Lata ia Koe ke Iloa Hagaao ke he Taulatua

KO E taulatua he vaha fou nei kua uka ke fakamaama. Ha ko lautolu ne putoia ke he mena nei kua kehekehe lahi. Kitia e lautolu nakai fai matapatu pule po ke taofiaga po ke tohi fakatapu ke fakalataha aki e tau talitonuaga. Kua kehekehe foki a lautolu ke he aga fakamotu, fakatokatokaaga, tataiaga, mo e tau manatu ko e atua fe ke fakalilifu. Ne talahau he taha tagata tohia: “Ko e lalolagi taulatua kua foaki ke he tau tagata takitaha e ‘makete ataina’ he tau manatu.” Ti talahau foki he taha: “Kua teitei e laulahi he tau Tagata Pouliuli Fou ke taufetoko ke he tau mena oti.”

Ke he tokologa ko e fekehekeheaki nakai ko e taha mena vihi a ia. Ne talahau he taha matapatu tohi ne fakaohooho e tau tagata taulatua: “Ka fehagai a koe mo e fakailoaaga ke tuga e uhukehe, kia kumikumi e fakailoaaga nei mo e taute e fifiliaga ko e mena fe ka mui ki ai. Fanogonogo ke he lotomatala hau. Ke he falu kupu, kia ata ke fifili mai he tau tohi mahuiga tuai mo e tau tohi fakaako tuai ke fifili ko e heigoa ne logona ke hako.”

Ma lautolu ne maama e foliga he kupu moli, kua kitia e fekehekeheaki pihia mo mena vihi. Kua hako e kupu moli, mo e kua moli lahi. Kua nakai moli e tau mena ha kua logona hifo po ke talitonu e tagata kua moli e tau mena ia. Ke fakatai ki ai, he taha vaha ne talitonu e tau toketa kua maeke ia lautolu ke fakamalolo e nimonia he iihi ua e moa mo e tuku e tau vala i luga he fatafata he tagata gagao. Nakai fakauaua, tokologa e tau tagata gagao ne talitonu moli to fakamalolo he puhala nei a lautolu. Ka ko e tau talitonuaga mo e tau amaamanakiaga ha lautolu, kua nakai fakalata atu ke he mena moli—ha ko e fakaholoaga ia kua nakai fakamaulu e nimonia. Nakai taute he tau tagata e kupu moli; kua kakapa atu a lautolu ki ai ke moua e maama.

Ne fakakite he Tohi Tapu kua ha ha i loto e kupu moli hagaao ke he tau mena fakaagaga. Ne talahau e Iesu Keriso, he mogo ne nofo he lalolagi ke he hana Matua he liogi: “Ko e hau a kupu ko e kupu moli haia.” (Ioane 17:17) Ne tohia he aposetolo ko Paulo: “Ko e tau Tohi Tapu oti kana mai he Agaga he Atua.” (2 Timoteo 3:16) Ka ko e tokologa ne putoia ke he taulatua kua nakai talia. Ti kua kumi a lautolu ke he fakaohoohoaga mo e takitakiaga ke he tau tala tuai, tau lotu tuai, pihia foki ke he fakasaiene taute noa. Ti nakai kia tonu, mogoia, ke manamanatu ke he mena ne talahau he Tohi Tapu? Ha kua teitei ni ke mailoga ke he lalolagi katoa ko e tohi fakatapu. Ko e taha foki he tau tohi lotu mai tuai tigahau ne hao mai. Kua molea e 1,600 e tau tau ne tohia ai e Tohi Tapu, ka kua tatai oti ni e tau fakaakoaga i loto. Kia fakatatai a e tautolu e tau fakaakoaga he Tohi Tapu ke he falu a talitonuaga fa mahani ne talahau fou e lautolu ne fakahakehake e taulatua.

Ko Hai Haia he Kautu Fakaagaga?

Ko e matapatu huhu he kumikumi atu ke maama fakaagaga ko e mena nei, Ko hai haia he kautu fakaagaga? Pete he tokologa e tau tagata taulatua he vaha fou nei ne mumuitua ke he foliga tua he fahi uta ne tapuaki atua loga, kua tapuaki falu ke he atua matua fifine ne mua, ne kua fakakite he matagahua he tama fifine, matua fifine, mo e fuakau fifine veveveve, ne fakakite e tau matapatu tutuaga he moui. Ko e tane hana ko e atua fai hoe. Falu tagata taulatua ne tapuaki tokoua ke he atua mo e atua fifine. Ne talahau he taha tagata tohia: “Ko e Atua Fifine mo e Atua kua mailoga ke eke mo fakakiteaga he tau malolo pauaki he aga fakafifine mo e fakatane. [Kua] igatia a laua mo e tau talaga kehekehe ti he magaaho ka lafi ai ne fua mai e tufugaaga haolo mitaki he moui.” Ne tohi he taha tagata tohia foki: “Ko e taha mena ne mua he tau fifiliaga he Taulatua ko e fifiliaga ni hau ke he tau tuaga atua (Atua/Atua Fifine) ka gahua mo koe. . . . Kua foaki he Taulatua ki a koe e ataina ke fifili ati fakalilifu ni e koe hau a talagaaga he Faka-Atua.”

Kua nakai lago he Tohi Tapu e tau manatu nei. Ne fakaaoga katoa e Iesu Keriso hana fekafekauaga ke fakaako falu hagaao ki a Iehova, “ko e Atua moli tokotaha ni.” (Ioane 17:3) Ne talahau he Tohi Tapu: “Kua homo a Iehova, ti lata ni ke fakaheke fakalahi kia ia; kua mua e matakutaku kia ia ke he tau atua oti. Ha ko e tau atua oti he tau motu ko e tau tupua ni haia.”—1 Nofoaga he Tau Patuiki 16:25, 26.

Ka e kua e Tiapolo? Ne fakamaama he Webster’s Ninth New Collegiate Dictionary e taulatua ko e “matutakiaga mo e tiapolo.” Ka kua uka ke moua e tagata taulatua he vaha nei ke talia e fakamaamaaga nei, ha kua tokologa ne nakai talia e moliaga ha Satani ko e Tiapolo. Taha e fifine fuata, ne fakamaama he The Irish Times ko e “tagata taulatua lahi mo e ko e takitaki he taha he tau toloaga ne mua i Ailani,” ne fakamaama mai pehenei: “Ke talitonu ke he Tiapolo ko e taliaaga a ia he faka-Kerisiano . . . [Ko e Tiapolo] kua nakai maeke ke haia he lalolagi ne nakai fai Atua.”

Kua fakamoli he Tohi Tapu e mouiaga he Tiapolo mo e tuku ki a ia e matematekelea lahi mo e kapaletu he lalolagi. (Fakakiteaga 12:12) Ka kua nakai fakaako hokoia e Iesu ko e moli e Tiapolo ka kua fakakite foki e ia kua maeke ke taute totamaki e finagalo he Tiapolo. Ke fakatai ki ai, ne talahau he tau takitaki lotu fia tututonu lahi he senetenari ke fakamua aki ko lautolu, kua tuga ko e tau tama he Atua mo e talitonu kua taute e lautolu e finagalo he Atua. Ko Iesu, ne maeke ke fioia e tau mena he tau loto ha lautolu, kua kehe e mena ne iloa. Ne tala age fakahako a ia ki a lautolu: “Ko mutolu, mai he matua ha mutolu ko e tiapolo ti kua fia eke e mutolu e tau mena kua manako ki ai e matua ha mutolu.” (Ioane 8:44) Mua atu, ne tala mai he tohi Tohi Tapu he Fakakiteaga kua “fakahehe [he Tiapolo] e lalolagi oti.”—Fakakiteaga 12:9.

Mitaki Kia Falu Mana?

Ko e mana, kua matutaki mau atu ke he taute lagatau taulatua.a Tokologa e tau tagata he vaha i tuai mo e vaha fou nei ne talitonu ko e mana ne taute he tau tagata taulatua kua taute ke fakahagahaga kelea aki e falu. Kua talitonu kua ha ha he tau tagata taulatua e malolo ke fakamamahi mo e tamate foki ha ko e kakano he mana. Ko e mahani toka tuai, ne fa tukupau e tau tagata taulatua ha ko e tau malaia loga, putoia ai e tau gagao, mate, mo e mateafu e tau akau.

Kua fakatikai lahi he tau tagata taulatua he vaha nei e tau fakafili pihia. Pete kua fakailoa mai kua fai tagata taulatua muikau ne aga kelea, kua talahau he laulahi kua fakaaoga e mana ha lautolu ke moua aki e aoga, nakai ke fakahagahaga kelea. Ne fakaako he tau Wicca ko e lauia he mana, ka liuaki ke lagatolu e monuina ke he tagata ne taute e mana mo e talahau ko e puipuiaga lahi anei ke he fakamalaia. Ko e tau fakataiaga nei he mana ne talahau ke mitaki kua putoia ki ai e tau kupu mana ke puipui aki a koe ni, ke fakamea aki hau a kaina mai he tau malolo kelea ne tiaki hifo he tau tagata fakamua he fale, ke taute e tagata ke to e manako ki a koe, ke fakamalolo e fakamauluaga mo e malolo tino, ke puipui neke galo e gahua hau, ke moua e tau tupe. Ko e tau malolo tupu lahi pihia ha ko e taulatua, kua kitia maali e kakano ne kua mahuiga lahi ai.

Ka kua nakai fakakite he Tohi Tapu e kehe he vahaloto he mana ne mitaki mo e mana ne kelea. He Fakatufono ne age ki a Mose, ne talahau maali he Atua hana tuaga. Ne talahau e ia: “Ua eke e mutolu e tau lagatau taulātua.” (Levitika 19:26) Kua totou foki e tautolu: “Aua neke kitia ia koe . . . taha kua talahau mena he kitekite ke he tau aolagi, po ke taha kua kumi ke he tau fakamailoga, po ke taha taulatua, po ke tagata fakavai gata, po ke taha kua kumi ke he tau atua.”—Teutaronome 18:10, 11.

Ko e ha ne talahau he Atua e mena ia? Nakai ha kua manako a ia ke fakatikai a tautolu ke he mena aoga. Ne foaki e Iehova e tau fakatufono nei ke he tau tagata hana ha kua ofania e ia a lautolu mo e nakai manako ke fakatupa a lautolu ke he matakutaku mo e matakutaku aitu. Ka kua uiina e ia hana tau fekafekau ke o atu ki a ia ma e tau mena ne manako a lautolu ki ai. Ko ia ko e Foaki he “tau mitaki oti . . . katoa mo e tau mena fakaalofa oti kua katoatoa ai e mitaki.” (Iakopo 1:17) Ne fakamafana he aposetolo ko Ioane e tau katofia talitonu: “Ko e tau mena oti foki ke ole atu ai a tautolu, kua moua mai e tautolu [he Atua], ha kua omaoma a tautolu ke he tau poaki hana, mo e eke e tautolu e tau mena kua fiafia ki ai a ia.”—1 Ioane 3:22.

Ka e Kua e Tau Agaga Kelea?

Tokologa e tau tagata taulatua ne talia mo e Tohi Tapu ke he mena nei: Ha ha ai e tau agaga kelea. He taha tohi ne hataki mai e tagata fakahakehake taulatua: “Ha ha i fafo e tau Tupua: Kua momoui a lautolu, he lalolagi nakai kitia mata ne tuga mo e ha tautolu, ne puke he tau mena momoui. . . . Ko e tau kupu ‘Temoni Tote,’ ‘Agaga Kelea’ mo e ‘Temoni’ kua hako lahi. Kua malolo lahi a lautolu. . . . Ko lautolu ne iloilo lahi . . . kua maeke (kaeke lagomatai he taha tagata ke hafagi e gutuhala ki a lautolu) ke huhu mai ke he lalolagi ha tautolu. . . . Maeke ia lautolu ke huhu ki loto ia koe . . . , mo e fai pule foki ki a koe. E, kua tuga moli e tau tala hu Temoni tuai anei.”

He vaha Tohi Tapu, kua fakamatulituli he hu temoni e tau tagata ke he tau puhala kehekehe. Falu ia lautolu ne hufia ne nakai maeke ke vagahau, falu ne matapouli, falu ne vikoia, mo e falu ne mahomo atu e malolo. (Mataio 9:32; 12:22; 17:15, 18; Mareko 5:2-5; Luka 8:29; 9:42; 11:14; Gahua 19:16) He falu magaaho kua lafi e mamahi he magaaho ka tokologa e tau temoni ne huhu he tagata he taha ni e mogo. (Luka 8:2, 30) Moli ni, mogoia, kua mitaki e kakano ne hataki e Iehova e tau tagata ke fakamamao mai he taute taulatua mo e falu lagatau he taulatua.

Ko e Lotu Fakave ke he Kupu Moli

Kua tokologa ne futia ke he taulatua he vaha nei ha kua tuga e lotu foliga nakai fakamatematekelea mo e totonu. Kua talia ai he falu maaga. Kua nakai matakutaku ki ai. Ka kua mahani ni ke eke mo mena tote. He takatakaiaga ne takitaki he tokanoa he tau lotu e tokologa ke talia e taulatua ne kehe, kua moua ai e fakalilifu lahi.

Moli, ko e lalolagi he tau lotu kua eke mo makete ne fakaata e tau tagata ke fifili e lotu ne lata tonu mo lautolu, tuga ni e fakatau he tau tevae. Kehe mai, ua ni e fifiliaga ne vagahau a Iesu ki ai. Ne pehe a ia: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Ka kua tokanoa pauaki a tautolu ke fifili e puhala ka uta. Ka kua hagahaga kelea e moui tukulagi ha tautolu ati aoga lahi ai e fifiliaga ia. Ti ke moua e maama fakaagaga, kua lata ia tautolu ke tutuli e puhala he kupu moli—ko e puhala ne kua moua ni he Kupu he Atua, ko e Tohi Tapu.

[Matahui Tala]

[Fakatino he lau 5]

Tokologa he vaha nei ne kitia e taulatua mo lotu foliga nakai fakamatematekelea

[Fakatino he lau 6]

Kua fa matutaki tumau e mana mo e taute lagatau taulatua

[Fakatino he lau 6]

Kua taute kia he tau tagata ne putoia ke he taulatua e finagalo he Tiapolo ka e nakai iloa?

[Tau Fakatino he lau 7]

Kua fakakite he Tohi Tapu e puhala he kupu moli