Ubye tayari oko kiro kya Yehova

1. Litolere itwakolaki tutoke erisyasabuka oko kiro kya Yehova?

OMUGHULU eBiblia ikakanaya oko “Ekiro kya [Yehova],” ikamaanisaya endambi kutse omughulu ogho Yehova akendisyatoghotya esyonzighu siwe n’erisabula abandu biwe. Kera Yehova mwaswirya ebihanda bilebe. (Isa. 13:1, 6; Ezek. 13:5; Zef. 1:8) Oko mughulu wetu, “Ekiro kya [Yehova]” kikendisyatsuka omughulu abakulu b’ebihugho bakendisyatsandya Babeli mukulu, kandi kikendisyahwerera oko vita ye Harmagedoni. Twamanza erisyasabuka “Ekiro” ekyo litolere itwatsuka eriyiteghekania lino. Yesu abere akania oko “bulige bunene” mwabugha ati “mubye imunasikire.” Ekyo ni bugha ambu ni mwatsi w’erikola ebiro byosi.​—Mat. 24:21; Luka 12:40.

2. Busanaki ekitabu kye 1 Abanya Tesalonika kyanganatulera endundi?

² Omo baruha yiwe y’erimbere oko Abanya Tesalonika, omukwenda Paulo mwakolesya emifano mingyi eriwatikya Abakristo eribya ibane tayari oko kiro kikulu kya Yehova eky’eritswera. Paulo abya asi ndeke ngoko ekiro kya Yehova sikyendiasa oko ndambi eyo abughirako. (2 Tes. 2:1-3) Nomo bine bitya, mwahana abaghala babo ati babye ibanayiteghekire oko kiro ekyo nga kikendiasa omungya, netu erighano eryo litulebirye. Tulangire ebyo Paulo abugha oko mwatsi eno: (1) ekiro kya Yehova kyasyasa kiti, (2) ni bahi bo bakendisyasabuka oko kiro ekyo, na (3) twangayiteghekania tuti oko kiro ekyo.

EKIRO KYA YEHOVA KYASYASA KITI?

3. Ekiro kya Yehova kyasyasa kiti ng’omwibi oyukasa omo kiro?

³ “Ngʼomurahi oyukasa omo kiro.” (1 Tes. 5:2) Oyu w’omufano w’erimbere ow’oko mifano isatu eyo akolesaya akakania oko eryasa ly’ekiro kya Yehova. Kangyi-kangyi abibi bakasa omo kiro, omughulu abandu sibayilindirire kubo. N’ekiro kya Yehova nakyo ko kikendisyasa kitya, kikendisyatsumbukania abandu bangyi. Nibya n’Abakristo b’ekwenene banganasyasweka bakalangira emyatsi yikaenda luba-luba. Aliwe sitwendisyatoghotibwa kundi itwe situli babi.

4. Ekiro ky’oMungu kisosire kiti n’obulumi b’obukule?

⁴ “Ngʼerikunda erikahika oko mukali.” (1 Tes. 5:3) Omukule syangaminyerera endambi eyo obukule bwiwe bukenditsuka eriluma. Aliwe akabya inyanasi ngoko bukendisyaluma. Kandi omughulu bukendisyaluma, alinga bukedisyaluma kutsibu, kitsumbukirania, kandi syangakakiryabo. Ko bine bitya n’oko kiro kya Yehova sitwasi nga kikendisyasa mughulu wahi, kandi oko endambi yahi, aliwe kikendisyasa. N’eritswera ry’oMungu oko babi, lyasyasa kitsumbukirania, kandi sibangabalaryo.

5. Obulighe bunene bukasosekanibawa buti n’eritsuka ry’ekiro kihya?

⁵ Ng’eritsuka ry’ekiro kihya. Omufano w’akasatu wa Paulo nagho akakanaya oko barahi abakiba omo kiro. Aliwe rero hano amasosekania ekiro kya Yehova n’eritsuka ly’ekiro kihya-kihya. (1 Tes. 5:4) Abarahi abakiba omo kiro banganabirirwa ngoko endambi inemuenda. Ekyakakala eky’ekiro kihya-kihya kyanganabasisirya neryo ibalangirika. Kyanganasyabya kitya n’oko mughulu w’obulighe bunene, ng’omwibi bukendisyatsumbukania abakasighala omo mwirimya bakakola ebyo Mungu aponire. Aliwe itwe tukayiteghekanaya oko kiro ekyo omwitendikola ebyo Yehova aponire n’erikwamirira “emisindo yosi yʼebibuya, nʼebitunganene, nʼebyʼekwenene.” (Efe. 5:8-12) Enyuma w’aho Paulo mwakolesya iyindi mifano ibiri erikania oko bandu abatendisyasabuka.

NI BAHI BO SIBENDISYASABUKA OKO KIRO KYA YEHOVA?

6. Abandu bangyi baghotsere omo nzira yahi? (1 Abanya Tesalonika 5:6, 7)

⁶ “Abakayato.” (Soma 1 Abanya Tesalonika 5:6, 7.) Paulo mwasosekania abatendisyasabuka oko kiro kya Yehova n’abandu abalito. Sibaliminya ebikalaba kandi ngoko endambi nayo inemulaba. Sibaliminya omughulu omwatsi mulebe w’omughaso akendikoleka kandi nga bakendiyiwata bati kugho. Abandu banene munabwire, baghotsere omo nzira y’obunya-kirimu. (Rom. 11:8) Sibalilangira ebyosi ebikakanganaya ngoko tuli oko “ebiro by’enyuma-nyuma” kandi ngoko ekiro ky’obulighe bunene kiri hakuhi n’erihika. Omughulu emyatsi minene-minene ikalaba omo kihugho, abandu balebe bakanaligha hake engulu y’Obwami. Aliwe abanene bakasuba omo bughotseri, omo mwanya w’erisighala ibanalolire. N’abandu abikirirye ngoko hane ekiro oMungu akendisyasoha abandu, bakalengekanaya bati sikyendisyabwa lino. (2 Pet. 3:3, 4) Aliwe twikirirye ngoko ebiro bikalaba erihano erikatusaba eribya itunalolire, rikalola embere eribya ry’omughaso.

7. Abakendisyatoghotibwa n’oMungu bali bati ng’abakundirya?

⁷ “Abakakunda.” Omukwenda Paulo mwasosekania abandu abo oMungu akendisyatoghotya n’abandu abakundire. Kangyi-kangyi omundu oyutamire syaliminya ebikalaba, kandi nibya syaliyisogha ndeke. Na munabwire abandu babi sibalitsomana amahano w’oMungu. Bakasombola enzira eyikabalolaya okwiyatoghotibwa. Aliwe Abakristo basabirwe eribya bakalengekania ndeke. (1 Tes. 5:6) Omundu mughuma oyuwasi ndeke emyatsi y’eBiblia ati omundu oyukalengekanaya ndeke y’omundu oyukasighala “inyanatulere kandi syalihanga-hangaya; neryo ebyo bikaleka inabya akayisogha ndeke.” Busanaki litolere itwasighala itunatulere n’eritendihangya-hangya? Ekyo kikatuwatikaya eritendiyingirya omo mwatsi ye politike n’eyindi myatsi y’ekihugho kibi kino. Ekiro kya Yehova kikahika hakuhi, kyasyatukalako kutsibu eritendiyingirya omo myatsi eyo. Aliwe situtolere erikwa obuba tuti alinga tukendisyatoghera omo kitegho ekyo. Ekirimu ky’oMungu kyanganatuwatikya erisighala itunatulere n’eritendihangya-hangya omo bwenge tutoke eriyisogha ndeke.​—Luka 12:11, 12.

TWANGANAYITEGHEKANIA TUTI OKO KIRO KYA YEHOVA?

8. 1 Abanya Tesalonika 5:8 ikakanganaya yiti emibere ey’angatuwatikya erisighala itunalolire n’eribya tukalengekania ndeke? (Ulebaye n’epitsa.)

⁸ “Twambale . . . obupa bwʼekikuba . . . n’akakira.” Paulo akatusosekanaya n’abasuda abali omo malwa abambite ebimano. (Soma 1 Abanya Tesalonika 5:8.) Omusuda atolere eribya inianayiteghekenie oko malwa obuli ndambi. Ko kine kitya n’okw’itwe. Tukabya itunayiteghekenie oko kiro kya Yehova omwimbala erikirirya n’olwanzo n’obupa bw’ekikuba. Emyatsi isatu eyo yanganatuwatikya kutsibu.

9. Obwikirirya bwetu bukatuteghaya buti?

⁹ Obupa bw’ekikuba bukateghaya omutima w’omusuda. Erikirirya n’olwanzo bikateghaya omutima wetu w’ekisosekanio. Bikatuwatikaya erilola embere erikolera oMungu n’erikwama Yesu. Busana n’obwikirirya, tulighire ngoko Yehova akendisyatuhemba kundi tukamukolera n’omutima wetu wosi. (Ebr. 11:6) Obwikirirya bukatuwatikaya erisighala bataleghula oko musondoli wetu Yesu, nibya n’omughulu kikatusaba eriyiyinia omo maligho. Imwitwatoka eriyiyinia omo maligho litolere itwawatya obwikirirya bwetu omwigha eby’erileberyako ebya munabwire eby’abandu abakasighala bataleghula nomo banemwendereribwa kutse nomo banemubula esyofranga. Twamabigha abandu abakahira emyatsi y’Obwami y’embere omo ngebe yabo, ekyo kyanganatuwatikya eriyihighula oko kitegho eky’eryanza esyofranga n’ebindu bingyi by’ekinya-mubiri.b

10. Olwanzo lwetu oko Mungu n’oko bandu lukatuwatikaya luti eriyiyinia?

¹⁰ Olwanzo lukaleka itwasihala itunalolire n’eriteya. (Mat. 22:37-39) Olwanzo l’oMungu lukatuwatikaya erilola embere eritulira nomo ekyo kyanganatuletera ebitsibu bingyi. (2 Tim. 1:7, 8) Kundi twanzire n’abandu abatekolera Yehova ekyo nakyo kikatukuna erilola embere eritulira omo kiharo kyetu kyosi, nibya nomo kyangatusaba eritulira oko telefone kutse erilabira ebaruha. Situlibunika mutima kundi twikirirye ngoko kiro kighuma abandu abo tukayatulira banganabindula emitima yabo n’eritsuka erikola ebyuwene.​—Ezek. 18:27, 28.

11. Olwanzo lwetu oko baghala n’abali betu lukatuwatikaya luti? (1 Abanya Tesalonika 5:11)

¹¹ Kandi twanzire Abakristo bali kyetu. Tukakanganya olwanzo oluli ng’olo ‘omwisibikania nʼerihimbana.’ (Soma 1 Abanya Tesalonika 5:11.) Netu tukasikanaya ng’abasuda abakakola omo bughuma omo malwa. Kwenene omusuda anganahutalya butsira eriminya oghundi musuda mulikyabo omo malwa, aliwe syaliyiririra. Netu kutya sitwangahutalya abaghala n’abali betu omwiyiririra kutse omwituhulya ekibi oko kibi. (1 Tes. 5:13, 15) Kandi tukakanganaya olwanzo lwetu omwisikya abaghala betu abakasondola endeko. (1 Tes. 5:12) Omughulu Paulo ahandikira endeko ye Tesalonika ebaruha eyi, endeko eyo yabya isiriyabugha n’omwaka mughuma. Alinga ababya bakasondolayo babya isibasi erikola emyatsi yo ndeke neryo mubakola amakosa mangyi. Obulighe bunene bukasonda erihika, alinga tukendisyalagha kutsibu oko busondoli bwa basyakulu kwilaba munabwire. Kyanganasyatalukana eribana obusondoli erilua oko bwikalo bukulu kutse oko syobeteli. Nomo hakendisyabyaki, tukendisyalola embere eriteya. Sitwendisyalebya amakosa w’abasyakulu b’endeko. Kwesi tuyikase eryanzabo lino n’erisikyabo. Omo mwanya w’erisyalangira amakosa wabo, tukendisyayikasa erilangira ngoko Yehova anemusondola abalume bataleghula abo erilabira Yesu.

12. Amaha wetu akateghaya ati amalengekania wetu?

¹² Ngoko akakira kutse ekikeke ky’omusuda kikateghaya omutwe wiwe, netu amaha wetu aw’omulamo akateghaya obwenge bwetu n’erituwatikya erilengekania ndeke. Twamabya n’amaha awawatire tukalangira ebindu by’ekihugho nga sibiwite mughaso. (Flp. 3:8) Amaha wetu akatuwatikaya erisighala itunatulere n’eritendihangya-hangya. Wallace na Laurinda, abakakolera omo Afrika mubayilangirira ekyo. Omughuma mwaherya baba wiwe omo luholo, habere habilaba amayenga isatu n’oghundi naye mwaherya mama wiwe omo luholo. Busana n’ekihunzo kye KORONA, mubataluka erisuba ewabo eriyata ababuti babo. Wallace mwahandika ati: “Amaha aw’erisyalubuka akaniwatikaya erilengekania kubo, sinirilengekanaya ngoko babya omo biro byabo by’enduli omo kihugho kibi kino, aliwe ngalengekanaya ngoko bakendisyabya, babilubuka omo kihugho kihya-kihya. Amaha ayo akaleka inatulera omughulu nabirikwa obulighe bunene.”

13. Twangakolaki eribana ekirimu kibuyirire?

¹³ “Simuhumberaye [ekirimi kye] Kirimu.” (1 Tes. 5:19, NTN62) Paulo mwasosekania ekirimu kibuyirire n’omuliro owakaka omw’itwe. Ekirimu kibuyirire eky’oMungu kikatukuna erikola n’omuhwa eritunganene n’erituha akaghala ek’erikolera Yehova n’omuhwa. (Rom. 12:11) Twangakolaki eribana ekirimu kibuyirire? Twanganasaba akyo oko Yehova, erigha Ekinywa kiwe ekyasondolawa nakyo, n’erikola kughuma n’endondeka yiwe eyikasondolawa nakyo. Twamabikola tutya itukendikulya “emikolere eyikalua oko kirimu.”​—Gal. 5:22, 23.

14. Ni byahi byo byangaleka itutabana ekirimu kibuyirire? (Ulebaye n’epitsa.)

¹⁴ OMungu amabituha ekirimu kiwe kibuyirire kumbe itwayiteya “eritendihumberya [ekirimi kye] Kirimu” ekyo. OMungu akaha ekirimu kiwe oko bandu abali n’amalengekania awuwene kandi abakayighendaya ndeke basa. Twamabya tukabya n’amalengekania awatuwene kutse erikola emyatsi eyituwene, Yehova syangatuha ekirimu kiwe kibuyirire. (1 Tes. 4:7, 8) Twamanza eribana ekirimu kibuyirire, litolere itwakwama erihano rino: “Simupone eritulago erikalua [oko Mungu].” (1 Tes. 5:20) Omo mulondo ono “eritulago erikalua [oko Mungu]” y’emilaghe kutse emyatsi eyo Yehova akatuha erilabira ekirimu kiwe kibuyirire. Amaminyereri ayo ahiriremo awakakanaya oko kiro kya Yehova n’awakakanganaya ngoko tuli omo biro by’enduli. Isitwalengekanaya tuti alinga ekiro kya Yehova kutse e Harmagedoni ikendisyahika isitukiriho. Omo mwanya w’erilengekania tutya, tuhire ekiro ekyo hakuhi omo bwenge bwetu. Obuli kiro, twamabya n’ebingyi by’erikola omo “migendere yibuyirire” ekyo kikakanganaya ngoko tunasi ngoko ekiro kya Yehova kikasa lino-lino.​—2 Pet. 3:11, 12.

“MULENGE EMYATSI YOSI”

15. Twangakola tuti eriyiteya oko mabehi we Sitani? (1 Abanya Tesalonika 5:21)

¹⁵ Omo biro bikasa lino-lino, esyonzighu sy’oMungu sikendisyabugha omo nzira nyilebe siti hamabya: “Obuholo nʼeriyisyandira!” (1 Tes. 5:3) Amabehi wa Sitani akendisyusula omo kihugho n’eriteba abandu bangyi. (Erib. 16:13, 14) Netu byasyabya biti okw’itwe? Sitwendisyatebibwa twamabisyakolesya erihano rya Paulo erikabugha liti “mulenge emyatsi yosi.” (Soma 1 Abanya Tesalonika 5:21.) Ekinywa kye Kigiriki ekyakolesibawa hano ekikabindulawa kiti “mulenge” ikikakolesibawa oko bandu abakalenga oko mabwe w’obughuli nge horo n’ebindi byuma by’obughuli batoke eriminya nga binuwene. Kwesi, litolere itwalenga oko ebyo tukahulikirira kutse ebyo tukasoma tutoke eriminya nga nina by’ekwenene. Ekyo kyabya ky’omughaso munene oko Banya Tesalonika, netu kikendisyabya ky’omughaso munene kutsibu okw’itwe tukasonda erihika oko mughulu w’obulighe bunene. Omo mwanya w’eriligha obuli mwatsi ogho abandi bakabugha, tukakolesaya obutoki bwetu bw’erilengekania tutoke eriminya ebyo tukahulikirira n’ebyo tukasoma nga binahambene n’ebyo eBiblia n’endondeka ya Yehova bikabugha. Twamakola tutya isitwendisyatebibwa n’amabehi wa Sitani.​—Emi. 14:15; 1 Tim. 4:1.

16. Tuwite amaha wahi aw’ekwenene, kandi tuyisoghire erikolaki?

¹⁶ Tunasi ngoko abandu ba Yehova bakendisyasabuka omughulu w’obulighe bunene. Aliwe sitwasi ekikendisyahikira obuli mughuma w’okw’itwe. (Yak. 4:14) Nomo twangahola embere sy’obulighe bunene, kutse itwasabuka oko bulighe bunene tukendisyahembwa engebe y’erikota twamabisighala bataleghula. Abahirirweko amaghuta basyabya na Kristo omo lubula. N’esindi mbuli syasyabya omo paradiso oko kihugho. Kwesi itwe bosi tuhire amalekania wetu oko maha wetu itunayiteghekenie oko kiro kya Yehova!