Ragela Phambili Unqotjhiswa NguJehova

1. Fanekisa ukuthi kubayini kufuze silalele uJehova njengoMqophisethu.

AKHUZICABANGE ulahlekile ehlathini. Ubhodwe ziingozi ngapha nangapha, iimbandana, ukugula okukhamba ngeengongwana, iintjalo ezinetjhefu nemibundu enamatje. Kungakuthabisa kwamambala ukufumana umuntu onelwazi ngendawo leyo, ukuthi akunqophise lapha ekufuze ukhambe khona bona ubalekele ingozi! Iphaseli linjengehlathi. Lizele ngobungozi, khulukhulu obuthinta ubuhlobo bethu noJehova. Umuntu ophuma phambili, ongasinqophisa, nguJehova. Usikhipha engozini asitjhingise lapha sifuna ukuya khona, ekuphileni okungapheliko, ephasini elitjha.

2. UJehova usinqophisa njani?

² UJehova usinqophisa njani? Indlela eyihloko asinqophisa ngayo, liliZwi lakhe elitloliweko iBhayibheli. Nanyana kunjalo, ubuye asebenzise abantu abamjamelako. Ngokwesibonelo, usebenzisa “inceku ethembekileko nehlakaniphileko” ukusinikela ilwazi esilitlhogako elizosisiza senze iinqunto ezihlakaniphileko. (Mat. 24:45) UJehova ubuye asebenzise amadoda anekghono bona asinqophise. Ngokwesibonelo, usebenzisa ababonisi besigodi nabadala bamabandla bona asinikele isikhuthaza neenqophiso ezizosisiza eenkhathini ezibudisezi. Simthokoza kwamambala uJehova ngokusinqophisa kuhle kangaka eenkhathini ezibudisezi, ngaphambi kobana kufike isiphelo! Zisisiza sihlale sinetjhebiswano elihle noJehova begodu sihlale endleleni yokuphila.

3. Sizokucoca ngani esihlokwenesi?

³ Nanyana kunjalo, ngezinye iinkhathi singakufumana kubudisi ukulandela isinqophiso sakaJehova, khulukhulu nasisifumana ebantwini abanesono. Kubayini? Isiyeleliso singaba ngesiphikisana nezinto esizithandako nesingazithandiko. Namkha kungaba kukuthi, isinqophiso esisifumanako sisibona kwanga asikahlakaniphi namkha sibone ngasuthi asiveli kuJehova. Kusebujamweni obunjalo lapho sikutlhoga khulu khona ukuthemba ukuthi uJehova nguye onqophisa abantu bakhe nokuthi ukulandela iinqophiso zakhe kuzokuletha iimbusiso. Ukusisiza sikghone ukuthembela khulu kuJehova, isihlokwesi sizokuveza (1) indlela uJehova ebekanqophisa abantu bakhe ngayo eenkhathini zeBhayibheli (2) indlela uJehova asinqophisa ngayo namhlanjesi begodu (3) indlela esizuza ngayo nasiragela phambili silandela isinqophiso sakaJehova.

INDLELA UJEHOVA EBEKANQOPHISA NGAYO ISITJHABA SAKWA-ISRAYELI

4-5. UJehova watjengisa njani ukuthi usebenzisa uMosi ukunqophisa ama-Israyeli? (Qala isithombe esingaphandle.)

⁴ UJehova wakhetha uMosi bona anqophise ama-Israyeli awakhiphe eGibhide. Wanikela ama-Israyeli ubufakazi obubonakalako ukuthi bekawanqophisa ngoMosi. Ngokwesibonelo, emini uJehova bekakhamba phambi kwawo ngesika yelifu kuthi ebusuku ngesika yomlilo. (Eks. 13:21) UMosi walandela isika eyanqophisa yena nama-Israyeli eLwandle eliboMvu. Abantu bangenwa mamanzi ngemadolweni nababona ukuthi bavinjezelwe hlangana nelwandle nebutho lamaGibhide. Baphetha ngokuthi uMosi wenza umtjhapho ngokubaletha eLwandle eliboMvu. Kodwana bekungasimtjhapho. UJehova wasebenzisa uMosi ukuthi anqophise abantu bakhe lapho. (Eks. 14:2) UZimu wabasindisa.—Eks. 14:26-28.

⁵ Iminyaka ema-40 yoke, uMosi walandela isika yelifu bona anqophise abantu bakaZimu emmangweni.a Kwaba nesikhathi lapho uJehova abeka khona isika yelifu phezu kwetende lakaMosi, lapho woke ama-Israyeli ebekakghona ukuyibona. (Eks. 33:7, 9, 10) UJehova wakhuluma noMosi ngesika yelifu begodu uMosi watjela abantu lokho uJehova amtjela khona. (Rhu. 99:7) Ama-Israyeli abona kuhle ukuthi uJehova bekasebenzisa uMosi ukuwanqophisa.

6. Ama-Israyeli asabela njani esinqophisweni sakaJehova? (Numeri 14:2, 10, 11)

⁶ Okudanisako kukuthi, ama-Israyeli amanengi akhenge amukele ubufakazi obubonakalako ukuthi uJehova usebenzisa uMosi njengomjamelakhe. (Funda uNumeri 14:2, 10, 11.) Bewangafuni ukwamukela ukuthi uJehova bekasebenzisa uMosi ukuwanqophisa. Ngebanga lalokho, uJehova akhenge awavumele ukuthi angene eNarheni yesiThembiso.—Num. 14:30.

7. Veza iimbonelo zalabo abalandela iinqophiso zakaJehova. (Numeri 14:24) (Qala nesithombe.)

⁷ Nanyana kunjalo, amanye ama-Israyeli alandela isinqophiso sakaJehova. Ngokwesibonelo, uJehova wathi: “uKalebi . . . bekasolo angilandela ngehliziyo epheleleko.” (Funda uNumeri 14:24.) UZimu wabusisa uKalebi, wabe wamvumela ukuthi akhethe lapha afuna ukuhlala khona enarheni yesithembiso. (Jotj. 14:12-14) Isizukulwana esalandelako sakwa-Israyeli naso sabeka isibonelo esihle sokulandela iinqophiso zakaJehova. Lokha uMosi nakabeka uJotjhuwa bona adose phambili, ama-Israyeli “amhlonipha khulu yoke imihla yokuphila kwakhe.” (Jotj. 4:14) Ngebanga lalokho, uJehova wawabusisa ngokuwaletha enarheni yesithembiso.—Jotj. 21:43, 44.

8. Hlathulula indlela uJehova anqophisa ngayo abantu bakhe hlangana neenkhathi zamakhosi. (Qala nesithombe.)

⁸ Ngemva kweminyaka, uJehova wabeka abahluleli ukuthi banqophise abantu bakhe. Ngemva kwalokho, ngesikhathi samakhosi uJehova wabeka abaphorofidi ukuthi banqophise abantu bakhe. Amakhosi athembekileko alandela iinqophiso zabaphorofidi. Ngokwesibonelo, ngokuthobeka iKosi uDavida yamukela ukulungiswa okuvela kumphorofidi uNathani. (2 Sam. 12:7, 13; 1 Kron. 17:3, 4) IKosi uJehotjhafathi yathembela esinqophisweni somphorofidi uJarhaziyeli yabe yakhuthaza nabantu bakwaJuda ukuthi ‘bakholwe ebaphorofidini’ bakaZimu. (2 Kron. 20:14, 15, 20) Lokha iKosi uHezekiya nayigandelelekileko, yabawa umphorofidi u-Isaya bona ayisize. (Isa. 37:1-6) Qobe lokha amakhosi nakalandela isinqophiso sakaJehova, bekabusiswa begodu nesitjhaba besivikeleka. (2 Kron. 20:29, 30; 32:22) Bekufuze kukhanye kibo boke abantu ukuthi uJehova bekasebenzisa abaphorofidi bakhe ukunqophisa abantu bakhe. Amakhosi amanengi kuhlanganise nabantu, akhenge balalele abaphorofidi bakaJehova.—Jor. 35:12-15.

INDLELA UJEHOVA EBEKANQOPHISA NGAYO AMAKRESTU WOKUTHOMA

9. UJehova wasebenzisa abobani ukuthi banqophise amaKrestu wekhulu lokuthoma? (Qala nesithombe.)

⁹ NgePentekoste laka-33 C.E, uJehova wajamisa ibandla lobuKrestu. Wawanqophisa njani amaKrestu wokuthoma la? Wabeka uJesu njengehloko yebandla. (Efe. 5:23) Kodwana uJesu akhenge akhulume nomlandeli ngamunye ukuthi kufuze enzeni. Wasebenzisa abapostoli namadoda amadala eJerusalema ukuthi adose phambili. (IzE. 15:1, 2) Kwabekwa nabadala bona banqophise ibandla.—1 Thes. 5:12; Tit. 1:5.

10. (a) AmaKrestu wekhulu lokuthoma asabela njani esinqophisweni asifumanako? (IzEnzo 15:30, 31) (b) Kubayini abanye ngeenkhathi zeBhayibheli babhalelwa kuhlonipha abajameli bakaJehova? (Funda ibhoksi elithi, “Kubayini Abanye Bangakhenge Bamukele Ubufakazi Obukhanyako?”)

¹⁰ AmaKrestu wekhulu lokuthoma asabela njani? Amanengi akuthabela ukulandela iinqophiso azifumanako. Kuhlekuhle amanengi ‘athatjiswa sikhuthazo’ asifumanako. (Funda izEnzo 15:30, 31.) Emalangeni la, uJehova ubanqophisa njani abantu abakhe?

INDLELA UJEHOVA ASINQOPHISA NGAYO NAMHLANJESI

11. Nikela isibonelo sendlela uJehova anqophisa ngayo labo abadosa phambili eenkhathini esiphila kizo.

¹¹ UJehova uragela phambili anqophisa abantu bakhe namhlanjesi. Bekasolo akwenza lokho ngeliZwi lakhe nangeNdodanakhe, uJesu ihloko yebandla. Kghani siyabubona ubufakazi bokuthi uZimu uragela phambili asebenzisa abantu ukuthi babe bajameli bakhe? Iye. Ngokwesibonelo, cabanga ngetuthuko ebekhona kusukela ngeminyaka yekupheleni kwama-1800. U-Charles Taze Russell nabangani bakhe bathoma ukuzwisisa ukuthi umnyaka ka-1914 uzokuba mnyaka oqakatheke khulu emBusweni kaZimu. (Dan. 4:25, 26) Iimphorofido zeBhayibheli zabasiza bazwisisa isiphorofidwesi. Inga-kghani uJehova wabanqophisa ngerhubhululo leBhayibheli? Iye kunjalo. Ngo-1914 izinto ebezenzeka ephasini zatjengisa ukuthi ukubusa komBuso kaZimu kuthomile. Kwaba nePi yePhasi I, kwalandela ukugula, ukusikinyeka kwephasi nokutlhayela kokudla. (Luk. 21:10, 11) Kwamambala uJehova bekasebenzisa amadoda athembekileko la amaKrestu ukuthi asize abantu bakhe.

12-13. Ngimaphi amalungiselelo enziwako hlangana nePi yePhasi II?

¹² Cabanga godu ngalokho okwenzeka hlangana nePi yePhasi II. Abafowethu abadosa phambi bendlukulu bafunda isAmbulo 17:8, kilokho abakufundako bazwisisa ukuthi iPi yePhasi II beyingatjho ukuthi kuza i-Arimagedoni kodwana bebazi ukuthi kuzokuba nokuthula ngemva kwepi begodu aboFakazi bakaJehova bazokuragela phambili batjhumayeza abantu abanengi. Ngesikhatheso, kungenzeka kwabonakala kunganahloko bona i-Watchtower Bible College (School) ye-Gilead yahlela bona kubandulwe abatjhumayeli bevangeli ukuthi bayokutjhumayela bebafundise eenarheni zoke ephasini. Abatjhumayeli bevangelaba bafumana izabelo hlangana nepi. Ukungezelela kilokho, inceku ethembekileko yahlela bona kube nesikolob ukubandula woke amabandla bona abe batjhumayeli nabafundisi abangcono. Ngendlela le, abantu bakaZimu bebalungiselelwa ukutjhumayela ebekufuze bakwenze.

¹³ Nasiqala emva, kuyakhanya ukuthi uJehova bekasolo anqophisa abantu bakhe hlangana neenkhathi ezibudisi. Kusukela ngePi yePhasi II, eenkhathini ezinengi abantu bakaJehova bebathabela ukuthula netjhaphuluko yokutjhumayela iindaba ezimnandi. Eqinisweni, umsebenzi lo, bewukhamba kuhle khulu.

14. Kubayini kufuze sithembe isinqophiso esivela ehlanganweni kaJehova nakubadala? (IsAmbulo 2:1) (Qala nesithombe.)

¹⁴ Namhlanjesi, amalunga wesiHlopha esiBusako aragela phambili athembela esinqophisweni sakaKrestu. Afuna iinqophiso azinikela abafowethu zitjengise umbono kaJehova. Asebenzisa ababonisi besigodi nabadala ukuthi banikele iinqophiso ebandleni.c Abadala abazesiweko ‘basisandla [sakaKrestu] sokudla.’ (Funda isAmbulo 2:1.) Kuliqiniso ukuthi abadala banesono begodu bayayenza imitjhapho. UMosi noJotjhuwa bebayenza imitjhapho ngezinye iinkhathi, kuhlanganise nabapostoli. (Num. 20:12; Jotj. 9:14, 15; Rom. 3:23) Nanyana kunjalo, uKrestu usanqophisa inceku ethembekileko nabadala begodu uzokuragela phambili enza njalo “bekube sekupheleni kwephasi.” (Mat. 28:20) Yeke sinamabanga amanengi wokulandela isinqophiso asinikelako ngamadoda awabekileko bona adose phambili abantu bakhe.

SIYAZUZA NASILANDELA IINQOPHISO ZAKAJEHOVA

15-16. Khuyini oyifundileko kilabo abalandele isinqophiso sakaJehova?

¹⁵ Nasilandela iinqophiso zakaJehova siyazuza. Ngokwesibonelo, u-Andy no-Robyn balalela isikhuthazo sokuthi kufuze benze ukuphila kwabo kube lula. (Mat. 6:22) Umphumela waba kukuthi bakghona ukuvolontiya emaphrojekthini wokwakha kwezakhiwo zehlangano. U-Robyn uthi: “Sihleli eendaweni ezinengi ezincani, kanengi bekungabi nekhitjhi. Kwafuze ngithengise izinto ebengizisebenzisela ukutjhuda, bengikuthanda khulu ukutjhuda. Nangizithengisako ngalila. Njengomfazi ka-Abrahama, uSara, bengizimisele ukuqala phambili ingasi emuva.” (Heb. 11:15) Khuyini abatjhadikazaba abayifumanako ngalokhu? U-Robyn uthi: “Saneliseka khulu ngokwazi ukuthi sinikela uJehova koke esinakho. Nasisebenza emaphrojekthini wehlangano, sikghona ukubona ukuthi kuzokuba njani ephasini elitjha.” U-Andy uyavuma, uthi: “Kusithabisa khulu lokhu ngombana sinikela soke isikhathi namandlethu ukwenza umsebenzi kaJehova.”

¹⁶ Ngiyiphi enye indlela esizuza ngayo nasilandela isinqophiso sakaJehova? Ngemva kokuqeda isikolo, u-Marcia wafuna ukulandela iseluleko asifumanako ukuthi aphayone. (Mat. 6:33; Rom. 12:11) Uthi: “Ngafumana umfundaze wokufunda iminyaka emine eyunivesithi kodwana bengifuna ukwenzela uJehova okunengi. Kunokubana ngiye eyunivesithi, ngakhetha ukufunda ikghono elizongisiza ngiphayone. Bekusiqunto esihle khulu leso. Nje, ngithabela ukuphayona, ukusiza e-Bethel nokwenza ezinye izabelo.”

17. Ngiziphi iimbusiso esizifumanako nasiragela phambili silandela iinqophiso zakaJehova? (Isaya 48:17, 18)

¹⁷ Ngezinye iinkhathi, sifumana iinluleko ezisisiza singathandi izinto zakanokutjho nezinto ezingabeka ubuhlobo bethu noJehova engozini, siphule umthetho kaZimu. Nalapho, sifumana iimbusiso ngokulalela iinqophiso zakaJehova. Siba nonembeza ohlwengekileko sibalekele nemiraro eminengi. (1 Thim. 6:9, 10) Umphumela uba kukuthi sikghona ukulotjha uJehova ngehliziywethu yoke begodu lokho kusilethela ithabo elikhulu, ukuthula nokwaneliseka.—Funda u-Isaya 48:17, 18.

18. Kubayini uzimisele ukuragela phambili ulandela isinqophiso sakaJehova?

¹⁸ Siyaqiniseka ukuthi uJehova uzokuragela phambili asebenzisa abajameli abababantu, ukuthi basinikele isinqophiso hlangana nesizi elikhulu nemiNyaka eliKulungwana yokuBusa kwakaKrestu. (Rhu. 45:16) Kghani uzokuragela phambili ulandela isinqophiso ngitjho nanyana ufisa ukwenza izinto ngendlela ethileko? Kuzokuba bulula ukuthi ulalele isinqophiso sakaJehova nawuthoma nje. Yeke, asihlaleni silandela isinqophiso sakaJehova naleso esinikelwa madoda awabekileko ukuthi adose phambili. (Isa. 32:1, 2; Heb. 13:17) Nasenza njalo, sizokuba namabanga amanengi wokuthi sithembe uMnqophisethu, uJehova, osivikela ezintweni ezingonakalisa ubuhlobo bethu naye—osinqophisela endleleni esisa ekuphileni okungapheliko.