Malifalensi a Utumiki komasoti Moyo wasu wachikhilisitu kabuku kamisonkhano
MEYI 6-12
CHUMA CHUPEZEKA M’MAWU A MULUNGU MASALIMO 36-37
“Osati mukokhumudwa chifukwa cha vochita va ŵanthu aipa”
Nsanja ya Mulonda 04/2017 pedji 10 ndim. 4
Kansi vochita va ŵanthu aipa vutikhuza tyani?
4 Mtumwi Paulo enenelatu kuti masiku ŵano izankhale “nthawe yapadela komasoti yovuta.” Yove elembasoti kuti: “Ŵanthu aipa na achinyengo azaipile-ipile.” (2Ti 3:1–5, 13) Kansi mwewo mwaonapo umboni wa vamene ivi? Anyinji asewo tatamanapo chifukwa cha vochita va ŵanthu achiwawa, aukali, komasoti achiŵembu. Ayakine ochita minkhalidwe iipa moliwoneshela, pamene ayakine ochita molifisa. Olo kuti ŵanthu oteti aliye tichitile vinthu viipa moliwoneshela, koma vochita vawo vutikhuza mphela. Mwachisanzo, tukhumudwa komasoti tuchita wowa tikamvwa za vinthu vamene ŵanthu aipa vachitila achikulile, ŵana komasoti ŵanthu osauka. Ŵanthu aipa owonesha ntima wauchinyama komasoti wauchiŵanda. (Yak 3:15) Koma olo n’tetyo, sewo atumiki a Mulungu tuziŵa kuti pali uthenga uweme.
Nsanja ya Mulonda 06/2022 pedji 10 ndim. 10
Yehova odalisa ŵanthu amene okhululuka
10 Tuliwononga seka keno tusunga vifukwa. Yehova ofuna kuti tikosangalala na ntendele wamene uwela chifukwa chosasunga vifukwa. (Ŵelengani Aefeso 4:31, 32.) Yove otilangiza kuti ‘tikopewa kupya ntima na kukalipa.’ (Sl 37:8) Kukonkheja malangizo amene aŵa kungatiyavye ngako. Kusunga vifukwa kungawononge maganizo ŵasu komasoti thanzi yasu. (Miy 14:30) Koma keno tupitilija kusungila vifukwa munthu muyakine, vingawonongelini yove yayi koma vingawononge sewo, monga nimwavunkhalila keno tamwa poizoni. M’malo mwake, keno tukhululukila ayakine tulipasa seka mphaso. (Miy 11:17) Tunkhala na ntendele wa m’maganizo na wamuntima, ndipo tingakwanishe kupita pasogolo potumikila Yehova.
Nsanja ya Mulonda 1/12/2003 pedji 13 ndim. 20
“Kondwelani mwa Mulungu”
20 Tetyo, “ofasa azalondele ichi chalo.” (Sl 37:11 a) Lomba kansi “ofasa” amene awo niŵani? Mawu ŵechimasulila kuti “ofasa” ofumila kumawu amene otanthauza “kunzunza, kuchefya, komasoti kunyoza.” Eye, “wofasa” ni ŵanthu amene oyembekezela Yehova molichefya kuti awamye kusoŵa chilungamo kwakuchitiliwa na ŵanthu ayakine. “Azakondwele nawo ntendele unyinji.” (Sl 37:11b) Olo palipano tufwana ntendele unyinji m’paradaiso wauzimu wamene uli mumpingo Wachikhilisitu chachendi.
Kusakila-sakila mfundo zingatiyavye
Insight–2 pedji 445
Lupili na malupili
Kunkhazikika mwamaziko komasoti kukwejeka. Kunkhazikika kwamene uku, kutanthauza kunkhazikika kwamalupili. (Yes 54:10; Ahe 3:6; yelekezelani na Salimo 46:2.) Tetyo, wamasalimo pechinena za chilungamo cha Yehova kunkhala monga “malupili a Mulungu” (Sl 36:6) vuwoneka kuti enzetanthauza kuti chilungamo cha Yehova chuchinjalini. Pakuti malupili ochinjalini malo, vamene ivi tingaviyelekezele na chilungamo ngacho-ngacho cha Mulungu chamene chupambana kutalimpha kwa malupili, ivi vuwoneshelatu kuti yove niwosiyana na ŵanthu. (Yelekezelani na Yesaya 55:8, 9.) Ponena za mbale ya namba 7 ya ukali wa Mulungu yamene iseguliwa, lemba ya Chivumbuluso 16:20 yunena kuti: “Malupili aliyepezeke.” Vamene ivi vutanthauza kuti vinthu vitali-vitali monga malupili, sembe viliye kwanishe kulesha ukali wa Mulungu.—Yelekezeleni na Yeremiya 4:23-26.
MEYI 13-19
CHUMA CHUPEZEKA M’MAWU A MULUNGU MASALIMO 38-39
Osati mukoliimba ngako mulandu chifukwa cha vinthu viipa vemwenzechita kuvuli
Nsanja ya Mulonda 11/2020 pedji 27 ndim. 12-13
“Menso ŵako” akololesha pa vinthu vakusogolo
12 Ŵelengani 1 Yohani 3:19, 20. Nthawe ziyakine tonse tuliimba mulandu. Mwachisanzo, ayakine oliimba mulandu chifukwa cha vinthu venzechita akaliye phunzila chonadi. Ayakine oliimba mulandu chifukwa cha vinthu venzechita akaliye batizika. Ndipo nivachilwendo lini kumvwa tetyo. (Alo 3:23) Nichendi kuti tufuna kuchita vinthu viweme koma “tonse tukhumudwishiwa nthawe zinyinji.” (Yak 3:2; Alo 7:21-23) Olo kuti kuliimba mulandu nikosasangalasa, koma kutiyavya munjila ziyakine. Ndaŵa yanji tunena tetyo? Kuliimba mulandu niye kutiyavya kusimikija ntima kuti tizawelejelini soti vinthu vetiphoniyesha kuvuli.—Ahe 12:12, 13.
13 Koma olo n’tetyo, nivokwanishika kuliimba ngako mulandu. Vamene ivi vutanthauza kupitilija kuliimba mulandu olo kuti—munthu wamene uyo elapa komasoti Mulungu emukhululukila. Kuliimba mulandu kotetyo kungankhale koyofya. (Sl 31:10; 38:3, 4) Ndaŵa yanji? Tiyeni tikambilane za chisanzo cha mulongo muyakine wamene enzeliimba mulandu chifukwa cha machimo ŵechichita masiku akuvuli. Yove enena kuti: “Nuwona kuti paliye chifukwa chakuti nikochitila khama potumikila Yehova, chifukwa olo ningalipeleke motyani nizapulumuke lini.” Payakine anyinji asewo tingalimvwe monga nimwenzemvwila mulongo wamene uyu. Tetyo, tufunika kusamala kuti osati tikoliimba mulandu mopitilila malile. Tunena tetyo chifukwa chakuti satana angasangalale ngako keno tingasiye kutumikila Yehova olo kuti Yehova wamene uyo—otikonda mphela komasoti otikhululukila!—Yelekezelani na 2Ak 2:5–7, 11.
Nsanja ya Mulonda 15/11/2002 pedji 20 ndim. 1-2
Kansi tingachite tyani kuti masiku amoyo wasu asangalase Yehova?
MASIKU amoyo wasu owoneka kuti ni atontho komasoti okulumija kukwana. Wamasalimo Davide eganizila za kufupika kwa moyo wamunthu ndipo vamene ivi vemuchitisha kuti apemphele kuti: “Yehova, muniziŵishe mapeto ŵangu komasoti—masiku ŵangu, kuti niziŵe mapeto ŵangu. Onani mweika masiku ŵangu kuti ankhale monga kuyeja chisengu ndipo vyaka vangu vili monga chinthu chatyala-tyala pamenso panu.” Pempho yenzenayo Davide yenze yakuti ankhale na moyo wamene ungakondweleshe Mulungu kupitila mu volaŵila komasoti vochita vake. Polaŵila za chidalilo chenzenacho kwa Yehova, yove enena kuti: “Chiyembekezo changu chili muli mwewo.” (Sl 39:4, 5, 7) Yehova emumvwila. Ewona chendi vechichita Davide ndipo emupasa mphaso mokatijana na vochita vake.
Nivosavuta kunkhala wotangwanika nthawe zonse komasoti kunkhala moyo wojuja na vochitika vinyinji. Vamene ivi vingatichitishe kuti tiyambe kudela ngako nkhaŵa ngako-ngako chifukwa chonkhala na vochitika vinyinji pamene nthawe yakuti tichite vamene ivo niitontho ngako. Kansi nkhaŵa yasu ili monga ni ya Davide—yakuti tinkhale na moyo wamene ungasangalase Yehova? Kulaŵila chendi, Yehova otiwona ndipo tonse otiyavya mosamala ngako. Yobu mwanalume wamene enzeyopa Mulungu ezindikila pavuli pa vyaka 3,600 kuti Yehova ewona njila zake zonse komasoti eŵelenga maluwayo ŵake onse. Yobu ekonsha kuti: “Kansi kuti anikonshe ningamuyankhe chinji?” (Yob 31:4–6, 14) Tingakwanishe kuchita vinthu vamene vingatiyavye kuti masiku a moyo wasu akondweleshe Mulungu keno tuika vinthu vauzimu pa malo oyamba, kumvwila malamulo ŵake, komasoti kukatishila ntchito nthawe yasu mwanzelu. Tiyeni tikambilane mbali zamene izi momvwika luweme.
Nsanja ya Mulonda 10/2021 pedji 15 ndim. 4
Kukonzasoti ushamwali wanu na Yehova
Mukolaŵila na Yehova pafupi-pafupi. Atata ŵasu oziŵa kuti keno mungankhalile kuliimba mulandu nthawe zonse, vingankhale vovuta kuti mukopemphela kuli yove. (Alo 8:26) Koma olo n’tetyo, “limbikilani kupemphela,” ndipo mukomuuja Yehova kuti mufunishisha kunkhala nayesoti paushamwali. (Alo 12:12) Andrej enena kuti: “Nenzeliimba mulandu ngako ndipo nenzechita nsoni. Nthawe iliyonse nikapemphela nenzekumvwa luweme komasoti nenzenkhala na ntendele wa muntima.” Keno muziŵalini vamunganene popemphela mukoganizila mapemphelo a mfumu Davide ŵechipemphela pavuli pakuti walapa, opezeka pa masalimo chapitala 51 na 65.
Kusakila-sakila mfundo zingatiyavye
Nsanja ya Mulonda 09/2022 pedji 13 ndim. 16
Mukowonesha kuti nimwe wodalilika
16 Kulilesha n’kofunikasoti ngako kuti tinkhale munthu wodalilika. Nkhalidwe yamene iyi ingatiyavye kuti tikonkhala chelele patuyesewa kuti tiulule nkhani ziyakine zachisinsi. (Ŵelengani Miyambo 10:19.) Nthawe ziyakine, kulilesha kungankhale kovuta keno tukatishila ntchito malo otandalila apa intaneti. Keno tingalekesamala, mosaziŵa tingaulule nkhani zachisinsi kuli ŵanthu anyinji. Tikangotumija uthenga pa malo otandalila apa intaneti, tingaziŵelini mwangaukatishilile ntchito ŵanthu amene alondela uthenga wamene uyo, komasoti tingachitepolini kanthu pa mavuto angawele. Komasoti, kulilesha kungatiyavye kuti tinkhale chelele, keno oshusha otinyengelela kuti tiulule vinthu vamene vingaike pa ngozi moyo wa abale na alongo ŵasu. Vamene ivi vingachitike keno tukonshewa makonsho na mapolisi m’chalo chamene ntchito yasu ni yoleshewa. Tingakonkheje mfundo yakuti ‘timange pakamwa pasu kuti patetezeke’ pa vochitika monga n’vamene ivi komasoti viyakine. (Sl 39:1) Tufunika kunkhala odalilika keno tuchita vinthu na ŵanthu a m’banja mwasu, azishamwali ŵasu, abale na alongo, olo munthu aliyense. Ndipo kuti tinkhale odalilika tufunika kunkhala olilesha.
MEYI 20-26
CHUMA CHUPEZEKA M’MAWU A MULUNGU
MASALIMO 40-41
Ndaŵa yanji tufunikila kuyavya ŵanthu ayakine?
Nsanja ya Mulonda 08/2018 pedji 22 ndim. 16-18
Munthu wopasa onkhala wosangalala
16 Ŵanthu amene opeleka vinthu mofumila pansi pa ntima, onkhala lini na cholinga chakuti apezepo kanthu kayakine. Yesu enzeganizila mfundo yamene iyi pechinena kuti: “Ukakonza phwando ukoita ŵanthu osauka, ochiliwa, olemala na asalola. Ukachita tetyo, uzankhale wodala chifukwa aliye chakuti angakuwejele.” (Lu 14:13, 14) Wolemba Baibolo muyakine, enena kuti munthu wopasa “azadalisiwe.” Muyakinesoti enena kuti: “Wodala ni munthu wamene ochita vinthu moganizila ŵanthu onyozeka.” (Miy 22:9; Sl 41:1) Tetyo, tufunikila kunkhala opasa chifukwa tusangalala tikoyavya ŵanthu ayakine.
17 Kansi Paulo pechikata mawu a Yesu akuti “kupasa kuleta chisangalalo chinyinji kupambana kulondela,” enzengonena zakupasa ŵanthu vinthu? Yayi. Enzetanthauza zakupasa ŵanthu malangizo, kuyavya ŵanthu amene ovutika komasoti kuŵalimbikisa. (Mac 20:31-35) Volaŵila komasoti vochita va Paulo—vutiyavya kuziŵa vatingachite pa nkhani yamene iyi. Tufunikila kukonda ngako ŵanthu kuŵaganizila komasoti kukatishila ntchito nthawe na mphamvu zasu kuti tiŵayavye.
18 Ŵanthu ochita kafuku-fuku apeza kuti ŵanthu opasa onkhala osangalala. Nkhani iyakine yenzenena kuti, “ŵanthu amene oyavya ayawo oyamba kumvwa luweme ngako komasoti kusangalala.” Ochita kafuku-fuku amene awo enena kuti munthu oyavya ŵanthu ayakine “owona kuti moyo wake uli na cholinga.” Vili tetyo chifukwa chakuti tilengewa munjila yakuti tikosangalala tikayavya ayakine. Chifukwa cha vamene ivi, akaswili olimbikisa ŵanthu kuti akolipeleka kukata ntchito zoyavya ayakine na cholinga chakuti akokumvwa luweme komasoti akonkhala osangalala. Vamene ivi nivosadabwisa kuli ŵanthu amene owona kuti Baibolo nimphaso yechitipasa Nyamalenga wasu Yehova.—2Ti 3:16, 17.
Nsanja ya Mulonda 15/12/2015 pedji 24 ndim. 7
Yehova azakuyavyeni pamulwala
7 Olo n’tetyo, tikolwala Mulungu angatitang’ishe, kutipasa nzelu komasoti kutiyavya monga ni mwechichitila na atumiki ŵake akale. Mfumu Davide elemba kuti: “Wodala ni munthu wamene ochita vinthu moganizila munthu wonyozeka. Pansiku ya soka Yehova azamupulumushe. Yehova azamuteteze nomusunga ali wamoyo.” (Sl 41:1, 2) Davide enzetanthauza lini kuti ŵanthu amene ochita vinthu moganizila ŵanthu ovutika angafwelini. M’malo mwake, enzetanthauza kuti Mulungu oŵayavya ŵanthu otetyo. Koma kansi oŵayavya tyani? Davide enena kuti: “Yehova azaŵayavye pakulwala noŵasamalila luweme ngako.” (Sl 41:3) Munthu wamene ochita vinthu moganizila ŵanthu ovutika, ofunikila kuziŵa kuti Mulungu owona vinthu viweme vakuchita komasoti kumukhulupilila kwake. Komasoti Mulungu otiyavya chifukwa chakuti epanga muŵili wasu munjila yakuti tikokwanisha kuchila.
Nsanja ya Mulonda 09/2017 pedji 12 ndim. 17
Mukokonkheja Yehova pa nkhani ya chifundo
17 Koma tufunikalini kuti timangochitila chifundo ŵanthu ayakine na cholinga chakuti sewo tipezepo phindu iyakine. Cholinga chikulu tikochitila ŵanthu ayakine chifundo, chikonkhala kukonkheja Yehova Mulungu wasu wachifundo komasoti kumulemekeza. (Miy 14:31) Yove opeleka chisanzo chiweme ngako pankhani yamene iyi. Lomba tiyeni tonse tikochita vonse vatingakwanishe pomukonkheja. Tikochita vamene ivi—tizayambe kukondana ngako na abale na alongo ŵasu komasoti na ŵanthu ayakine.—Aga 6:10; 1 Yoh. 4:16.
Kusakila-sakila mfundo zingatiyavye
Insight–2 pedji 16
Yehova
Nkhani ya m’Baibolo yamene iyi yunena za kusimikijila kuti Yehova niye woyenelela kulamulila, ndipo vamene ivi vuwonesha cholinga chikulu cha Yehova Mulungu chamene ni: Kutuŵishiwa kwa zina yake. Kutuŵishiwa kwamene uku kutanthauza kuchosa vitonzo vonse vokhuza zina ya Mulungu. Koma kupambana vonse, volengewa vonse vakululu komasoti vapano pachalo vufunikila kulemekeza zina yopatulika ya Mulungu. Ivi vutanthauza kuzindikila komasoti kulemekeza malo aulemelelo a Mulungu, kuchita vamene ivo mofunishisha, kulipeleka na ntima wonse pomutumikila komasoti kusangalala patuchita chifunilo chake chifukwa chachikondi chasu kuli yove. Pemphelo yechipeleka Davide kwa Yehova pa Salimo 40:5-10 yuwonesha luweme minkhalidwe amene aŵa komasoti kutuŵishiwa kwachendi kwa zina ya Yehova. (Onani mwamene mtumwi wamene uyu mwechikatishila ntchito vigawo va salimo yamene iyi pankhani yokhuza Yesu Khilisitu pa Ahebeli 10:5-10.)
MEYI 27–DJUNI 2
CHUMA CHUPEZEKA M’MAWU A MULUNGU MASALIMO 42-44
Mukopindula mokwanila na maphunzilo a Mulungu
Nsanja ya Mulonda 1/06/2006 pedji 9 ndim. 4
Mfundo zikulu-zikulu za chigawo chachiŵili cha masalimo
42:4, 5, 11; 43:3–5. Keno tingakwanishelini kusonkhana pamozi na mpingo Wachikhilisitu kwakanthawe chifukwa cha vinthu viyakine vamene tingakwanishelini kuchinja, tingalimbikisiwe tikakumbukila za chisangalalo chetenzenkhala nacho panthawe yetenzesonkhana pamozi na mpingo. Olo kuti poyamba vamene ivi vingakulishe ululu watingankhale nawo chifukwa chakusungulumwa, vingatikumbushe kuti Mulungu niye pothaŵilapo pasu ndipo tufunikila kuyembekezela yove kuti atiyavye.
Nsanja ya Mulonda 15/01/2012 pedji 15 ndim. 2
Vamungachite kuti mukopindula komasoti kusangalala mukophunzila Baibolo
1 KUPEMPHELA: Choyamba tufunikila kupemphela. (Sl 42:8) Ndaŵa yanji tunena tetyo? Tufunikila kuwona kuti kuphunzila mawu a Mulungu ni mbali yakulambila kwasu. Tetyo, tufunikila kumusenga Yehova kuti atiyavye kuti tinkhale na maganizo oyenelela komasoti kuti atipase nzimu wake utuŵa. (Lu 11:13) Barbara wamene wankhala ochita umishonale kwa nthawe itali, enena kuti: “Nupemphela nthawe zonse nikaliye yamba kuŵelenga komasoti kuphunzila Baibolo. Nikachita tetyo, nikumvwa kuti Yehova ali nane ndipo osangalala na vanuchita.” Kupemphela tikaliye yamba kuphunzila, kutiyavya kuti tisegule maganizo komasoti ntima na cholinga chakuti tipindule mokwanila na chakulya chauzimu cha mwana alilenji chatulondela.
Nsanja ya Mulonda 09/2016 pedji 5 ndim. 11-12
“Manja ŵanu osati afoke”
11 Mulungu otipasasoti mphamvu pokatishila ntchito vatuphunzila pamisonkhano ya mpingo, yadela, yachigawo komasoti masikulu osiyana-siyana. Vinthu vatuphunzila vamene ivi, vutiyavya kuti tinkhale na ntima wofuna kutumikila Mulungu. Vutiyavyasoti kuti tinkhale na volinga vauzimu komasoti kuti tikokwanilisha maudindo ŵasu. (Sl 119:32) Kansi mwewo namwe muyeja-yeja kuti mukofwana mphamvu kufumila pa vinthu vatuphunzila?
12 Yehova eyavya Aisiraeli kugonjesa Ameleki na Aitiyopiya komasoti epasa mphamvu Nehemiya na ayake kuti asilijishe ntchito yawo. Yove angatiyavyesoti sewo nase kuti tikolalikila m’gawo yovuta komasoti kuti osati tifoke tikoshushiwa kapena tikodela nkhaŵa. (1Pe 5:10) Tuyembekezelalini kuti Yehova akotichitila vinthu vodabwisa. M’malo mwake, tufunikila kuchita khama pa vinthu monga kuŵelenga Baibolo nsiku na nsiku komasoti kukonzekela nopezeka pamisonkhano sondo iliyonse. Tikophunzilasoti Baibolo paseka, kuchita kulambila kwapabanja, komasoti kupemphela nthawe zonse. Osati tikolola kuti chilichonse chitikangishe kuchita vinthu vakukatishila ntchito Yehova potilimbikisa komasoti kutipasa mphamvu. Keno mungawone kuti muchitalini luweme pa nkhani ziyakine zatatomola, mukosenga Yehova kuti akuyavyeni, mukachita tetyo “nzimu wa Mulungu uzatang’ishe volaka-laka vanu kuti muchite vinthu vonse vakukonda yove.” (Afi 2:13) Kansi tingachite tyani kuti sewo nase tikotang’isha manja ŵa Akhilisitu ayasu?
Kusakila-sakila mfundo zingatiyavye
Insight–1 pedji 1242
Nkhandwe
M’malemba mophiphilisila, oyelekezela Nkhandwe maulwendo oweleja-weleja. Yobu pofotokoza za mavuto omvwisha chisoni ŵechikumana nawo, eŵilikija kuti “nankhala mkwake wa mphumphi.” (Yob 30:29) Ponena za kugonjesewa kochitisha nsoni kwa ŵanthu a Mulungu, payakine wamasalimo enzenena za malo ŵakusonkhana ŵanthu kuti aniyate nkhondo, kwamene niye kwazuluta mphumphi kuti zilye ŵala amene apaiwa (yelekezelani na Salimo 68:23), Elaŵila modandaula kuti: “Mwatipaya kuti malilimi a imbwa zanu amyangule milopa ŵa adani ŵanu.” (Sl 44:19) Ababulo pechizenguluka Yerusalemu mu 607 B.C.E. eleta mavuto anjala, ndipo vokonkhapo vake nivakuti anakazi eyamba kuchitila nkhanza ŵana ŵawo.—Mlr 4:3, 10.
DJUNI 3–9
CHUMA CHUPEZEKA M’MAWU A MULUNGU MASALIMO 45-47
Nyimbo yunena za Ukwati wa Mfumu
Nsanja ya Mulonda 15/02/2014 pedji 9-10 ndim. 8–9
Sangalalani chifukwa cha ukwati wa Mwana Wambelele!
8 Ŵelengani Salimo 45:13, 14 a. Mkwatibwi wakonzekela ukwati wake ndipo owoneka kuti “ali paulemelelo ukulu.” Pa Chivumbuluso 21:2, Mkwatibwi omuyelekezela na tauni yanyowani ya Yerusalemu, ndipo “wawamililisha mwanalume wake.” Tauni yakululu yamene iyi ili na “ulemelelo wa Mulungu” ndipo uyetimila, “monga mwala wantengo wapatali ngako. Monga mwala utuŵa mbee monga ni gilasi.” (Chv 21:10, 11) Buku yachivumbuluso yufotokoza luweme za Yerusalemu wanyowani wamene uyu. (Chv 21:18-21) Mpomvwika kuti wamasalimo enena kuti mkwatibwi wamene uyu “ali paulemelelo ukulu.” Ali chendi paulemelelo chifukwa ukwati wamene uyu uzachitikilesoti kululu.
9 Mkwatibwi wamene uyu omuleta kwa mkwati wamene ni Mfumu yaufumu —wa Mesiya. Mfumu yamene iyi yankhala yumukonzekelesha, ‘pomusambisha mmanzi a mawu a Mulungu.’ Tetyo ni “ntuŵa ndipo aliye chilema chilichonse.” (Aef 5:26, 27) Vovwala va mkwatibwi wamene uyu, vufunikasoti kunkhala vowoneka luweme mokatijana na mwambo waukwati. Ndipo niye mwavilili chendi chifukwa, “vovwala vake nivagolide,” ndipo “azamulete kwa Mfumu ali vwale vovwala vosoka.” Paukwati wa mwana wa Mbelele wamene uyu, Mkwatibwi “wavomekejewa kuvwala vovwala vapalulu, voyetimila na vituŵa luweme—pakuti vovwala vapalulu vupanamila ntchito zolungama za atuŵa.”—Chv 19:8.
Nsanja ya Mulonda 05/2022 pedji 17 ndim. 10-12
Kansi buku —ya Chivumbulutso yufotokoza chinji vokhuza sogolo yasu?
10 Kansi Yehova azachite chinji na kuukila koyofya kwamene uku? Yove otiuja kuti: “Ukali wangu uzafumile m’mphuno mwangu.” (Eze 38:18, 21–23) Buku ya Chivumbulutso chapitala 19, yufotokoza vinthu vikuti vizachitike pavuli pake. Yehova azatumije Mwana wake kuti akateteze ŵanthu ŵake nogonjesa adani ŵawo. Pa kuukila kwamene uku, Yesu azankhale na “magulu ankhondo a kululu”—amene ni angelo okhulupilika pamozi na a 144.000. (Chv 17:14; 19:11–15) Kansi vokonkhapo va nkhondo yamene iyi vizankhale votyani? Ŵanthu onse aipa pamozi na magulu oshushana na Yehova azawonongewe mpaka kale-kale!—Ŵelengani Chivumbuluso 19:19–21.
11 Yejani kuganizila mwakuti azamvwile ŵanthu okhulupilika akazapulumuka pa chiwonongeko chosilijila cha adani a Mulungu! Ŵanthu onse pano pachalo azasangalale! Olo kuti kululu kuzankhale chisangalalo chikulu Babulo Nkulu akazawonongewa, palisoti chinthu chiyakine chikuti chizalete chisangalalo. (Chv 19:1–3) Chamene ichi ni chochitika chokondwelesha ngako—chamene ni “ukwati wa mwana wa Mbelele.”—Chv 19:6–9.
12 Kansi ukwati wamene uyu uzachitike nthawe yanji? Nkhondo ya Aramagedo ikezesala potontho kuti iyambe, ozozewa onse okwana 144.000 azankhale kululu. Olo n’tetyo, yamene iyo izankhalelini nthawe ya ukwati wa mwana wa Mbelele. (Ŵelengani Chivumbuluso 21:1, 2.) Ukwati wa mwana wa Mbelele, uzachitike pavuli pakuti nkhondo ya Aramagedo yachitika komasoti adani onse a Mulungu akazawonongewa.—Sl 45:3, 4, 13-17.
Insight–2 pedji 1169
Nkhondo
Pamapeto pa nkhondo yamene iyi, ŵanthu azasangalale na ntendele unyinji kwa vyaka 1.000. Salimo yunena kuti “[Mulungu] azaleshe nkhondo mpaka kumalekejelo a ichi chalo. Watyola uta nopeta-peta nkondo, ndipo washoka magaleta ankhondo, chamene ichi chenze chiyambi chakukwanilishiwa kwa ulosi n’chalo cha Aisiraeli pechifwaya visulo vankhondo va adani.” Khilisitu akazagonjesa ŵanthu aipa pa Aramagedo amene oyambisha nkhondo, atumiki a Mulungu azasangalale na ntendele unyinji pano pachalo komasoti wokwanila na wokhutilisha. (Sl 46:8-10) Ŵanthu akuti azapulumuke nonkhala na moyo wosasila “azanole vibemba vawo kuti vinkhale tukambwili twa pulawu, ndipo vibemba vawo azavinole kuti vinkhale visulo votemela vimiti” ndipo “azaphunzilelini soti nkhondo.” “Pakuti pakamwa pa Yehova wamagulu ankhondo akululu palaŵila vamene ivi.”—Yes 2:4; Mik 4:3, 4.
Kusakila-sakila Mfundo zingatiyavye
Nsanja ya Mulonda 04/2017 pedji 11 ndim. 9
Kansi Ufumu wa Mulungu ukazewela uzachose vinthu votyani?
9 Kansi n’chinji chikuti chizaloŵe mmalo mwa mabungwe? Kansi pali bungwe kapena gulu iliyonse ikuti izankhalepo pavuli pa Aramagedo? Baibolo yunena kuti: “Pali kululu kwa nyowani na chalo chanyowani vatuyembekezela sewo mokatijana na lonjezo yake ndipo mwamene umo muzankhale chilungamo.” (2Pe 3:13) Maboma alipo aŵa ali monga kululu kwa kale, pamene ŵanthu ŵake ali monga chalo chakale, ndipo vonse vamene ivi vizankhalepo lini soti. Tetyo, azaloŵewe mmalo na kululu kwa nyowani komasoti chalo chanyowani. Mawu akuti “kululu kwa nyowani” otanthauza boma yakululu ndipo “chalo chanyowani” ni ŵanthu amene akuti azankhale pano pachalo nolamuliliwa na boma yamene iyo. Mfumu ya Ufumu wamene uyu ni Yesu Khilisitu, ndipo Ufumu wamene uyu uzawoneshe kuti Mulungu niwadongosolo. (1Ako 14:33) Tetyo, ŵanthu akuti azalamuliliwe na Ufumu wamene uyu azankhale gulu yokatijana. Komasoti pazankhale ŵanthu akuti akosogolela ntchito zosiyana-siyana. (Sl 45:16) Akolondela malangizo kufumila kwa Khilisitu na a 144,000. Kansi muganiza kuti vizankhale tyani mabungwe onse amene aŵa akazachoka nosala tyala gulu imozi iliye chinyengo komasoti ya ŵanthu okatijana?
DJUNI 10-16
CHUMA CHUPEZEKA M’MAWU A MULUNGU MASALIMO 48-50
Makolo— Yavyani banja yanu kuti ikodalila gulu ya Yehova
Nsanja ya Mulonda 03/2022 pedji 22 ndim. 11
Kulambila kwachendi kungakuyavyeni kunkhala osangalala
11 Tulambila Yehova keno tuphunzila Mawu ŵake komasoti kuphunzisa ŵana ŵasu vokhuza yove. Pa nsiku ya Sondo, Aisiraeli enzekatalini ntchito zawo za nsiku na nsiku, ndipo vamene ivi venzeŵapasa mwayi woganizila za ushamwali wawo na Yehova. (Eks 31:16, 17) Ŵala enze okhulupilika pakati pawo enzephunzisa ŵana ŵawo vokhuza Yehova na ubwino wake. Masiku ŵanosoti tufunika kupatula nthawe yoŵelenga nophunzila Mawu a Mulungu. Vamene ivi vupanga mbali ya kulambila kwasu Yehova, ndipo vutiyavya kuti tinkhale naye pa ushamwali wotang’a. (Sl 73:28) Ndipo keno tuphunzila pamozi monga banja—tingayavye ŵana ŵasu—kuti ankhale pa ushamwali wotang’a na Atata ŵasu akululu amene ni achikondi.—Ŵelengani Masalimo 48:13.
Nsanja ya Mulonda 15/03/2011 pedji 19 ndim. 5-7
Vinthu vamungasangalale navo
“Yendani mozenguluka Ziyoni mwewo mwaŵanthu, ndipo yenda-yendani mwamene umo komasoti ŵelengani sanjika zake. Ganizilani mofasa za chipupa chake chotang’a. Kuti muzafotokozele mibadwo yakusogolo.” (Sl 48:12, 13) Pamene apa wamasalimo elimbikisa Aisiraeli kuti akoluta kuyawona tauni ya Yerusalemu. Kansi muganiza kuti mabanja achi Isiraeli amene eluta ku tauni yopatulika yamene iyi kuyachita nawo vikondwelelo vapa chaka komasoti kuyawona nawo kachisi muweme ngako enzekumvwa tyani akajokela kwawo? Vuwoneka kuti ove enzelimbikisiwa “kufotokozela mibadwo yakusogolo” vinthu vechiwona vamene ivo.
Ganizilani za Mfumukazi yaku Sheba yamene poyamba yenzekaikila veyenze kumvwa vokhuza ulamulilo wapalulu wa Solomo komasoti nzelu zake zodabwisa. Kansi n’chinji cheyavya mfumukazi yamene iyi kukhulupilila vinthu veyichimvwa? Mfumukazi yamene iyi yenena kuti “Niliye khulupilile mawu amene aŵa, niye panawela kuti niwone na menso ŵangu.” (2Mb 9:6) Nichendi kuti vinthu vatuwona na “menso ŵasu” vutikhuza ngako.
Kansi mungayavye tyani ŵana ŵanu kuwona na “menso ŵawo” vinthu vochitisha chidwi vam’gulu ya Yehova? Keno kuli ofesi ya nthambi ya mboni za Yehova kufupi na kwamunkhala, mungachite luweme kuluta kuyeiwona. Mwachisanzo, Mandy na Bethany ni asimbi amene ekulila m’dela yamene pali nsenga wamakilomita 1,500 kufumila ku beteli yamuchalo chawo. Koma makolo ŵawo enzekonza zakuti akowona malo amene awo pafupi-pafupi ngako-ngako panthawe yenzekula ŵana amene aŵa. Asimbi amene aŵa enena kuti: “Tikaliye luta ku beteli tenzeganiza kuti ni malo osangalasa kuli ŵanthu okalamba ŵeka-ŵeka. Koma tekumana na achilumbwana amene enzetumikila Yehova mwakhama komasoti mosangalala. Tenzewona kuti gulu ya Yehova yenzepezeka tyalalini m’dela yasu yeka, ndipo ulwendo uliwonse watingalute ku beteli tenzelimbikisiwa ngako mwauzimu.” Mandy na Bethany pechiwona bwino-bwino gulu ya Mulungu elimbikisiwa kuchita upainiya ndipo pavuli pake eitiwa kuti akatumikile pa beteli kwakanthawe.
Nsanja ya Mulonda 15/08/2012 pedji 12 ndim. 5
Mukochita vinthu monga nzika ya Ufumu wa Mulungu!
5 Mufunikila kuphunzila za mbili ya chalo chamene icho. Munthu wamene ofuna kuyankhala nzika ya chalo chiyakine angafunikile kuziŵa vinthu viyakine vokhuza mbili ya chalo chamene icho. Nawosoti ŵanthu ofuna kunkhala nzika za Ufumu wa Mulungu, ofunikila kuphunzila vinyinji vokhuza mbili yake. Ŵana a Kora amene enzetumikila ku Isiraeli, epeleka chisanzo chiweme pa nkhani yamene iyi. Ove enzekonda ngako tauni ya Yerusalemu na malo ŵake olambilila ndipo enzekonda kuuja ayakine mbili ya tauni yamene iyo. Chinthu chenzeŵachitisha chidwi nikukongolalini kwa tauni yamene iyo, koma vinthu venzepanamila tauni yamene iyo komasoti malo olambilila. Yerusalemu wenze “munzi wa Mfumu ikulu,” chifukwa chakuti ŵanthu enzelambila Yehova komasoti kuphunzila chilamulo chake kwamene uko. Komasoti Yehova enzewamila ntima ŵanthu enzelamuliliwa na mfumu yaku Yerusalemu. (Ŵelengani Masalimo 48:1, 2, 9, 12, 13.) Kansi mwewo namwe mukonda kuphunzila komasoti kuujako ayakine mbili ya ŵanthu a Yehova? Muzayambe kutembeja ngako Ufumu wa Mulungu, mukaphunzila vinyinji vokhuza ŵanthu a Mulungu komasoti mwakuŵayavyila Yehova. Ivi vizakuyavyeni kunkhala na ntima wofuna kulalikila uthenga uweme wa Ufumu.—Yer 9:24; Lu 4:43.
Kusakila-sakila Mfundo zingatiyavye
Insight–2 pedji 805
Chuma
Monga mtundu wosankhiwa, Aisiraeli enzesangalala na vakulya, komasoti vakumwa (1Mf 4:20; Mla 5:18, 19) ndipo chuma chawo cheŵateteza ku mavuto aumphawi. (Miy 10:15; Mla 7:12) Koma olo kuti venze vokatijana na chifunilo cha Mulungu kuti Aisiraeli akosangalala chifukwa chakatundu wenzenawo komasoti ntchito yotang’a yenzekata (yelekezelani na Miy 6:6-11; 20:13; 24:33, 34), echenjejewa kuti osati aluŵe Yehova wamene niye munecho wakatundu wawo noyamba kudalila katundu wamene uyo. (De 8:7-17; Sl 49:6–9; Miy 11:4; 18:10, 11; Yer. 9:23, 24) Ove ekumbushiwa kuti chuma nichakanthawe (Miy 23:4, 5), ndipo chingapelekewelini kwa Mulungu monga dipo notiwombola ku imfwa (Sl 49:6, 7), komasoti chingaukishelini akufwa (Sl 49:16, 17; Mk 5:15). Ove eŵakumbusha kuti kuona chuma kunkhala chinthu chofunika ngako, sembe kweŵachitisha kunkhala na viyoloŵezi vochita vinthu vachinyengo komasoti sembe veŵachitisha kuti osati akokondewa na Mulungu. (Miy 28:20; yelekezelani na Yeremiya 5:26-28; 17:9-11.) Ephunzisiwasoti kuti “akolemekeza Yehova pokatishila ntchito vinthu vawo vantengo wapatali venzenavo.”—Miy 3:9.
DJUNI 17-23
CHUMA CHUPEZEKA M’MAWU A MULUNGU MASALIMO 51-53
Mukochita vinthu vamene vingakuyavyeni kupewa machimo akulu-akulu
Nsanja ya Mulonda 01/2019 pedji 15 ndim. 4–5
Kansi tingateteze tyani ntima wasu?
4 Pa Miyambo 4:23, mawu akuti “ntima” otanthauza “munthu wankati” kapena kuti “munthu wofisika.” (Ŵelengani Masalimo 51:6 komasoti mawu amnyansi.) Tetyo, tinganene kuti mawu akuti, “ntima” onena za maganizo ŵasu, mwatumvwila muntima mwasu, volinga vasu komasoti vinthu vatulaka-laka. Tingalaŵile kuti mwatilili nkati mwasu osati mwakutiwonela ŵanthu ayakine.
5 Kuti timvwishe za umunthu wasu wankati, tiyeni tikambilane za muŵili wasu ngawo-ngawo. Choyamba, kuti tinkhale na thanzi iweme tufunikila kulya chakulya chiweme komasoti kuchita masoŵela otang’isha muŵili. Nichimozi-mozi soti na umunthu wasu wankati. Kuti tinkhale na thanzi tufunikila kulya chakulya chauzimu komasoti kuchita vinthu vowonesha kuti tukhulupilila Yehova. Mwachisanzo, tufunikila kukonkheja vatuphunzila komasoti kuuja ayakine vatukhulupilila. (Alo 10:8-10; Yak 2:26) Chachiŵili, munthu angawoneke monga ni wathanzi koma nkati mwa muŵili wake muli matenda. Molingana na vamene ivi tingaganize kuti tili na chikhulupililo chotang’a chifukwa chakuti tuchita vinthu vokhuza kulambila koma muntima mwasu tayamba kulaka-laka vinthu viyakine viipa. (1Ak 10:12; Yak 1:14, 15) Tufunikila kukumbukila kuti Satana ofuna kutisokoneza na cholinga chakuti tikoyendela maganizo ŵake. Kansi yove angachite tyani vamene ivi? Lomba sewo tingaliteteze tyani?
Nsanja ya Mulonda 15/06/2015 pedji 14 ndim. 5–6
N’vokwanishika kunkhala mphela atuŵa
5 Tingawoneshe kuti tudalila Yehova tikomusenga kuti atiyavye kupewa maganizo aipa. Tikavwendela kwa Yehova kupitila m’pemphelo, yove naye otivwendelela soti. Otipasa nzimu wake utuŵa kuti atiyavye kunkhala mphela atuŵa nopewa maganizo aipa. Tetyo, tikosenga Yehova kuti atiyavye kuganizila vinthu vomusangalasa. (Sl 19:14) Tufunikila kumusenga molichefya kuti atiyavye kuziŵa maganizo aliwonse amene angatipangishe kuti tichite chimo. (Sl 139:23, 24) Tikomusenga nthawe zonse kuti akotiyavya kunkhala mphela okhulupilika tikakumana na mayeselo.—Mt 6:13.
6 Payakine tikaliye yamba kuphunzila za Yehova tenzekonda kuchita vinthu vamene ozondana navo, ndipo nthawe ziyakine vuwela mmaganizo mwasu. Olo kuti vili tetyo, Yehova angatiyavye kunkhala mphela atuŵa. Davide enzeziŵa luweme vamene ivi, yove pechichita chigololo na Betiseba esenga Yehova kuti “Pangani ntima wolungama nkati mwangu, . . . ndipo ikani maganizo anyowani na onkhazikika muli newo.” (Sl 51:10, 12) N’chendi kuti tingoganizila vinthu viipa ndipo vingativute kusiya maganizo aipa amene awo. Koma Yehova angatisogolele mphela kuti tikomvwila malamulo ŵake. Yove angatiyavye kuti osati tikolamuliliwa na maganizo aipa.—Sl 119:133.
Kusakila-sakila Mfundo zingatiyavye
Insight–1 pedji 644
Doegi
Muyedomu niye enze m’chiŵeta mkulu wamene enzelolela katundu wa Mfumu Sauli. (1Sa 21:7; 22:9) Vuwoneka kuti Doegi enze wotembenukila ku Chiyuda. Chifukwa chakuti enze “sungiwa pamenso pa Yehova” ku Nobu payakine chifukwa cha lumbilo, kuipishiwa olo matenda amankhutu, Doegi ewona mkulu wa ansembe Ahimeleki penzepeleka nkate wachiwoneselo komasoti chibemba cha Goliyati kuli Davide. Pavuli pake, Doegi eulula vechiwona ku Nobu, ndipo yove enena kuti Sauli pamozi na atumiki ŵake enzemukonzela chiwembu. Pechiitiwa na mkulu wa ansembe komasoti ansembe ayakine aku Nobu nokonsha Ahimeleki, Sauli elamula atumiki ŵake kuti apaye ansembe amene awo. Ove pechikana, Doegi molamuliliwa na Sauli komasoti mosakakamijika yove epaya ansembe onse okwana 85. Pevisila vochitika vamene ivi, Doegi ewononga tauni ya Nobu komasoti epaya ŵanthu onse enzenkhala mwamene umo, ŵana akulu komasoti vifuwo vawo.—1Sa 22:6-20.
Monga mwatuwoneshela tumawu twapalulu pa chapitala 52 cha salimo, Davide elemba za Doegi kuti: “Lilimi yako yamene niyonola monga nileza, yukonda vachiwembu komasoti kuchita vinthu vachinyengo. Ukonda ngako kutala wenye kupambana kulaŵila va chendi. Ukonda mawu owononga ayakine, wewo wamene lilimi yako yukonda kulaŵila vachinyengo.”—Sl 52:2–4.
DJUNI 24-30
CHUMA CHUPEZEKA M’MAWU A MULUNGU MASALIMO 54-56
Mulungu ali kumbali yanu
Nsanja ya Mulonda 1/08/2006 pedji 22 ndim. 10-11
Nkhalani anzelu—mwakuyopa Yehova!
10 Nthawe iyakine Davide eluta kwa Akasidi mfumu ya tauni ya Afilisiti ku Gati kwawo kwa Goliyati. (1Sa 21:10-15) Atumiki a mfumu yamene iyo enena kuti Davide ni n’dani wa mtundu wamene uyo. Kansi Davide echita chinji vinthu pevifwika paipa teti? Yove epemphela kwa Yehova mofumila pansi pa ntima. (Sl 56:1–4, 11-13) Olo kuti Davide echita vinthu monga munthu wofuntha, yove enzeziŵa kuti Yehova ngaye-ngaye niye emuwombola pomupasa nzelu yamene iyo. Davide edalila Yehova na ntima wake wonse powonesha kuti enzechendi munthu woyopa Mulungu.—Sl 34:4–6, 9-11.
11 Molingana na Davide sewo nase tingawoneshe kuti tuyopa Mulungu podalila lonjezo yake yakuti azatiyavye kuti tikwanishe kulimbana na mavuto ŵasu. Davide enena soti kuti: “Peleka njila yako kwa Yehova, mukhulupilile yove, azachitepo kanthu.” (Sl 37:5) Vamene ivi vutanthauzalini kuti tikomusiyila Yehova mavuto ŵasu kuti yove alimbane nawo sewo osachitapo kanthu kalikonse. Davide aliye pemphele kwa Yehova kuti amuyavye yove nonkhala osachitapo kanthu kalikonse. Koma ekatishila ntchito mphamvu komasoti nzelu zechimupasa Yehova polimbana na vuto yake yamene iyo. Koma olo n’tetyo, Davide enzeziŵa kuti vochita va munthu payeka nivosadalilika. Sewo nase tikoziŵa vamene ivi. Tikachita mbali yasu na mphamvu zasu zonse, tikosiya vonse mmanja mwa Yehova. Ngako-ngako nthawe zinyinji pakankhala kuti paliye chilichonse chatingachite kupatulapo kudalila Yehova. Yamene iyi ni nthawe yamene sewo paseka tingawoneshe kuti tuyopa chendi Mulungu. Tingalimbikisiwe na mawu ŵechinena Davide ofumila pansi pa ntima akuti: “Chisinsi cha Yehova chili muli ŵala omuyopa yove.”—Sl 25:14.
Yandikilani pedji 243 ndim. 9
Paliye chamene “Chingatilekanishe na chikondi cha Mulungu”
9 Yehova otembejasoti kupilila kwasu. (Mt 24:13) Nthawe zonse tikokumbukila kuti satana ofuna kuti timukane Yehova. Nsiku iliyonse yatingankhale mphela wokhulupilika kwa Yehova, tumuyavya kuti akwanishe kuyankha wenye wa satana wamene uyu. (Miy 27:11) Nthawe zinyinji kupilila, kunkhala kovuta. Matenda, mavuto azachuma, kuvutika maganizo komasoti mavuto ayakine, vingankhale viyeso va nsiku na nsiku. Nthawe ziyakine tingayambe kufooka chifukwa chakuti vinthu vetenzeyembekezela vachelwa kuchitika. (Miy 13:12) Tikopilila keno tukumana na mavuto otetyo, chunkhala chinthu cha ntengo wapatali ngako kwa Yehova. Chifukwa chake Mfumu Davide esenga Yehova kuti amusungile misozi ŵake “n’chola chachikumba.” Chifukwa chomudalila, eyangijilasoti kuti: “Kansi yunkhalalini m’buku mwanu?” (Sl 56:8) Eye, Yehova osunga komasoti kukumbukila misozi yonse nakuvutika konse komasoti kupilila ponkhala mphela wokhulupilika kuli yove. Misozi yamene iyo pamozi nakuvutika nichinthu chantengo wapatali mmenso mwake.
Nsanja ya Mulonda 06/2022 pedji 18 ndim. 16-17
Mwachingatiyavyile chikondi kuti osati tikochita wowa
16 Satana oziŵa kuti tuwona moyo wasu kuti ni wa ntengo wapatali. Koma olo n’tetyo, yove onena kuti tingavomele kutaya chilichonse olo ushamwali wasu na Yehova na cholinga chakuti titeteze moyo wasu. (Yob 2:4, 5) Koma kulaŵila chendi yove onkhala kuti olisempha! Olo vili tetyo, pakuti yove “ali na njila yoletela imfwa,” oyeja-yeja kukatishila ntchito wowa wachibadwa watunkhala nawo pa nkhani ya imfwa kuti atichitishe kusamvwila Yehova. (Ahe 2:14, 15) Nthawe ziyakine, ŵanthu amene osogolelewa na Satana otiyofya kuti atipaye keno tilekelini kukhulupilila Yehova. Pa nthawe yatufunikila thandizo ya chipatala mokulumija, nthawe ziyakine Satana angapezelepo mwayi wotichitisha kusankha vinthu mu njila yophoniyeka. Madokota olo achibale ŵasu amene ni a Mbonilini angatikakamije kuti tivomele kuikiwa milopa vamene vingachitishe kuti tifwaye malamulo a Mulungu. Olosoti munthu muyakine angatilimbikise kuti tifwane thandizo ya mankhwala isakatijana na mfundo za m’Malemba.
17 Olo kuti tufunalini kufwa tuziŵa kuti Yehova alekelini kutikonda olo timwalile. (Ŵelengani Aroma 8:37-39.) Azishamwali a Yehova akamwalila, yove oŵakumbukila mphela ndipo vikungonkhala monga akali na moyo. (Lu 20:37, 38) Yove ofunishisha kuzaŵausha. (Yob 14:15) Yehova epeleka malipilo apalulu ngako na cholinga chakuti ‘tizafwane moyo wosasila.’ (Yoh 3:16) Tuziŵa kuti yove otikonda ngako ndipo otiganizila. Tetyo mmalo mosiya Yehova tikankhala kuti tulwala olo kuti tingafwe tumudalila kuti atilimbikise, kutipasa nzelu komasoti kutipasa mphamvu. Ivi niye vechichita Valérie na mwanalume wake.—Sl 41:3.
Kusakila-sakila Mfundo zingatiyavye
Insight–1 pedji 857-858
Kuziŵilatu komasoti kukonzekelatu
Kusakhulupilika kwa Yudasi Isikariyoti, kwekwanilisha ulosi wa Mulungu ndipo kwewonesha kuziŵilatu vinthu kwa Mulungu komasoti mwana wake. (Sl 41:9; 55:12, 13; 109:8; Mac 1:16-20) Koma tinganene lini kuti Mulungu enze ekonzelatu kapena kulembelatu kuti azakatishile ntchito Yudasi pokwanilisha ulosi wamene uyu. Maulosi enenelatu kuti ayake apantima a Yesu, azamupeleke koma aliyetomole kuti niŵani ngaye-ngaye pakati pa ayake amene awo akuti azamupeleke. Malangizo a Mulungu amene efotokozewa na mtumwi wamene uyo niŵakuti: “Osati mukokulumija kuika munthu aliyense paudindo; kapena kuyaŵana na ŵanthu ayakine machimo ŵawo; pitilijani kunkhala na minkhalidwe ituŵa.” (1Ti 5:22; yelekezelani na 3:6.) Yesu powonesha kuti enzedela nkhaŵa pa nkhani ya mwangasankhile mwanzelu komasoti moyenelela Atumwi ŵake 12, yove echezela usiku wonse opemphela kuli Atata ŵake akaliyepanga chosankha. (Lu 6:12-16) Ngati Yudasi enze esankhiliwatu na Mulungu kuti akapeleke Yesu, vamene ivi sembe vechitisha kuti osati ankhale mtumiki wa Mulungu, ndipo mokatijana na malangizo kukatijana naye sembe kwechitisha kuti ophunzila ayakine ayaŵane naye machimo.
Tetyo, nivowonekelatu kuti panthawe yechisankhiwa Yudasi kuti ankhale mtumwi, enzeve umboni uliwonse wooneka kuti angankhale na maganizo opeleka Yesu komasoti kukatijana naboma. Yove evomela kuti ‘maganizo aipa azike miju muntima mwake’ noipisha nkhalidwe yake, vamene vechitisha kuti apatuke pachisogojo cha Mulungu, nolola kuti akosogolelewa na satana mdyerekezi komasoti kuyenda panjila yachinyengo. (Ahe 12:14, 15; Yoh 13:2; Mac 1:24, 25; Yak 1:14, 15; onani Yuda namba. 4.) Yesu eziŵa maganizo a Yudasi pechifwika paipa, ndipo enenelatu kuti Yudasi niye akuti azanipeleke.—Yoh 13:10, 11.