Zayufunika Kutanthauza Zina ya Yehova Kuli Seo

1-2. Kansi tuziŵa tyani kuti zina ya Yehova ni yofunika ngako kuli Yesu?

ZINA ya Yehova ni yofunika ngako kuli Yesu. Paliye munthu aliyense wamene wacita zinyinji kuti aziŵikishe zina ya Yehova kupambana mwawacitila Yesu. Monga ni mwetephunzilila m’nkhani yapita, Yesu enze wokonzeka kufwa cifukwa ca zina ya Yehova. (Mko. 14:36; Aheb. 10:​7-9) Ndipo pavuli pa Ulamulilo wake wa Vyaka 1,000, Yesu akankhale wokonzeka kuwezhya ulamulilo wonse na colinga cakuti zina ya Yehova ituŵishiwe. (1 Akor. 15:​26-28) Cikondi ca Yesu pa zina ya Mulungu, cutiuzhya soti zokhuza ushamwali wake na Ausuwake. Mwacisanzo, zutipasa umboni wakuti Yesu okonda ngako mwineco wa zina yamene iyi.

² Yesu ewela pa calo mu zina ya Ausuwake. (Yoh. 5:43; 12:13) Yove eziŵikisha zina ya Ausuwake kuli okonkha ŵake. (Yoh. 17:​6, 26) Ndipo enzophunzisa nocita zozizwisa mu zina ya Yehova. (Yoh. 10:25) Yesu pecipemphela kwa Yehova kuti ayanganile ophunzila ŵake, yove esenga Yehova kuti acite izi ‘cifukwa ca zina yake,’ Yehova. (Yoh. 17:11) N’zoonekelatu kuti zina ya Mulungu yenze yofunika ngako kuli Yesu kupambana cinthu ciyakine ciliconse. Lomba kansi munthu angalaŵile tyani kuti ni wokonkha wa Yesu koma oziŵa lini zina ya Yehova olo kuiseŵenzesha?

3. Kansi tilaŵizhyane cinji m’nkhani ino?

³ Monga Akhristu amene okonkha maluwayo a Yesu, tulemekeza zina ya Ausuwake. (1 Pet. 2:21) M’nkhani ino, tilaŵizhyane cifukwa cake ŵala amene olalikila ‘uthenga wabwino wa Ufumu’ oziŵika na zina ya Yehova. (Mat. 24:14) Tilaŵizhyane soti zayufunika kutanthauza zina ya Yehova kuli seo, aliyense payeka.

“ŴANTHU OZIŴIKA NA ZINA YAKE”

4. (a) Kansi Yesu eŵauzhya cinji ophunzila ŵake nthawi itontho akaliyowelela kululu? (b) Ndipo izi zuleta konsho yotyani?

⁴ Nthawi itontho akaliyoluta kululu, Yesu euzhya ophunzila ŵake kuti: “Mukayolandila mzimu utuŵa, mukankhale na mphamvu. Ndipo mukankhale mboni zangu mu Yerusalemu, ku Yudeya konse na ku Samariya, mpaka kolekezhyela kwa calo.” (Mac. 1:8) Tetyo, uthenga wabwino wenze kuzolalikiliwa kulikonse osati tyala mu Isiraeli. Posilizhyila pake, ŵanthu a mitundu yonse enze kuzonkhala na mwai wonkhala okonkha a Yesu. (Mat. 28:​19, 20) Koma Yesu elaŵila kuti: “Mukankhale mboni zangu.” Kansi izi zenzotanthauza kuti ophunzila alomba enzofunika kuziŵa zina ya Yehova, olo kapena enzofunika tyala kunkhala mboni za Yesu? Zocitika zufotokozewa mu Machitidwe caputa 15, zutiyavya kupeza yankho ya konsho iyi.

5. Kansi atumwi na akulu mu Yerusalemu eonesha tyani kuti ŵanthu onse ofunika kuziŵa zina ya Yehova? (Onani soti cithunzithunzi.)

⁵ Mu 49 C.E., atumwi na akulu mu Yerusalemu ekumana pamozi kuti alaŵizhyane zinthu zeenzofunika kucita ŵanthu osaduliwa, amene enze lini Ayuda na colinga cakuti avomelezhyewe monga Akhristu. Kosilizhyila kwa makambisilano yao, Yakobo mkwake wa Yesu elaŵila kuti: “[Petulo] wafotokoza bwino mwamene Mulungu eceukila ŵanthu a mitundu iyakine kwa nthawi yoyamba, kuti pakati pao atolepo ŵanthu oziŵika na zina yake.” Kansi Yakobo enzotanthauza zina ya ŵani? Mwa kukata mau a mneneli Amosi, yove eyangizhyilapo kuti: “Nicite izi kuti ŵanthu osala asakilesakile Yehova na mtima wonse. Amusakilesakile pamozi na mitundu yonse ya ŵanthu, ŵanthu oitiwa na zina yangu, walaŵila tetyo Yehova.” (Mac. 15:​14-18) Tetyo ophunzila aŵa alomba, enzofunika lini tyala kuphunzila za Yehova, koma enzofunika soti ‘kuitiwa na zina yake.’ Izi zutanthauza kuti enze kuzonkhala na zina ya Mulungu ndipo enze kuzoziŵika na zina yamene iyo.

6-7. (a) Ndaŵa yanji Yesu ewela pa calo?(b) Kansi n’cifukwa ciyakine cotyani cofunika ngako camene cecitisha Yesu kuwela pa calo?

⁶ Zina ya Yesu yutanthauza kuti “Yehova ni Cipulumuso.” Ndipo Yehova eseŵenzesha Yesu kuti apulumuse ŵanthu onse amene okhulupilila yove na Mwana wake. Yesu ewela pa calo na colinga cakuti apeleke moyo wake cifukwa ca ŵanthu. (Mat. 20:28) Mwa kupeleka dipo, yove ecitisha kuti zinkhale zokwanishika kuti ŵanthu apulumusiwe nonkhala na ciyembekezo cakuyonkhala na moyo kosasila.—Yoh. 3:16.

⁷ Lomba ndaŵa yanji ŵanthu enzofunika kupulumusiwa? N’cifukwa ca zinthu zecitika m’munda wa Edeni. Monga ni mweyefotokozela nkhani yapita, makolo ŵasu oyambilila Adamu na Eva, epandukila Yehova ndipo etaya mwai wonkhala na moyo mpaka kale-kale. (Gen. 3:​6, 24) Olo n’tetyo, izi zenzoyangizhyilapo soti cinthu ciyakine cofunika ngako kupambana kupulumusiwa kwa ŵanthu. Cinthu ici ni kunyozewa kwa zina ya Yehova. (Gen. 3:​4, 5) Tetyo nkhani ya cipulumuso ca mbadwa za Adamu na Eva, yukatizhyana na nkhani ikulu yokhuza kutuŵishiwa kwa zina ya Yehova. Cifukwa cakuti Yesu opanamilako Yehova ndipo ali na zina yake, ecita mbali yofunika ngako pa kutuŵishiwa kwa zina ya Yehova.

8. Kansi okonkha onse a Yesu enzofunika kuziŵa cinji?

⁸ Okonkha onse a Yesu amene enze Ayuda na ŵala amene enze lini Ayuda, enzofunika kuziŵa kwecenzocokela cipulumuso cao kwamene ni kuli Ausuwake a Yesu, Yehova Mulungu. (Yoh. 17:3) Kuyangizhyila apo, molingana na Yesu, ove enzofunika kuziŵika na zina ya Yehova. Enzofunika soti kuzindikila kufunika kotuŵisha zina yake. Cipulumuso cao cenzodalila pa kucita izi. (Mac. 2:​21, 22) Tetyo okonkha onse a Yesu okhulupilika, enzofunika kuphunzila zokhuza Yehova na Yesu. Niye cifukwa cake Yesu esilizhya pemphelo yake yupezeka mu Yohane 17 na mau akuti: “Neo nacitisha kuti ove aziŵe zina yanu ndipo nipitilizhye kuŵaziŵisha zina yamene iyo kuti nao akoonesha cikondi monga camene mweo mwenionesha, kuti nane ninkhale okatizhyana na ove.”—Yoh. 17:26.

“MWEO NIMWE MBONI ZANGU”

9. Kansi tingaoneshe tyani kuti zina ya Yehova ni yofunika ngako kuli seo?

⁹ Okonkha onse acendi a Yesu, ofunika kunkhala ofunishisha kutuŵisha zina ya Yehova. (Mat. 6:​9, 10) Ofunika kuona zina ya Yehova kunkhala cinthu cofunika ngako kupambana cinthu ciliconse. Angacite izi kupitila mu zocita zao. Kansi tingacite tyani kuti tikotolako mbali pa kutuŵisha zina ya Yehova noonesha kuti zecilaŵila Satana zokhuza Yehova ni zawenye?

10. Kansi ni nkhani yanji yufotokozewa mu Yesaya 42-44? (Yesaya 43:9; 44:​7-9) (Onani soti cithunzithunzi.)

¹⁰ Mu Yesaya 42-44, tuphunzila mwatingatuŵishile zina ya Yehova. M’macaputa aya, Yehova okonsha ŵanthu amene omulambila lini kuti aoneshe ngati milungu yakulambila ni yacendi. Yove okonsha soti ngati pali mboni iliyonse ingacite izi. Koma paliye aliyense angacite izi. —Ŵelengani Yesaya 43:9; 44:​7-9.

11. Molingana na Yesaya 43:​10-12, kansi Yehova olaŵila cinji ponena za ŵanthu ŵake?

¹¹ Ŵelengani Yesaya 43:​10-12. Ponena za ŵanthu ŵake, Yehova olaŵila kuti: “Mweo nimwe mboni zangu . . . ndipo neo n’ne Mulungu.” Yehova oŵasenga kuti ayankhe konsho yakuti: “Kansi pali soti Mulungu muyakine kupatulapo neo?” (Yes. 44:8) Tetyo, tili na mwai woyankha konsho iyi. Kupitila mu zokamba na zocita zasu, tuonesha kuti Yehova niye tyala Mulungu wacendi na kuti zina yake ni yapalulu ngako kupambana zina iyakine iliyonse. Mwatucitila zinthu mu umoyo wasu, zuonesha kuti tumukonda cendi Yehova na kuti nise okhulupilika kuli yove mosasamala kanthu za mayeselo yaangatiletele Satana. Izi zutipasa mwai woyavyako pa nchito yotuŵisha zina ya Mulungu.

12. Kansi ulosi wopezeka pa Yesaya 40:​3, 5 wekwanilishiwa tyani?

¹² Ngati tucilikiza zina ya Yehova, niye kuti tutolela cisanzo ca Yesu Khristu. Yesaya elosela kuti muyakine ‘akakonze njila ya Yehova.’ (Yes. 40:3) Kansi ulosi uyu wekwanilishiwa tyani? Yohane M’batizi ekonza njila ya Yesu wamene ewela m’zina ya Yehova nolaŵila m’zina yamene iyo. (Mat. 3:3; Mko. 1:​2-4; Luka 3:​3-6) Ulosi umozimozi welaŵila soti kuti: “Ulemelelo wa Yehova ukaonekele.” (Yes. 40:5) Kansi izi zecitika tyani? Yesu peciwela pa calo, epanamilako Yehova ndipo izi zenze monga kuti Yehova mwine wake wawela pa calo.—Yoh. 12:45.

13. Kansi tingatolele tyani cisanzo ca Yesu?

¹³ Molingana na Yesu, seo nise Mboni za Yehova. Tuziŵika na zina ya Yehova ndipo tuuzhya ŵanthu za nchito zake zodabwisa. Olo n’tetyo, kuti tikwanishe kucita izi, tufunika kulengeza zokhuza udindo wa Yesu pa kutuŵisha zina ya Yehova. (Mac. 1:8) Yesu niye Mboni ikulu ya Yehova, ndipo nase tukonkha cisanzo cake. (Chiv. 1:5) Koma kansi zina ya Yehova yufunika kutanthauza cinji kuli seo, aliyense payeka?

ZAYUFUNIKA KUTANTHAUZA ZINA YA YEHOVA KULI SEO

14. Molingana na Salimo 105:​3, kansi tukumvwa tyani cifukwa ca zina ya Yehova?

¹⁴ Tumekela zina ya Yehova. (Ŵelengani Salimo 105:3.) Yehova osangalala ngako na ŵala amene ozitama cifukwa ca zina yake. (Yer. 9:​23, 24; 1 Akor. 1:31; 2 Akor. 10:17) ‘Kuzitama mwa Yehova’ kutanthauza kumekela Yehova monga Mulungu wasu. Tuona kuti ni mwai ukulu kulemekeza nocilikiza zina yake. Tufunika lini kucita nsoni kuuzhya ayasu a ku nchito, a ku sukulu, maneba ŵasu na ŵanthu ayakine kuti nise Mboni za Yehova. Maleŵania ofuna kuti tileke kuuzhya ayakine zokhuza Yehova. (Yer. 11:21; Chiv. 12:17) Ndipo yove na aneneli ŵake awenye ofuna kucitisha ŵanthu kuluŵa zina ya Yehova. (Yer. 23:​26, 27) Koma cikondi casu pa zina ya Yehova, cutiyavya kupitilizhya kusangalala cifukwa ca zina yamene iyi siku ‘iliyonse.’—Sal. 5:11; 89:16.

15. Kansi kuita pa zina ya Yehova kuyangizhyilapo cinji?

¹⁵ Tupitilizhya kuita pa zina ya Yehova. (Yow. 2:32; Aro. 10:​13, 14) Kuita pa zina ya Yehova kuyangizhyilapo zinyinji, osati tyala kuziŵa noseŵenzesha zina ya Mulungu. Tufwika pomuziŵa bwino Mulungu monga munthu, kumudalila, nololesha kuli yove kuti atiyavye notisogolela. (Sal. 20:7; 99:6; 116:4; 145:18) Tulengeza soti za zina yake koma soti minkhalidwe yaali nayo kuli ŵanthu ayakine, noŵalimbikisha kuti alape na colinga cakuti ankhale ovomelezhyeka kwa Yehova.—Yes. 12:4; Mac. 2:​21, 38.

16. Kansi tingaoneshe tyani kuti Satana ni wawenye?

¹⁶ Nise okonzeka kuvutika cifukwa ca zina ya Yehova. (Yak. 5:​10, 11) Ngati tupitilizhya kunkhala okhulupilika kwa Yehova tikakumana na mavuto, tuonesha kuti Satana ni wawenye. M’nthawi ya Yobu, Satana elaŵila zawenye zokhuza ŵala amene otumikila Yehova. Elaŵila kuti: “Munthu angapeleke ciliconse caali naco kuti apulumuse moyo wake.” (Yobu 2:4) Satana etanthauza kuti ŵanthu angatumikile Yehova, tyala ngati zinthu zuŵayendela bwino ndipo ngati angakumane na mavuto, angaleke kumutumikila. Mtumiki wokhulupilika Yobu, eonesha kuti zecilaŵila Satana zenze zawenye. Molingana na izi, nase tili na mwai woonesha kuti Satana ni wawenye mwa kupitilizhya kutumikila Yehova mosasamala kanthu za mavuto yaangacitishe Satana. Tetyo, tingankhale na cidalilo cakuti Yehova apitilizhye kutiyanganila cifukwa ca zina yake.—Yoh. 17:11.

17. Molingana na 1 Petulo 2:​12, kansi tingapeleke tyani ulemelelo ku zina ya Yehova?

¹⁷ Tulemekeza zina ya Yehova. (Miy. 30:9; Yer. 7:​8-11) Cifukwa cakuti tupanamilako Yehova ndipo tuziŵika na zina yake, tingalemekeze zina yake olo kusailemekeza. (Ŵelengani 1 Petulo 2:12.) Tetyo, tufuna kucita zilizonse zatingakwanishe kuti tilemekeze zina ya Yehova kupitila mu zokamba na zocita zasu. Mwa njila iyi, ticite zilizonse zatingakwanishe kuti tipeleke ulemelelo ku zina ya Yehova olo kuti tiliye ungwilo.

18. Kansi ni njila iyakine yotyani yatuoneshelamo kuti zina ya Yehova ni yofunika ngako kuli seo? (Onani soti mau a m’nyansi.)

¹⁸ Tudela nkhaŵa ngako zina ya Yehova kupambana mbili yasu. (Sal. 138:2) Ndaŵa yanji kucita izi n’kofunika? N’cifukwa cakuti patucita zinthu zokondwelesha Yehova, kanyinji-kanyinji ŵanthu olaŵila ziipa zokhuza seo.a Yesu enze wokonzeka kufwa imfwa yocitisha nsoni monga nyankapondo na colinga cakuti alemekeze zina ya Yehova. Yove elola kucitiliwa zinthu “zocitisha nsoni” ndipo aliyoike ngako maganizo ŵake pa zinthu zeenzomuganizila ŵanthu ayakine. (Aheb. 12:​2-4) Yove eika maganizo ŵake pa kucita cifunilo ca Mulungu.—Mat. 26:39.

19. Kansi mukumvwa tyani cifukwa ca zina ya Yehova, ndipo ndaŵa yanji?

¹⁹ Tumekela zina ya Yehova ndipo tuona kuti ni mwai ukulu ngako kuitiwa kuti Mboni za Yehova. Cifukwa ca izi, nise okonzeka kupilila kunyozewa kulikonse kwatingakumane nako. Zina ya Yehova ni yofunika ngako kuli seo kupambana mbili yasu. Tetyo, tiyeni tinkhale osimikizhya kupitilizhya kutamanda zina ya Yehova mosasamala kanthu za mavuto yaangacitishe Satana. Mwa kucita izi, tioneshe kuti zina ya Yehova ni yofunika kuli seo, monga ni mwailili yofunika kuli Yesu Khristu.