O ka Maka Ying mo Wene Kela ba Bangwana ba sa le Tshware Gabutši?

1-2. Batho ba go tlala ba fo re king mara mo ba bona ba bangwana ba sa tshwariwi gabutši, fote re ka tiputsisa gore king?

RE PHELA ga lefase la gore batho a ba tshware ba bangwana gabutši. Batho a ba ba tshware tsona ka taba la dilo tsa go tlala tsa go tshwana le gore baa tihlupegela, ke banna kela basadi, setšo sa bona kela mohlobo wo ba leng wona. Batho ba go tlala baa hlupega ka taba la gore ba bangwana ba gore ba ghannye kela ba go yeta mahlong ba mmušo, so ba hlupegang ka sona ka matla ke go ba le sekwetše. Dilo tsowa tsa gore a yi tsona tsa gore di makiye ke ba bangwana, di ka fo ba di leyele rune kela ba bangwana bo re ba tšibang mohlupego.

² Phela a di re makatse mo ba go tlala ba kwatiye ka taba la go sa tshwariwi gabutši kela ba bona ba bangwana ba sa ba tshware gabutši. Ka mokana ga rune re ya di nyaka go phela ga lefase la gore re tikwa re tšhireletsegiye fote ba re tshwara gabutši. Batho ba bangwana ba liketsa go lukisa mathatha ya ba ma bonang ho lefaseng kela ya ma leng ga naga yo ba dulang. Ba toyatoyela memmušo le melawo kela ba vowutela bo ba go yeta mahlong tsa dipolotiki ba gore ba ba tshepisa gore ba nyoko ba lukisela mathatha. Mara, ka taba la gore ke rune Makreste, ba re tšhutisa gore re sa be “ba lefase lowa” fote re yemele Mmušo wa Modimo gore wo tle wo tlosanye taba yowa ya gore batho a ba ba tshware gabutši. (Joh. 17:16) Le mo go le ka mokgonone, o kraya yi sa re tshware tsona—re ro boya re fufulela—mo re bona ye mongwana ba sa mo tshware gabutši. Re ka tiputsisa le gore: ‘Ke make ying mara mo ke bona di makega dilo tsowa? Ayitsano go na le so nka se makang ka taba yowa gana byalo?’ Gore re thogo fetola diputsiso tsowa, tla re thomiseneng ka go lebelela gore Jehova le Jeso ba tikwa byang mo ba bona ba bangwana ba sa tshwariwi gabutši.

JEHOVA LE JESO BA HLOYYE GO BONA MO BA BANGWANA BA SA TSHWARIWI GABUTŠI

3. Ke ntaba di kwagala mo re kwatisa ke mo ba sa re tshware gabutši kela re bona ba bangwana ba sa ba tshware tsona? (Jesaya 5:7)

³ Bhayibele yi hlatolla gore ke ntaba re sa kwane natso mo ba sa re tshware gabutši kela mo re bona ba bangwana ba sa tshwariwi gabutši. Yi hlatolla gore mo Jehova a re maka, o makiye gore re tshwane naye, “o kwana le go loka fote aa hlawolane mo a yahlula.” (Pis. 33:5; Gen. 1:26) A ka sa ro tsoga a tshwere ye mongwana bošidi fote aa nyake le motho ka wwoši a tshware ba bangwana ka mokgonone! (Dot. 32:​3, 4; Mmik. 6:8; Zak. 7:9) Mo re beyisa, ka dinako tsa Jesaya wa go porofeta, Jehova o kwile Maisrayele ya go tlala ya gore ne ‘ma gotla ka taba la gore Maisrayele ya mangwana ne ma sa ma tshware gabutši.’ (Bala Jesaya 5:7.) Jehova o yye a wolola bo ba gore ne ba fo ya mahlong ba sa theetsele melawo yage ba boya ba sa tshware ba bangwana gabutši.—Jes. 5:​5, 13.

4. Jeso o tikwa byang mo ye mongwana ba sa mo tshware gabutši? (Lebelela le sethombhe.)

⁴ Go fo tshwana le Jehova, Jeso o kwana ka matla le go loka mara o hloyye mo a bona ba bangwana ba sa ba tshware gabutši. Tšatši le lengwana o yye a bona morene mongwana wa gore ne a golofele—a na le letsogo la go kokotana. Jeso o yye a mo kwela go baba ke mokane a mo gelepa, mara bo ba go yeta mahlong tsa sedumedi ba gore a ba na pelo, ba yye ba kwata. Ba yitseri Jeso ne a tshela molawo wa Sabatha. Ke mo ba se na taba le gore morenela aa sa kwa go baba. Jeso o yye a tikwa byang mara mo a bona ka mokgo ba yyeng ba titshwara ka gona? O yye “a kwa go baba ka matla ka taba la gore ne ba na le lešidi.”—Mar. 3:​1-6.

5. Ke selo sefeng so re sa tshwanelang go se lebala mo di tla ga taba ya go kwatisa ke go sa tshwariwi gabutši?

⁵ Jehova le Jeso ba kwata ka matla mo batho ba sa tshware ba bangwana gabutši. Byalo, le rune a re sinyi mo re tikwa ka mokgonone. (Maef. 4:26) Mara, di nyaka re sa lebale gore le mo re ka fo kwata—di boya di ro kwisisega gore ke ntaba re kwatiye—tsotsone di ka sa lukisi bothatha byowa bya gore batho a ba tshwariwi gabutši. Gabutšibutši, mo re fo dula re kukumusiye dikana nako ya go lefa, re ka feleletsa re lwala kela ra kgahleletsega. (Pis. 37:​1, 8; Jak. 1:20) Byalo, re ka tshwaragana byang le taba yowa ya mo ba sa re tshware gabutši kela re bona ba bangwana ba sa ba tshware gabutši? Wa tšiba, re ka tšhuta se sengwana ga mošupetso wa Jeso.

JESO O YYE A MAKA YING MO A BONA BA BANGWANA BA SA TSHWARIWI GABUTŠI?

6. Nakwela Jeso a le ho lefaseng, batho ba bangwana ne ba ba tshwara bošidi ka mekgwa yifeng? (Lebelela le sethombhe.)

⁶ Jeso o bonne batho ba go tlala ba sa ba tshware gabutši. Ke mo a di tšiba tsa gore bo ba go yeta mahlong tsa sedumedi ke mo ba tokegela melawo ya go tlala ya gore ke mo yi roba batho. (Mat. 23:​2-4) Fote ke mo a di tšiba tsa gore ba go lawola ba Maroma ke mo ba tshwara batho bošidi. Majuda ya go tlala ke mo ma sa sa nyaka selo, ma fo tinyakela gore ma lokologe ga Maroma. Ya mangwana, ma yye ma šinya ma ro maka megoba ya gore yi lwa le Maroma. Mara, Jeso a sanka a wela ga mogoba wone wa gore ne wo lwela gore mmušo wo tšhentšhe. Byalo, mo Jeso a di bona tsa gore ba polanne go maka gore a be kgoši, o yye a ngwega.—Joh. 6:15.

7-8. Ke ntaba Jeso a sa liketsa go lukisa mathatha ya a ma bonneng nakwela a le ho lefaseng? (Johane 18:36)

⁷ Nakwela Jeso a sa le ho lefaseng, a sanka a kenakena ga tsa dipolotiki gore a liketse go lukisa mathatha yaa a ma bonneng. Ke ntaba mara? Ke mo a di tšiba tsa gore batho a baa tshwanela go lawola batho ba bangwana kela ba ka sa di kgone go maka tsotsone. (Pis. 146:3; Jer. 10:23) Fote batho ba ka sa di kgone le go tomola midu ya mo taba ya go sa tshwariwi gabutši yi tšwang gona. Sathane Diyabolo ke yene a lawolang lefase lowa. Mo ba bolabola ka lešidi, ba ra Sathane fote batho ba go tlala ba lefase lowa ba dula ba kopisela yene. (Joh. 8:44; Maef. 2:2) Fote le taba ya go sa yenela yi maka gore di sa kgonege le ga mong bala ba gore re ba tseya ba lukiye gore le bona ba make dilo gabutši ka moka nako.—Mmo. 7:20.

⁸ Jeso ke mo a di tšiba tsa gore ke Mmušo wa Modimo fela wo wo ka napang wo tomola wo lahlela ku kgole midu ya taba yowa ya go sa tshwariwi gabutši. Nka taba lo a yyeng a karakara ka matla gore a “[tšhomayele] le go sabalatsa ditaba tsa go bafala tsa Mmušo wa Modimo.” (Lluk. 8:1) Ka mokgonone, o yye a kgomoletsa batho ba gore ba di lambhele tsa gore go fele ka mohlupego le dilo tsa go befa. (Mat. 5:6; Lluk. 18:​7, 8) A go na mmušo le mong ka wwoši wa batho wa gore wo ka tšhentšha dilo tsowa. Ke Mmušo wa Modimo fela wo wo ka di kgonang, fote Mmušo wa Modimo “a yi wa lefase lowa.”—Bala Johane 18:36.

YEKISELA JESO MO O BONA BA BANGWANA BA SA TSHWARIWI GABUTŠI

9. Ke ntaba o tshepa gore Mmušo wa Modimo ke wona fela wa gore wo ka fetsa ka mehlupego ka moka?

⁹ Re phela ga “dinako tsa mafelelo” tsa lefase lowa, byalo go na le mathatha ya go tlala go phala ya nakwela Jeso a le ho lefaseng. Mara go fo tshwana le ka dinako tsa Jeso, bo ba re leyelang mohlupego ke Sathane le batho ba dipelo tse diphifadu ba gore ba kopisela gage. (2 Thim. 3:​1-5, 13; Kut. 12:12) Go fo tshwana le Jeso, re ya di tšiba gore ke Mmušo wa Modimo fela wo wo nyoko fetsang ka ye a makang gore batho ba sa tshwariwi gabutši, yene Sathane, fote wo nyoko tlosa dilo ka mokana ga tsona tsa go sa loka. Byalo, ka taba la gore re thega Mmušo wa Modimo, o ka sa re krayi re yemisiye loto ka lloši re re re ya toyatoya kela re tshepela ga memmušo gore yi fetse ka taba yowa ya gore batho a ba tshwariwi gabutši. Lebelela tso mogageru wa mosadi ye ba reng ke Stacy a gahlanneng natso.a Mo Stacy a soko bane a tšhuta nnete, ne a dula a toyatoyela taba ya gore batho a ba tshwariwi gabutši. Mara o yye a thomisa go kamaka taba yo ne a yi maka. O re: “Mo nkene ke le ga ditoyitoyi, ne ke fela ke tiputsisa gore ayitsano ke thega mokgwa wa gabutši wa go lukisa bothatha byowa. Mara gana byalo ka taba la gore ke thega Mmušo wa Modimo, ke ya tšiba gore wo nyoko lukisa mathatha ka moka. Ke ya di tšiba gore Jehova o nyoko fetsa ka mehlupego ka moka, go leng selo sa gore nna ne nka sa tsoge ke di kgonne go se maka.”—Pis. 72:​1, 4.

10. Matewu 5:​43-48 yi re ke ntaba re sa liketse go tšhentšha melawo le memmušo? (Lebelela le sethombhe.)

¹⁰ Batho ba go tlala lekgono ba joyina megoba ya gore yi liketsa go tšhentšha memmušo. Le mo go le ka mokgonone, ba go tlala ba bona baa kwata, ba tshela melawo fote ba kwaletsa ba bangwana. Phela tsowa, a yi tsona tso Jeso a re tšhutisiyeng gore re di make. (Maef. 4:31) Mogageru ye mongwana ye ba reng ke Jeffrey o re: “Ke ya di tšiba gore mo batho ba toyatoya, ba fo yakgoswa ba kwata lela la go šinya ba thomisa go sinyanya dilo, ba yetswa ba boya ba ro kwaletsana bona beng.” Mara, Jeso o re tšhutisa gore re kwane le batho ka mokana ga bona, go tokegela le bo ba go re phigisa kela ba go re hlupegisa. (Bala Matewu 5:​43-48.) Ka taba la gore ke rune Makreste, re maka so re ka se kgonang gore re kganele kgole le selo se sengwana le se sengwana sa gore a se sipidisane le mošupetso wo Jeso a re beyeleng wona.

11. Ke ntaba ka dinako tse dingwana di ka re thathafela go yekisela Jeso?

¹¹ Wa tšiba, le mo re kene re di tšiba tsa gore Mmušo wa Modimo wo nyoko fetsa ka mohlupego go ya go yye, o ka kraya di re thathafela go yekisela Jeso mo ba sa re tshware gabutši. Lebelela tso di makegeleng Janiya, wa gore batho ba yye ba sa mo tshware gabutši ka taba la khala yage kela mohlobo wo a leng wona. O re: “Ne ke kwatiye la mafelelo. Di nkwisiye go baba fote ne ke nyaka gore batho bone ba gore a ba ntshwara tsona ba ba lukise. Ke mokane ka nagana ka go thega ditoyitoyi tsa gore di lwela batho ba go sa tshwariwi gabutši go ya ka khala ya bona. Ne ke bona nkare mo ke maka ka mokgonone, ne go ko ba go le mokgwa wa gabutši wa go šupetsa ka mokgo ke kwatiyeng.” Mara, mo nako yi kene yi ya, Janiya o di bonne tsa gore di nyaka a tšhentšhe go gongwana. O re: “Ke di bonne gore ne ke thomisa go tshepa tso batho ba di hlayang ke boya ke tshepela ga bona, ne ke sa tshepela ga Jehova. Ke yye ka fetsa ka gore ke tšwe ga megoba yone fote ka lisetsa go tšhela letsogo ga dilo ka moka tsa go sipidisana nayo.” Le mo di re kwatisa mo ba sa re tshware gabutši kela mo re bona ba bangwana ba sa ba tshware gabutši, di nyaka re pasope gore re sa kwate lela la gore re šitega go titshwara fote ka dinako ka moka re sa kenakene dilo tsa lefase lowa.—Joh. 15:19.

12. Ke ntaba di ko ba di le gabutši gore re kgete dilo tso re di balang, re di lebelelang kela tso re di theetselang?

¹² Re ka gelepa king mara gore re dule re kgibiye mo rune kela ba bangwana ba sa ba tshware gabutši? Selo se sengwana so se ka re gelepang, ke go pasopa dilo tso re di balang, tso re di theetselang le tso re di lebelelang. Ditaba tse dingwana tsa gore di ho ga Inthanete ba di makele gore di tshose batho le go ba maka gore ba kokolele mmušo. Ga go tlala, o kraya bo ba begang ditaba ba hlaya ka mokgo bona ba tseyang dilo mara go se tso di makegiyeng. Le mo re ka fo kwa taba ya gore yi makegiye ya go bolabola ka batho ba gore a baa tshwariwa gabutši, ayitsano dya thuša go fo dulela go nagana ka yona? Gabutšibutši, mo re ka fetsa nako ya go tlala re theetsele kela re bala ka ditaba tsa mošaga wonowa, re ka feleletsa re šekela, re kgongwela re boya re kwata. (Diy. 24:10) Re ka boya ra ro lisetsa le go yetisa Mmušo wa Modimo mahlong mo re kene re phela fote ra lebala le taba ya gore ke Mmušo wa Modimo fela wo wo ka lukisang mathatha ka mokana ga wona.

13. Go bala Bhayibele ka moka matšatši go ka re gelepa byang mo re bona ba bangwana ba sa ba tshware gabutši?

¹³ Mo re ka fo bala Bhayibele ka moka matšatši ra boya ra ghayela ka tso re di badiyeng, tsotsone di nyoko re gelepa gore re thogo tšiba selo sa gabutši so re tshwaneleng go se maka mo ba sa re tshware gabutši kela re bona ba bangwana ba sa ba tshware gabutši. Mogageru wa mosadi ye ba reng ke Alia o yye a kgongwela mo a bona batho ba poleke yo a dulang ga yona ba sa ba tshware gabutši. Ne di šupetsa nkare batho bo ba gore ne ba sa tshware ba bangwana gabutši ne ba fo ba lisetsa. O re: “Ke yye ka dula fase ke mokane ka tiputsisa gore, ‘Ayitsano ke ya di tshepa tsa gore Jehova o nyoko lukisa mathatha yawa?’ Ke mo go le ka dinako tsone mo ke yyeng ka bala Jobo 34:​22-29. Ditemanyana tsone di n’gopotsiye gore a go na ye a ka wutamelang Jehova. Ke yene a ntoši ye a di kgonang go yahlula batho gabutši fote ke yene fela ye a ka lukisang mathatha ka mokana ga wona ya batho.” Mara mo re kene re sa yemele Mmušo wa Modimo gore wo lukise mathatha ka moka, rune re ka tšwa re maka ying gana byalo?

RE MAKE YING GANA BYALO?

14. Ke selo sefeng so re ka se makang gana byalo? (Makolosi 3:​10, 11)

¹⁴ Re ka sa di kgone go tšhentšha ka mokgo batho ba tshwarang ba bangwana ka gona, mara re ka liketsa ka matla gore rune re tshware ba bangwana gabutši. Akere re šele re tšhutiye gore re yekisela Jeso ka go šupetsa gore re ya nyakanana. Byalo, re liketsa go tshwara batho ka mokana ga bona gabutši—re ra le mong bala ba gore a ba re tshware tsona. (Mat. 7:12; Marom. 12:17) Jehova o jabola ka matla mo re tshwara batho ka mokana ga bona gabutši fote re ba tshwara ka go lekana.—Bala Makolosi 3:​10, 11.

15. Re gelepa batho byang mo re ba botsa tso Bhayibele yi di tšhutisang?

¹⁵ Mokgwa wa gabutši ka matla wa go gelepa batho ke mo re ba tšhutisa ka Jehova. Ke ntaba re reyane? Ka taba la gore go “tšiba ka Jehova” go ka tšhentšha motho wa gore ne a kwana le go kwata le bokgohlane gore go be motho wa pelo ye butši le wa gore o nyakanana ka matla. (Jes. 11:​6, 7, 9) Mo Jemal a soko bane a tšhuta nnete, o yye a joyina mogoba wo mongwana wa gore ne wo lwela go tšhentšha mmušo wa naga ya gabo ka taba la gore ne wo bona nkare a wo make tsona. O re: “O ka sa gapeletse motho gore a tšhentšhe. Le nna a ke ya gapeletsa ke motho gore ke tšhentšhe, mara ke gelepiye ke go tšhuta nnete ya Bhayibele gore ke thogo tšhentšha.” Dilo tso Jemal a di tšhutiyeng di mo hlohletsele gore a lisetse go lwa. Byalo, mo re tšhutisa batho nnete ya go tšwa ka ho Bhayibeleng, re ka ba gelepa gore ba lisetse go maka dilo tsa gore di kwisa ba bangwana go baba.

16. Ke ntaba o kwa di go tšhofa gore o botse ba bangwana ka tshepo ya Mmušo wa Modimo?

¹⁶ Go fo tshwana le Jeso, re dula re tikemisele go botsa batho gore Mmušo wa Modimo ke wona wo le ntoši wo wo nyoko tlosang mohlupego go ya go yye. Tshepo yone yi ka tiyisa bo ba gore ne ba sa ba tshware gabutši. (Jer. 29:11) Stacy, yela wa gore re bolabodiye ka yene, o re: “Ka taba la gore ke ya di tšiba tsa gore Modimo o nyoko fetsa ka mohlupego, ke dula ke kgibiye mo ba sa ntshware gabutši kela mo ke bona ba bangwana ba sa ba tshware gabutši. Jehova o berekisa molayetsa wa Bhayibele gore a re kgomoletse.” Di nyaka re dule re tikemisele gore re kgomoletse ba bangwana ka dilo tso Bhayibele yi di tshepisang. Mo o ka fo tšiba gabutši gore Bhayibele yi re king ka mohlupego, dilo tso yi di tšhutisang o ko napa o di tshepa mong go di tshepa. Ke mokane, mo o le sekolong kela mmerekong o ko thogo tšhutisa ba bangwana gore ke ntaba re hlupega le gore Jehova o nyoko maka ying gore a fetse ka mohlupego.b

17. Jehova o re gelepa byang mo ba sa re tshware gabutši?

¹⁷ Re ya di tšiba phela gore solanka Sathane go sa na go le yene “ye a lawolang lefase lowa,” re nyoko dula re sa tshwariwi gabutši kela ra bona ba bangwana ba sa ba tshware gabutši. Mara tsotsone a di rele gore re psyile mo re kene re sa yemele gore a ‘bošediwe ka tawong.’ (Joh. 12:31) Mo re beyisa, ka ho Bhayibeleng Jehova o re botsa gore ke ntaba go na le mohlupego ka mokgo, le gore o na le taba ka bo ba gore a ba tshwariwi gabutši. (Pis. 34:​17-19) Ga Jeso re tšhuta gore re titshware byang mo ba bangwana ba sa re tshware gabutši. Fote go se botala Mmušo wa Modimo wo nyoko tlosa mohlupego fote batho ba ka sa tsoge ba ba hlupegisiye. (2 Pet. 3:13) Nkare re ka ya mahlong re tšhomayela ka matšato ditaba tsa go bafala tsa Mmušo wa Modimo, re kene re yi yemele ka maahlo ya makhubedu nako ya mo lefase le tlele “ka go loka.”—Jes. 9:7.