Go Neela Ditaba tše Lokilego—Re le Lapa
1 Lapa leo le ineetšego leo le bago le karolo ka mo go tletšego tirelong e kgethwa—tate, mma le bana ba direla Modimo ka moya ka moka—ruri le tumiša leina le legolo la Jehofa. Re thabišwa ke gore malapa a bjalo a mantši a hwetšwa ka diphuthegong tša batho ba Jehofa lefaseng ka bophara.
2 Ee, tate o na le boikarabelo bjo bogolo bja go hlokomela dinyakwa tša moya tša lapa la gagwe. (1 Ba-Kor. 11:3) Ka tirišano ya mosadi wa gagwe le bana ba gagwe, lapa la gagwe le ka tsenya tutuetšo e matla go ba bangwe. (Mat. 5:16) Ke mafelo afe a mangwe moo tirišano ye e ka bontšhwago gona?
BATSWADI BA ETELELA PELE
3 Mabakeng a mantši, mo gongwe tate e ka ba e le mogolo goba mohlanka wa bodiredi. Se se bolela gore go oketša dikgahlegong tša lapa la gagwe, e nngwe ya nako ya gagwe le tlhokomelo di swanetše go newa ditabeng tša phuthego. Boikarabelo bja tate ke go kgonthišetša gore nako yeo e lego gona e a aroganywa e le gore lapa la gagwe le se hlokomologwe. Mo gongwe se se ka se be bonolo ka mehla ka baka la dilo tšeo di nyakago nako ya gagwe yeo e lekanyeditšwego. Eupja ka ge lapa la gagwe e le boikarabelo bja gagwe bjo bogolo, ka mehla o swanetše go rulaganya e nngwe ya nako yeo a nago le yona gore a be le lapa la gagwe thutong, tirelong ya tšhemo, dibokeng le boitapološong bjo bo swanetšego. Maemo le boikarabelo bjo bongwe mo gongwe di ka fetoša thulaganyo ya tate ka dinako tše dingwe, eupja ke mo go putsago gakaakang ge a ka diriša nako kgweding e nngwe le e nngwe tirelong ya tšhemo a e-na le ditho tša lapa!
4 Tirišano ya mosadi ke ya bohlokwa. A ka tlatša monna wa gagwe ka tsela e bohlokwa kudu ka go thuša go tlwaetša bana bodireding. Phišego ya gagwe le boineelo bjo bo beago mohlala di tla dira mo gontši bakeng sa go tutueletša bana go gola tabeng ya go leboga ga bona bodiredi.—2 Tim. 3:14, 15.
5 Go na le mehlala e mentši e mebotse ya maemo ao go ona motswadi o tee a rwelego morwalo wa boikarabelo bja moya gomme a tlwaetša bana ka katlego bodireding. Ka baka la mohlala o mobotse kudu wa mmago bona goba tatago bona, bafsa ba bantši ba ile ba emela therešo ka go tia, gaešita le go tšea bodiredi bja nako e tletšego.
BOIKARABELO BJA BANA
6 Go thwe’ng ka boikarabelo bja bana? Gaešita le Morwa yo a phethagetšego wa Modimo, Jesu, ge e be e sa le ngwana, o be a ikokobeletša tlhahlo le tayo ya batswadi ba gagwe. (Luka 2:51) Ka gona, ge tate le mma ba rulaganya gore lapa le diriše nako le le gotee bodireding, ruri bana ba gapeletšega go bontšha boineelo bja bona go Modimo ka go dirišana le batswadi ba bona.—Ba-Ef. 6:1-3.
7 Go rapela gotee le le lapa—go ithuta, go ba le karolo bodireding bja tšhemo le go ya dibokeng—go matlafatša ditlemo tša lerato le botee tikologong ya lapa. Batswadi le bana ba na le boikarabelo tabeng ye.