Godiša Kgahlego Ka Go Dira Dipoelo Tše Di Atlegago

1 Polelo e nngwe le e nngwe yeo e lokišeditšwego gabotse e akaretša matseno ao a tsošago kgahlego, mmele o tletšego tsebišo le phetho e tutuetšago. Matseno a tanya tlhokomelo ya batheetši, eupja ka ntle le mmele le phetho polelo e tla ba e sa felelago. Molao o swanago wa motheo o šoma bodireding bja rena. Ke mo gobotse go tsoša kgahlego ya mong wa ntlo ketelong ya mathomo, eupja re swanetše go tšwela pele re godiša kgahlego yeo ya mathomo ka go dira dipoelo tše di atlegago.

2 Ke ka baka la’ng Modimo a dumelela tlaišego? Yeo ke potšišo e šišinyago monagano gakaakang! Na ga o dumele gore taba ye e menaganong ya batho ba bantši lehono? Ke ka baka leo sehlogong se se lego ka mo godimo go šišintšwego gore o rotoše potšišo ye mafelelong a ketelo ya mathomo ka kgopolo ya go tla go e araba ge o dira poelo.

3 Mo gongwe o ka bolela se:

◼“Dumela. Nakong e fetilego ge re be re bolela, taba ya go dumelela ga Modimo tlaišego e ile ya rotoga gomme ka holofetša go boa ke go swaretše tsebišo. Batho ba bantši ba nagana gore ge nkabe ka kgonthe Modimo a tshwenyega ka rena, o be a tla fediša tlaišego. Mohlomongwe o kile wa ikwa ka tsela e swanago. [Dumelela mong wa ntlo gore a arabe.] Beibele e re kgonthišetša gore ruri Modimo o a tshwenyega. [Bala 1 Johane 4:8.] Modimo o na le mabaka a kwalago a go dumelela tlaišego gore e tšwele pele go fihla mo nakong ye. Le lengwe la mabaka ao le hlalositšwe go 2 Petro 3:9. [Bala.] Mabaka a mangwe a hlalositšwe ka pukwaneng ye.” Ka gona phetla go letlakala 15 la pukwana ya ‘Bonang, Dilo ka Moka ke di Dira tše Mpsha’ gomme o ahla-ahle ntlha yeo e kgahlišago.

4 Beng ba bangwe ba dintlo ba ka thabela tlhaloso e nabilego kudu, gomme go ka nyakega dipoelo tše mmalwa pele ga ge ba kgotsofala ka mo go tletšego ka karabo. Dipuku tše dintši tše di tlemilwego tša Mokgatlo tša matlakala a 192 tšeo di tlago go sepedišwa ka January di akaretša kgaolo yeo e ka dirišwago e le motheo wa go tšwetša poledišano ya taba pele.

5 Ge o e-ya mafelelong a poledišano, rotoša potšišo e nngwe gomme o botše mong wa ntlo gore o tla thabela go abelana le yena tsebišo e kgahlišago ge o boa. Batho ba bantši ba rata go tseba seo se diregago ge motho a e-hwa. Ke ka baka la’ng o sa rulaganyetše go ahla-ahla taba yeo ka nako e swanetšego?

6 E ka ba mo go holago go wena go gopola melao e meraro ya motheo. E-ba yo a feto-fetogago le maemo. Mong wa ntlo a ka ba a se a tlwaela go beela nako e itšego ka thoko bakeng sa poledišano ya Beibele. Bolela ka boripana. O se ke wa dula nako e telele goba wa akaretša dintlha tše dintši kudu di tloga fase. Mabakeng a mantši, go tla ba le karabelo e kgahlišago kudu diketelong tša gago ge e ba o akaretša dintlha tše sego kae feela ka nako e kopana. E-ba yo botho le yo a nago le bogwera. Bontšha mong wa ntlo gore wena ka noši o a mo kgahlegela.

7 Pakane ya rena gona bjale ke go akaretša mong wa ntlo poledišanong ya Mangwalo. Ka gona re nyaka go thoma thuto e enywago ya Beibele ya legae ka puku e swanetšego, bjalo ka puku ya Phela ka mo go sa Felego. O ka ba le lethabo le bjalo ge e ba o godiša ka go se fele pelo kgahlego ya mathomo ka go dira dipoelo tše di atlegago.