Diboka Tša Tirelo Tša January
Beke e Thomago ka January 4
10 mets:Ditsebišo tša phuthego le Ditsebišo tše di swanetšego tše di tšwago go Tirelo ya Rena ya Mmušo.
20 mets:“Bolela ka Tsela ya Modimo e Išago Khutšong le Polokegong.” Kakaretšo ya sehlogo ka dipotšišo le dikarabo. Kgothaletša bagoeledi go diriša mpho e šišintšwego ya puku tirelong ya tšhemo. Ka morago ga go ahla-ahla serapa 7, dira gore mogoeledi yo a lokišeditšego gabotse a bontšhe kamoo thuto ya Beibele e ka thongwago ka gona ketelong ya mathomo goba poelong, a diriša pampišana ya Bophelo Lefaseng le Lefsa la Khutšo. Mogoeledi: “Re a lotšha. Re boledišana le batho lehono ka boemo bja bophelo. Na o kgotsofetše ka seo o se bonago se direga maphelong a batho lehono?” Mong wa ntlo: “Le gatee.” Mogoeledi: “Na o nagana gore boemo bo tla kaonefala?” Mong wa ntlo: “Ga ke tsebe.” Mogoeledi o neela pampišana gomme o re: “Ba bangwe ba nagana gore seo se diregago ke phethagatšo ya boporofeta bja Beibele le gore bofelo bja lefase bo kgaufsi. Wena o nagana’ng?” Mong wa ntlo: “Ga ke tsebe. Ke nagana gore go ka ba go le bjalo.” Ke moka mogoeledi o šupa pampišaneng gomme o hlalosa gore bofelo bja lefase ga bo bolele go fela ga magodimo a kgonthe le lefase. Mogoeledi o rulaganyetša go etela gape bakeng sa go ahla-ahla bohlatse bja Beibele bja gore bofelo bja tshepedišo ya gona bjale bo kgaufsi.
15 mets:Tše di nyakegago tša phuthego, goba polelo yeo e nago le sehlogo se se rego E-ba le Pono e Swanetšego ka Boithabišo, e theilwego go Phafoga! ya November 8, 1992, matlakala 3-10.
Kopelo 139 le thapelo ya go phetha.
Beke e Thomago ka January 11
10 mets:Ditsebišo tša phuthego. Gopotša banababo rena ka dithulaganyo tša tirelo ya tšhemo mafelo-bekeng a tlago.
20 mets:Romelang Bana ba Lena Sekolong ba E-na le Dikgopolo tša Modimo ka Dipelong. Polelo ka mogolo. Re phela lefaseng leo le katanelago go re gapeletša go swana le lona. Se ke sa therešo kudu-kudu ka bafsa ba rena. Batswadi ba swanetše go lemoga dinyakwa tša bona le mathata. (Die. 20:5) Ba swanetše go bjala melao ya Modimo le lerato gotee le lerato la batswadi go bana ba bona. Pontšho: Lapa le boledišana kamoo le ka dirišago pukwana ya Sekolo ka gona. Ngwana o mongwe o ya sekolo ka lekga la mathomo, mola bana ba bangwe ba babedi ba e-na le nywaga e mmalwa ba tsena sekolo. Kgetha ntlha yeo e tlago go šoma maemong a o mongwe le o mongwe. Dira gore bana ba itlhalose ka mantšu a bona ka noši go motswadi yo a tšeago karolo ya morutiši. Kgonthišetša gore bana ba kwešiša melao ya motheo yeo e akaretšwago. Mogolo o gopotša batswadi gore bana ba bona ba swanetše go se akaretšwe thutong ya bodumedi le ditiragalong tša letšatši le letšatši tša bodumedi (go akaretša go balwa ga karolo ya Beibele le go rapela). Tate goba mma o swanetše go ya le (ba)ngwana go ya go bona hlogo ya sekolo, a ye a swere lengwalo la go kgopela go se akaretšwe. Dikolong tše dingwe barutiši ba ile ba bontšha go ba le kwešišo ka go beela ka thoko phapoši yeo go yona bana ba Dihlatse ba ka bokanago ka dinako tša thuto ya bodumedi. Dikolo tše dingwe di bile di dumeletše gore motswadi a hlokomele bana ba Dihlatse le go ba ruta ditaba tša Beibele. Mo go dirilwego tokišetšo ye, mogolo o swanetše go e hlokomela ka šedi le go kgonthišetša gore bagoeledi bao ba nago le bokgoni ba phetha se. Ngwanabo rena yo a swarago karolo ye o kgothaletša thuto ya Beibele ya lapa le go gatelela go nyakega ga gore batswadi ba be le tswalano ya kgaufsi le ya bogwera le bana ba bona.
15 mets:Go Phema Mathata a Tšhelo ya Madi—Nako ya go Mpshafatša Di-Advance Medical Directive tša Rena. Mogolo yo a swarago karolo ye o dira gore dikarata tše difsa di abelwe bagoeledi bao ba kolobeditšwego gomme o ahla-ahla ka kelohloko lengwalo la October 15, 1992 leo le hlalosago ka mohola wa dikarata tše. Ge o lokišetša, boeletša ka kelohloko lengwalo la Mokgatlo la January 1, 1990. Bao ba saenago e le dihlatse ba swanetše go bona mong wa karata a saena karata ye. Kgothaletša bohle gore ba tlatše dikarata tše difsa pele ga ge ba tloga Holong ya Mmušo. Bagoeledi bao ba kolobeditšwego le ka mohla ga se ba swanela go tloga gae ba se na karata ya bona ya Advance Medical Directive/Release. Bana bao ba sa kolobetšwago ba batswadi ba Dihlatse ka mehla ba swanetše go swara Identity Card. Nyakišišo ya morago bjale yeo e dirilwego sebokeng se sengwe sa phuthego e bontšhitše gore mogoeledi o 1 go ba bangwe le ba bangwe ba 5 o be a se na karata ya gagwe, gomme ga go na bana bao ba bego ba swere di-Identity Card tša bona. Ge o phetha, bala Diema 22:3 gomme o e hlalose.
Kopelo 151 le thapelo ya go phetha.
Beke e Thomago ka January 18
10 mets:Ditsebišo tša phuthego le Ditaba tša Pušo ya Legodimo. Bala pego ya tša ditšhelete le ditebogo tša Mokgatlo tša meneelo. Reta phuthego bakeng sa thekgo ya potego ya tša ditšhelete phuthegong ya lena gotee le modirong wa Mokgatlo wa lefase ka bophara.
20 mets:“Go Diriša Ditlabakelo tše Bohlokwa ka Bohlale.” Ka morago ga matseno a makopana ka modula-setulo, go tla ba le dipontšho tše pedi tšeo di theilwego tabeng yeo e hlalositšwego go dirapa 2 go ya go 5. Mafelelong a pontšho ya mathomo mong wa ntlo o amogela mpho. Mogoeledi o holofetša go boela go ya go araba potšišo e rego, Ke ka baka la’ng Modimo a dumelela tlaišego? Mafelelong a pontšho ya bobedi go thongwa thuto ya Beibele ya legae. Kgothaletša bohle go akaretša beng ba dintlo poledišanong ya Mangwalo ge ba šoma tirelong ya tšhemo mafelo-bekeng a.
15 mets:Lebaka Leo ka Lona Bakriste ba Ilago Madi. Polelo ka mogolo, e theilwego tlhalosong le dihlogwaneng tše tharo tša pele ka tlase ga “Madi” ka pukung ya Go Boledišana, matlakala 262-3.
Kopelo 177 le thapelo ya go phetha.
Beke e Thomago ka January 25
5 mets:Ditsebišo tša phuthego. Kgothaletša bohle gore ba akgofele go bega tirelo ya bona ya tšhemo mafelelong a kgwedi.
10 mets:“Tokelo e Botse ya Tirelo.” Poledišano le batheetši. Ge e ba nako e dumela, boledišana le mogoeledi yo a nago le tsejana e tsepamego ya dimakasine. O e thomile bjang? E mo thušitše bjang go mediša kgahlego goba go lemoga gabotse bogolo bja kgahlego ya mong wa ntlo? Kgothaletša phuthego go ba le karolo e tletšego modirong wa dimakasine, o boeletše tše dingwe tša ditšhišinyo tšeo di neilwego ka go Tirelo ya Rena ya Mmušo ya October 1992, letlakala 11.
15 mets:“Na o ka Hlankela Jehofa o le Mmulamadibogo?” Poledišano le batheetši. Boledišana le mofsa yo e lego mmulamadibogo wa ka mehla goba mogoeledi yo a ilego a bula madibogo e sa le mofsa. Gatelela kamoo batswadi le ba bangwe ba ka kgothaletšago bafsa ka gona go fihlelela pakane ya bona ya go bula madibogo. Dira boipiletšo ka borutho go bohle gore ba naganišiše kudu ka dikgonagalo tša gore ba tsenele tirelo ya nako e tletšego. Rulaganya e sa le bjale gore o be mmulamadibogo wa go thuša ka April.
15 mets:“Godiša Kgahlego ka go Dira Dipoelo tše di Atlegago.” Polelo e kopana yeo e latelwago ke pontšho ya poledišano yeo e hlalositšwego go serapa 3. Ge e ba nako e dumela, dikarolo tše dingwe tša motheo tša thero tše bjalo ka matseno goba go fetela lengwalong di ka boeletšwa.
Kopelo 160 le thapelo ya go phetha.