Na O Ka Go Dira?

1 O botšiša gore, ‘Go dira eng?’ Diema 3:27 e a araba: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” Na “’atla sa xaxo se kxôna” go katološa mediro ya gago gomme o be le karolo tirelong ya bobulamadibogo bja go thuša goba bja ka mehla? Na o ka dira seo?

2 E bile mo go kgothatšago gakaakang go bala ka go 1993 Yearbook gore go bile le palo-gare ya babulamadibogo ba go thuša le ba ka mehla ba 6303 Afrika Borwa, e lego karolelano ya mmulamadibogo o tee go bagoeledi ba seswai. Ee, ba 814 ba tsenetše tirelo ya bobulamadibogo ngwagola. Se se fihlelela tekanyo ya bagoeledi ba ba fetago ba babedi ka letšatši, bao ba ilego ba hlahloba maemo a bona gomme ba hwetša gore ba ka kgona go dira mo gontši bodireding.

3 Bobulamadibogo bja go thuša ke tsela ya go direla ba bangwe tše botse. Ka April 1992 go be go e-na le babulamadibogo ba go thuša ba 8611 Afrika Borwa. Ke mo gobotse kudu. Bagoeledi ba bantši ba tsoma ditsela tša go dira bobulamadibogo bja go thuša gantšinyana ngwageng.

4 Bakeng sa go hlahloba ge e ba o ka “xo dira” goba go se bjalo, sa pele o swanetše go hlahlobišiša kganyogo ya gago e tšwago pelong. (Mat. 22:37-39) Ditiro 20:35 e re: “Lešexo la monei le phala la monewa.” Ga go na pelaelo gore bao ba neago thušo ya moya ka boati go tšwa pelong ba na le kganyogo e nepagetšego. Gore o be mogoeledi goba mmulamadibogo yo a atlegago, kganyogo yeo ke ya bohlokwa.

5 Sa bobedi, hlahloba maemo a gago a gona bjale. Na o ka beakanya ditaba tša gago tša letšatši le letšatši gore o hlankele ka nako e tletšego? Ga se bohle bao ba ka kgonago. Eupja ka morago ga go itlhahloba ka thapelo, ngwageng o mongwe le o mongwe ba dikete ba hwetša tsela ya go “xo dira.” (Ba-Kol. 4:5; w77 letl. 701) Ka mohlala, malapa a mangwe a kgetha dikgwedi tše itšego gore ditho tše dingwe tša lapa goba ka moka di tsenele bobulamadibogo bja go thuša. Malapa a mangwe a thekga ka tša ditšhelete se sengwe sa ditho tša ona e le mmulamadibogo wa ka mehla. Na lapa la gago le ile la naganišiša ka dikgonagalo tše?—Bona Diema 11:25.

6 Go thuša ba bangwe go tseba therešo go tliša kgotsofalo ya kgonthe, go sa šetšwe ge e ba o hlankela bjalo ka mogoeledi goba mmulamadibogo. Re a tseba gore lethabo la kgonthe le tlišwa ke go direla ba bangwe tše botse, kudu-kudu ge e ba go direga gore ‘seatla sa rena se kgone go go dira.’