Latelela Bohle Ba Ba Kgahlegago E Le Gore O Hole Ba Bangwe
1Re swanetše go phafogela go latelela kgahlego ka moka yeo re e hwetšago tšhemong. Ba bangwe ba nagana gore go bohlokwa feela go dira leeto la go boela ge e ba motho a tšere puku. Lega go le bjalo, se ga sa nepagala. Neng le neng ge motho a bontšha kgahlego gaešita le e nyenyane molaetšeng wa Mmušo, re nyaka go dira selo le ge e le sefe seo re ka se kgonago bakeng sa go hola motho yoo. Ka gona re dira maeto a go boela ka boikemišetšo bja go hlagolela kgahlego ya motho le go thoma thuto ya legae ya Beibele. Se ke pakane ya rena gaešita le ge re sa tlogele dipuku. Se se ka dirwa bjang?
2Ge e ba poledišano ya lena ya nakong e fetilego e be e le ka ga go ata ga mathata a lenyalo lehono gomme o tlogetše puku ya “Phela ka mo go sa Felego,” o ka thoma poledišano ya lena ka tsela ye:
◼ “Ketelong ya-ka ya nakong e fetilego, re ile ra boledišana ka lenyalo le keletšo e šomago ya Beibele yeo e ka re thušago go hwetša lethabo le legolo. Na ga se therešo gore gaešita le malapeng a kaone kudu, mathata a rotoga nako le nako? [Dumelela karabo.] Beibele e re nea keletšo e botse yeo e ka re thušago go rarolla mathata ditswalanong tša lapa. Lapa le ka šegofatšwa ka go ithuta Beibele gotee.” Phetla go letlakala 246, gomme o ahla-ahle serapa 23. Bala Johane 17:3, gomme o ithapele go nea thušo ka go thuša lapa go thoma go ithuta Beibele ka gae.
3Ge e ba le boletše ka bana le go nyaka ga bona tlwaetšo, mo gongwe o ka tšwetša poledišano pele ka mokgwa wo:
◼ “Nakong e fetilego re ile ra bolela ka tlwaetšo ya moya yeo bana ba e nyakago le kamoo batswadi ba ka ba thušago ka gona. Batswadi ba bantši bao ke ilego ka boledišana le bona ba tšhošwa ke boitshwaro bjo bobe bja bafsa ba bantši gakaakaa lehono. O nagana’ng ka . . . ? [Bolela mohlala wa go hloka boitshwaro ga bafsa mo gantši go bonwago tikologong ya gabo lena. Dumelela karabo.] Anke ke go bontšhe tše dingwe tša dikeletšo tše šomago tšeo di neilwego ka Beibeleng.” Phetla go serapa 22 letlakaleng la 246 pukung ya Phela ka mo go sa Felego, ahla-ahla ntlha e kgolo gomme o bale Ba-Efeso 6:4. Bontšha gore bana ba bantši ba tloga ba nyaka tayo le tlhahlo. Ge batswadi ba fišegela go e nea, bana ba a thaba gomme e ba bao ba hlomphago kudu boitshwarong bja bona. Hlalosa kamoo re ithutago Beibele ka gona le bana ba rena.
4Ge e ba sehlogo sa poledišano ya lena e be e le lefase la Paradeise, gona o ka bolela se bakeng sa go tsošološa kgahlego:
◼ “Re ile ra lebelela diswantšho tše dingwe pukung ye tšeo di re bontšhitšego seo lefase le tlago go ba sona ge Modimo a le dira paradeise. Go be go tla bolela go gonyenyane go rena ge e ba re be re ka se ke ra le thabela le baratiwa ba rena. Na ga o dumele?” Dumelela karabo. Ke moka o phetle go letlakala 162 pukung ya Phela ka mo go sa Felego. Bala Kutollo 21:3, 4, gomme o hlalose kamoo baratiwa ba rena ba ka dulago ba e-na le rena ka gona. Ge e ba go e-na le karabelo e botse, bala Johane 5:28, 29 go bontšha gore bahu ba tla boela bophelong. Bontšha letlakala la ka ntle la puku gomme o re: “E tloga e le therešo—re ka phela ka mo go sa felego Paradeiseng mo lefaseng!” Rulaganyetša leeto le lengwe bakeng sa go tlo ahla-ahla lebaka leo ka lona re tsebago gore e kgaufsi.
5Morero o mogolo wa leeto la go boela ke go thuša batho ba thabelago gore ba holwe ke molaetša wa Mmušo. Batho ba bantši ba nyaka sehlohleletši bakeng sa go loutša kganyogo ya bona ya dilo tša moya. Lebiša tlhokomelo ya bona dintlheng tše itšego tša mohola o šomago ka pukung, o gatelele kamoo e ka ba thušago ka gona go kwešiša Beibele gakaone. Maeto a go boela ao a phethago dipakane tše a tla thuša ba bangwe gore ba ikhole ka tsela e kaone kudu ka mo go ka kgonegago.