Bota Jehofa!

“Bota Jehofa ka pelo ya gago ka moka.”—DIEMA 3:5, PK.

1. Diema 3:5 e ile ya kgoma bjang lesogana le lengwe, gomme ka mafelelo afe a nako e telele?

MOROMIWA wa nako e telele o ngwala se: “‘BOTA MORENA KA PELO YA GAGO KA MOKA; GOMME O SE KE WA ITHEKGA KA TLHAOLOGANYO YA GAGO.’ Mantšu ao a tšwago ka Beibeleng ao a bego a foreimetšwe gomme a fegilwe lebotong ka legaeng leo ke bego ke le etetše a ile a tanya tlhokomelo ya-ka. Letšatšing leo ka moka ke ile ka naganišiša ka ona. Ke ile ka ipotšiša gore, Na nka bota Modimo ka pelo ya-ka ka moka?” Motho yo ka nako yeo o be a e-na le nywaga e 21. A e-na le nywaga e 90 gomme a sa dutše a hlankela ka potego e le mogolo kua Perth, Australia, a ka lebelela morago bophelong bjo bo humišitšwego ka dienywa tša go bota Jehofa ka pelo ka moka, go akaretša nywaga e 26 ya mathata ya go bula madibogo mašemong a mafsa a boromiwa kua Ceylon (yeo bjale e lego Sri Lanka), Burma (yeo bjale e lego Myanmar), Malaya, Thailand, India, le Pakistan.a

2. Ke kholofelo efe yeo Diema 3:5 e swanetšego go e aga ka go rena?

² “Bota Jehofa ka pelo ya gago ka moka”—mantšu a a Diema 3:5, bjalo ka ge a fetoletšwe ke Phetolelo ya Kgale, a swanetše go re tutuetša ka moka ga rena gore re tšwele pele re gafela Jehofa maphelo a rena ka pelo ka moka, re kgodišegile gore a ka matlafatša tumelo ya rena, gaešita le go fihla ntlheng ya go fenya mapheko a swanago le thaba. (Mateo 17:20) Bjale anke re hlahlobeng Diema 3:5 go ya ka ditemana tšeo di e dikologilego.

Tayo ye e Kego ke ya Tate

3. (a) Ke kgothatšo efe yeo e ka hwetšwago dikgaolong tše senyane tša pele tša Diema? (b) Ke ka baka la’ng re swanetše go ela hloko e le ka kgonthe Diema 3:1, 2?

³ Dikgaolo tša pele tše senyane tša puku ya Beibele ya Diema di tletše ka tayo ye e kego ke ya tate, e lego keletšo ye bohlale ye e tšwago go Jehofa bakeng sa bohle bao ba lebeletšego pele go thabeleng go ba barwa magodimong goba go thabela “tokologo ya letago ya bana ba Modimo” (NW) mo lefaseng la paradeise. (Ba-Roma 8:18-21, 23) Ye ke keletšo ye bohlale yeo e ka dirišwago ke batswadi ge ba godiša barwa le barwedi. Keletšo e kgethegilego ke yeo e lego go Diema kgaolo 3, yeo e thomago ka temošo: “Ngwan’a-ka! Se lebale thutô ya-ka. Pelo ya xaxo a e lôtê ditaêlô tša-ka.” Ge mehla ya bofelo ya lefase le kgopo la Sathane e dutše e e-ya seremong sa yona, eka re ka tšwela pele re ela hloko kudu dikgopotšo tša Jehofa. Tsela mo gongwe e ka ba e be e bonala e le e telele, eupja kholofetšo go bohle bao ba kgotlelelago ke gore “di tlo Xo tlišetša bontši bya matšatši, le nywaxa ya bophelô, le têtlêxô”—bophelo bjo bo sa felego tshepedišong e mpsha ya Jehofa.—Diema 3:1, 2.

4, 5. (a) Ke tswalano efe ye e thabišago yeo e hlaloswago go Johane 5:19, 20? (b) Keletšo yeo e lego go Doiteronomio 11:18-21 e šoma bjang mehleng ya rena?

⁴ Tswalano e thabišago magareng ga tate le morwa e ka ba ya bohlokwa kudu. Mmopi wa rena Jehofa Modimo, o rulagantše gore go be bjalo. Kriste Jesu o boletše ka tswalano ya gagwe ya kgaufsi le Jehofa gore: “Xa xo se Morwa a kxônaxo xo se dira ka la xaxwe; xobane tše Tat’axwe a di diraxo, ké tšôna tše le Morwa a di diraxo. Xobane Tate ó rata Morwa ’me ó mo laetša tše a di diraxo tšohle.” (Johane 5:19, 20) Jehofa o rulagantše gore tswalano e swanago ya kgaufsi e be gona magareng ga gagwe le lapa la gagwe ka moka mo lefaseng, gotee le magareng ga bo-tate bao e lego batho le bana ba bona.

⁵ Tswalano e botegago ya lapa e be e kgothaletšwa Isiraeleng ya bogologolo. Jehofa moo o ile a eletša bo-tate ka gore: “Mantšu a-ka á, a beeng dipelong tša lena le meoyeng ya lena, Le a tlêmêlêlê diatleng tša lena e bê seká, e bê mo-fapa-hlôxô mo diphatleng tša lena. Le a rutê bana ba lena, Le boledišanê ka ôna Lè dutše mo nywakong ya lena, le xe O sepela mo tseleng, le xe O y’o rôbala, le xe O tsoxa. O a ngwalê mo dijakwaneng tša ngwakô wa xaxo, le mo maxorong a xaxo. Ké mo matšatši a lena le a bana ba lena, a xe Le dutše mo naxeng ye Morêna a e neetšexo bô-tata weno e tl’o xo ba a mantši, byalo ka matšatši a lexodimo lè le xodimo xa lefase.” (Doiteronomio 11:18-21) Lentšu le le buduletšwego la Morutiši wa rena yo Mogolo, Jehofa Modimo, ruri le ka thuša go mo gokaganya kgaufsi le batswadi le bana ba bona, gotee le ba bangwe ka moka bao ba mo hlankelago ka phuthegong ya Bokriste.—Jesaya 30:20, 21.

6. Re ka hwetša bjang kamogelo ya Modimo le ya batho?

⁶ Keletšo e bohlale ye e kego ke ya tate go batho ba Modimo ba bagolo le ba banyenyane, e tšwela pele go ditemana 3 le 4 tša Diema kgaolo 3: “A leratô [“botho bjo lerato,” NW] le therêšô di se Xo tloxêlê. Di aparê bo-ka-pheta molaléng; di tlôkê pelong bo-ka ’tlapeng. Ké mo O tl’o xo hwetša mahlô a Modimo le a batho à xo lebeletše ka leratô le ka botho.” Jehofa Modimo ka noši o tšwa pele tabeng ya go bontšha botho bjo lerato le go ba le therešo. Go bjalo ka ge Psalme 25:10 e bolela gore, “ditsela tšohle tša Morêna ké tša botho le therešô.” Go etša Jehofa, re swanetše go tšeela godimo dika tše le matla a tšona a šireletšago, re di tšee e le tša bohlokwa go etša ge re be re tla dira ka pheta ya bohlokwa-hlokwa gomme re di tloke wa go se phumolege pelong ya rena. Ka gona, re ka rapela go tšwa pelong ka gore: “Wêna Morêna, . . . ka mehla ke tlo šireletšwa ke botho bya xaxo le pôtêxô y’axo.”—Psalme 40:11.

Potego e sa Felego

7. Jehofa o bontšhitše go botega ga gagwe ka ditsela dife?

⁷ Potego e hlaloswa ke Webster’s Ninth New Collegiate Dictionary e le “go ba le kholofelo mo go kgonthišeditšwego go semelo, bokgoni, matla goba go rereša ga motho yo mongwe goba selo se sengwe.” Semelo sa Jehofa se tsemilwe ka go tia bothong bjo lerato bja gagwe. Re ka ba le kholofelo e tletšego bokgoning bja gagwe bja go dira seo a se holofeditšego, ka gobane leina la gagwe ka noši, e lego Jehofa le mo hlaola e le Mophethi yo mogolo wa Merero. (Ekisodo 3:14; 6:2-8) Ka ge e le Mmopi, ke yena Mothopo wa matla a magolo. (Jesaya 40:26, 29) Ke yena go mothofatšwa ga therešo, ka gobane “Modimo a sa aketše.” (Ba-Hebere 6:18) Ka gona, re kgothaletšwa go bea kholofelo e feletšego go Jehofa, e lego yena Modimo wa rena, Mothopo o mogolo wa therešo ka moka, yo a nago le matla ohle a go šireletša batho ba gagwe ba botegago le go atlegiša merero ya gagwe ka moka e megolo ya letago.—Psalme 91:1, 2; Jesaya 55:8-11.

8, 9. Ke ka baka la’ng ka mo go nyamišago go se na potego lefaseng, gomme batho ba Jehofa ba bontšha phapano bjang?

⁸ Lefaseng le le gobogilego leo le re dikologilego, ka manyami potego ga e gona. Go e na le moo, re hwetša megabaru le kgobogo kae le kae. Letlakala la ka ntle la tokollo ya May 1993 ya makasine wa World Press Review le be le ngwadilwe ka tsela ya phatlalatšo molaetša o rego: “GO ATA KA LEBELO GA KGOBOGO—Go Hwetša Tšhelete ka Bohwirihwiri Thulaganyong ya Lefase le Lefsa. Ditiro tša kgobogo di naba go tloga Brazil go ya Jeremane, go tloga United States go ya Argentina, go tloga Sepania go ya Peru, go tloga Italy go ya Mexico, go tloga Vatican go ya Russia.” Ka ge e theilwe lehloyong, megabarung le go hlokeng potego, thulaganyo yeo go thwego ke thulaganyo ya lefase le lefsa yeo e dirilwego ke motho ga e bune selo ge e se manyami ao a oketšegago ka lebelo bathong.

⁹ Go fapana le ditšhaba tša bopolitiki, Dihlatse tša Jehofa di thabela go ba “setšhaba seo Jehofa e lego Modimo wa sona.” Ke bona feela bao ba ka bolelago ka go botega gore, ‘Re bota Modimo.’ Yo mongwe le yo mongwe wa bona a ka goeletša ka lethabo ka gore: “Xe Modimo à na le nna, ke fadiša ’ntšu la xaxwe. . . . Ke bôta Modimo, xa ke boife.”—Psalme 33:12, PK; 56:4, 11.

10. Ke’ng seo se ilego sa matlafatša Bakriste ba bantši ba bafsa gore ba kgomarele potego?

¹⁰ Nageng ye nngwe ya Asia moo dikete-kete tša Dihlatse tša bafsa di ilego tša bethwa o šoro le go tswalelelwa kgolegong, go bota Jehofa go ile gwa dira gore ba bantši kudu ba kgotlelele. Bošegong bjo bongwe ka kgolegong, Hlatse ya mofsa yeo e hlokofaditšwego o šoro e ile ya ikwa e se sa kgona go kgotlelela. Eupja mofsa yo mongwe o ile a tla go yena ka go khukhuna a iphihlile ka lefsifsi. O ile a bolela ka go seba a re: “O se ke wa langwa; ke ile ka kwanantšha gomme ga se ka ka ka ba le khutšo ya monagano ga e sa le go tloga nakong yeo.” Mofsa wa pele o ile a tsošološa boikemišetšo bja gagwe bja go ema a tiile. Re ka ba le kholofelo e feletšego go Jehofa ya gore o tla re thuša go fenya boiteko bjo bongwe le bjo bongwe bja Sathane bja go fediša potego ya rena.—Jeremia 7:3-7; 17:1-8; 38:6-13, 15-17.

11. Re tutuetšwa bjang gore re bote Jehofa?

¹¹ Molao wa pele ka boripana o balega ka gore: “Morêna Modimo wa xaxo O mo ratê ka pelo ya xaxo ka moka.” (Mareka 12:30) Ge re dutše re naganišiša ka Lentšu la Modimo, ditherešo tše di kgahlišago tšeo re ithutago tšona di nwelela ka gare-gare pelong ya rena mo e lego gore re tutueletšega go gafela borena bjohle tirelong ya Modimo wa rena yo a makatšago, Morena yo a Phagamego Jehofa. Ke ka pelo e tletšego tebogo ya go mo leboga—bakeng sa tšohle tšeo a re rutilego tšona, a re diretšego tšona le tšeo a sa tlogo go re direla tšona—ge re tutueletšega go bota phološo ya gagwe ka mo go feletšego.—Jesaya 12:2.

12. Go theoša le nywaga, Bakriste ba bantši ba bontšhitše bjang go bota ga bona Jehofa?

¹² Potego ye e ka hlagolelwa ka nywaga e mentši. Hlatse ye e ikokobeditšego ya Jehofa yeo e ilego ya hlankela ka potego ka nywaga e fetago e 50 ntlong-kgolo ya Mokgatlo wa Watch Tower kua Brooklyn, ge a be a thoma tirelo ya gagwe ka April 1927, o ngwadile gore: “Mafelelong a kgwedi yeo ke ile ka amogela tšhelete ya ditshenyagalelo ya $5,00 [R16] e phuthetšwe ka gare ga enfelopo e e-na le karata e botse yeo e nago le temana ya Beibele go Diema 3:5, 6 . . . Go be go e-na le mabaka ka moka a go bota Jehofa, ka gobane go se go ye kae ke ile ka thoma go lemoga gore ntlong-kgolo Jehofa o na le ‘molaki yo a botegago le yo bohlale’ yo a hlokomelago dikgahlego ka moka tša Mmušo mo lefaseng.—Mateo 24:45-47.”b Pelo ya Mokriste yo e be e se ya lebišwa leratong la go rata tšhelete, eupja e lebišitšwe tabeng ya go hwetša “lehumô le le sa felexo la kwa maxodimong.” Ka mo go swanago mehleng yeno, ba dikete-kete bao ba hlankelago magaeng a Bethele a Mokgatlo wa Watch Tower lefaseng ka moka ba dira bjalo ka tlase ga mohuta o itšego wa keno ya molao ya bodiidi. Ba bota Jehofa bakeng sa gore a ba nee dinyakwa tša bona tša letšatši le lengwe le le lengwe.—Luka 12:29-31, 33, 34.

Ithekge ka Jehofa

13, 14. (a) Ke kae feela moo go ka hwetšwago keletšo e budulego? (b) Ke’ng seo se swanetšego go phengwa bakeng sa go kgotlelela ditlaišo?

¹³ Tatago rena wa magodimong o a re eletša: “O se ké wa ithêkxa ka xo fo re: Ke n’e thlaloxanyô.” (Diema 3:5) Baeletši ba lefase le ditsebi tša monagano le ka mohla ba ka se be le kholofelo ya go batamela bohlale le tlhaologanyo tšeo Jehofa a di bontšhago. “Ké yo bohlale byo bo sa êlwexo.” (Psalme 147:5) Go e na le go ithekga ka bohlale bja batho ba tumilego ba lefase goba ka maikwelo a rena ka noši ao a theilwego go hlokeng tsebo, anke re ithekgeng ka Jehofa, Lentšu la gagwe le bagolo ka phuthegong ya Bokriste bakeng sa keletšo e budulego.—Psalme 55:22; 1 Ba-Korinthe 2:5.

¹⁴ Bohlale bja motho goba maemo a botumo di ka se re iše felo letšatšing le le batamelago ka lebelo la teko e šoro. (Jesaya 29:14; 1 Ba-Korinthe 2:14) Kua Japane nakong ya Ntwa ya II ya Lefase, modiši yo a nago le bokgoni eupja e le yo a ikgogomošago wa batho ba Modimo o ile a kgetha go ithekga ka tlhaologanyo ya gagwe. Ka tlase ga kgateletšo o ile a fetoga mohlanogi gomme bontši bja mohlape le bjona bja gogela morago ka tlase ga tlaišo. Kgaetšedi wa Mojapane yo a botegago, yo ka sebete a ilego a kgotlelela go swarwa gampe diseleng tša ditšhila tša kgolego, o itše: “Bao ba ilego ba dula ba botega ba be ba se na bokgoni bjo bo kgethegilego gomme ba be ba sa bonale kudu. Ruri ka moka ga rena re swanetše go bota Jehofa ka mehla ka pelo ya rena ka moka.”c

15. Ke seka sefe sa go boifa Modimo seo se lego bohlokwa ge e ba re tla kgahla Jehofa?

¹⁵ Go bota Jehofa go e na le go bota tlhaologanyo ya rena ka noši go akaretša boikokobetšo. Seka se se bohlokwa gakaakang go bohle bao ba nyakago go kgahla Jehofa! Modimo wa rena gaešita lege e le Morena yo a Phagamego wa legohle ka moka, o bontšha boikokobetšo ditirišanong tša gagwe le dibopiwa tša gagwe tše di nago le tlhaologanyo. Re ka bontšha tebogo bakeng sa seo. “Ó ukametše maxodimo le lefase, ó di bôna di le tlase, a tsoša babôtlana leroleng.” (Psalme 113:6, 7) Ka baka la kgaugelo ya gagwe e kgolo o re lebalela mafokodi a rena motheong wa mpho ya gagwe e kgolo kudu yeo a e neilego batho, e lego sehlabelo sa topollo se bohlokwa sa Morwa wa gagwe yo a rategago, Kriste Jesu. Re swanetše go leboga gakaakang botho bja gagwe bjo bo sa swanelago!

16. Banababo rena ba ka katanela bjang ditokelo ka phuthegong?

¹⁶ Jesu ka noši o a re gopotša: “Wa xo ikxodiša ó tlo kokobetšwa wa xo ikokobetša ó tlo xodišwa.” (Mateo 23:12) Ka boikokobetšo, banababo rena ba kolobeditšwego ba swanetše go katanela boikarabelo ka phuthegong ya Bokriste. Lega go go bjalo, balebeledi ga se ba swanela go lebelela go kgethwa ga bona e le maemo, eupja e le sebaka sa go dira modiro ka boikokobetšo, ka tebogo le ka mafolofolo bjalo ka ge go dirile Jesu yo a itšego: “Tate ó sa dira le byalo; ’me le Nna ke a dira.”—Johane 5:17; 1 Petro 5:2, 3.

17. Ke’ng seo ka moka ga rena re swanetšego go se lemoga, e lego seo se išago modirong ofe?

¹⁷ Eka ka mehla re ka lemoga ka boikokobetšo le ka thapelo gore re fo ba lerole feela mahlong a Jehofa. Ka gona, re ka thaba gakaakang ka gobane “botho bya Morêna bo xôna bò se na mathômô le mafêlô; bo ukametše ba ba mmoifaxo; xo loka xa xaxwe xo xôna xo bana le bana ba bana”! (Psalme 103:14, 17) Ka gona, ka moka ga rena re swanetše go ba barutwana ba fišegago ba Lentšu la Modimo. Nako yeo e dirišwago thutong ya motho ka noši le ya lapa le dibokeng tša phuthego e swanetše go ba gare ga diiri tša bohlokwa kudu bekeng e nngwe le e nngwe. Ka tsela ye re aga “xo tseba Yêna Mokxêthwa.” Seo ke “thlaloxanyô.”—Diema 9:10.

“Ditseleng tša Xaxo Tšohle . . . ”

18, 19. Re ka diriša bjang Diema 3:6 maphelong a rena, gomme ka mafelelo afe?

¹⁸ Ge e re lebiša go Jehofa, Mothopo yo e lego Modimo wa tlhaologanyo, Diema 3:6 ka mo go latelago e re: “Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Go lebiša tlhokomelo go Jehofa go akaretša go dula re le kgaufsi le yena ka thapelo. Go sa šetšwe moo re lego gona, le gona go sa šetšwe boemo bjo bo ka rotogago, re ka kgona go ya go yena ka bjako ka thapelo. Ge re dutše re dira mediro ya rena ya letšatši le letšatši, ge re lokišetša tirelo ya tšhemo, ge re e-ya ka ntlo le ntlo re goelela Mmušo wa gagwe, re ka tšwela pele re rapelela gore a šegofatše modiro wa rena. Ka gona, re ka ba le tokelo e sa lekanywego ka selo le lethabo la go ‘sepela le Modimo,’ re kgodišegile gore o tla ‘re thulela ditsela,’ go etša ge a dirile go Henoge yo a boifago Modimo, Noage le ba-Isiraele ba botegago ba bjalo ka Jošua le Daniele.—Genesi 5:22; 6:9; Doiteronomio 8:6; Jošua 22:5; Daniele 6:23; bona gape le Jakobo 4:8, 10.

¹⁹ Ge re tsebiša Jehofa ditopo tša rena, re ka kgodišega gore ‘khutšo ya Modimo ye e fetago tlhaologanyo yohle, e tla boloka dipelo tša rena le dikgopolo tša rena ka Kriste Jesu.’ (Ba-Filipi 4:7) Khutšo ye ya Modimo, yeo e bontšhwago ka sefahlego se se edilego, e ka bolelela molaetša wa rena go beng ba dintlo bao re kopanago le bona nakong ya modiro wa rena wa boboledi. (Ba-Kolose 4:5, 6) E ka ba ya kgothatša bao ba ka bago ba hlasetšwe ke dikgateletšo goba go hloka toka mo go atilego kudu lefaseng la lehono, go etša ge pego e latelago e bontšha.d

20, 21. (a) Nakong ya tšhošetšo ya Nazi, potego ya Dihlatse tša Jehofa e ile ya kgothatša ba bangwe bjang? (b) Ke boikemišetšo bofe bjo lentšu la Jehofa le swanetšego go bo tsoša ka go rena?

²⁰ Max Liebster, yo e lego mo-Juda wa tlhago yo ka seo go bonalago e le mohlolo a ilego a phologa Polao e Sehlogo, o ile a hlalosa leeto la gagwe la go ya kampeng ya Nazi ya polao ka mantšu a: “Re ile ra tswalelelwa ka matorokising a setimela ao a bego a fetotšwe disele tše dintši tše nyenyane bakeng sa batho ba babedi. Ka morago ga go kgoromeletšwa ka go le lengwe la ona ke ile ka lebana le mogolegwa yo mahlo a gagwe a bego a bonagatša khutšo. O be a le moo ka baka la go hlompha molao wa Modimo, a kgetha go golegwa le go lebana le lehu go e na le gore a tšholle madi a batho ba bangwe. E be e le yo mongwe wa Dihlatse tša Jehofa. O be a tšeetšwe bana gomme mosadi wa gagwe o be a bolailwe. Le yena o be a letetše go bolawa. Leeto la matšatši a 14 le ile la tliša karabo ya dithapelo tša-ka, ka gobane e bile nakong ya leeto leo le le išago lehung mo ke ilego ka hwetša kholofelo ya bophelo bjo bo sa felego.”

²¹ Ka morago ga go ba “letšabeng la ditau,” la Auschwitz go etša ge a be a e bitša, le ka morago ga go kolobetšwa, ngwanabo rena yo o ile a nyala yo mongwe wa Dihlatse tša Jehofa yo le yena a bego a golegilwe le yo tatagwe a ilego a tlaišega kampeng ya tshwenyo ya Dachau. Nakong ya ge tatagwe a be a le moo, o ile a kwa gore mosadi wa gagwe le morwedi yo monyenyane le bona ba be ba golegilwe. O hlalositše tsela yeo a ilego a itshwara ka yona ka gore: “Ke be ke tshwenyegile kudu. Ke moka ka letšatši le lengwe ge ke be ke eme mothalading bakeng sa go yo hlapa, ke ile ka kwa lentšu le tsopola Diema 3:5, 6 . . . Le ile la kwagala bjalo ka lentšu leo le tšwago magodimong. Ke sona seo ke bego ke se nyaka gore ke tle ke hlaphogelwe.” Ge e le gabotse, lentšu leo e be e le la mogolegwa yo mongwe a tsopola temana ye, eupja tiragalo ye e ile ya gatelela matla ao Lentšu la Modimo le ka bago le ona go rena. (Ba-Hebere 4:12) Eka lentšu la Jehofa le ka bolela le rena ka matla lehono ka mantšu a temana ya rena ya ngwaga wa 1994: “Bota Jehofa ka pelo ya gago ka moka”!

[Mengwalo ya tlase]

Go Dira Kakaretšo

◻ Ke keletšo ya mohuta ofe yeo e newago go Diema?

◻ Go bota Jehofa go re hola bjang?

◻ Ke’ng seo se akaretšwago ka go ithekga ka Jehofa?

◻ Ke ka baka la’ng re swanetše go ela hloko Jehofa ditseleng tša rena ka moka?

◻ Jehofa o re thulela ditsela bjang?

[Pictures on page 15]

Molaetša o thabišago wa Mmušo o kgahla batho ba dipelo tše botegago