Dulang le Phafogile Gomme le Phakgame
1 Ka baka la sebopego seo se fetogago gantši sa lefase, ke mo go swanetšego gakaakang gore sehlogo sa kopano ya tikologo bakeng sa ngwaga wa tirelo wa 1991 e be se se rego “Dulang le Phafogile Gomme le Phakgame.” (1 Ba-Thes. 5:6) Lelokelelo le le tla thoma ka September. Ka moka ga rena re swanetše go dira dithulaganyo gore re be gona kapejana ge molebeledi wa rena wa tikologo a re tsebiša matšatši.
2 Tše dingwe tša dintlha tše kgolo tša lenaneo di tla akaretša polelo ya go šiedišana ya dikarolo tše nne yeo e reretšwego go re thuša go ‘phakgama dilong ka moka.’ (2 Tim. 4:5, NW) Go sa šetšwe nako ya bošilo e fetilego, ke bjang re ka atlegago mo nakong ye tabeng ya go phema mereo ya Sathane le go lwantšha moya wa lefase? Kgonthišega gore ga o foše tsebišo ye e bohlokwa. Kopanong ka moka ya matšatši a mabedi, gape re tla lebiša tlhokomelo ya rena keletšong yeo e rwelwego ke puku ya Dipotšišo tša Bafsa le Dikarabo tše Šomago. Mo gongwe o ka rata go tla le kopi ya gago. Bana ka mo go kgethegilego ba tla rata go šetša ka mo go kgethegilego tsebišo yeo e lebišitšwego go bona ke molebeledi wa tikologo ka Mokibelo. Bjalo ka mehleng, go tla ba le dithulaganyo bakeng sa kolobetšo ka Mokibelo, ka gona bao ba ratago go bontšha boineelo bja bona kopanong ya tikologo ba swanetše go tsebiša molebeledi yo a okamelago e sa le pele ka pela ka mo go ka kgonegago.
3 Ka Sontaga mesong dithuto tša bohlokwa di tla gatelelwa kudu ka lelokelelo la dipontšho tšeo di bontšhago kamoo re ka holwago ke mathata, go akaretša le diphošo tša rena. Thapama molebeledi wa selete o tla neela polelo ya phatlalatša ka sehlogo se se rego “Go Dira ka Bohlale Lefaseng la Bošilo.” Bagoeledi ba Mmušo ka moka le batho bao ba thabelago ba swanetše go leka ka mešego fela gore ba be gona.
4 Ka ge dikgateletšo tša bophelo di tšwela pele di gola, re holofela gore bohle ba tla hwetša mohola le tapologo lenaneong le leo le rulaganyeditšwego go re kgothatša. Re tla bona ditsela tšeo ka tšona re ka bago bao ba phafogetšego ka mo go oketšegilego dinyakwa tša rena tša moya le tša malapa a rena gotee le tša ba bangwe ka phuthegong. Ikemišetše go ba gona kopanong ka moka ya tikologo le go theetša ka kelohloko lenaneong ka moka, “xobane xo phološwa xa rena byale ké xôna xo batametše xo fetiša mola rè sa thôma xo dumêla.”—Ba-Roma 13:11.