Go Amogela, Go Diriša Le Go Holwa Ke Lentšu La Modimo

1 Gaešita le ge batho ba dimilione ba e-na le Beibele, fela ba bantši ga ba e amogele e le Lentšu la Modimo, ba bantši ga ba diriše keletšo ya yona e bohlale, ka go rialo batho bao ba holwago ke yona ke ba sego nene feela. Lega go le bjalo, batho ba Jehofa ba dumela gore ke Lentšu la Modimo e le ka kgonthe le gore e hola dilong ka moka. (2 Tim. 3:16, 17) Ka gona, sehlogo sa lenaneo la kopano ya tikologo ya ngwaga wa tirelo wa 1993 e tla ba se se rego “Go Amogela, go Diriša le go Holwa ke Lentšu la Modimo.”

2 Go tla ba le dipolelo, dipontšho, ditshwantšhetšo, diphihlelo le dipoledišano bakeng sa go re kgothatša, go godiša tebogo ya rena bakeng sa Lentšu la Modimo le go re thuša go le diriša ka botlalo dibopegong ka moka tša bophelo. Lenaneo la Mokibelo thapama le tla bolela ka keletšo le tayo ka lapeng mabapi le boithabišo, bogwera le go rata dilo tše di bonagalago. Le tla bontšha kamoo re swanetšego go ba ba arogilego lefaseng le go se amogele mekgwa ya lona e mebe le dipolelo tša lona tša go se hlomphe le tša ditšhila. Go oketša moo, go tla newa kgothatšo bakeng go thuša batswadi bao ba se nago balekane gotee le bana bao ba se nago botate.

3 Le gona, ka Mokibelo batho bao ba sa tšwago go ineela ba tla hwetša sebaka sa go kolobetšwa ka morago ga go kwa polelo ya Mangwalo mabapi le taba yeo. Bao ba rulaganyetšago go kolobetšwa kopanong ya tikologo ba swanetše go botša molebeledi yo a okamelago wa phuthego ka kganyogo ya bona ka pela ka mo go ka kgonegago e le gore a tle a be le nako e lekanego ya go rulaganya bagolo gore ba hlahlobe le bona dipotšišo tša bao ba yago kolobetšong.

4 Lenaneo la mesong ya Mokibelo le tla hlahloba ditsela tšeo ka tšona re ikgethollago lefaseng ka go dumelelana le Lentšu la Modimo. Tše dingwe tša dihlogo tšeo di tlago go hlahlobja ke bohlokwa bja ponagalo ya rena le kamoo re ka phemago go senya monagano wa rena. Mathapama molebeledi wa selete o tla neela polelo ya phatlalatša yeo e nago le sehlogo se se rego “Ke’ng Seo se Bontšhago Gore Beibele e Nepagetše?” Re nyaka go kgonthiša gore re laleletša batho ka moka ba thabelago lenaneong le le lebotse.

5 Matšatši ao lenaneo le la kopano ya tikologo le tlago go swarwa ka ona a tla newa ke molebeledi wa lena wa tikologo, gomme re kgothaletša bohle gore ba be gona e le gore ba tle ba amogele, ba diriše le go holwa ke keletšo ya Lentšu la Modimo.—Jak. 1:22-25.