Ke’ng Seo Nka Se Bolelago Bakeng Sa Go Tutuetša Kgahlego E Oketšegilego?
1 Karolo e kgolo ya morero wa rena ka go bolela ditaba tše di lokilego ke go dira barutiwa, e sego feela go tlogela dipuku. Ka baka leo, ka morago ga ge go hweditšwe kgahlego, re swanetše go hlagolela le go nošetša dipeu tšeo di bjetšwego, re dire karolo ya rena bakeng sa go tšweletša boemo bjo bobotse bjoo go bjona Jehofa a ka thušago motho gore a gole moyeng. (1 Ba-Kor. 3:6) Ke’ng seo o ka se bolelago ka morago ga dithero tša pele tšeo di lokeleditšwego ka mo godimo? Tše dingwe tša ditšhišinyo tša maemo a fapa-fapanego ao o ka lebeletšanago le ona šidi.
2 Go Hlagolela Kgahlego Yeo e Hweditšwego: “Nakong e fetilego ge re be re bolela ka bokopana, o be o swaregile kudu, eupja o ile wa ipha nako ya go bolela ka go tshwenyega ga gago ka bokamoso. Bjalo ka ge o tla gopola, re ile ra bala ka Beibeleng go Kutollo 1:3 gore ‘nako yeo e beilwego e batametše.’ Se se kgoma bokamoso bja rena ka moka ka go lebanya. Ela hloko seo puku ye e se bolelago ka mangwalo. [Bala go tloga go serapa 11 go letlakala 17 la puku ya Seremo sa Kutollo.] Puku ye e ahla-ahla diporofeto ka moka tšeo di lego ka pukung ya ya Beibele ya Kutollo gomme ya bontšha kamoo rena ka noši re ka holegago ka gona. Na o ka thabela go ithuta mo go oketšegilego?”
3 Go Diriša Puku ya Seremo sa Kutollo Bakeng sa go Thoma Thuto ya Beibele: “Ke mo gobotse go go bona gape. Go na le ntlha e nngwe yeo ke ratago go e abelana le wena yeo e lego ka pukung yeo ke go tlogeletšego yona, gomme ke e kgothatšago kudu. Beibele e bolela ka ‘lengwalo la bophelo’ mabapi le bao ba tlago go phela ka mo go sa felego. Na o ka rata go tseba gore ke maina afe ao a lego ka lengwalong leo?” Phetla go letlakala 298 la puku ya Seremo sa Kutollo. Bala serapa 11, ke moka o botšiše dipotšišo tša serapa seo. Ka morago ga go hlahloba dirapa tše mmalwa, ithapele go boa bakeng sa go tšwetša pele poledišano.
4 Go Diriša Puku e Nngwe go Thoma Thuto ya Beibele: “Ke thabetše go go hwetša o le gae lehono. Nakong e fetilego ge re be re boledišana, re ile ra bala gotee kholofetšo ya Beibele yeo e lego go Kutollo 1:3. [Bala gape.] Ela hloko gore lethabo leo go bolelwago ka lona ga le fo itlela. Go nyakega dilo tše pedi: Re swanetše go bala seo Beibele e se bolelago gomme re se boloke, goba re diriše seo se ngwadilwego. Pukwana ye ya ‘Bonang! Dilo ka Moka ke di Dira tše Mpsha’ e tla dira gore o ipshine ka puku yeo ke go tlogeletšego yona ka gobane e hlalosa dilo tšeo Modimo a di nyakago ka tsela e bonolo. Go letlakala 30 go na le lelokelelo la dipotšišo tše 12 tšeo batho ba bantši ba ka di botšišago. Ke efe go tšona yeo o ka ratago gore e arabje?” Ka morago ga gore mong wa ntlo a arabe, o ka phetla lefelong leo go lona potšišo e arabjago ka pukwaneng ye gomme wa thoma thuto ya Beibele.
5 Diriša Diswantšho Bakeng sa go Tutueletša Kgahlego: Puku ya Seremo sa Kutollo e na le diswantšho tše dintši tše di kgahlišago. Tšona di ka gatelelwa bakeng sa go tutueletša kgahlego. Ka mohlala, ge re dira leeto la go boela re ka phetla go letlakala 7. Šupa seswantšho sa Johane a le sehlakahlakeng sa Patimo. Kutollo 1:3 e gatelela gore kutollo e yago go Johane e be e le molaetša o thabišago. Se se ka ba bjalo bjang mola Kutollo e hlalosa dibata tše boifišago le tshenyego? Ela hloko dirapa 1 le 2 go letlakala 6 la puku ye. Diswantšho tšeo di lego matlakaleng a ka gare ao a kgomaganego le matlakala a ka ntle, gotee le ditiragalo tšeo di bontšhago lefase la Paradeise go matlakala 302, 308 le 309.
6 Maetong a go boela, re swanetše go aga motheong woo o theilwego ketelong ya mathomo. Go lebiša tlhokomelo ka kelohloko sebopegong se sa bodiredi bja rena go tla tliša ditšhegofatšo tše dintši tšeo di tšwago go Jehofa go rena gotee le go bao ba re theetšago.—1 Tim. 4:16.