Lenaneo le Lefsa la Kopano ya Tikologo
1 Sehlogo se se tlago go ahla-ahlwa lenaneong le lefsa la kopano ya tikologo le le thomago ka September ke se se rego, “Dulang le Phakgame, Emang le Tiile, Tiang Matla.” Se theilwe mantšung a kgothatšo a moapostola Paulo go Bakriste ba lekgolong la pele la nywaga, ao a begilwego go 1 Ba-Korinthe 16:13.
2 Lenaneo le tla thoma ka go gatelela go nyakega ga ka mehla ga go itlhahloba ga rena ga moya. Go kgomarela ka go tia se se lokilego “mehleng [ye] ya bofêlô” go nyaka tsheka-tsheko ya kgonthe ya tswalano ya rena le Jehofa le boemo bja rena le phuthego ya gagwe ya lefaseng. (2 Tim. 3:1) Re tla gopotšwa ka go leboga ga Modimo modiro wa rena ka moka o matla. Re nyaka go rutwa ka ditsela tša go kaonefatša dika tša rena tša Bokriste le go kgomarela boitshwaro bjo bo beago mohlala.
3 Go nyakega ga go ba mafolofolo modirong wa go dira barutiwa ge re dutše re obelela tšwelopele ya moya le boikarabelo le tšona di tla gatelelwa. Go tla newa ditšhišinyo tše di šomago mabapi le kamoo batho ka o tee ka o tee le malapa ba ka kgomarelago ka gona lenaneo la ka mehla la phepo ya moya dipolelong tše di fapa-fapanego, dipontšhong le dipoledišanong. Gape go tla ba le seboka sa banababo rena ka moka ba ba sa nyalago ba ba hlankelago e le bagolo goba bahlanka ba bodiredi, ba ba kgahlegelago go tsena Sekolo sa Tlwaetšo sa Bodiredi.
4 Ka Mokibelo ba ba swanelegago ba tla kgona go dira boipolelo bja phatlalatša bja boineelo bja bona ka go kolobetšwa meetseng. Ka gona ka Sontaga, ka moka ga rena re tla rata go ba gona bakeng sa polelo ya phatlalatša e nago le sehlogo se se rego, “Boemo bja Gago le Modimo ke Bofe?”
5 Lenaneo le tla phetha ka kgothatšo ya go dula re tiile tumelong, ka mehla re dirišane ka moya wa lerato le khutšo. Kopano ya tikologo ke se sengwe sa dibaka tše di kgethegilego tšeo Jehofa a re lokišetšago tšona ka moka ga rena gore re “išanê leratong le medirong e botse.” (Ba-Heb. 10:24, 25) Dira dithulaganyo tše di tiilego gore o be gona bakeng sa lenaneo ka moka ka matšatši a mabedi.