Diriša Nako Ya Gago Ka Mo Go Holago
1 Jehofa o šetša nako. O nyaka gore le rena re hlokomele nako. Ka mokgatlo wa gagwe o re thuša gore re šetše nako. Ka mehla re kgothaletšwa go ba le “go gontši mo [re] go dirago modirong wa Morena.” (1 Ba-Kor. 15:58, NW) Ka tsela ye, re ka ba bao ba atlegago kudu tirelong ya Jehofa.
2 Yo mongwe le yo mongwe wa rena o na le tekanyo e swanago ya nako beke e nngwe le e nngwe—diiri tše 168. Re diriša bjang nako ya rena ka tsela e holago? Na re bontšha gore re tseba e le ka kgonthe seo nako e lego sona go ya ka pono ya Jehofa? Na re šitišwa ke mediro yeo e sego bohlokwa?
3 Ke gabohlokwa gore re be bao ba rulagantšwego gabotse. Ba bantši ba leka go kgomarela lenaneo la dilo tše di tlago pele. Selo se sengwe le se sengwe se ngwalwa lelokelelong go ya ka bohlokwa bja sona. Seo se ka hlaolwa bjang? Beibele e bolela gore motho o swanetše go “bôna tše di botse ka ’tapišô tš’axwe tšohle.” (Mmo. 3:13) Mediro e mengwe e tliša mafelelo a kaone go phala e mengwe. Nagana ka mafelelo ao o mongwe le o mongwe o tlago go a tliša. Na go phetha modiro go tla tšweletša mehola e bohlokwa? Na o tla “bôna tše di botse” tša modiro wa gago o thata? Ge e ba go se bjalo, mohlomongwe ga se modiro o bohlokwa-hlokwa.
4 Bodireding bja Rena: Re thabela ge ba bangwe ba fihla dibokeng tša tirelo ka nako, ba theetša ditaelo ka kelohloko gomme ba tloga gatee-tee go ya tšhemong. Go kaone gore re upše re swarege boboleding go e na le go leta. Go molaleng gore Paulo o ile a nagana ka mo go tseneletšego mabapi le go nyakega ga go ba le thulaganyo e botse ge a be a ngwala gore: “Tšohle di yê ka bothakxa le ka molaô.”—1 Ba-Kor. 14:40.
5 Ge re ile tirelong ya tšhemo re ka lahlegelwa ke nako ya bohlokwa ka baka la dinako tša go khutša. Lega go le bjalo, ge maemo a tša leratadima a sa thabiše, nako ya go khutša e tla re lapološa le go re thuša go tšwela pele. Lega go le bjalo, ba bantši ba rata go tšwela pele ba swaregile ka go nea bohlatse bathong gomme ba tlogela go gwerana le banababo bona ka dinako tša go khutša nakong yeo e beetšwego ka thoko bakeng sa bodiredi. Go nyakega teka-tekano.
6 Beibele e bolela gore “moxolodi . . . o tseba lebaka la wôna” la go hudugela lefelong le lengwe, gomme tšhoši ‘e ipeela dilewa selemo’ gore e itokišeletše marega. (Jer. 8:7; Die. 6:6-8) Moo ke mo go letšego sephiri sa go diriša nako ka mo go holago. Le rena re swanetše go ‘tseba lebaka la rena.’ Ka ntle le go ba ba thata ka mo go feteletšego, re swanetše go ba bao ba šetšago nako. Ga se ra swanela go tseba feela seo re swanetšego go se dira, eupša re tsebe le nako yeo se swanetšego go dirwa ka yona. Re swanetše go itlwaetša mokgwa wa go naganela dilo pele, re be le tekanyo ya nako bakeng sa go diega mo go ka bago gona. Le gona re swanetše go ikemišetša go kgaotša mediro e mengwe gore re be le nako bakeng sa selo se sengwe se bohlokwa kudu, bjalo ka go lokišeletša diboka tša rena, bodiredi bja tšhemo le mediro e mengwe ya pušo ya Modimo.
7 Re nyaka go swana le Tatago rena wa legodimong, Jehofa Modimo yo a re rutago gore “tšohle di na le mohla wa tšôna.” (Mmo. 3:1) Ka go diriša nako ya rena ka mo go holago, re ka ‘phetha bodiredi bja rena ka botlalo.’—2 Tim. 4:5, NW.