Dithero Tšeo Di Amogelwago

1 Dithero tšeo di amogelwago ke tšeo di bontšhago gabotse kamoo taba e kgomago mong wa ntlo, gore ke selo seo a se nyakago goba seo a ka se dirišago. Poledišanong ya lena ka moka, thuša mong wa ntlo gore a lemoge gore, “Se se a nkgoma.” Ge re lokišetša thero re swanetše go ipotšiša gore: ‘Ke ditaba dife tšeo batho ba ba lego tšhemong ya gešo ba tshwenyegilego kudu ka tšona? Ke’ng tšeo ba di nyakago? Nka neela molaetša bjang bakeng sa go bontšha gore Jehofa o nagana ka dinyakwa tša bona?’ Tše di lokeleditšwego ka mo tlase ke dilo tše sego kae tšeo di kgahlago batho kudu lehono. Na o ka diriša se sengwe sa tšona goba se sengwe sa go swana le tšona therong ya gago? Gape ela hloko kamoo dintlha tšeo di tšwago ka pukung ya Seremo sa Kutollo di ka gokaganywago ka gona.

2 Go Tshwenyega ka go Hlokega ga Lethabo: “Re boledišana le batho bao ba tlogago ba tshwenyegile ka boemo bja bophelo tikologong ya gabo rena. Gaešita lege batho ba ka ba ba e-na le dinyakwa tša bophelo, ba bantši ga ba thabele seo ba se hwetšago bophelong. Na o nagana gore go ba le bophelo bjo bo thabišago e le ka kgonthe go a kgonega? [Emela karabo.] Se sengwe sa dilo tše di išago lethabong se hwetšwa ka Beibeleng go Kutollo 1:3. [Bala.] Go kwešiša seo Kutollo e se bolelago ka bokamoso go ka go tlišetša lethabo. E-kwa bjo bongwe bja boporofeta bja yona.” Bala Kutollo 21:3, 4 gomme o šupe seswantšhong seo se lego go letlakala 302 la puku ya Seremo sa Kutollo.

3 Go Tshwenyega ka Bokamoso: “Re leka go abelana le baagišane ba rena pono e kgothatšago ka bokamoso. Na yeo ke yona tsela yeo o lekago go lebelela bophelo ka yona? [Emela karabo.] Go ya ka Beibele, re na le lebaka la go ba le kholofelo e botse ge e ba re dira seo e se bolelago go Kutollo 1:3.”

4 Go Tshwenyega ka go Ipshina Mmeleng: “Ba bantši tikologong ye ya rena ba tshwenyegile ka go se ipshine mmeleng. Lega go le bjalo, go sa šetšwe gore re itlhokomela gakaakang, fela re sa dutše re kwešwa bohloko ke bolwetši. Na o ka rata go phela lefaseng leo go lona o mongwe le o mongwe a tlago go ipshina mmeleng le go ba le matla ka mo go tletšego? Gaešita lege se se ka bonala se sa kgodiše, puku ya Beibele ya Kutollo e bolela ka nako e bjalo gomme e re botša gore e kgaufsi kudu.” Bala Kutollo 21:3, 4. Ka morago o ka šupa seswantšhong seo se lego go matlakala 308-9 a puku ya Seremo sa Kutollo, bakeng sa go bontšha kamoo batho ba tlago go amogela ditokišetšo tša bophelo nakong ya Pušo ya Nywaga e Sekete ya Kriste.

5 Go Tshwenyega ka Tšhilafalo le Tikologo: “Ge re boledišana le baagišane ba rena, re hweditše gore ba bantši ba tshwenyegile mabapi le kamoo moya, meetse le dijo di šilafatšwago ka gona. Na o nagana gore mebušo e tla ka ya kgona go fediša se? [Emela karabo.] Ke mo go kgothatšago go bona seo Beibele e bolelago gore se tla diragalela bao ba senyago lefase.” Bala Kutollo 11:18b. Bolela gore ka ntle le go tloša bao ba senyago lefase, morero wa Modimo ke gore ba boleta ba dire lefase paradeise bjalo ka ge go bontšhitšwe go Psalme 37:10, 11 goba Jesaya 65:21, 22.

6 Go Bao ba Sekametšego Bodumeding: “Re botšiša baagišane ba rena potšišo ye: Na o nagana gore puku ya Kutollo e be e reretšwe gore e kwešišwe, goba na e be e swanetše go dula e le sephiri? [Emela tlhaloso.] Ba bantši ba na le pono e swanago le ya gago. Ela hloko seo Beibele ka boyona e se bolelago go Kutollo 1:3.”

7 Ge o dutše o katana ka boikemišetšo bakeng sa go fihlelela pelo ya batheetši ba gago, bao ba swerwego ke tlala ya therešo le toko ba tla arabela.—Mat. 5:3, 6.