Go Neela Ditaba Tše Di Lokilego Ka Boemo Bjo Bo Nepagetšego Bja Kgopolo
1 Ka moka ga rena re rata go hwetša lethabo le go phetha se sengwe go seo re se dirago, kudu-kudu modirong wa go dira barutiwa. Ke’ng seo se re tlišetšago kgotsofalo e bjalo? Taba e thoma ka go kgomarela ga rena boemo bjo bo nepagetšego bja kgopolo mola re dula re swaregile modirong o holago wa go thuša ba bangwe. (Die. 11:25) Mokgwa wa rena wa go neela ditaba tše di lokilego o swanetše go bontšha gore ruri re dumela seo re se bolelago. Ge e ba re bolela go tšwa pelong ya rena, gona potego ya rena le kgodišego ya motho ka noši di tla iponagatša. (Luka 6:45) Ka go boeletša thero ya rena, re tla ikwa re kgodišegile kudu ge re boledišana le batho tšhemong. Se e tla ba sa bohlokwa kudu-kudu ka September ge re sepediša puku ya O ka Phela ka mo go sa Felego Paradeiseng mo Lefaseng goba ya Go Dira Bophelo bja Lapa la Gago Gore bo Thabiše. Mo gongwe o ka hwetša ditšhišinyo tše di latelago e le tše di holago go neeleng ditaba tše di lokilego ka boemo bjo bo nepagetšego bja kgopolo.
2 Ge o sepediša puku ya “Phela ka mo go sa Felego,” o ka bolela se ketelong ya pele: ◼“Ge ke be ke boledišana le batho tikologong ye, ke lemogile gore ba bantši ba hlologetšwe setšhaba se se lotegilego le lefase la khutšo. Pono ya gago ke efe ge e le mabapi le lebaka leo ka lona motho a paletšwego ke go fihlelela maemo a bjalo? [Dumelela karabo.] Baetapele ba bangwe mo gongwe e ka ba e le ba botegago gomme ba dira botse bjo itšego, eupša ela hloko seo Beibele e se eletšago ka bohlale.” Bala Psalme 146:3, 4; ke moka o botšiše gore: “Na go na le motho le ge e le ofe yo a ka kgotsofatšago dinyakwa tša motho?” Bala ditemana 5 le 6. Bontšha diswantšho tše di lego go matlakala 156-8 a puku ya Phela ka mo go sa Felego, gomme o lebiše tlhokomelo meholeng ya pušo ya Modimo. Sepediša puku ka moneelo o šišintšwego.
3 Ge e ba pušo ya Modimo e ile ya ahla-ahlwa ketelong ya pele, mo gongwe o ka leka tšhišinyo ye leetong la go boela: ◼“Ge ke be ke le mo matšatšing a sego kae a fetilego, re ile ra ahla-ahla go palelwa ga motho ke go tliša khutšo ya kgonthe lefaseng. Mo gongwe o ka ba o gopola gore re hweditše lebaka leo Beibele e le neago bakeng sa go palelwa mo go bjalo. [Bala Psalme 146:3 gape.] Na o lemogile lebaka leo ka lona Modimo a re eletšago gore re se bee dikholofelo tša rena bathong? [Dumelela karabo.] Mohlomongwe o a dumela gore kholofelo le ge e le efe bakeng sa tharollo ya sa ruri e swanetše go tšwa go Modimo. Lebaka leo ka lona re ka bago le kholofelo ye le hlaloswa go Psalme 146:10. [Bala.] Ge e ba re rata go ba balata ba Mmušo wa Modimo, ke’ng seo re swanetšego go se dira?” Phetla go letlakala 128 la puku ya Phela ka mo go sa Felego, bala serapa 5, gomme o gatelele Johane 17:3. Ithapele go bontšha kamoo ba dimilione ba ilego ba hwetša tsebo e išago bophelong bjo bo sa felego ka thuto ya Beibele. Ge e ba o dumelelwa, rola puku ya Tsebo gomme o thome thuto.
4 Mo gongwe o ka leka thero ye ge o sepediša puku ya “Bophelo bja Lapa”: ◼“Ge re boledišana le baagišani ba rena, re hweditše gore ba bantši ba nyaka bophelo bjo bo thabišago bja lapa. Ke’ng seo o naganago gore se tla thuša batho go hwetša lethabo le legolo bophelong bja bona bja lapa? [Dumelela karabo.] Na ga o dumele gore go theetša seo Mmopi wa lapa a se bolelago e be e tla ba mo go holago? O hlalosa tlhahlo e nyakegago ka Beibeleng. Melao ye ya motheo e ahla-ahlwa ka pukung ye ya Go Dira Bophelo bja Lapa la Gago Gore bo Thabiše. Ela hloko dihlogo tše fapa-fapanego tšeo di ahla-ahlwago. [Bontšha lelokelelo la dikagare.] Puku ye e bile e šupa tharollong e swarelelago ya mathata a batho. Re tlogela puku ye ka R3,50 feela.”
5 Ge o boela bakeng sa go etela bao o ba sepedišeditšego puku ya “Bophelo bja Lapa,” mo gongwe o ka rata go bolela se: ◼“Matšatšing a sego kae a fetilego re ile ra ahla-ahla kamoo go theetša Mmopi wa rena go ka thušago go rarolla mathata a lapa. Na o lemogile gore dikgateletšo tša letšatši le letšatši le mathata a gona bjale di tšweletša tlhohlo ya kgonthe malapeng lehono? [Dumelela karabo.] Hlokomela seo Mothomi wa lenyalo a se boditšego banyalani ba babedi ba pele.” Bala Genesi 1:28 ke moka o phetle go letlakala 8 ka pukung ya Bophelo bja Lapa gomme o tšwetše pele poledišano ya lena, o diriša dintlha tše di kgethilwego go tšwa go dirapa 11-13. Ithapele go swara thuto ya Beibele. Ge e ba e amogelwa, thoma thuto ka pukung ya Tsebo.
6 Ge o šoma lebenkele le lebenkele, mo gongwe o ka diriša matseno a a makopana ka puku ya “Phela ka mo go sa Felego”: ◼“Lehono re neela tirelo e kgethegilego go batho ba kgwebo setšhabeng. Ka moka ga rena re kgomegile ka go hlatloga ga bosenyi le bošoro tikologong ya rena. Na o nagana gore go na le motho le ge e le ofe yo a nago le tharollo ya kgonthe bothateng bjo? [Dumelela karabo.] Modimo o na le tharollo.” Phetla go letlakala 157 la puku ya Phela ka mo go sa Felego; bala gomme o hlalose Diema 2:22. Bontšha sehlogo sa kgaolo 19, gomme o sepediše puku ka moneelo o šišintšwego.
7 Ge o dira leeto la go boela go motho wa kgwebo yoo o mo sepedišeditšego puku ya “Phela ka mo go sa Felego,” mo gongwe o ka bolela se: ◼“Ketelong ya-ka e fetilego, ke boletše gore Modimo ke yena a nnoši yo a tlogago a e-na le tharollo e swarelelago bosenying le bošorong. Go ya ka kholofetšo ya gagwe, re ka holofela gore lefase la khutšo le tla fihlelelwa.” Bala serapa 4 go letlakala 159 la puku ya Phela ka mo go sa Felego, go akaretša le Psalme 37:37, 38. Hlalosa ka diswantšho tše di lego go letlakala 158. Ithapele go swara thuto e sa lefelelwego ya Beibele yeo e ka swarelwago lefelong la bona la mošomo goba legaeng la bona.
8 Ka ge re le “badirišani ba Modimo,” re na le mabaka ka moka a go ba le boemo bjo bo nepagetšego bja kgopolo ge re neela ditaba tše di lokilego. (1 Ba-Kor. 3:9) Go kgomarela ga rena boemo bjo bja kgopolo go tla feleletša ka tšhegofatšo e humilego ya Jehofa.