Lenaneo le Lefsa la Kopano ya Tikologo

Ke mehola efe e šomago yeo o e amogelago gona bjale ka go sepela le Jehofa? O ka ganetša bjang teko ya go dumelela go phegelela dilo tšeo e sego tša pušo ya Modimo di šitiša dikgahlego tša Mmušo go tla pele bophelong bja gago? (Mat. 6:33) Na o hwetša go le thata go lemoga selo se se lokilego go se se fošagetšego lefaseng leo le dirago gore se se fošagetšego se bonagale e le se lokilego? (Ba-Heb. 5:14) Ditaba tše di tla ahla-ahlwa kopanong ya tikologo ya “Holwa Gona Bjale ke go Sepela Ditseleng tša Modimo,” yeo e thomago ka September 1999.—Ps. 128:1.

Sebopego se sefsa sa ka Mokibelo kopanong ye ya tikologo se tla bolela ka mokgwa wa Seboka sa Tirelo. Molebeledi wa lena wa tikologo o tla tsebiša diphuthego ka seo se rulaganyeditšwego e le gore ka moka ba ka tla ba itokišeleditše go tlo thabela lenaneo ka mo go tletšego.

Karolo e nago le sehlogo se se rego, “Babulamadibogo—Dulang le Šeditše Kudu Kamoo le Sepelago ka Gona” se tla re bontšha kamoo re ka bontšhago bohlale le tlhaologanyo ka gona e le gore re reke nako e swanetšego bakeng sa bodiredi bja bobulamadibogo. (Ba-Ef. 5:15-17) Sehlogo se se rego, “Hlokomela Ditsela Tšeo di Bonagalago e le tše di Lokilego” se tla re ruta kamoo re ka kgonthišegago ka gona ka seo se amogelegago go Modimo sebopegong se sengwe le se sengwe sa bophelo. Polelo e rego, “Kamoo Boporofeta bjo bo Phethagetšego bo re Kgomago ka Gona” e tla re thuša go tlatša megopolo le dipelo tša rena ka lerato la go rata Lentšu la Modimo. Polelo ya phatlalatša e rego, “Ditsela tša Modimo—Kamoo di Nago le Mohola ka Gona!” e tla gatelela mehola e šomago yeo e hwetšwago gona bjale ka go sepela ka go dumelelana le ditekanyetšo tša Jehofa tša go loka.

Na ke kganyogo ya gago gore o bontšhe phatlalatša ka kolobetšo ya meetseng gore o nyaka go sepela ditseleng tša Modimo o le yo mongwe wa bahlanka ba gagwe ba ineetšego? Gona bolela le molebeledi yo a okamelago e le gore go ka dirwa dithulaganyo tše di swanetšego.

Ikemišetše go se foše kopano ye ya tikologo e lego nakong. E-ba gona lenaneong ka moka la matšatši a mabedi, gobane “wa lehlôxônôlô ké e a boifaxo Morêna, mang le mang a sepelaxo ditseleng tša xaxwe.”—Ps. 128:1.