Na o Šoma ka Morero?
1 Jehofa ke Modimo wa morero. (Jes. 55:10, 11) Re kgothaletšwa go mo ekiša. (Ba-Ef. 5:1) Se ka kgonthe se swanetše go bontšhwa tseleng yeo re phethago bodiredi bja rena ka yona. Ka gona potšišo ye ke e swanetšego: “Na o šoma ka morero?”
2 Go bolela ga gago ka ntlo le ntlo, go nea bohlatse bjo bo sa rulaganyetšwago le go aba dipuku, ka moka ke karolo ya bodiredi bjo bo nago le morero. Eupša gopola gore thomo ya rena ga e akaretše feela go dira boboledi eupša gape le go dira barutiwa. (Mat. 28:19, 20) Ka morago ga go bjala dipeu tša therešo ya Mmušo, go nyakega gore re boele gomme re di nošetše le go di hlokomela ka mehla ge re dutše re lebeletše go Jehofa gore a tliše koketšego. (1 Ba-Kor. 3:6) Re swanetše go ba ba šetšago mabapi le go dira maeto a go boela le go thoma dithuto tša Beibele.
3 Katološa Bodiredi bja Gago: Ka mehla go na le maikwelo a mabotse ge o lebelela morago go seo o se dirilego tirelong gomme o ipotša gore: “Ke phethile seo ke bego ke rerile go se dira.” Ka ge go begilwe go 2 Timotheo 4:5, (NW) Paulo o eleditše ka gore: “O phethe bodiredi bja gago ka botlalo.” Seo se akaretša go katološa maiteko a gago a go latelela kgahlego ka moka yeo e hweditšwego. Thulaganyong ya gago ya beke le beke ya tirelo, rulaganya nako e tsepamego ya go dira maeto a go boela. Šomela pakaneng ya go leka go thoma dithuto tša Beibele le bao ba sekametšego go lokeng. Wo e swanetše go ba morero wa gago ge o tšea karolo bodireding.
4 Botšiša bagoeledi kamoo ba ilego ba ikwa ka gona ge ba be ba bona barutwana ba bona ba Beibele ba kolobetšwa kopanong. Ba ile ba thaba kudu go etša bao ba bego ba kolobetšwa. Ba phethile morero o mogolo! Modira-barutiwa yo mongwe o ile a bolela se ka gore: “Go dira barutiwa go bolela go dira bareti ba oketšegilego ba Jehofa. Go bolela bophelo go bao ba amogelago therešo. Ke fo rata go ruta ba bangwe therešo—ke mo go kgahlišago! . . . Ba bantši ba bao ba ilego ba thoma go rata Jehofa e bile bagwera ba-ka ba rategago kudu.”
5 Anke o nagane o kgona go thuša motho gore e be mohlanka yo a ineetšego wa Jehofa! A lebaka le lekaakang la go thaba! Dienywa tše bjalo di tlišwa ke go šoma ka morero bodireding.—Ba-Kol. 4:17.