Lenaneo le Lefsa la Kopano ya Tikologo

‘Dinakong tše tše hlobaetšago tšeo go lego thata go lebeletšana le tšona,’ re nyaka bohlale bjo bo tšwago godimo gore re hwetše kamogelo ya Jehofa le go dula re amogelwa ke yena. (2 Tim. 3:1, bapiša le NW) Lenaneo la kopano ya tikologo la ngwaga wa tirelo wa 2005 leo go lona go tla ahla-ahlwago sehlogo se se rego, “Hlahlwa ke ‘Bohlale byo bo Tšwaxo Xodimo’” le tla re nea keletšo e šomago gotee le kgothatšo.—Jak. 3:17.

Tšhiedišano ya pele yeo e nago le sehlogo se se rego, “Go Bonagatša ‘Bohlale byo bo Tšwaxo Xodimo’ Maphelong a Rena,” e tla re thuša go kwešiša seo se akaretšwago ke go ba yo a hlwekilego, yo a nago le khutšo, yo a leka-lekanego le yo a ikemišeditšego go kwa. Ke moka molebeledi wa tikologo o tla lebiša tlhokomelo dikarolong tše dingwe tše tharo tša bohlale bjo bo tšwago go Modimo. Molebeledi wa selete o tla phetha letšatši la pele ka go bontšha kamoo badiredi ba Bakriste ba hlametšwego go bolela bohlale bja Modimo le ge ba lebelelwa ke ba bangwe e se ‘ba mangwalo e bile e se barutegi.’—Dit. 4:13.

Letšatšing la bobedi, tšhiedišano e nago le sehlogo se se rego, “Phegelela Dilo Tšeo di Agago” e tla re thuša go lemoga le go phema dilo tšeo di ka re fokodišago moyeng. E tla re bontšha gape kamoo re ka agago ba bangwe dibokeng tša phuthego, bodireding bja tšhemo le ka lapeng. Polelo ya phatlalatša ye e nago le sehlogo se se rego, “Kamoo Bohlale bjo bo Tšwago Godimo bo re Holago ka Gona” e tla nweletša tebogo ya rena bakeng sa mehola yeo re e hwetšago ge re diriša melao ya motheo ya Modimo maphelong a rena. Polelo ya go phetha yeo e rego, “Go Gata Mogato ka go Dumelelana le Bohlale bja Modimo go a re Šireletša” e tla matlafatša boikemišetšo bja rena bja go tsoma bohlale go Jehofa mehleng ye ya bofelo.

Tiragalo e kgolo ya kopano e nngwe le e nngwe ke go kolobetšwa ga barutiwa ba bafsa. Sekolo sa Bodiredi sa Pušo ya Modimo le Thuto ya Morokami bakeng sa beke yeo le tšona di tla swarwa lenaneong. Jehofa o kganyoga gore ka moka ga rena re holwe ke bohlale bjo a bo neago. Re tla humišwa moyeng ke keletšo le kgothatšo tšeo re tlago go di hwetša kopanong ya rena ya tikologo.—Die. 3:13-18.