Lenaneo le Lefsa la Kopano ya Tikologo

Go kgonega bjang gore re eme re tiile kgahlanong le bao ba ganetšago o šoro borapedi bja therešo? Re ka fenya bjang dilo tšeo di lekago go re bušetša morago lefaseng leo le sa boifego Modimo? Lenaneo la kopano ya tikologo la ngwaga wa tirelo wa 2009 le tla araba dipotšišo tše tše bohlokwa. Sehlogo se re “Tšwela Pele o Fenya Bobe ka Bolo.” (Rom. 12:21) Ela hloko seo se re letetšego.

Molebeledi wa selete o tla nea dipolelo tša dihlogo tše di rego “Go Matlafaletšwa go Fenya Bobe ka Bolo,” “Itiše Malebana le go Ikholofela ka mo go Feteletšego” “Bokgopo ka Moka bo Kgaufsi le go Fela!” le “Go Matlafatša Tumelo ya Rena Bakeng sa go Fenya Lefase.” Molebeledi wa tikologo o tla bolela le rena ka sehlogo se se rego “Bjale ke Nako ya go Dula re Phafogile!,” se se theilwego go Baroma 13:11-13 le se se rego “O se ke wa Ipontšha o Nyamile Letšatšing la Tlalelo,” se se theilwego go Diema 24:10. Re lebeletše pele karolong ya molebeledi wa tikologo e rego “Go Ela Hloko tše di Nyakegago tša Tikologo.” Karolo e nngwe e kgothatšago e tla ba e rego “Na o ka ba ‘Bodireding bjo’—Ka go Bula Madibogo?” Tšhiedišano ya pele go tše pedi e na le sehlogo se se rego “Ema o Tiile Kgahlanong le Maano a Bohwirihwiri a Diabolo.” E tla re thuša go lemoga le go gana maano a bohwirihwiri a Diabolo dibopegong tša thekinolotši, boithabišo le thuto. Tšhiedišano ye e rego “Hwetša Matla a go Ganetša Mehleng ye e Kgopo” e tla re bontšha kamoo re ka dirišago ka botlalo kudu keletšo e buduletšwego e hwetšwago go Baefeso 6:10-18.

Go na le tswalano magareng ga go fenya bobe mothopong wa bjona le boboleding bja molaetša wa Mmušo. (Kut. 12:17) Ga go makatše ge Sathane a sa lape go hlasela Dihlatse tša Jehofa! (Jes. 43:10, 12) Eupša Diabolo o tla palelwa o šoro ka gobane re ikemišeditše go “tšwela pele [re] fenya bobe ka bolo.” Dira dithulaganyo tša kgonthe gore o holege ka botlalo mananeong ka moka a mane a kopano ye ya tikologo.