Na o Itokišeleditše Masetlapelo a Magolo?

1. Ke ka baka la’ng go le bohlokwa go itokišeletša dikotsi?

GO ITOKIŠELETŠA e sa le pele go ka phološa maphelo a rena. Ka mohlala ge go e ba le kotsi, batho bao ba itokišitšego e sa le pele ba ka phologa ba kgona le go thuša batho ba bangwe. Mokgatlo wo o lekago go thuša batho kua Europe o re: “Go itokišeletša gabotse go ka phološa maphelo a batho.”

2. Ke ka baka la’ng re swanetše go itokišeletša masetlapelo a magolo? (Mateo 24:44)

² “Masetlapelo a magolo” a tlo thoma ka ponyo ya leihlo. (Mat. 24:21) Eupša masetlapelo a magolo a fapana le dikotsi tše dingwe ka gobane re a tseba gore a etla. Mengwaga e ka bago e 2 000 e fetilego, Jesu o ile a lemoša balatedi ba gagwe gore ba itokišeletše letšatši leo. (Bala Mateo 24:44.) Ge e ba re itokišitše, go tlo ba bonolo gore re kgone go kgotlelela dinako tšeo tše thata, le go thuša batho ba bangwe gore le bona ba kgone go kgotlelela.—Luka 21:36.

3. Go ba le kgotlelelo, kwelobohloko le lerato go tlo re thuša bjang go itokišeletša masetlapelo a magolo?

³ Re swanetše go hlagolela dika tše tharo tšeo di tlago go re thuša go itokišeletša masetlapelo a magolo. Re tlo dira’ng ge e ba re swanetše go bolela molaetša wa kahlolo gomme batho bao ba sa dumelego ba re ganetša? (Kut. 16:21) Re tlo swanelwa ke go ba le kgotlelelo gore re kwe Jehofa, re tshepa gore o tla re šireletša. Re tlo dira’ng ge e ba bana babo rena le dikgaetšedi ba lahlegelwa ke dilo tša bona? (Habak. 3:17, 18) Re tlo hloka go ba le kwelobohloko e le gore re kgone go ba thuša ka dilo tšeo ba di hlokago. Re tlo arabela bjang ge e ba re hlaselwa ke ditšhaba tšeo di ipopilego ngatana e tee, ke moka ra swanelwa ke go dula le bana babo rena le dikgaetšedi lefelong le tee ka nakwana? (Hesek. 38:10-12) Re tlo hloka go ba le lerato leo le tseneletšego gore re kgone go thušana go kgotlelela nakong yeo e thata.

4. Beibele e bontšha bjang gore re swanetše go dula re hlagolela go ba le kgotlelelo, kwelobohloko le lerato?

⁴ Lentšu la Modimo le re kgothaletša gore re dule re hlagolela go ba le kgotlelelo, kwelobohloko le lerato. Luka 21:19 e re: “Ka go kgotlelela ga lena, le tla rua meoya ya lena.” Bakolose 3:12 e re: “Aparang. . . lešoko.” 1 Bathesalonika 4:9, 10 e re: “Lena ka bolena le rutwa ke Modimo gore le ratane. . . . Eupša bana bešo, re le eletša gore le tšwele pele le dira bjalo ka tekanyo e tletšego.” Ditemana tše ka moka di be di ngwaletšwe barutiwa bao ba bego ba šetše ba ena le kgotlelelo, kwelobohloko le lerato. Eupša ba be ba swanetše go dula ba ithuta go bontšha dika tše. Le rena re swanetše go dira bjalo. Re tlo thušwa ke go bona gore Bakriste ba mehleng ya pele, ba ile ba bontšha bjang seka se sengwe le se sengwe. Ke moka re tlo bona gore re ka ekiša bjang barutiwa bao, gomme ra kgona go bontšha gore re itokišeleditše masetlapelo a magolo.

EBA LE KGOTLELELO

5. Bakriste ba nakong e fetilego ba ile ba bontšha bjang kgotlelelo ge ba be ba na le mathata?

⁵ Bakriste ba nakong e fetilego ba be ba swanetše go kgotlelela. (Baheb. 10:36) Le ge ba be ba na le mathata a go swana le ao batho ba mehleng ya bona ba bego ba na le ona, ba be ba na le mathata a mangwe ao a oketšegilego ka baka la ge e le Bakriste. Ba bantši ba bona ba be ba tlaišwa, ba sa tlaišwe ke baetapele ba bodumedi ba Bajuda le baetapele ba Roma feela, eupša ba tlaišwa le ke ba malapa a gabo bona. (Mat. 10:21) Le gona, ba be ba swanetše go lwantšhana le dithuto tša maaka tša bahlanogi tšeo di bego di baka dikarogano ka phuthegong. (Dit. 20:29, 30) Lega go le bjalo, Bakriste bao ba ile ba kgotlelela. (Kut. 2:3) Bjang? Ba ile ba naganišiša ka mehlala ya batho ba ka Beibeleng bao ba ilego ba kgotlelela, go swana le Jobo. (Jak. 5:10, 11) Ba ile ba rapelela gore ba be le matla. (Dit. 4:29-31) Bakriste bao, ba ile ba gopola gore Jehofa o tlo ba šegofatša ge ba ka kgotlelela.—Dit. 5:41.

6. O ithuta’ng go seo Merita a ilego a se dirilego gore a kgone go kgotlelela ge a be a ganetšwa?

⁶ Le rena re ka kgona go kgotlelela ge e ba re dula re ithuta Lentšu la Modimo le go bala dikgatišo tša rena gomme ra kwa ka mehlala ya batho bao ba ilego ba kgotlelela, ke moka ra naganišiša ka yona. Kgaetšedi Merita wa kua Albania, o ile a kgona go kgotlelela kganetšo e šoro go tšwa go lapa la gabo. O re: “Ke ile ka kgothatšwa ke go bala ka pego ya Jobo ka Beibeleng. O ile a tlaišega kudu. Le ge a be a sa tsebe gore ke mang a mmakelago mathata, o ile a re: ‘Ke tla ba ka hwa ke se ka lahla potego ya ka!’ (Jobo 27:5) Ke ile ka bona kamoo mathata a Jobo a bego a le boima ka gona ge ke a bapetša le a ka. Go fapana le Jobo, nna ke be ke tseba gore mathata a ka a bakwa ke mang.”

7. Re swanetše go ithuta go dira’ng gona bjale le ge e ba re se na mathata a magolo?

⁷ Re ka hlagolela go ba le kgotlelelo ka go dula re botša Jehofa ka dilo tšeo di re tshwenyago. (Bafil. 4:6; 1 Bathes. 5:17) Mohlomongwe ga o na mathata a magolo gona bjale. Le ga go le bjalo ge o nyamile, o hlakahlakane goba o sa tsebe gore o dire eng, na o kgopela Jehofa gore a go thuše? Ge e ba o dula o kgopela Jehofa gore a go thuše ge o kopana le mathata letšatši le lengwe le le lengwe, o ka se palelwe ke go dira bjalo ge o kopana le mathata a magolo nakong e tlago. O tlo kgodišega gore Jehofa o dula a ikemišeditše go go thuša.—Ps. 27:1, 3.

8. Mohlala wa Mira o bontšha bjang gore go kgotlelela mathata lehono go ka re thuša le go kgotlelela mathata a nakong e tlago? (Jakobo 1:2-4) (Bona le seswantšho)

⁸ Ge e ba re kgona go kgotlelela mathata lehono, re tlo kgona go a kgotlelela le nakong ya masetlapelo a magolo. (Baroma 5:3) Ke ka baka la’ng re re’alo? Bana babo rena ba bantši le dikgaetšedi ba hweditše gore teko e nngwe le e nngwe yeo e ba lekago tumelo gomme ba kgona go e kgotlelela, e ba thuša gore ba tle ba kgotlelele mathata a mangwe ao a latelago. Ge Jehofa a ba thuša go kgotlelela bothata bjo itšego, ba ba le tumelo ya gore Jehofa o tloga a nyaka go ba thuša. Ka gona ka ge ba na le tumelo go Jehofa, ba ka kgona go kgotlelela mathata a mangwe. (Bala Jakobo 1:2-4.) Mira e lego mmulamadibogo wa kua Albania, o lemogile gore mathata a gagwe a nakong e fetilego, a mo thušitše gore a kgone go kgotlelela mathata ao a nago le ona gona bjale. O re ka dinako tše dingwe o ikwa eka ke yena a nnoši a nago le mathata a mantši. Eupša ge a gopola dilo tšeo Jehofa a mo diretšego tšona mengwageng e 20 e fetilego go mo thekga, o ile a ipotša gore: ‘Dula o botega. O se ke wa tlogela go hlankela Jehofa gona bjale, ka morago ga ge a ile a go thuša go kgotlelela mathata a mantši ao o ilego wa kopana le wona.’ Le wena o ka naganišiša kamoo Jehofa a šetšego a go thušitše go kgotlelela ka gona. Kgodišega gore ka mehla ge o kopana le bothata gomme o kgotlelela, Jehofa o lebeletše gomme o tlo go putsa. (Mat. 5:10-12) Ke moka ge masetlapelo a magolo a thoma o tla ba o ithutile go kgotlelela, gomme wa ikemišetša go tšwela pele o kgotlelela.

EBA LE KWELOBOHLOKO

9. Phuthego ya kua Antiokia ya Siria e ile ya bontšha bjang gore e na le kwelobohloko?

⁹ Nagana ka seo se ilego sa diragalela Bakriste ba kua Judea ge go be go na le tlala e kgolo. Ge phuthego ya kua Antiokia ya Siria e ekwa ka tlala yeo, e ile ya kwela bana babo bona bohloko. Ba ile ba dira se sengwe go thuša bana babo bona le dikgaetšedi. Ba ile “ba ikemišetša go romela tirelo ya thušo go bana babo bona bao ba dulago Judea, yo mongwe le yo mongwe wa bona go ya kamoo a bego a ka kgona ka gona.” (Dit. 11:27-30) Le ge bana babo bona le dikgaetšedi bao ba bego ba tlaišega ka baka la tlala ba be ba dula kgole, Bakriste ba kua Antiokia ba be ba ikemišeditše go ba thuša.—1 Joh. 3:17, 18.

10. Re ka bontšha bjang Bakristegotee le rena gore re ba kwela bohloko ge ba wetšwe ke dikotsi?(Bona le seswantšho)

¹⁰ Le rena lehono re ka bontšha kwelobohloko ge re ekwa gore bana babo rena le dikgaetšedi ba wetšwe ke dikotsi. Re ka thuša ka go botšiša bagolo ge e ba re ka kgona go thuša modirong wa tlhakodišo, ka go neela modirong wa lefase ka moka goba ka go rapelela bao ba wetšwego ke kotsi.b (Die. 17:17) Ka mohlala, ka 2020, Dikomiti tša Tlhakodišo tše di fetago tše 950, di ile tša hlongwa lefaseng ka moka go hlokomela bao ba kgomilwego ke leuba la COVID-19. Re tloga re leboga bana babo rena le dikgaetšedi bao ba šomago medirong ya tlhakodišo. Ka ge ba kwela bana babo bona le dikgaetšedi bohloko, ba ba nea dilo tšeo ba di hlokago, ba ba thuša gore ba tšwele pele ba hlankela Jehofa, gomme ka dinako tše dingwe ba lokiša goba ba aga lefsa magae a bona le mafelo a borapedi.—Bapiša le 2 Bakorinthe 8:1-4.

11. Re tumiša bjang Tatago rena wa legodimong ge re bontšha batho ba bangwe kwelobohloko?

¹¹ Batho ba bangwe ba kgona go bona dilo tšeo re di dirago ge re bontšha gore re kwela ba bangwe bohloko ka morago ga kotsi. Ka mohlala ka 2019, ledimo leo le bitšwago Dorian le ile la senya Holo ya Mmušo kua Bahamas. Ge bana babo rena ba dutše ba aga holo yeo, ba ile ba botšiša rakontraka yo e sego Hlatse gore a ka nyaka bokae gore a dire mošomo o itšego. O ile a re go bona: “Nka rata go neela. . . Ka dithulusi, bašomi le dilo tše dingwe tša go aga. . . . Ke nyaka go no direla mokgatlo wa lena se. Ke kgahlwa ke tsela yeo le swarago bagwera ba lena ka yona.” Batho ba bantši mo lefaseng ga ba tsebe Jehofa. Eupša ba bantši ba bona seo Dihlatse tša Jehofa di se dirago go thuša ba bangwe. Re tloga re thaba kudu ge re lemoga gore, go bontšha batho ba bangwe kwelobohloko, go dira gore batho ba bantši ba nyake go tseba ka Jehofa yo a ‘humilego ka dikgaugelo’!—Baef. 2:4.

12. Go bontšhana kwelobohloko lehono, go re thuša bjang gore re itokišeletše masetlapelo a magolo? (Kutollo 13:16, 17)

¹² Ke ka baka la’ng re tlo swanelwa ke go bontšhana kwelobohloko nakong ya masetlapelo a magolo? Beibele e bontšha gore bao ba sa thekgego mekgatlo ya dipolotiki ba tlo kopana le mathata gona bjale le nakong ya masetlapelo a magolo. (Bala Kutollo 13:16, 17.) Go ka nyakega gore re thuše bana babo rena le dikgaetšedi ka dilo tšeo ba di hlokago. Ge kgoši ya rena Jesu Kriste a etla go ahlola batho, eka a ka re hwetša ka moka ga rena re bontšhana kwelobohloko, ke moka a re meme gore re tle re je “bohwa bja Mmušo.”—Mat. 25:34-40.

BONTŠHA LERATO

13. Go ya ka Baroma 15:7, Bakriste ba nakong e fetilego ba ile ba bontšha bjang gore ba a ratana?

¹³ Bakriste ba nakong e fetilego ba be ba tsebja ka go bontšhana lerato. Eupša na go be go le bonolo go dira seo? Gopola gore batho ba phuthegong ya kua Roma ba be ba sa swane. Ba bangwe e be e le Bakriste ba Bajuda bao ba rutilwego go latela Molao wa Moshe, eupša ba bangwe e be e le Bakriste bao e sego Bajuda, e bile ba godišitšwe ka ditsela tša go se swane. Go ka direga gore ba bangwe e be e le makgoba mola ba bangwe ba lokologile, gomme ba bangwe go ka direga gore e be e le beng ba makgoba. Bakriste ba ba be ba ka bontšhana bjang gore ba a ratana le ge ba be ba sa swane? Moapostola Paulo o ile a ba kgothaletša gore ba ‘amogelane.’ (Bala Baroma 15:7.) O be a era gore’ng? Lentšu leo le fetoletšwego e le go “amogela” le bolela go swara motho ka botho, go swana le go mo amogela ka legaeng la gago goba go mo dira gore e be karolo ya bagwera ba gago. Ka mohlala, Paulo o ile a botša Filemone gore a amogele bjang lekgoba leo le bego le tšhabile e lego Onesimo. O itše go yena: “Mo amogele ka botho.” (Fil. 17) Akhwila le Perisila ba ile ba amogela Apollo yo a bego a sa tsebe go gontši ka Bokriste go swana le bona, ka go “sepela le yena.” (Dit. 18:26) Bakriste bao ga se ba ka ba dumelela go se swane ga bona go ba bakela mathata, gomme ba ile ba amogelana.

14. Anna le monna wa gagwe ba bontšhitše bjang gore ba rata batho ba bangwe?

¹⁴ Le rena re ka bontšha bana babo rena le dikgaetšedi lerato ka go gwerana le bona le go fetša nako re na le bona. Le bona ba tlo re bontšha lerato. (2 Bakor. 6:11-13) Ekwa ka phihlelo ya Anna le monna wa gagwe. Ka morago ga gore ba hwetše kabelo ya bona e mpsha ya go ba baromiwa kua Bodikela bja Afrika, leuba la COVID-19 le ile la thoma. Ka lebaka la leuba leo, ba ile ba palelwa ke go kopana le bana babo bona le dikgaetšedi ba phuthegong ya gabo bona e mpsha. Banyalani ba ba be ba ka bontšha bjang gore ba rata batho? Ba ile ba ikgokaganya le bana babo bona le dikgaetšedi ka bidio. Ke moka ba ba botša gore ba nyaka go ba tseba gakaone. Malapa ao a be a thabile kudu, e bile a dula a ba founela le go ba romela melaetša. Ke ka baka la’ng banyalani ba, ba be ba nyaka go tseba bana babo bona le dikgaetšedi ba ka phuthegong ya bona e mpsha? Anna o re: “Nka se tsoge ke lebetše bana bešo le dikgaetšedi bao ba ilego ba bontšha lapa lešo lerato, ge dilo di be di sepela gabotse le ge re be re na le mathata, gomme mohlala wa bona o dirile gore le nna ke bontšhe batho lerato lehono.”

15. O ithuta’ng mohlaleng wa Vanessa wa go rata bana babo rena le dikgaetšedi ka moka? (Bona le seswantšho)

¹⁵ Bontši bja rena re kopanela diphuthegong tšeo bana babo rena le dikgaetšedi ba godišitšwego ka ditsela tšeo di sa swanego, e bile ba na le dimelo tša go se swane. Re tlo kgona go ba rata ka moka ge re ka šetša feela dika tša bona tše dibotse. Kgaetšedi Vanessa yo a hlankelago New Zealand, o ile a hwetša go le thata go gwerana le batho ba bangwe ka phuthegong ya gabo. Eupša o ile a phetha ka gore go e na le gore a se ke a gwerana le batho bao a sa ratego dimelo tša bona, go kaone gore a fetše e ntši a na le bona. Go dira bjalo go ile gwa mo thuša gore a bone gore ke eng seo Jehofa a se ratago ka bona. O re: “Ge e sa le monna wa ka a eba molebeledi wa tikologo, re fetša nako e ntši re na le bana babo rena le dikgaetšedi, bao ba nago le dimelo tša go se swane, e bile ke hwetša go le bonolo gore ke gwerane le bona. Ga bjale ke ba rata ka moka. Jehofa le yena o a ba rata, ka gobane o gogile batho ba mehuta ka moka gore ba tle ba mo hlankele.” Ge re ithuta go lebelela batho ba bangwe ka tsela yeo Jehofa a ba lebelelago ka yona, re ba bontšha gore re a ba rata.—2 Bakor. 8:24.

16. Ke ka baka la’ng re tlo swanelwa ke go rata bana babo rena le dikgaetšedi nakong ya masetlapelo a magolo? (Bona le seswantšho)

¹⁶ Re tlo swanelwa ke go rata bana babo rena le dikgaetšedi nakong ya masetlapelo a magolo. Jehofa o tlo re šireletša bjang ge nako yeo e fihla? Nagana ka seo Jehofa a ilego a laela batho ba gagwe gore ba se dire ge Babilona ya bogologolo e be e hlaselwa. O itše: “Sepelang batho ba ka, le tsene diphapošing tša lena tša ka gare le tswalele mejako ya lena. Ikuteng ka nakonyana go fihla kgalefo e feta.” (Jes. 26:20) Mohlomongwe re ka tla ra swanelwa ke go latela tlhahlo e swanago, nakong ya masetlapelo a magolo. “Diphapoši tša ka gare” e ka ba diphuthego tša gabo rena. Nakong ya masetlapelo a magolo, re tlo hwetša tšhireletšo yeo Jehofa a tshepišago go re nea yona ge re ka tšwela pele re mo hlankela re ena le bana babo rena le dikgaetšedi. Ka gona, ga bjale re swanetše go šoma ka thata gore re rate bana babo rena le dikgaetšedi ka mo go tseneletšego, re se ke ra no phedišana feela le bona. Go phologa ga rena, go ka ithekga ka seo!

ITOKIŠE GONA BJALE

17. Re tlo kgona go dira’ng nakong ya masetlapelo a magolo ge e ba re itokiša e sa le gona bjale?

¹⁷ “Letšatši le legolo la Jehofa” le tlo tlišetša batho ka moka manyami. (Tsef. 1:14, 15) Batho ba Jehofa le bona ba tlo lebeletšana le mathata. Eupša ge re ka itokiša gona bjale, re tlo kgona go dula re išitše maswafo fase, le go thuša ba bangwe. Re tlo kgotlelela mathata ka moka ao re ka lebeletšanago le ona. Ge bana babo rena le dikgaetšedi ba tlaišega, re tlo dira sohle seo re ka se kgonago go ba thuša, ka go ba bontšha kwelobohloko le go ba nea dilo tšeo ba di hlokago. Le gona, ge re ka ithuta go rata bana babo rena le dikgaetšedi gona bjale, re tlo kgona go ba bontšha lerato nakong e tlago. Jehofa o tlo re putsa ka bophelo bjo bo sa felego lefaseng leo dikotsi ka moka le mathata di tla bego di lebetšwe.—Jes. 65:17.