Dinotlelo tša go go Thuša go Boledišana le Molekane wa Gago

‘N KABE ke sa bolela seo.’ ‘Ga se ka bea taba gabotse.’ Na o kile wa ikwa ka tsela yeo ka morago ga gore o leke go boledišana le molekane wa gago? Poledišano ke bokgoni bjoo go nyakegago gore bo hlagolelwe. Ka go swana le bokgoni le ge e le bofe, go bonagala batho ba bangwe ba e kgona gabonolo mola ba bangwe ba swara bothata. Lega go le bjalo, le ge e ba o swara bothata bja go boledišana le molekane wa gago, go a kgonega gore o ithute go botša molekane wa gago ka tsela e thabišago seo o se naganago, e lego gona go boledišana ka tsela e atlegago.

Ka dinako tše dingwe, tutuetšo ya setšo e dira gore batho ba nagane ka tsela e itšego ge go tliwa tabeng ya go phedišana le balekane ba bona. Banna ba rutilwe gore ‘e le gore ba bontšhe gore ke banna-nna, ga se ba swanela go bolela kudu.’ Banna bao ba bolelago kudu ba ka nyatšwa ka gore ba tletše papadi. Ke therešo gore Beibele e re: “Motho yo mongwe le yo mongwe a e be yo a akgofago mabapi le go kwa, yo a diegago mabapi le go bolela.” (Jakobo 1:19) Lega go le bjalo, keletšo yeo e šoma go banna le go basadi gomme e hlatsela gore poledišano e akaretša seo se fetago go fo bolela. Batho ba babedi ba ka boledišana ka nako e telele, eupša go thwe’ng ge e ba ba palelwa ke go theetšana? Go ka direga gore ka go dira bjalo go se be le poledišano ya kgonthe. Karolo e kgolo ya poledišano e atlegago go etša ge lengwalo le le lego ka mo godimo le bontšha, ke ya bokgoni bja go theetša.

Go Boledišana Ntle le go Ntšha Mantšu

Ditšhabeng tše dingwe, go letetšwe gore basadi ba se ntšhe sa mafahleng a bona. Banna ga ba be le taba le seo se diregago ka malapeng a bona. Maemong a bjalo, monna le mosadi ba phopholetša seo se nyakwago ke yo mongwe le yo mongwe wa bona maemong le ge e le afe. Basadi ba bangwe ba ba le bokgoni bja go lemoga seo banna ba bona ba se nyakago gomme ba gata mogato ka pela gore ba phethagatše seo. Maemong a bjalo, monna le mosadi ba boledišana ka tsela e itšego ntle le go ntšha mantšu. Lega go le bjalo, ka tlwaelo mohuta o bjalo wa poledišano o dirwa ke motho o tee. Le ge mosadi a ka ithuta go bona seo monna wa gagwe a se naganago, ga se gantši monna a hlagolelago bokgoni bjo bjalo e le gore a lemoge maikwelo a mosadi wa gagwe.

Ke therešo gore ditšong tše dingwe banna ba ela hloko dinyakwa tša maikwelo tša basadi ba bona gomme ba leka go di tšeela godimo. Lega go le bjalo, gaešita le ditšong tše bjalo manyalo a holwa ke poledišano e kaone.

Poledišano e Bohlokwa

Poledišano e lebanyago e ka dira gore go phengwe go se kwešišane le go kwelana thoko. Mathomong a histori ya Baisiraele, meloko ya Rubeni, Gada le seripa sa wa Manase yeo e bego e dula ka bohlabela bja Noka ya Jorodane e ile ya aga “aletare e kxolo kxakala” kgaufsi le Jorodane. Meloko e mengwe e ile ya se kwešiše ditiro tša yona. Ka ge meloko e mengwe e be e nagana gore bana babo bona ka mošola wa Jorodane ba be ba hlanogile, e ile ya itokišetša ntwa e le ka bodikela go lwa le meloko yeo e meraro yeo e bego e nagana gore ke ya marabele. Lega go le bjalo, pele ga ge e ka ya go lwa, e ile ya romela batseta gore ba yo boledišana le meloko ye ya ka bohlabela. Woo e tloga e bile mogato o bohlale! Ba ile ba hwetša gore aletare yeo e be e se ya go dira dihlabelo goba dibego dišele. Go e na le moo, meloko ya ka bohlabela e be e tšhoga gore nakong e tlago meloko e mengwe e be e tla e botša gore: “Fá xo Morêna xa xo se e lexo sa lena.” Aletare e be e tla ba bohlatse bja gore le bona e be e le barapedi ba Jehofa. (Jošua 22:10-29) Ba ile ba reela aletare yeo leina ba re ke Bohlatse, mohlomongwe e le ka gobane e bile bohlatse bja gore Jehofa e be e le Modimo wa therešo go bona.—Jošua 22:34.

Tlhaloso ya bona e ile ya kgotsofatša meloko e mengwe, yeo e ilego ya fetola kgopolo ya go lwa le meloko yeo e mengwe e mebedi le seripa. Ee, poledišano e bulegilego le e lebanyago e ile ya dira gore go efogwe ntwa. Ka morago ge Isiraele e rabetše malebana le Jehofa Modimo, e lego monna wa yona wa seswantšhetšo, o ile a e botša gore o tla ‘bolela le yona gabotse.’ (Hosea 2:14, bapiša le PK.) A mohlala o mobotse gakaakang go banyalani! Ee, katanela go fihlelela pelo, goba go bolela gabotse le molekane wa gago e le gore a kgone go kwešiša maikwelo a gago. Seo se bohlokwa, kudu-kudu ge taba yeo e ahla-ahlwago e kgoma maikwelo. Pattie Mihalik, e lego raditaba wa kua United States o bolela gore: “Mantšu ga a rekwe, eupša a bohlokwa kudu. Le ge ba bangwe ba ka thatafalelwa ke go bontšha maikwelo a bona, mafelelo a go dira seo e ba a mabotse kudu go feta tšhelete yeo e lego ka pankeng.”

Hlagolelang Bokgoni bja go Boledišana

Ba bangwe ba ka bolela gore: ‘Lenyalo la rena le ile la fo pala go tloga mathomong.’ Ba bangwe ba ka phetha ka gore: ‘Lenyalo le le padile.’ Ba ka nagana gore ga go kgonege go kaonefatša bokgoni bja bona bja go boledišana ka morago ga letšatši la bona la lenyalo. Lega go le bjalo, nagana ka bao ba phelago ditšhabeng tšeo manyalo a rulaganywago ke ba leloko. Bontši bja bao ba lego ditšong tše bjalo ba feleletša ba e-na le poledišano e botse manyalong a bona.

Banyalani ba bangwe ba nageng ya ka Bohlabela ba ile ba kopanywa ka lenyalo leo ba bego ba le rulaganyeditšwe. Mmaditsela wa lapeng labo monna yoo o be a kgopetšwe go sepela leeto le letelele go yo nyakela monna yoo mosadi. Se se kgahlišago ke gore gaešita le ge banyalani bao ba phetše nywaga e 4 000 e fetilego, ba ile ba bontšha bokgoni bjo bogolo bja poledišano. Monna yoo, e lego Isaka, o ile a kopana mašemong le mmaditsela yoo gotee le yoo e bego e tla ba mosadi wa gagwe. Mmaditsela yoo o ile a “laodišetša Isaka tšohle tše a di dirilexo.” Pego ya Beibele ya mabapi le lenyalo le e tšwela pele go hlalosa gore: “[Ka morago ga moo] Isaka a iša Rebeka mo lapeng le e bexo e le la Sara mm’axwê, [mogato wo e be e le lenyalo la semolao] a tšea Rebeka ya ba mosadi wa xaxwe, ’me a mo rata.”—Genesi 24:62-67.

Ela hloko gore Isaka o ile a kwa pego pele gomme “ka morago ga moo” a tšea Rebeka ya ba mosadi wa gagwe. Mmmaditsela yoo e be e le mohlanka yo a botegago e bile a ineetše go Jehofa Modimo, e lego Modimo yoo Isaka a bego a mo rapela. Isaka o be a na le lebaka le le kwagalago la gore a bote monna yo. Ka morago ga moo, Isaka ‘o ile a rata’ Rebeka, yoo a bego a mo nyetše.

Na Isaka le Rebeka ba ile ba hlagolela mekgwa e mebotse ya poledišano? Ka morago ga gore morwa wa bona Esau a nyale barwedi ba babedi ba Bahethe, go ile gwa tsoga bothata bjo bogolo ka lapeng. Rebeka ‘o ile a dula a botša’ Isaka gore: “Nna bophelô bo ntenne ka barwedi bá ba Hethe; xe Jakobo le yêna a ka tšea mosadi wa barwedi ba Hethe, . . . xôna nka re: Ke sa phelêla’ng?” (Genesi 26:34; 27:46) Go bonagala gabotse gore Rebeka o ile a bolela ka tsela e kwagalago seo se bego se mo tshwenya.

Isaka o ile a botša Jakobo yoo e bego e le lefahla la Esau gore a se ke a nyala yo mongwe wa barwedi ba Bakanana. (Genesi 28:1, 2) Rebeka o be a itlhalositše gwa kwagala. Banyalani ba ba ile ba atlega go boledišaneng ka taba e kgomago maikwelo kudu ya lapa, gomme ka go rialo ba re beetše mohlala o mobotse lehono. Lega go le bjalo, go thwe’ng ge e ba banyalani ba sa dumelelane ka taba e itšego? Go ka dirwa’ng?

Ge le Ngangišana

Ge e ba wena le molekane wa gago le ngangišana ka taba e itšego, o se ke wa mo homolela. Seo se tla fetiša molaetša o kwagalago wa gore: Ga se wa thaba, gomme o nyaka gore le molekane wa gago a se thabe. Le gona, molekane wa gago a ka no ba a sa kwešiše ka botlalo seo o se nyakago gotee le maikwelo a gago.

Go ka nyakega gore wena le molekane wa gago le ahla-ahle taba yeo e tsošitšego ngangišano. Ge e ba taba yeo e kgoma maikwelo, go ka fo ba thata gore le dule le išitše maswafo fase. Batswadi ba Isaka, e lego Aborahama le Sara, le bona ka nako e nngwe ba ile ba lebeletšana le boemo bjo thata. Ka ge Sara e be e le moopa, o ile a latela motlwae wa mehleng yeo gomme a dira gore mohlanka wa gagwe wa ngwanenyana e lego Hagara e be mosadi wa serethe wa Aborahama wa go mmelegela bana. Hagara o ile a belegela Aborahama ngwana wa mošemane, yoo leina la gagwe e bego e le Išimaele. Lega go le bjalo, Sara ka morago o ile a ima, gomme a belegela Aborahama morwa, yoo leina la gagwe e bego e le Isaka. Ge Isaka a be a tlo tshwešwa letswele, Sara o ile a bona Išimaele a kwera morwa wa gagwe. Ka gona ge Sara a lemoga gore seo se tla gobatša morwa wa gagwe, o ile a gapeletša Aborahama gore a rake mohlanka wa gagwe wa ngwanenyana le Išimaele. Ee, Sara o ile a bolela ka tsela e lebanyago seo se bego se mo tshwenya. Eupša seo a ilego a se kgopela se ile sa se thabiše Aborahama.

Bothata bjoo bo ile bja lokišwa bjang? Pego ya Beibele e balega ka gore: “Modimo a bolêla le Aborahama a re: O se šulêlwê ka ’baka la molata yó wa xaxo; ka moka tše Sara a di boletšexo le wêna, O di dumêlê; ka xobane peu ya xaxo e tlo bitšwa ka Isaka.” Aborahama o ile a theetša taelo ya Jehofa Modimo gomme a dira ka go dumelelana le yona.—Genesi 16:1-4; 21:1-14.

Mohlomongwe wena o ka re: ‘Ge e ba Modimo a ka boledišana le rena a le magodimong, gona re be re tla dumelelana gabonolo!’ Seo se re lebiša go senotlelo se sengwe sa go rarolla mathata a lenyalo. Senotlelo seo ke gore banyalani ba ka theetša Modimo. Bjang? Ka go bala Lentšu la Modimo ba le gotee gomme ba amogela gore seo le se bolelago ke tlhahlo ya Modimo.—1 Bathesalonika 2:13.

Mosadi yo mongwe wa Mokriste yo a nago le phihlelo o itše: “Mabakeng a mantši, ge mosadi yo mofsa a e-tla go nkgopela keletšo ya mabapi le lenyalo la gagwe, ke mmotšiša ge e ba yena le monna wa gagwe ba bala Beibele ba le gotee. Bontši bja bao ba nago le mathata lenyalong la bona ga ba na mokgwa woo wa go bala Beibele ba le gotee.” (Tito 2:3-5) Ka moka ga rena re ka holwa ke seo mosadi yo wa Mokriste a se lemogilego. Bala Lentšu la Modimo le molekane wa gago ka mehla. Ka tsela yeo, o “kwa” mantšu a Modimo a mabapi le tsela yeo o swanetšego go itshwara ka yona letšatši le letšatši. (Jesaya 30:21) Lega go le bjalo, ela hloko temošo ye: O se diriše Beibele e le kgati ya go itia molekane wa gago, ka mehla o mmontšha mangwalo ao o bonago gore o palelwa ke go a diriša. Go e na le moo, leka go bona kamoo bobedi bja lena le ka dirišago seo le se balago.

Ge e ba le leka go lokiša bothata bjo bogolo, ke ka baka la’ng le sa hlahlobe Watch Tower Publications Indexa mabapi le bothata bjoo? Mohlomongwe le hlokometše batswadi ba tšofetšego, gomme seo se baka dikgohlano lenyalong la lena. Go e na le go ngangišana ka seo molekane wa gago a swanetšego go ba a se dira goba go se se dire, ke ka baka la’ng le sa dule fase gomme la hlahloba Index le le gotee? Sa pele, lebelela sehlogo se segolo sa “Parents [Batswadi]”. O ka lebelela ditšhupetšo tše di lego ka tlase ga dihlogwana tše itšego, se bjalo ka “caring for aged parents [go hlokomela batswadi ba tšofetšego]”. Balang gotee dihlogo tše tswalanago le taba yeo go tšwa ka dikgatišong tša Dihlatse tša Jehofa. O tla makatšwa ke go bona kamoo wena le molekane wa gago le ka holwago ke tsebišo e theilwego Beibeleng, yeo e thušitšego Bakriste ba bantši ba botegago.

Go hlahloba ditšhupetšo tšeo le go bala taba e lego moo le le gotee go tla le thuša gore le bone moko wa bothata bja lena. Le tla hwetša Mangwalo ao a tsopotšwego le a bontšhitšwego ao a bontšhago pono ya Modimo ka ditaba. A buleng ka Beibeleng gomme le a baleng le le gotee. Ee, le tla kwa seo Modimo a se bolelago ka bothata bjoo le lebeletšanego le bjona!

Dulang le Boledišana Gabotse

Na o kile wa leka go bula mojako woo go fetilego nako e telele o sa bulwe? Digono tša wona di bulega ganyenyane-ganyenyane ge o dutše o tswinya. Eupša go thwe’ng ge e ba mojako woo o be o dutše o dirišwa ka mehla gomme digono tša wona di tloditšwe gabotse ka oli? O be o tla bulega gabonolo. Go bjalo le ka mojako wa poledišano. Ge e ba le itlwaetša gore le be le poledišano gomme le tlotša digono tša mojako wa lena wa poledišano ka lerato la Bokriste, le tla kgona go ntšha sa mafahleng a lena gabonolo le ge le sa kwane ka tharollo ya mathata a magolo.

Ao ke mathomo-mayo. Gaešita le ge mathomong poledišano e ka nyaka boiteko bjo bogolo, šoma ka thata gore o e fihlelele. O ka feleletša o thabela tswalano e botse le molekane wa gago, la dula le kwana ka nako e telele.

[Mongwalo wa ka tlase]

[Seswantšho go letlakala 7]

Na le tla nyaka tlhahlo ya Modimo ge le ngangišana?