Ditšhegofatšo Tše Dikgolo Ka Kgwerano E Mpsha

“[Jesu o] tlile a ba Khumedi ya kxwêranô ye e fetaxo yela ka boxolo.”—BA-HEBERE 8:6.

1. Ke mang yo a itlhatsetšego e le ‘peu ya mosadi’ yeo e holofeditšwego Edene gomme o ile a ‘longwa serethe’ bjang?

KA MORAGO ga ge Adama le Efa ba dirile sebe, Jehofa o ile a ahlola Sathane e lego yo a forilego Efa a re: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:15) Ge Jesu a be a kolobetšwa Nokeng ya Jorodane ka 29 C.E., Peu yeo e bego e holofeditšwe Edene e ile ya tšwelela mafelelong. Lehung la gagwe koteng ya tlhokofatšo ka 33 C.E. karolo ya boporofeta bjoo bja kgale e ile ya phethagatšwa. Sathane o be a ‘lomile serethe’ sa Peu.

2. Go ya ka mantšu a Jesu ka boyena, lehu la gagwe le hola batho bjang?

² Ka mo go thabišago, ntho yeo le ge e be e le e bohloko o šoro e be e se ya sa ruri. Jesu o ile a tsošwa bahung e le moya o sa hwego gomme a rotogela go Tatagwe legodimong moo a ilego a nea mohola wa madi a gagwe a tšholotšwego e le “topollô ya ba bantši.” Ka gona, mantšu a gagwe ka noši a ile a ba a therešo, a rego: “Morwa-motho le Yêna ó tlo fèxwa ka mokxwa woo, xore mang le mang e a mo dumêlaxo a se lahlêxê; a upyê a bê le bophelô byo bo sa felexo. Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Mateo 20:28; Johane 3:14-16; Ba-Hebere 9:12-14) Kgwerano e mpsha e bapala karolo ya thwadi phethagatšong ya boporofeta bja Jesu.

Kgwerano e Mpsha

3. Ke neng mo go ilego gwa bonagala la mathomo gore kgwerano e mpsha e a šoma?

³ Pejana ga lehu la gagwe, Jesu o ile a botša balatedi ba gagwe gore madi a gagwe a tšholotšwego e be e le “madi . . . a Kxwêranô e mpsha.” (Mateo 26:28; Luka 22:20) Matšatši a lesome ka morago ga ge a rotogetše legodimong, go ile gwa bonagala gore kgwerano e mpsha e a šoma ge moya o mokgethwa o tšhollelwa godimo ga barutiwa ba ka bago 120 bao ba bego ba bokane Jerusalema ka phapošing ya ka godimo. (Ditiro 1:15; 2:1-4) Go tsenywa ga barutiwa ba ba 120 kgweranong e mpsha go be go bontšha gore kgwerano “yela e bexo e le xôna” e lego kgwerano ya Molao bjale e be e onetše.—Ba-Hebere 8:13.

4. Na kgwerano ya kgale e be e paletšwe? Hlalosa.

⁴ Na kgwerano ya kgale e be e paletšwe? Le gatee-tee. Ke therešo gore bjalo ka ge e be e emetšwe legato, Isiraele ya nama e be e se sa hlwa e le batho ba Modimo ba kgethegilego. (Mateo 23:38) Eupša seo e be e le ka baka la go se kwe ga Isiraele le go gana Motlotšwa wa Jehofa. (Ekisodo 19:5; Ditiro 2:22, 23) Lega go le bjalo, pele Molao o tšeelwa sebaka o be o phethile go gontši. Ka nywaga-kgolo o be o neile tsela ya go batamela Modimo le go šireletšwa bodumeding bja maaka. O be o na le dibopego tše di emelago kgwerano e mpsha gomme ka dihlabelo tša yona tšeo di bego di boeletšwa o bontšhitše go nyaka ga motho kudu topollo sebeng le lehung. Ka kgonthe, Molao e be e le “moetetši wa xo re iša xo Kriste.” (Ba-Galatia 3:19, 24; Ba-Roma 3:20; 4:15; 5:12; Ba-Hebere 10:1, 2) Lega go le bjalo, e be e le ka kgwerano e mpsha mo tšhegofatšo yeo e holofeditšwego Aborahama e bego e tla fihlelelwa ka mo go feletšego.

Ditšhaba di Šegofatšwa ka Peu ya Aborahama

5, 6. Phethagatšong ya motheo ya moya ya kgwerano ya Aborahama, Peu ya Aborahama ke mang gomme ke setšhaba sefe e bilego sa mathomo go amogela tšhegofatšo ka yena?

⁵ Jehofa o ile a holofetša Aborahama gore: “Dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.” (Genesi 22:18) Tlase ga kgwerano ya kgale, bašele ba bantši ba dipelo tše boleta ba ile ba šegofatšwa ka go dirišana ga bona le Isiraele, peu ya setšhaba ya Aborahama. Lega go le bjalo, phethagatšong ya yona ya motheo ya moya, Peu ya Aborahama e be e le motho o tee yo a phethagetšego. Paulo o ile a hlalosa se ge a be a re: “Tše Aborahama a di boditšwexo è le kholofedišô, di lebane peu ya xaxwe. Xa xo thwe: Dipeu, e ke ké tše ntši. Xo bolêlwa Peu e tee, xe xo thwe: Ka Peu ya xaxo. ’Me yôna Peu yeo ké Kriste.”—Ba-Galatia 3:16.

⁶ Ee, Jesu ke Peu ya Aborahama gomme ka Yena ditšhaba tše dintši di hwetša tšhegofatšo yeo e fetago kgole selo le ge e le sefe seo se bego se kgonega go Isiraele ya nama. Ge e le gabotse setšhaba sa pele sa go hwetša tšhegofatšo ye ke Isiraele ka boyona. Kapejana ka morago ga Pentekoste ya 33 C.E., moapostola Petro o ile a re go sehlopha sa ba-Juda: “Le bana ba baporofeta bao, Le ba kxwêranô ye Modimo a e tlemilexo le bô-tata-wešo xe a bolêla le Aborahama, a re: Meloko ka moka ya lefase e tlo šexofatšwa ka peu ya xaxo. Byalo xe Modimo a tsošitše Ngwana wa xaxwe, ó diretše bô-lena; ó thomile ka bô-lena, a mo roma xore a Le šexofatšê, xore a sokollê bohle, mang le mang a fularêlê bokxôpô bya xaxwe.”—Ditiro 3:25, 26.

7. Ke ditšhaba dife tšeo di ilego tša šegofatšwa ka Jesu e lego Peu ya Aborahama?

⁷ Go se go ye kae tšhegofatšo e ile ya katološetšwa go ba-Samaria ke moka go ba-Ntle. (Ditiro 8:14-17; 10:34-48) Nako e itšego magareng ga 50 le 52 C.E., Paulo o ile a ngwalela Bakriste ba Galatia kua Asia Minor a re: “Mangwalô a be a dutše à bone xore Modimo ó tlo lokafatša ba-ntlê ka tumêlô, a napa a holofediša Aborahama, a re: Meloko ka moka ya lefase e tlo šexofatšwa ka wêna. Anthe xo šexofatšwa ba e lexo ba tumêlô xotee le Aborahama e a dumetšexo.” (Ba-Galatia 3:8, 9; Genesi 12:3) Gaešita le ge Bakriste ba bantši Galatia e be e le “ba-ntlê” ba ile ba šegofatšwa ka Jesu ka baka la tumelo ya bona. Ka tsela efe?

8. Bakeng sa Bakriste ba mehleng ya Paulo, go šegofatšwa ka Peu ya Aborahama go be go akaretša eng gomme mafelelong ke ba bakae ba ba ilego ba hwetša tšhegofatšo e bjalo?

⁸ Paulo o ile a botša Bakriste ba Galatia ba setlogo le ge e le sefe gore: “Xe Le le ba Kriste, ké xôna xe Le le peu ya Aborahama le baji ba bohwa ka kholofedišô.” (Ba-Galatia 3:29) Bakeng sa ba-Galatia bao, tšhegofatšo ka Peu ya Aborahama e be e akaretša go ba ga bona batšea-karolo kgweranong e mpsha le go ba baja-bohwa gotee le Jesu, e le bagwera ba Jesu peung ya Aborahama. Ga re tsebe palo ya batho ba Isiraele ya bogologolo. Re tseba feela gore e ile ya ba “ba bantši bo-ka-lešabašaba la lewatleng.” (1 Dikxoši 4:20) Lega go le bjalo, re tseba palo ya mafelelo ya bagwera ba Jesu peung ya moya—ke 144 000. (Kutollo 7:4; 14:1) Bao ba 144 000 ba tšwa “xo ba meloko yohle le maleme ohle le dithšaba tšohle le xo Ba-ntlê bohle” ba batho gomme ba tšea karolo go neeng ba bangwe ditšhegofatšo tša kgwerano ya Aborahama.—Kutollo 5:9.

Boporofeta bjo bo Phethagaditšwego

9. Ke bjang bao ba lego kgweranong e mpsha ba nago le molao wa Jehofa ka gare ga bona?

⁹ Ge a be a bolela e sa le pele ka kgwerano e mpsha Jeremia o ngwadile gore: “Kxwêranô ye ke tl’o xo e dira le bôná xe xo fetile mehla yeno, Morêna ó re, šé: Ke tlo bea melaô ya-ka matswalong a bôná, ke tlo e tlôka dipelong tša bôná.” (Jeremia 31:33) Go hlankela Jehofa ka lerato ke seka sa bao ba lego kgweranong e mpsha. (Johane 13:35; Ba-Hebere 1:9) Molao wa Jehofa o ngwadilwe dipelong tša bona gomme ba kganyoga ka matla go dira thato ya gagwe. Ke therešo gore Isiraeleng ya kgale batho ba bangwe bao ba botegago ba be ba rata molao wa Jehofa kudu. (Psalme 119:97) Eupša ba bantši ba be ba sa o rate. Lega go le bjalo, ba ile ba dula e le karolo ya setšhaba. Ga go motho yo a ka dulago kgweranong e mpsha ge e ba molao wa Modimo o se wa ngwalwa ka pelong ya gagwe.

10, 11. Bakeng sa bao ba lego kgweranong e mpsha, ke ka tsela efe Jehofa e ‘bago Modimo wa bona’ gomme ka moka ga bona ba tla mo tseba bjang?

¹⁰ Jehofa o tšwetše pele go bolela mabapi le bao ba lego kgweranong e mpsha gore: “Ké tlo ba Modimo wa bôná; ’me bôná e tlo ba sethšaba sa-ka.” (Jeremia 31:33) Isiraeleng ya kgale ba bantši ba be ba rapela medimo ya ditšhaba, eupša e ile ya dula e le ba-Isiraele. Motheong wa kgwerano e mpsha Jehofa o ile a hlola setšhaba sa moya, e lego “Ba-Isiraele ba Modimo” gore ba eme legatong la Isiraele ya nama. (Ba-Galatia 6:16; Mateo 21:43; Ba-Roma 9:6-8) Lega go le bjalo, ga go yo a dulago e le karolo ya setšhaba se sefsa sa moya ge a kgaotša go rapela Jehofa, le gona yena a nnoši.

¹¹ Jehofa gape o itše: “Ka moka xa bôná ba tlo ntseba, ba ba nyenyane le ba baxolo.” (Jeremia 31:34) Isiraeleng ba bantši ba ile ba no se šetše Jehofa, ge e le gabotse ba bolela gore: “Morêna xa a setše, xa a hlokofatše.” (Tsefanya 1:12) Ga go na yo a dulago e le karolo ya Isiraele ya Modimo ge a sa šetše Jehofa goba a šilafatša borapedi bjo bo sekilego. (Mateo 6:24; Ba-Kolose 3:5) Ba-Isiraele ba moya ke “bao ba tsebaxo Modimo wa bôná.” (Daniele 11:32) Ba thabela go ‘tseba Modimo-dimo a le nnoši le Jesu Kriste.’ (Johane 17:3) Go tseba Jesu go dira gore tsebo ya bona ya go tseba Modimo e tsenelele ka ge ka tsela e kgethegilego Jesu ‘e le yena yo a re laodišeditšego ka [Modimo].’—Johane 1:18, PK; 14:9-11.

12, 13. (a) Jehofa o lebalela dibe tša bao ba lego kgweranong e mpsha motheong ofe? (b) Ge e le mabapi le tebalelo ya dibe, kgwerano e mpsha e phagametše kgwerano ya kgale bjang?

¹² Mafelelong, Jehofa o ile a holofetša gore: “Ke tlo ba lebalêla molato wa bôná, ke se hlwê ke xopola sebe sa bôná.” (Jeremia 31:34b) Molao wa Moše o be o akaretša melao e makgolo-kgolo yeo ba-Isiraele ba bego ba laletšwa gore ba e kwe. (Doiteronomio 28:1, 2, 15) Ka moka bao ba bego ba robile Molao ba be ba nea dihlabelo gore ba bipe dibe tša bona. (Lefitiko 4:1-7; 16:1-31) Ba-Juda ba bantši ba ile ba dumela gore ba be ba ka ba ba lokilego ka mediro ya bona ka noši go ya ka Molao. Lega go le bjalo, Bakriste ba lemoga gore le ka mohla ba ka se šomele go loka ka mediro ya bona ka noši. Ba ka se kgone go phema go dira dibe. (Ba-Roma 5:12) Tlase ga kgwerano e mpsha, boemo bjo bo lokilego pele ga Modimo bo kgonega feela motheong wa sehlabelo sa Jesu. Lega go le bjalo, boemo bjo bo bjalo ke mpho e lego botho bjo bo sa swanelago bja Modimo. (Ba-Roma 3:20, 23, 24) Jehofa o sa nyaka gore bahlanka ba gagwe ba mo kwe. Paulo o re bao ba lego kgweranong e mpsha ba ‘bušwa ka Molao wa Kriste.’—1 Ba-Korinthe 9:21.

¹³ Ka gona, bakeng sa Bakriste le bona go na le sehlabelo sa dibe, eupša seo se fetago kgole dihlabelo tša ka tlase ga kgwerano ya Molao. Paulo o ngwadile gore: “Baperisita bohle [ba ka tlase ga kgwerano ya Molao] ba be ba beilwe xore ba dirêlê Modimo ka mehla, ba tliša tšôna didimo tšeo xantši, tše di bexo di sa kxone xo tloša dibe le xa-nyane. Xomme Jesu a tliša sedimo se tee sa xo tloša dibe, a y’o dula ka letsoxong le letona la Modimo xo ya xo ile.” (Ba-Hebere 10:11, 12) Ka ge Bakriste ka moka ba lego kgweranong e mpsha ba bontšha tumelo sehlabelong sa Jesu, Jehofa o ba bolela e le ba lokilego, ba se na sebe, ka gona ba le boemong bja go tlotšwa e le barwa ba gagwe ba moya. (Ba-Roma 5:1; 8:33, 34; Ba-Hebere 10:14-18) Ge ba dira sebe ka baka la go se phethagale ga batho, ba ka kgopela tebalelo ya Jehofa gomme motheong wa sehlabelo sa Jesu, Jehofa o a ba lebalela. (1 Johane 2:1, 2) Lega go le bjalo, ge ba kgetha tsela ya go dira sebe ka boomo, ba lahlegelwa ke boemo bja bona bja go loka le tokelo ya go ba batšea-karolo kgweranong e mpsha.—Ba-Hebere 2:2, 3; 6:4-8; 10:26-31.

Kgwerano ya Kgale le e Mpsha

14. Ke lebollo lefe le le bego le nyakega tlase ga kgwerano ya Molao? tlase ga kgwerano e mpsha?

¹⁴ Banna kgweranong ya kgale ba be ba bolotšwa e le pontšho ya gore ba be ba le ka tlase ga Molao. (Lefitiko 12:2, 3; Ba-Galatia 5:3) Ka morago ga ge phuthego ya Bokriste e thomile, ba bangwe ba ile ba nagana gore Bakriste ba e sego ba-Juda le bona ba be ba swanetše go bolotšwa. Eupša baapostola le bagolo Jerusalema, ba hlahlwa ke Lentšu la Modimo le ke moya o mokgethwa ba ile ba bona gore seo se be se sa nyakege. (Ditiro 15:1, 5, 28, 29) Nywaga e sego kae ka morago Paulo o ile a re: “Mo-Juda-Juda xa se eo wa lebopô; lebollô xa se leswaô leo la xo bônala mmeleng; Mo-Juda-Juda ké wa teng; lebollô-bollô ké la pelo, ké tirô ya Môya; xa se xo fo ya le Lengwalô.” (Ba-Roma 2:28, 29) Lebollo la kgonthe gaešita le bakeng sa ba-Juda ba nama le be le se sa na le mohola wa moya mahlong a Jehofa. Bakeng sa bao ba lego kgweranong e mspha, ke pelo e sego nama yeo e swanetšego go bolotšwa. Se sengwe le se sengwe dikgopolong tša bona, dikganyogong le tutuetšong seo se sa kgahlišego goba se sa hlwekago mahlong a Jehofa se swanetše go ripša.a Ba bantši lehono ke bohlatse bjo bo phelago bja matla a moya o mokgethwa a go fetoša mekgwa ya go nagana ka tsela ye.—1 Ba-Korinthe 6:9-11; Ba-Galatia 5:22-24; Ba-Efeso 4:22-24.

15. Isiraele ya nama le Isiraele ya Modimo di bapišwa bjang ge e le mabapi le bogoši?

¹⁵ Thulaganyong ya kgwerano ya Molao, Jehofa e be e le Kgoši ya Isiraele gomme ge nako e dutše e e-ya o ile a bontšha bogoši bja gagwe ka dikgoši tša batho Jerusalema. (Jesaya 33:22) Jehofa gape ke Kgoši ya Isiraele ya Modimo, e lego Isiraele ya moya le gona ga e sa le go tloga ka 33 C.E., o ile a buša ka Jesu Kriste yoo a hweditšego ‘matla ka moka legodimong le lefaseng.’ (Mateo 28:18; Ba-Efeso 1:19-23; Ba-Kolose 1:13, 14) Lehono Isiraele ya Modimo e lemoga Jesu e le Kgoši ya Mmušo wa Modimo wa legodimong woo o hlomilwego ka 1914. Jesu ke Kgoši e kaone kudu go feta gaešita le kamoo Hiskia, Josia le dikgoši tše dingwe tše di botegago tša Isiraele ya bogologolo di bego di le ka gona.—Ba-Hebere 1:8, 9; Kutollo 11:15.

16. Isiraele ya Modimo ke boperisita bja mohuta ofe?

¹⁶ Isiraele e be e se mmušo feela eupša gape e be e na le baperisita ba tloditšwego. Ka 33 C.E., Isiraele ya Modimo e ile ya tšeela Isiraele ya nama legato gomme ya ba “bahlanka” ba Jehofa, “dihlatse” tša gagwe. (Jesaya 43:10) Go tloga nakong yeo go ya pele mantšu a Jehofa go Isiraele ao a begilwego go Jesaya 43:21 le Ekisodo 19:5, 6 a be a šoma go Isiraele ya moya ya Modimo. Setšhaba se sefsa sa moya sa Modimo bjale e be e le “moloko wo o hlaotšwexo, Le boperisita bya boxoši, Le sethšaba se sekxêthwa, Le selete se Yêna a lexo Mong wa sôna” se ikarabela bakeng sa go ‘tsebatša mabothakga a Jehofa.’ (1 Petro 2:9) Bohle bao ba lego Isiraeleng ya Modimo, banna le basadi ba bopa sehlopha sa boperisita. (Ba-Galatia 3:28, 29) Bjalo ka karolo e nngwe ya peu ya Aborahama bjale ba re: “Hee lena Dithšaba! Hlalalang le ’thšaba sa xaxwe!” (Doiteronomio 32:43) Ba Isiraele ya moya bao ba sa šetšego lefaseng ba bopa “molaki e a bôtêxaxo yo bohlale.” (Mateo 24:45-47) Ke feela ka go kopanela gotee le bona moo tirelo e kgethwa yeo e amogelegago e ka newago Modimo.

Mmušo wa Modimo—Phethagatšo ya Mafelelo

17. Bao ba lego kgweranong e mpsha ba tswalwa bjang?

¹⁷ Ba-Isiraele bao ba belegwego ka morago ga 1513 B.C.E. ba tsene kgweranong ya Molao ge ba belegwa. Bao Jehofa a ba tsenyago kgweranong e mpsha le bona ba a belegwa—tabeng ya bona ke go tswalwa ka moya. Jesu o ile a bolela se go Mofarisei Nikodemo ge a be a re: “Ruri, ruri, ke a Xo botša, xe motho e se wa xo tswalwa lefsa, a ka se kê a bona mmušô wa Modimo.” (Johane 3:3) Barutiwa ba 120 ba ba bego ba le gona ka Pentekoste ya 33 C.E. e bile batho ba sa phethagalago ba mathomo ba go tswalwa lefsa mo. Ba boletšwe e le ba lokilego ka tlase ga kgwerano e mpsha, ba ile ba amogela moya o mokgethwa e le “seka” sa bohwa bja bona bja bogoši. (Ba-Efeso 1:14, PK) Ba ile ba “tswalwa ke Môya” gore e be barwa ba ba thwetšwego ba Modimo e lego seo se ilego sa ba dira gore e be banababo Jesu gomme ya ba “ba xo ja bohwa le Kriste.” (Johane 3:6; Ba-Roma 8:16, 17) Go “tswalwa lefsa” ga bona go butše tsela ya ditebelelo tše di kgahlišago.

18. Go tswalwa lefsa go bula sebaka bakeng sa ditebelelo dife tše di kgahlišago bakeng sa bao ba lego kgweranong e mpsha?

¹⁸ Ge a be a dira e le mmoelanyi wa kgwerano e mpsha, Jesu o ile a dira kgwerano e nngwe le balatedi ba gagwe a re: “Ke Le bea mmušô, byalo ka xe Tate a mpeile mmušô.” (Luka 22:29) Kgwerano ye ya Mmušo e ile ya lokiša dilo bakeng sa phethagatšo ya pono e makatšago e begilwego go Daniele 7:13, 14, 22, 27. Daniele o ile a bona “e mongwê . . . e kexo ké Morwa-motho” a newa taolo ya bogoši ke “Motála-wa-mabaka” e lego Jehofa Modimo. Ke moka Daniele a bona gore ‘bakgethwa ba ile ba newa mmušo.’ Jesu ke yo “e kexo ké Morwa-motho” yoo ka 1914 a ilego a amogela Mmušo wa legodimong go tšwa go Jehofa Modimo. Barutiwa ba gagwe ba ba tloditšwego ka moya ke “bakxêthwa” bao ba tšeago karolo le yena Mmušong woo. (1 Ba-Thesalonika 2:12) Bjang?

19, 20. (a) Bakeng sa bao ba lego kgweranong e mpsha, ke phethagatšo efe ya mafelelo yeo e kgahlišago yeo kholofetšo ya Jehofa go Aborahama e tlago go ba le yona? (b) Ke potšišo efe e nngwe yeo e swanetšego go ahla-ahlwa?

¹⁹ Ka morago ga lehu la bona, batlotšwa ba ba tsošwa bahung go swana le Jesu e le dibopiwa tša moya tše sa hwego gore ba hlankele le yena e le dikgoši le baperisita legodimong. (1 Ba-Korinthe 15:50-53; Kutollo 20:4, 6) A kholofelo e kgahlišago gakaakang! “Ba tlo buša mo lefaseng” e sego nageng ya Kanana feela. (Kutollo 5:10) Na e tla “ba beng ba dikxôrô tša manaba a bôná”? (Genesi 22:17) Ee, le gona ka tsela ya makgaola-kgang ge ba hlatsela tshenyo ya seotswa sa bodumedi sa lenaba e lego Babele o Mogolo le ge batlotšwa ba ba ba tsošitšwego ba tšea karolo le Jesu go dišeng ditšhaba “ka molamo wa thsipi,” le go pšhatleng hlogo ya Sathane. Ka gona ba tla ba le karolo go phethagatšeng karolo ya mafelelo ya boporofeta bjo bo lego go Genesi 3:15.—Kutollo 2:26, 27; 17:14; 18:20, 21; Ba-Roma 16:20.

²⁰ Lega go le bjalo, re ka botšiša gore, Na kgwerano ya Aborahama le kgwerano e mpsha di akaretša meoya ye e botegago e 144 000 feela? Aowa, ba bangwe bao ba sego dikgweranong tše ka go lebanya ba tla šegofatšwa ka tšona, bjalo ka ge go tla bonwa sehlogong se se latelago.

[Mengwalo ya tlase]

Na o a Gopola?

◻ Ke neng moo go ilego gwa bonagala la mathomo gore kgwerano e mpsha e a šoma?

◻ Ke eng seo se ilego sa fihlelelwa ka kgwerano ya kgale?

◻ Ke mang yo gabotse e lego Peu ya Aborahama gomme ke ka tatelano efe ditšhaba di ilego tša šegofatšwa ka Peu yeo?

◻ Bakeng sa ba 144 000, phethagatšo ya mafelelo ya kgwerano ya Aborahama le kgwerano e mpsha ke efe?

[Seswantšho go letlakala 15]

Tebalelo ya dibe e na le se segolo kudu seo e se bolelago bakeng sa bao ba lego tlase ga kgwerano e mpsha go feta go bao ba bego ba le tlase ga kgwerano ya kgale