Phafogela Go Thoma Dithuto Tša Beibele
1 Go thoma le go swara dithuto tša Beibele ke karolo ya thomo ya rena re le Dihlatse tša Jehofa. (Mat. 28:19, 20) Ka gona, na o tla ba o mongwe wa badirišani ba Modimo ka go dira se? (1 Ba-Kor. 3:9) Ke tokelo e kgolo gakaakang go thuša ba bangwe gore ba tsebe Motho o mogolo legohleng!
2 Ka baka la mathata a mantši gakaakaa ao a gokaganego le ditiragalo tša lefase tše fetogago ka lebelo, batho ba bantši ba dipelo tše botegago ba nyaka dikarabo ge e le mabapi le lebaka leo dilo tše di diregago ka lona. Kgale-kgale Jehofa o ile a nea dikarabo tša dipotšišo tša bona. Ge batho ba botegago ba rutwa ka Lentšu la Modimo, ba a homotšega. Ka gona re swanetše go phafogela dibaka tša go thoma dithuto tša Beibele.—Die. 3:27.
PHAFOGELA DIBAKA
3 Na o kile wa naganišiša ka go thoma thuto ya Beibele le wa leloko wa kgaufsi goba motho yo o mo tlwaetšego yo a sego ka therešong? Go ba tseba go go nea boemo bjo bobotse bja go diriša temogo ge e le ka sebaka se se swanetšego sa go boledišana ka taba le bona. Gopola gore potšišo e kgethilwego gabotse goba lentšu le le boletšwego ka nako e swanetšego le ka tsoša go thabela ga bona therešo. Ge go rata go tseba ga motho go tsošitšwe, gantši dipoledišano tšeo di nago le mafelelo a mabotse di a latela, gomme thuto ya Beibele e ka thongwa.
4 Mabakeng a mantši boitshwaro bjo bobotse bja molekane wa Mokriste bo thušitše go bula tsela bakeng sa gore yo a sa dumelego a tle therešong. (1 Pet. 3:1, 2) Balekane bao ba sa dumelego le ditho tše dingwe tša lapa ka kakaretšo ba a leboga ge ba godišwa le go hlompšha ke ditho tša phuthego. Go bontšha kgahlego ya motho ka noši go bona go ka thuša kudu tabeng ya go aga ditswalano tša bogwera. Ka go šoma gotee le molekane goba setho sa lapa seo se lego therešong, mo gongwe o ka kgona go hloma thuto ya Beibele.
5 Ge re dira modiro wa ntlo le ntlo, mo gongwe re ka leka go thoma thuto ya Beibele ketelong ya mathomo. Se se ka dirwa bjang? Bagoeledi ba bangwe ba bile le katlego go direng se ge mong wa ntlo a botšiša dipotšišo tšeo di ka arabjago ka go lebanya go tšwa pukung. Ge e ba motho a dumela go bala puku goba ge e ba a re laletša gore re tsene, re ka diriša sebaka bakeng sa go tšwetša pele poledišano gomme mohlomongwe re bontšhe kamoo thuto e swarwago ka gona. Diriša tekanyetšo ya gago ge e le ka nako yeo o tla e dirišago ketelong ya mathomo. E ka ba mo go holago go boa ka iri ya moragonyana goba letšatšing le lengwe go tla go tšwetša pele poledišano. Diketelong tša nakong e tlago, mo gongwe o ka rata go tšwela pele go bolela ka taba yeo e rotšwego ketelong ya mathomo. Goba mo gongwe o ka diriša potšišo yeo e rotošitšwego bofelong bja ketelo ya nako e fetilego.
MABAKA A SA RULAGANYETŠWAGO
6 Bohlatse bjo sa rulaganyetšwago e ka ba tsela e nngwe e nago le dienywa kudu maitekong a rena a go thoma dithuto tša Beibele. Medirong ya rena ya letšatši le letšatši, re kopana le batho ba bantši bao ba ka ratago go ithuta. Go re thuša gore re be ba atlegago, re ka diriša a mangwe a matseno ao a lekilwego go tšwa pukung ya Go Boledišana go thoma dipoledišano. Le gona o se ke wa dika-dika go bolelela thuto ya Beibele di sa tloga fase ka gobane motho a dula felo go gongwe gomme re ka se ke ra ba le sebaka sa go swara thuto ya Beibele rena ka noši.
7 Phafogela dibaka bakeng sa bohlatse bjo bo sa rulaganyetšwago, gomme o itokišetše ka go rwala sesola sa dipampišana le dimakasine tšeo di tlago go godiša go thabela ga motheetši therešo. (Mmo. 11:1) Ge e ba motho a bontšha go thabela therešo gomme a se tšhemong ya phuthego ya geno, hwetša aterese ya gagwe le tsebišo e nngwe e nyakegago gomme o e fetišetše phuthegong ya moo a dulago gona e le gore motho o mongwe a ka mo hlokomela ka mo go swanetšego.
8 Modiro wo wa go dira barutiwa ga se feela wa ba sego kae. Ke wa diphuthego ka moka. Go fela re gopola gore ke thomo ya Bokriste go ba badiri ba barutiwa go tla re kgothaletša go phafogela dibaka tša go thoma dithuto tša Beibele.