Tsomang Motse wo o Tlago go Dula o le Gona

1. Jesu o ile a bolela gore go tlo direga’ng Jerusalema lekgolong la pele la mengwaga?

MATŠATŠI a sego kae pele Jesu Kriste a hlokofala, o ile a bolela ka boporofeta bjo bo ilego bja phethagala mehleng ya bofelo bja tshepedišo ya Sejuda. O ile a lemoša gore ka letšatši le lengwe motse wa Jerusalema o tlo dikologwa “ke madira a hlomilego ditente.” (Luka 21:20) O ile a lemoša balatedi ba gagwe gore ge ba bona madira ao, ba tšhabe ka ponyo ya leihlo.—Luka 21:​21, 22.

2. Ke’ng seo moapostola Paulo a ilego a se botša Bakriste ba Baheberu bao ba bego ba le Jerusalema le Judea?

² Mengwaga e sego kae pele madira a Baroma a dikologa motse wa Jerusalema, moapostola Paulo o ile a ngwala lengwalo leo lehono le tsebjago e le puku ya Baheberu. Lengwalong leo, Paulo o ile a nea Bakriste bao ba bego ba le Jerusalema le Judea keletšo yeo e bego e tlo ba thuša go itokišeletša seo se bego se tlo direga. Go be go tlo direga’ng? Motse wa Jerusalema o be o tlo fedišwa. Bakriste bao ba be ba swanetše go ikemišetša go tlogela magae a bona le dikgwebo tša bona gore ba kgone go phologa. Ge Paulo a bolela ka motse wa Jerusalema o itše: “Ga re na motse wo o dulago o le gona, eupša re tsoma ka matla woo o tlago go tla.”—Baheb. 13:14.

3. “Motse wo o nago le metheo ya kgonthe,” ke’ng gona ke ka baka la’ng re o tsoma?

³ Go ka direga gore batho ba ile ba sega le go kwera Bakriste bao ba ilego ba kgetha go tloga Jerusalema le Judea, eupša phetho yeo e phološitše maphelo a bona. Lehono re a kwerwa ka gobane ga re ithekge ka batho goba tšhelete ge re na le mathata. Ke ka baka la’ng re kgetha go dira bjalo? Re a tseba gore tshepedišo ye ya dilo e tlo fela e se kgale. Re letetše Mmušo wa Modimo ka gobane re a tseba gore ke ona e lego “motse wo o nago le metheo ya kgonthe.”a (Baheb. 11:10; Mat. 6:33) Sehlogwaneng se sengwe le se sengwe mo sehlogong se, re tlo kwa gore: (1) keletšo ya Paulo e ile ya thuša bjang Bakriste ba lekgolong la pele la mengwaga gore ba dule ba tsoma “motse wo o tlago go tla,” (2) kamoo Paulo a ilego a itokišeletša dilo tšeo di tlago go tla le (3) kamoo keletšo yeo a ba neilego yona e re holago ka gona lehono.

TSHEPA JEHOFA KA GE A KA SE GO LAHLE

4. Ke ka baka la’ng motse wa Jerusalema o be o le bohlokwa go Bakriste?

⁴ Motse wa Jerusalema o be o le bohlokwa kudu go Bakriste. Phuthego ya mathomo e ile ya hlongwa ka ngwaga wa 33 C.E., ebile sehlopha se bušago se be se dula moo. Bakriste ba bantšhi ba be ba na le magae ebile ba na le dilo tše dingwe tše dintšhi motseng woo. Le ge go le bjalo, Jesu o ile a lemoša balatedi ba gagwe gore ba tšwe motseng wa Jerusalema le Judea.—Mat. 24:16.

5. Paulo o ile a thuša bjang Bakriste gore ba itokišeletše seo se bego se tlo direga?

⁵ Paulo o ile a thuša Bakriste gore ba itokišeletše selo seo se bego se tlo direga, ka go dira gore ba kwešiše gore Jehofa o be a ikwa bjang ka motse wa Jerusalema. Paulo o ile a ba gopotša gore Jehofa ga a sa amogela baperisita ba tempeleng le dihlabelo tšeo ba bego ba mo direla tšona kua Jerusalema ka ge e be e se sa le tše kgethwa. (Baheb. 8:13) Badudi ba moo ba bantšhi ba ganne Mesia. Go be go se sa hlokagala gore batho ba ye tempeleng ya Jerusalema go yo hlankela Jehofa ebile Jerusalema le tempele di be di tlo fedišwa.—Luka 13:​34, 35.

6. Ke ka baka la’ng Bakriste ba be ba hloka keletšo yeo e lego go Baheberu 13:​5, 6?

⁶ Ge Paulo a ngwalela Baheberu lengwalo, dilo di be di sepela gabotse kua motseng wa Jerusalema. Mongwadi yo mongwe wa Moroma ka nako yeo o ile a bolela gore Jerusalema ke “motse o tumilego kudu ka karolong ya Bohlabela.” Bajuda ba go tšwa mafelong a mantšhi ba be ba eya moo go yo keteka meletlo ya ngwaga le ngwaga gomme ge ba le moo ba diriša tšhelete. Ga go pelaelo gore Bakriste ba bangwe ba be ba kgona go dira tšhelete e ntšhi ka nako yeo. Mohlomongwe ke ka baka leo Paulo a ilego a ba botša gore: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona.” Ka morago o ile a tsopola mantšu a mangwe ao a lego ka Mangwalong ao a bontšhago kamoo Jehofa a hlokomelago batho ba gagwe ka gona, ao a rego: “Le ka mohla nka se ke ka [le] tlogela le ge e le go [le] lahla.” (Bala Baheberu 13:​5, 6; Doit. 31:6; Ps. 118:6) Bakriste bao ba bego ba dula Jerusalema le Judea, ba be ba swanetše go gopola gore Jehofa a ka se tsoge a ba lahlile. Ka baka la’ng? Ka gobane ka morago ga go hwetša lengwalo le, ba be ba tlo tseba gore ba ka swanelwa ke go tlogela magae a bona, dikgwebo tša bona le dilo tša bona tše dintšhi. Ba be ba tlo swanelwa ke go thoma bophelo lefelong le lengwe leo ba bego ba sa le tsebe.

7. Ke ka baka la’ng re swanetše go tshepa Jehofa ka mo go feletšego gona bjale?

⁷ Seo re ithutago sona: Go tlo direga’ng e se kgale? Tshepedišo ye e kgopo ya dilo e tlo fedišwa nakong ya “masetlapelo a magolo.” (Mat. 24:21) Re swanetše go dula re phafogile ebile re ntšhitše mahlo dinameng go swana le Bakriste ba lekgolong la pele la mengwaga. (Luka 21:​34-36) Nakong ya masetlapelo a magolo re ka tla ra swanelwa ke go tlogela dilo tša rena re tshepile gore Jehofa a ka se tsoge a lahlile batho ba gagwe. Le gona bjale, pele masetlapelo a magolo a thoma, re swanetše go bontšha gore re tshepa mang. Ipotšiše gore, ‘Na dilo tšeo ke di dirago le dipakane tšeo ke nago le tšona di bontšha gore ke tshepile Modimo le gore ke a dumela gore o tlo dula a ntlhokomela?’ (1 Tim. 6:17) Le ge re ka ithuta go Bakriste ba lekgolong la pele la mengwaga, re a tseba gore “masetlapelo a magolo” ao a tlago, e tlo ba selo seo se sa kago sa bonwa. Re tlo tseba bjang seo re swanetšego go se dira ge masetlapelo a magolo a thoma?

EKWANG BAO BA ETELELAGO PELE

8. Jesu o neile barutiwa ba gagwe ditaelo dife?

⁸ Mengwaga e sego kae ka morago ka ga gore Baheberu ba hwetše lengwalo leo Paulo a ba ngwaletšego lona, ba ile ba bona madira a Baroma a dikologa motse wa Jerusalema. Ba ile ba lemoga gore ba swanetše go tšhaba ka gobane motse wa Jerusalema o be o tlo fedišwa. (Mat. 24:3; Luka 21:​20, 24) Ba be ba swanetše go tšhabela kae? Jesu o be a boletše gore: “Bao ba lego Judea ba thome go tšhabela dithabeng.” (Luka 21:21) Go be go na le dithaba tše dintšhi tikologong yeo. Ba be ba tlo tseba bjang dithaba tšeo ba bego ba swanetše go tšhabela go tšona?

9. Ke ka baka la’ng Bakriste ba ka ba ile ba ipotšiša gore ba ka tšhabela dithabeng dife? (Bona le mmapa.)

⁹ Nagana ka tše dingwe tša dithaba tšeo Bakriste ba bego ba ka tšhabela go tšona: dithaba tša Samaria, dithaba tša Galilea, Thaba ya Herimone, dithaba tša Libanoni le dithaba tše dingwe tšeo di lego ka mošola wa Jorodane. (Bona mmapa.) Metse e mengwe ya dithabeng tšeo e be e ka bonagala e šireletšegile. Ka mohlala, motse wa Gamla, o be o le godimo ga thaba gomme go se bonolo go fihla go ona. Bajuda ba bangwe ba ile ba bona gore ba ka tšhabela motseng woo. Baroma ba ile ba hlasela motse woo gomme batho ba bantšhi bao ba bego ba dula go ona ba ile ba bolawa.b

10-11. (a) Jehofa a ka ba a ile a hlahla bjang Bakriste ba Baheberu? (Baheberu 13:​7, 17) (b) Bakriste ba ile ba holega bjang ka baka la go kwa bao ba etelelago pele? (Bona le seswantšho.)

¹⁰ Go bonagala Jehofa a ile a hlahla Bakriste a diriša bao ba bego ba etelela pele ka phuthegong. Radihistori yo a bitšwago Eusebius o ile a ngwala gore: “Batho bao ba bego ba le ka phuthegong ya Jerusalema ba ile ba hwetša molaetša ka banna bao ba kgethilwego . . . wa gore ba tloge motseng pele ntwa e thoma gomme ba ye tikologong ya Perea yeo e bitšwago Pella.” Pella e be e bonagala e le motse o mokaone wo Bakriste ba ka tšhabelago go ona. Motse wo o be o se kgole le Jerusalema ebile go le bonolo go fihla go ona. Batho ba bantšhi bao ba bego ba dula motseng woo e be e se Bajuda gomme ba be ba sa leke go lwa le Baroma.—Bona mmapa.

¹¹ Bakriste bao ba tšhabetšego dithabeng ba ile ba diriša keletšo ya Paulo yeo e rego, “kwang bao ba etelelago pele” ka phuthegong. (Bala Baheberu 13:​7, 17.) Bahlanka ba Modimo ba ile ba phologa ka baka la go dira seo. Histori e bontšha gore Modimo ga se a ka a lahla bao ba bego ba “letetše motse wo o nago le metheo ya kgonthe” e lego Mmušo wa Modimo.—Baheb. 11:10.

12-13. Jehofa o ile a hlahla bjang batho ba gagwe dinakong tše thata?

¹² Seo re ithutago sona: Jehofa o diriša bao ba etelelago pele gore ba hlahle bahlanka ba gagwe. Beibele e bolela ka banna bao Jehofa a ilego a ba diriša gore ba etelele pele batho ba gagwe ge ba be ba na le mathata. (Doit. 31:23; Ps. 77:20) Le lehono re a bona gore Jehofa o sa dutše a diriša bao ba etelelago pele gore ba re hlahle.

¹³ Ka mohlala, nakong ya leuba la bolwetši bja COVID-19, “bao ba . . . etelelago pele” ba ile ba re nea tlhahlo yeo re e hlokago. Bana babo rena ba, ba ile ba nea bagolo tlhahlo ya kamoo diphuthego di bego di ka bokana ka gona le go tšwela pele di hlankela Jehofa. Dikgwedi tše sego kae ka morago ga gore leuba leo la bolwetši le thome, re ile ra ba le dikopano ka maleme a fetago a 500 re diriša Inthanete, thelebišene le radio. Ruri Jehofa o ile a tšwela pele a re nea dilo tšeo re di hlokago le go re hlahla nakong ya leuba la bolwetši. Seo se ile sa dira gore re kgone go dula re le batee. Re ka kgodišega gore go sa šetšwe mathata ao re ka tlago ra kopana le ona, Jehofa o tlo tšwela pele a diriša bao ba etelelago pele go re thuša. E le gore re itokišeletše masetlapelo a magolo le go tlo dira dilo ka bohlale nakong yeo e thata, re swanetše go tshepa Jehofa le go kwa bao ba etelelago pele. Ke dika dife tšeo di ka re thušago go dira seo?

GO BONTŠHANA LERATO LA BORWARRE LE GO AMOGELA BAENG

14. Bakriste ba ile ba swanelwa ke go ba le dika dife pele tshepedišo ya Sejuda e fedišwa? (Baheberu 13:​1-3)

¹⁴ Ge masetlapelo a magolo a thoma, re tlo swanelwa ke go bontšhana gore re ratana kudu. Ka nako yeo re tlo swanelwa ke go ekiša mohlala wa Bakriste bao ba bego ba dula Jerusalema le Judea. Ba be ba dula ba bontšhana gore ba a ratana. (Baheb. 10:​32-34) Mengwaga e sego kae pele tshepedišo ya Sejuda e fedišwa, Bakriste ba ile ba swanelwa ke go bontšhana “lerato la borwarre” le go ‘amogelana’ le go feta.c (Bala Baheberu 13:​1-3.) Le rena re swanetše go ba ekiša ge tshepedišo ye ya dilo e dutše e batamela bofelong.

15. Ke ka baka la’ng Bakriste ba Baheberu ba ile ba swanelwa ke go bontšhana lerato la borwarre le go amogela baeng ka morago ga gore ba tšhabe?

¹⁵ Ge madira a Baroma a be a dikologa motse wa Jerusalema gomme ka morago a tloga, Bakriste ba ile ba tšhaba le dilo tše sego kae. (Mat. 24:​17, 18) Ba ile ba swanelwa ke go thušana ge ba fihla dithabeng le ge ba be ba fihla lefelong leo ba bego ba tlo dula go lona. Ba bangwe ba ile ba hloka dijo, diaparo le mafelo a go dula. Bakriste bao ba ile ba bontšha gore ba a ratana ka go amogelana, go hlokomelana le go abelana dilo tšeo ba nago le tšona.—Tito 3:14.

16. Re ka bontšha bjang gore re rata bana babo rena le dikgaetšedi bao ba hlokago thušo? (Bona le seswantšho.)

¹⁶ Seo re ithutago sona: Re thuša bana babo rena le dikgaetšedi ka gobane re a ba rata. Bahlanka ba bantšhi ba Jehofa ba thuša bana babo bona le dikgaetšedi bao ba tšhabilego dinageng tša gabo bona ka baka la dintwa le dikotsi tša tlhago ka go ba nea dilo tšeo ba di hlokago gore ba phele le ka go ba thuša gore ba dule ba hlankela Jehofa. Kgaetšedi yo a tšwago Ukraine, yo a ilego a swanelwa ke go tloga gae ka baka la ntwa o re: “Re ile ra bona gore Jehofa o a re hlahla le go re thuša a diriša bana babo rena le dikgaetšedi. Ba ile ba re bontšha botho ka go re thuša ge re le Ukraine, re le Hungary ebile le gona bjale ba a re thuša ge re le mo Germany.” Ruri re a bona gore bao ba amogelago bana babo bona le go ba thuša, ba dirišwa ke Jehofa.—Die. 19:17; 2 Bakor. 1:​3, 4.

17. Ke ka baka la’ng go le bohlokwa gore re bontšhane lerato la borwarre le go amogela baeng gona bjale?

¹⁷ Nakong ya masetlapelo a magolo re tlo hloka go thušana go feta gona bjale. (Habak. 3:​16-18) Gona bjale Jehofa o a re tlwaetša gore re kgone go bontšhana lerato la borwarre le go amogela baeng, e lego dika tšeo re tlago go di hloka nakong ya masetlapelo a magolo.

SEO SE TLO DIREGAGO NAKONG E TLAGO

18. Re ka ekiša bjang Bakriste ba Baheberu ba lekgolong la pele la mengwaga?

¹⁸ Bakriste bao ba ilego ba tšhabela dithabeng ba ile ba phologa ge Jerusalema e be e fedišwa. Ba ile ba tloga motseng, eupša Jehofa ga se a ka a ba lahla. Re ithuta’ng mohlaleng wa bona? Ga re tsebe gore go tlo direga eng nakong ya masetlapelo a magolo. Jesu o ile a re lemoša gore re ikemišetše go kwa. (Luka 12:40) Re tseba le mantšu ao Paulo a ilego a a ngwalela Baheberu, e lego keletšo yeo e ka re thušago go swana le ge e thušitše Bakriste ba lekgolong la pele la mengwaga. Jehofa o tshepišitše gore le ka mohla a ka se ke a re tlogela le ge e le go re lahla. (Baheb. 13:​5, 6) Eka re ka dula re tsoma motse wo o tlago go dula o le gona, e lego Mmušo wa Modimo gomme re thabele le ditšhegofatšo tšeo di tlago le ona.—Mat. 25:34.