Yobu

26 Tsopano Yobu anayankha kuti:

 2 “Koma ndiyetu wathandiza munthu wopanda mphamvu!

Ukuona ngati wapulumutsa dzanja lopanda nyonga,+

 3 Walangiza munthu wopanda nzeru.+

Komanso ukuona ngati anthu ochuluka wawadziwitsa nzeru zopindulitsa.

 4 Kodi wauza ndani mawu ako,

Ndipo zimene ukunenazi zachokera kuti?

 5 Akufa amangokhalira kunjenjemera

Pansi pa nyanja ndi pansi pa zimene zili m’nyanjamo.+

 6 Manda ndi ovundukuka pamaso pake,+

Ndipo malo a chiwonongeko n’ngosavundikira.

 7 Iye anatambasula kumpoto pamwamba pa malo opanda kanthu,+

Ndipo anakoloweka dziko lapansi m’malere.

 8 Iye anakulunga madzi m’mitambo yake,+

Moti mitamboyo sing’ambika pansi pa madziwo.

 9 Anaphimba mpando wake wachifumu,

Poukuta ndi mtambo wake.+

10 Anaika malire ozungulira pamwamba pa madzi,+

Kumene kuwala kumakathera mu mdima.

11 Zipilala za kumwamba zimagwedezeka,

Ndipo zimadabwa chifukwa cha kudzudzula kwake.

12 Ndi mphamvu zake wavundula nyanja,+

Ndipo ndi kuzindikira kwake wathyolathyola+ wachiwawa.*+

13 Ndi mphepo yake wapukuta kumwamba,+

Ndipo dzanja lake labaya* njoka yokwawa.+

14 Komatu zimenezi ndi kambali kakang’ono chabe ka zochita zake,+

Ndipo timangomva kunong’ona kwapansipansi kwa mawu ake.

Koma kodi mabingu ake amphamvu, angawamvetse ndani?”+