Masalimo

81 Anthu inu, fuulani mosangalala kwa Mulungu amene ndi mphamvu yathu,+

Fuulirani Mulungu wa Yakobo mosangalala chifukwa wapambana.+

 2 Yambani kuimba nyimbo+ ndipo tengani maseche,+

Zeze womveka mosangalatsa pamodzi ndi choimbira cha zingwe.+

 3 Pa tsiku lokhala mwezi, imbani lipenga la nyanga ya nkhosa.+

Pa tsiku looneka mwezi wathunthu, imbani lipenga la nyanga ya nkhosa, loimba pa tsiku la chikondwerero.+

 4 Pakuti limeneli ndi lamulo kwa Isiraeli,+

Komanso chigamulo cha Mulungu wa Yakobo.

 5 Anaika chigamulocho monga chikumbutso kwa Yosefe,+

Pamene anali kutuluka m’dziko la Iguputo.+

Ndinali kumva chilankhulo chimene sindinali kuchidziwa.+

 6 Mulungu akuti: “Ndinachotsa goli paphewa lake.+

Manja ake anamasuka ndipo sananyamule dengu.+

 7 Pa nthawi ya nsautso unaitana ndipo ine ndinakupulumutsa.+

Ndinayamba kukuyankha m’malo obisika a bingu.+

Ndinakusanthula pamadzi a Meriba.+ [Seʹlah.]

 8 Imvani anthu anga, ndipo ndidzakulangizani ndi kukuchenjezani.+

Zikanakhala bwino ngati mukanandimvera, inu Aisiraeli.+

 9 Pakati panu sipadzakhala mulungu wosadziwika.+

Ndipo simudzagwadira mulungu wachilendo.+

10 Ine Yehova, ndine Mulungu wanu,+

Amene ndinakutulutsani m’dziko la Iguputo.+

Tsegulani pakamwa panu ndipo ndidzaikamo chakudya.+

11 Koma anthu anga sanamvere mawu anga.+

Ndipo Isiraeli sanasonyeze kuti ndi wofunitsitsa kundimvera.+

12 Choncho ndinawasiya kuti apitirize kuumitsa mtima wawo.+

Iwo anapitiriza kuyenda mu nzeru zawo.+

13 Haa! Zikanakhala bwino ngati anthu anga akanandimvera,+

Zikanakhala bwino ngati Isiraeli akanayenda m’njira zanga.+

14 Ndikanagonjetsa adani awo mosavuta,+

Ndipo ndikanalanga adani awo ndi dzanja langa.+

15 Koma odana kwambiri ndi Yehova adzabwera kwa iye akunjenjemera ndi mantha,+

Ndipo nthawi yawo idzakhala mpaka kalekale.

16 Ine ndidzadyetsa Aisiraeli tirigu wabwino koposa,+

Ndipo ndidzawapatsa uchi wochokera pathanthwe+ kuti adye ndi kukhuta.”