Huku Makatetulula Ovitateka, Ouye Auho

ONONKHUMBI mbukahi mouye auho, iya ovanthu ovanyingi vakuatesako nokankhenda vana vekahi nokumona emone. Mongeleka, onondotolo, vaundapa ounthiki auho mo nosipitali, pala okuvatela vana vavela ine veliveta. Vokunyima otupia, no mapulisa, novokwava ovitumino, no vokuundapa nomatuku-tuku onosipitali pala okukayovola vana vapita moviponga, valinga ononkhono pala okutepulula ine okutyilika ononkhumbi mbavakuavo. Valinga ononkhono ombo pala okuvatela ovanthu, mahi petupu omunthu nawike ine eongano lipondola okumanako ononkhumbi mouye auho. Mahi, tyotyili, Huku upondola, iya makamanako ononkhumbi mouye auho.

Momukanda wahulililako Wombimbiliya tuvasamo omulao ou: “[Huku] makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.” (Revelação 21:4) Tala oñgeni omulao oo maukakuatesako ovanthu ovanyingi. Tyotyili, ulekesa ehando lia Huku liokukamanako ononkhumbi ambuho. Huku makamanako ovita, nondyala, nomauvela, novivi, novanthu aveho onondingavivi kombanda yoohi. Petupu omunthu nawike upondola okutyilinga.

Oityi Ouhamba wa Huku Maukalinga

Huku maundapesa Jesus Kristu wokuatutilisua, opo afuisepo omilao viae. Apa katutu, Jesus makatumina ngo Hamba kombanda yoohi aiho. Ovanthu kamavakatuminwa vali no nohamba, ovatumini vovanthu, ine ovo pulitika. Mahi, mavakatuminwa vala no Hamba ike, outumini Wouhamba wa Huku.

Ouhamba oo maukahanyaunako outumini auho wovanthu. Ombimbiliya yapopiale kohale okuti: “Huku yo keulu makavialeka ouhamba umue kamauhanyaunuako vali. Ouhamba oo kamaukapita pomaoko elongo ekuavo. Maukahanyaunako omautumini atyo aeho nokuenyimako. Iya ouhamba watyo oo, ngao ukakalako apeho.” (Daniel 2:44) Ovanthu aveho kombanda yoohi mavakakala kumwe mombuelo youtumini waviuka—Ouhamba wa Huku.

Etyi Jesus ankho ekahi pano pohi, wapopile ovikando ovinyingi konthele Youhamba. Oe wapopile konthele oyo melikuambelo alongesa ovalongwa vae, iya evepopila velikuambele okuti: “Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:10) Tala okuti Jesus walekesile okuti Ouhamba welikuata nehando lia Huku malilingwa pano pohi, iya ehando lia Huku okumanako ononkhumbi mouye auho.

Outumini waviuka wa Huku maukaeta ononkhano onongwa mbehevilwa okuetuako noutumini womunthu. Hinangela okuti Jeova waava omona wae ngofeto yeyovo opo ovanthu vapewe omuenyo wahapu. Mombuelo youtumini Wouhamba, ovanthu mavakakala tyihena onkhali. Oityi matyilandulako? Jeova “makamanako ononkhia apeho, iya Ohamba Tatekulu Jeova, makasekuna ononkhuka kovipala aviho.”—Isaías 25:8.

Vamwe vapondola okupula: ‘Omokonda yatyi Huku ahamanenako ononkhumbi ambuho? Oityi ekahi nokukevelela?’ Jeova ñgeno wamanakuale kohale ononkhumbi ambuho ine okutyilika ononkhumbi ombo. Mahi, Huku kekahi nokuyeka ononkhumbi mbutualeko mokonda yelungavi, anthi opala ouwa wovana vae pano pohi. Ovohe vokuna ohole, mavayeke omona wavo apite mononkhumbi inkha vanoñgonoka okuti otyo matyimuetela ouwa. Tupu, Jeova una omahunga omawa pala okuyeka ovanthu vamone ononkhumbi okamuvo kehehi, iya omahunga oo ekahi Mombimbiliya. Omahunga oo, muakutikinya epondolo liokuliholovonena, onkhali, notyitateka tyimwe konthele youtumini waviuka wa Jeova. Tupu, Ombimbiliya ihangununa okuti, Jeova ukahi nokuyeka Satanasi atumine ouye mokamuvo kamue kehehi.a

Namphila katupondola okuhangununa omahunga aeho pomafo aa ehehi, pena ononthele onombali mbupondola okutuavela ekevelelo, nepameko. Onthele yotete yati: Jeova meketuavela ononkhano onongwa mbulamba povitateka tuna hono. Moluotyo, Huku utuavela onthumbi yokuti: “Ovipuka ovio vio kohale kamavikahinangelwa vali, tupu kamavikeya vali komutima.” (Isaías 65:17) Huku makamanako oluhepo, nononkhumbi mbutundilila kovivi.

Onthele ya vali yati: Huku wanaka omuwo pala okumanako ononkhumbi. Hinangela okuti omuuli Habakuke, wapulile Jeova okuti olo pi mayekelela oungangala novilwa. Jeova akumbulula okuti: “Emonekelo nkhele malikafuisuapo momuvo wanakua . . . Kamalisete.” (Habacuque 2:3) Ngetyi matukelilongesa monthele ilandulako, “omuvo oo wanakua” ukahi popepi.

[Onondaka Poutoi]

[Ehangununo liolutalatu pefo 7]

Kamakukakala Vali Ovita:

“Endyuei mutale ovilinga via Jeova, oñgeni alinga ovipuka vihuvisa kombanda yoohi. Huku makamanako ovita alo kuna kuaoyela oohi.”—Salmo 46:8, 9.

Vana Tuhole Mavatutiliswa:

“Makukakala etutilo liovaviuki na vana vehevaviuki.”—Atos 24:15.

Makukakala Okulia Pala Aveho:

“Makukakala ovilia ovinyingi kombanda yoohi. Alo umwe kombanda yo nomphunda makukakala okulia okunyingi.”—Salmo 72:16.

Kamakukakala Vali Omauvela:

“Nawike omunthu kombanda yoohi makati: ‘Ame ndyivela.’”—Isaías 33:24.

Kamakukakala Vali Onondingavivi:

“Anthi, onondingavivi mavakanyimuako kombanda yoohi, iya onongangala keheke mavakatukuluako.”—Provérbios 2:22.

Makukakala Ouviuki:

“Tala! Ohamba [Kristu Jesus] maikatumina pala ouviuki watyo muene, iya konthele yovatumini, mavakatumina ngovatumini pala ouviuki.”—Isaías 32:1.

[Ehangununo liolutalatu pefo 7]

Ouhamba wa Huku maukamanako ononkhumbi ambuho tukahi nokumona