Himbika no Nondaka Mbulunda Ovanthu Okusuka na Jeova
1. Oityi tulilongesila kononkhalelo mbelikalaila mbokuivisa mbo Vakristau votete?
1 Ovakristau votete ankho vaivisa onondaka onongwa kovanthu vomihoko aviho no nongeleya mbelikalaila. (Col. 1:23) Namphila onondaka Mbouhamba wa Huku ankho vaivisa mbelifwa, mahi ankho vahimbika okupopia mononkhalelo mbelikalaila mbatokala movanthu vapopia navo. Mongeleka, tyina ankho Petulu apopia no va Judeu vokuahumba Ovihonekwa, ankho uhimbika okupopia konthele yomuuli Joele. (Atos 2:14-17) Tupu, tala onkhalelo Paulu ankho atomphola no va Gregu ngetyi tyahonekwa mu Atos 17:22-31. Hono, ovanthu povilongo vimwe vena onthilo no Vihonekwa, iya tupondola okupopia navo konthele Yombimbiliya, tyina tuivisa umbo na umbo. Anthi, tuesukisa okulunguka tyina tupopia na vana vehesukile no Mbimbiliya, nonongeleya, no vonongeleya mbuhetavela Kristu.
2. Oñgeni matuundapesa omikanda viokuava opo tukuateseko vokuna onthilo no Mbimbiliya, na vana vehena?
2 Undapesa Nounongo Omikanda Viokuava: Omikanda maviawa menima eli liovilinga, mavipilauluka tyina palamba onohanyi onombali, tupu mavipopi unene omutala womulavi no Despertai!, no notalatatu, no nombulusula. Namphila ovanthu potyilongo tyetu kavesukile no Mbimbiliya, no ngotyo matutyivili okuvepa omukanda vesuka nao. Pamwe katuatangele nomunthu ovihonekwa ine katuapopile nae konthele Yombimbiliya onthiki yotete, mahi inkha esuka, tukondoka ko opo tumukuateseko okukala nekolelo mo Mupakeko no mo Ndaka yae ahonekesa. Tupu, inkha tukahi nokuivisa pana ovanthu vapanda Ombimbiliya, tupondola okuundapesa omikanda vietu, iya atuhimbika no nondaka mbupopia konthele yomikanda ovio. Moluotyo, tupondola okuava omukanda Ombimbiliya Ilongesa, ine ombulusula Tehelela Huku ine Tehelela Huku opo Ukale Nomuenyo Wahapu kese muvo, namphila pamwe kavikahi nokuawa ohanyi oyo. Tyakolela okupopia onondaka mbulunda omunthu okusuka na Jeova.
3. Omonkhalelo patyi omitima viovanthu potyilongo tyetu, vielifwa noohi?
3 Pongiya Omutima: Omutima womunthu ukahi ngoohi. (Lucas 8:15) Oohi imwe yesukisa okupongiyua vali unene opo ombuto yotyili tyo Mbimbiliya ipondole okukala nomii nokukula. Ovaivisi votete, vevilile okukuna momihoko aviho viomitima, iya otyo atyivehambukiswa unene. (Atos 13:48, 52) Nonthue tupondola okukala nehambu ngolio inkha tutala nawa onondaka tuhimbika nambo pokupopia novanthu.