Veliepesa!
1. Eliongiyo patyi lituavela omphitilo yokuava oumbangi, iya omokonda yatyi?
1 Petupu eliongiyo ekuavo lituavela onomphitilo mbokuava oumbangi tyipona Ehinangelo lia Tatekulu. Nkhele tala: Enima lino ovanthu ovanyingi veya Pehinangelo vatehelela oluembia olunene valekeswa etyi Jeova na Jesus vaava ofeto yeyovo. (João 3:16; 15:13) Velilongesa konthele yononkhano onongwa matuavelwa mokonda yotyawa Jeova alinga. (Isa. 65:21-23) Ngotyo, omulongomoni hae vala wava oumbangi peliongiyo olio. Aveho veya Pehinangelo vena onomphitilo mbokuava oumbangi tyina valiepesa nawa ovaenda.—Rom. 15:7.
2. Oñgeni tupondola okuliepesa ovaenda?
2 Tyina nkhele uheneovole pana mopumphama nokukevela eliongiyo lihimbike, omokonda yatyi uhaihanena ovanthu vamwe opo umphame navo? Ovaenda vapondola okutila owoma nokunkhia ohonyi. Tyina tuveyolesa nokuveliepesa nehambu, tyivekuatesako okuhakala nohonyi nokulitehela okuti vapandwa. Tyina wamamono omuenda weya upondola okumupula inkha eli eliongiyo liotete eya, ine una ou ei meuaneno. Upondola okuita opo mupumphame nae nokutanga nae Mombimbiliya yove nokuimba nae momukanda woviimbo. Inkha mualingila Mondyuo Yomaliongiyo nkhele upondola okuenda-enda nae katutu. Tyina elongomona liamapu, upondola okuliava opo ukumbulule omapulo ae. Inkha ewaneno lienyi lina okutundamo liwa mokonda Mondyuo yomaliongiyo mamupingi ekuavo upondola okuti: “Ame nahanda okutehelela oityi wasoka konthele yeliongiyo eli. Opi tupondola okulivasa?” Taindya omuvo opo mulivase onthiki onkhuavo. Ovakulu vewaneno vavelwa ondundo opo vapameke ovaivisi vana vayekapo okuivisa opo veye Pehinangelo.
3. Omokonda yatyi Pehinangelo otyiwa okulinga ononkhono mbokuliepesa ovaenda?
3 Etyi, otyikando tyotete ovaenda ovanyingi mavatale ehambu, nombembwa, newaneko likahi pokati kovanthu va Jeova. (Sal. 29:11; Isa. 11:6-9; 65:13, 14) Oñgeni ovaenda mavakala tyina vameya Pehinangelo? Mahi haunene tyitei kononkhono matulingi mbokuveyakula nawa.