Kuatesako Vana Nkhele Vahapondola Okulongeswa Momukanda Ombimbiliya Ilongesa
1. Okuti aveho mavetavela liwa omukanda Ombimbiliya Ilongesa? Hangununa.
1 Opo Omunthu afende Jeova, una okunoñgonoka oityi Ombimbiliya ilongesa. Mahi, vamwe vekahi monongeleya mbehetavela Kristu, moluotyo kavetavela okuti Ombimbiliya Ondaka ya Huku. Ovakuavo kavetavela okuti kuna Huku, nokuhena onthilo Nombimbiliya. Omikanda patyi vihole okukuatesako vana vehetavela liwa omukanda Ombimbiliya Ilongesa? Onondaka mambulandulako mbapopiwa novaivisi vovilongo 20 vielikalaila.
2. Inkha omunthu umwe uti ketavela ku Huku, oityi tupondola okulinga? Omokonda yatyi?
2 Vana Vehetavela Okuti Kuna Huku: Inkha omunthu umwe uti ketavela okuti kuna Huku, otyiwa okunoñgonoka omokonda yatyi. Okuti omokonda utavela okuti ovipuka vieyako vala avike? Okuti ekolelo liae mu Huku liatepuluka mokonda yovivi vikahi mouye ine omokonda yemphinia lionongeleya? Okuti kotyilongo atunda tyityilika ovanthu okutavela ku Huku? Hamwe kaanye tyawina okuti kutupu Huku, mahi kenesoke okuti wesukisa okutavela Kwe. Opo omunthu apopie oityi ehetavelela okuti kuna Huku, ovaivisi ovanyingi vehole okupula okuti: “Tunde kohale usoka ngotyo?” Tehelela ohemutete mondaka. Okunoñgonoka oityi omunthu ehetavelela okuti kuna Huku, matyitukuatesako okutala oñgeni matukumbulula, nomukanda patyi matumuavela.—Prov. 18:13.
3. Oñgeni matulekesa okuti katuatombele omatavelo omunthu?
3 Pokukumbulula, lunguka opo wahapopie monkhalelo inumanesa omunthu. Tala onondaka ombu mbapopiwa ko Estados Unidos: “Otyiwa tuhatombe omatavelo ovanthu, mokonda ovo muene vena okuholovona etyi mavetavela. Tuhaovolei okufinda ovanthu metompho, mahi tulingei omapulo maevekuatesako okusoka, nokutokola ovo muene.” Omutalelipo umwe womawaneno wati tyina amatehelela nawa omunthu umwe, apeho ukumbulula nepulo eli: “Okuti nthiki imwe wasokeliale ngetyi?”
4. Oñgeni tupondola okukuatesako ova Budista?
4 Ova Budista ovanyingi, kavasoko okuti kuna Huku. Ovaivisi vamwe ko Grã-Bretanha vehole okuundapesa ombrochula Como Ter Verdadeira Paz e Felicidade, tyina vapopia novanthu ovo. Tyina vamapopi onondaka mbokuhimbika, vaya ponthele yati: “Existe Realmente um Criador Supremo?” avatale vali onthele yati: “Um Guia Prático Para Beneficiar Toda a Humanidade.” Konyima, avalekesa omunthu oo omukanda Ombimbiliya Ilongesa, avemupopila okuti: “Namphila wehetavela okuti kuna Huku, okulilongesa Ombimbiliya otyiwa, mokonda ina onondonga onongwa.” Omukokoli-ndyila umwe ko Estados Unidos, ukahi nokuivisila ova China, wati: “Motelitoliu yetu muna ovanthu ovanyingi vehole okutanga. Ngotyo, vatanga omukanda auho tyina nkhele tuhenekondokeko onthiki onkhuavo. Mahi kavanoñgonoka omokonda yatyi vesukisila okulongeswa Ombimbiliya. Moluotyo monthiki yotete ame ndyityihole okuveavela ombrochula Onondaka Onongwa mokonda yahonekwa monkhalelo iveavela ondundo yokutomphola nonthue.” Omutalelipo umwe womauaneno melaka liova China ko Estados Unidos wapopia okuti tyitavela okuava omukanda Ombimbiliya Ilongesa monthiki yotete. Mahi, otyiwa okuhimbika okulilongesa o kapitulu 2, tyipona okapitulu ko 1 kapopia konthele ya Huku.
5. Okupwa elundo tyakolela mokonda yatyi?
5 Opo omunthu akale nekolelo mu Huku tyisukisa omuvo, moluotyo tuesukisa okupwa elundo. Etompho liotete lipondola okuhalundu omunthu okutavela okuti kuna Huku. Mahi, mokueenda kuomuvo upondola okuimbuka okuti hamwe kuna Huku, ine upondola okunoñgonoka omokonda yatyi vamwe vasokela okuti kuna Huku.
6. Omokonda yatyi ovanthu vamwe vehesukila Nombimbiliya?
6 Vana vehesukile ine Vahayumbu Onthumbi Mombimbiliya: Mahi, pamwe omunthu umwe upondola okutavela okuti kuna Huku, mahi ehesuku netyi Ombimbiliya ilongesa, mokonda ketavela okuti Ondaka ya Huku. Tyafuile wekulila motyilongo muna onongeleya mbehe mbova Kristau iya vasoka okuti Ombimbiliya oyo Vakristau vala. Ine hamwe ukala motyilongo muna ovanthu valongeswa monosikola konthele yongeleya, iya kasoko okuti Ombimbiliya ipondola okumukuatesako. Oñgeni tupondola okukuatesako ovanthu ovo okusuka Nombimbiliya iya konyima avetavela okulongeswa momukanda Ombimbiliya Ilongesa?
7. Oipi onkhalelo ongwa yokulunda omunthu okusuka Nombimbiliya?
7 Ombetele yo ko Grécia yahoneka okuti: “Onkhalelo ongwa yokukuatesako ovanthu vehesukile Nombimbiliya, okuyiikula ovelekesa etyi tyikahimo. Ovaivisi ovanyingi vaimbuka okuti onondaka mbo Mbimbiliya mbuhika vali komutima wovanthu tyipona onondaka ononkhuavo omunthu apondola okupopia. (Heb. 4:12) Okuovola enyina lia Huku Mombimbiliya tyihole okukuatesako ovanyingi okusuka vali Nombimbiliya.” Ombetele yo ko India yahoneka okuti: “Ova Hindu ovanyingi vesuka unene notyili konthele yomuenyo nononkhia. Tupu vesuka nomulao Wombimbiliya wouye wehena vali ovivi.” Okupopia ovitateka vio potyilongo apeho tyiavela ovaivisi omphitilo yokulekesa okuti Ombimbiliya ipopia okuti Ouhamba wa Huku maukamanako ononkhumbi ambuho.
8. Oityi tupondola okupopila vana vehetavela omalongeso Ombimbiliya mokonda yonongeleya mbomatutu?
8 Inkha omunthu umwe ketavela omalongeso Ombimbiliya mokonda yonongeleya mbomatutu, mupopila okuti onongeleya mbumwe kambulongesa otyili konthele Yombimbiliya. Ombetele yo ko India yahoneka okuti: “Pamwe tuesukisa okukuatesako ovanthu okutala okuti Ombimbiliya ha pala vala onongeleya.” Vapopia okuti ova Hindu haunene vesuka vali nonthele ya 4 yombrochula Qual É o Objetivo da Vida? Como Encontrá-lo? Ihangununa oñgeni onongeleya mbukahi nokuhanya, nokuhonyeka Ondaka ya Huku nomatutu. Omukokoli-ndyila umwe ko Brasil upopila ovanthu okuti: “Omokonda yatyi wahaovolela okunoñgonoka vali ovipuka ovikuavo vikahi Mombimbiliya? Ovanthu ovanyingi vekahi nokulinga ngotyo, namphila vehekahi mongeleya yetu. Mohuvu netyi molongesiwa.”
9. Omokonda yatyi katyitusoyesila ankho omunthu umwe ponthyimbi kesuku nomalongeso Ombimbiliya?
9 Jeova utala omutima wa kese munthu. (1 Sam. 16:7; Prov. 21:2) Jeova ukahi nokueeta mefendelo liotyotyili ovanthu vomutima waviuka. (João 6:44) Ovanyingi puvo ankho kavenelongeswe konthele ya Huku ine ankho kavenetange Ombimbiliya. Ovilinga vietu viokuivisa viveavela omphitilo “yokuyovolwa nokukala nenoñgonoko liafuapo liotyili.” (1 Tim. 2:4) Ngotyo, inkha ovanthu ponthyimbi kavesuku nomalongeso Ombimbiliya, wahasoye! Undapesa omikanda vikahi melaka liove opo ulunde esuko liavo. Mokueenda kuomuvo, pahe amulilongesa omukanda tuundapesa vali unene pala okulongesa ovanthu Ombimbiliya, omukanda Oityi Ombimbiliya Tyili Ilongesa?
[Okakaska pefo 4]
Inkha omunthu uti ame hitavela ku Huku, linga ñga:
• Pula okuti, “Tunde kohale usoka ngotyo?” opo unoñgonoke omokonda yatyi.
• Inkha omunthu omu Budista undapesa ombrochula Como Ter Verdadeira Paz e Felicidade, pomafo 9-12.
• Inkha omunthu utavela okuti ovipuka vieyako vala avike, undapesa omikanda evi:
O Despertai! ponthele yati: “Teve Um Projeto?”
O video As Maravilhas da Criação Revelam a Glória de Deus
Ono mbrochula Como Ter uma Vida Satisfatória, onthele 4; A Vida — Teve um Criador?; A Origem da Vida — Cinco Perguntas Que Merecem Resposta
• Inkha omunthu utupu vali ekolelo mu Huku mokonda yovivi nononkhumbi, undapesa omikanda evi:
Omukanda Existe um Criador Que Se Importa com Você?, kapitulu 10
Ono mbrochula Importa-se Deus Realmente Conosco?, onthele 6, no yokuati Qual É o Objetivo da Vida?, onthele 6
• Tyina hekulu yeumbo amahimbika okutavela okuti kuna Huku, pahe upondola okumulongesa momukanda Ombimbiliya Ilongesa. Otyiwa okuhimbika okulilongesa okapitulu 2 ine onthele onkhuavo yelikuata nomasuka-suka ae.
[Okakaska pefo 5]
Inkha omunthu ketavela Ombimbiliya, linga ñga:
• Lilongesei ovikapitulu 17 no 18 momukanda A Vida—Qual a Sua Origem? A Evolução ou a Criação?
• Inkha omunthu omu Budista undapesa ombrochula, Por Que Devemos Adorar a Deus com Amor e Verdade?
• Inkha omunthu omu Judeu undapesa ombrochula Haverá Algum Dia um Mundo sem Guerra?, pomafo 3-11.
• Tompholei kouwa utundilila kokuendela movitumino Viombimbiliya. Opo ulekese omunthu esilivilo liokuendela movitumino Viombimbiliya, undapesa omikanda evi:
O Despertai! mononthele mbati “Ajuda para a Família”
O video A Bíblia: O Poder Dela na Sua Vida
Ono mbrochula Onondaka Onongwa mba Huku!, pelongeso 9 ne 11; Um Livro Para Todas as Pessoas, pomafo 22-26; no yokuati Como Ter uma Vida Satisfatória, onthele 2
Inkha omunthu omu budista undapesa ombrochula O Caminho para a Paz e Felicidade, pomafo 3-7.
Inkha omunthu omu Musulumanu undapesa ombrochula Verdadeira Fé — O segredo de uma Vida Feliz, ponthele 3.
Inkha ukahi nokuivisa potyilongo apa ovanthu vahahande Ombimbiliya, otyiwa uhapopie okuti onondaka uvepopila mbatunda Mombimbiliya, otyipopi vala tyina wamakondokako ovikando ovinyingi.
• Hangununa oñgeni omaulo Ombimbiliya afuiswapo. Upondola okuundapesa omikanda evi:
Ovideo A Bíblia, História Exata, Profecia Real
Ombrochula Um Livro Para Todas as Pessoas, pomafo 27-29
• Tyina omunthu amahimbika okupula omalongeso omakuavo Ombimbiliya, pahe upondola okumulongesa momukanda Ombimbiliya Ilongesa.
[Okakaska pefo 6]
Inkha omunthu uti: “ame hitavela okuti kuna Huku,” upondola okupopia okuti:
• “Ndyipondola okukulekesa onondaka mbumwe mbankhuatesako okutavela okuti kuna Omutungi Waatyiho?” Konyima omulekesa onondaka mbukahi momukanda Raciocínios, pomafo 94-96, ine umulaa okumuetela omukanda omukuavo wekukuatesako.
• “Mahi inkha ñgeno kuna Huku, ove wahandele ñgeno ukahi ñgeni?” Ovanthu ovanyingi vati vahanda Huku woluembia, nomuviuki, nomukwa-nkhenda, nokuhena okapungulula. Mulekesa Mombimbiliya okuti Huku una ovituwa ovio. (Tupu upondola okutomphola konthele yokapitulu 1 komukanda Ombimbiliya Ilongesa, okuhimbikila popalagrafu 6.)
Inkha omunthu uti: “Ame hitavela Ombimbiliya,” upondola okupopia okuti:
• “Ovanthu ovanyingi vasoka ngotyo. Vamwe vapopia okuti Ombimbiliya kaipopi konthele younongo womouye, ine onondonga mbayo mbutupu esilivilo. Nkhele mphopile, nthiki imwe watangeliale Ombimbiliya? [Yeka omunthu akumbulule. Konyima omulekesa pefo 3 liombrochula Um Livro Para Todas as Pessoas, iya omuavela yo.] Ovanyingi kavetavela etyi Ombimbiliya ilongesa, mokonda onongeleya kambulongesa etyi tyikahi Mombimbiliya. Tyina nameya vali, mandyikulekesa ongeleka imwe pefo 4 alo 5.”
• “Ovanthu ovanyingi vasoka ngotyo. Okuti ndyipondola okukulekesa otyipuka tyimwe tyanthyuvisa Mombimbiliya? [Tanga Jó 26:7; Isaías 40:22, mbulekesa okuti tyina Ombimbiliya ipopia konthele younongo womouye ipopia otyili.] Tupu Ombimbiliya ina onondonga onongwa mbukuatesako onombunga. Tyina nameya vali, mandyikulekesa ongeleka imwe.”
• “Napandula etyi wetyimphopila. Inkha Huku watuma okuhoneka omukanda pala ovanthu, mokusoka kuove, oityi tyikahi momukanda oo?” Konyima omulekesa otyipuka tyimwe Mombimbiliya tyelikuata netyi apopia.