Omikanda Viokulilongesa Omukanda Wovilinga Omwenyo Wetu Woukilisitau
© 2023 Watch Tower Bible and Tract Society of Pennsylvania
1-7 YA JANEIRO
OLUMONO LUKAHI MONDAKA YA HUKU | SOMBE 32-33
Kwatesako Vana Vena Otyiho
Perspicaz Vol. 1 pefo 799
Eliyuu
Eliyuu ankho utupu okapungulula, ankho utekula vala nawa ovanthu aveho. Ankho utyii umwe okuti nae ukahi vala nga Sombe, aveho vatungwa nonthata, ya wevetunga o Siovaa Huku. Eliyuu ankho kahande okutilisa owoma Sombe, mahi wapopia umwe vala nae ngepanga liotyotyili atee umwe emutumbula enyina liae, otyipuka ovo Elifasi na Mbilindande na Sofale vahalingile. — Som. 32:21, 22; 33:1, 6.
Omutala Womulavi 15/6/2014 pefo 25 §§ 8-10
Okuti Ove Utala Vana Vahapamene Ngetyi Jeova Evetala?
8 Oityi matyitukuatesako okunoñgonoka vali nawa ovakuatate vetu nonomphange vesukisa ombatelo? Hinangela okuti ovanyingi puvo vekahi nokumona ononkhumbi mokonda youvela, ine omokonda vakala nombunga ihelilongesa otyili. Inkha tukala novitateka ngovio, matuhande vakuetu vakale nokankhenda nonthue. Soka kova Isilayeli. Vamuene ononkhumbi ononyingi mo Egitu, mahi etyi nkhele vehenenyingile Motyilongo Valaelwe, Jeova wevehinangelesile opo vahateneke omitima viavo. Jeova ankho uhanda ova Isilayeli vakuateseko ovakuatate vavo ankho vahepa, nokuahapamene. — Epal. 15:7, 11; Lev. 25:35-38.
9 Katuesukisile okuvela liwa onombei ovakuatate vetu mokonda yovitateka viavo ine okusoka okuti onthue tuavilapo vali kuvo. Tuesukisa okukuatesako ovakuatate vetu vokuatenda. (Som. 33:6, 7; Mat. 7:1.) Mongeleka, soka komunthu umwe watoka nomota iya atualwa liwa kosipitali. Okuti tyina ehika kosipitali onondotolo, novakuavo vokuundapamo nkhele mavapesela omuvo nokupula olie wemupuma? Au. Mavemukuatesako liwa, okumuavela ovihemba opo akale nawa. Tupu, inkha omukuatate wetu watenda mokonda yovitateka viae muene, tuesukisa okumukuatesako liwa opo apameke vali oupanga wae na Jeova. — Tanga 1 Ova Tesalonika 5:14.
10 Ovakuatate vamwe vapondola okumoneka ngoti kavapamene. Mahi inkha katusoko konkhalelo yavo, matutale okuti vekahi nawa. Soka oñgeni tyipuiya komphange umwe una omulume uhaumbila Jeova. Tyina utala ina uhena omulume wenda apeho komaliongiyo nomona ine ovana vae, kuhuvo nekolelo liae? Soka kovakuendye vahongiliyua ononthiki ambuho kosikola opo vayekepo otyili. Aveho, vena ohole yotyotyili na Jeova iya vatokola okutualako ovakuatyili kwe. Tyina tusoka okuti ovakuatate ovo aveho vekahi nokuumbila Jeova, matyitukuatesako okuvetala ngatyina “ovahona mekolelo,” namphila vamoneka ngoti kavapamene. — Tia. 2:5.
Omutala Womulavi 3/2020 pefo 23 §§ 17-18
Onalupi tuna okupopia?
17 Omunthu wa kuana waile ku Sobe, ombunga ya Ambalaiau ankho utiwa o Eliuu. Etyi Sobe nomapanga ae etatu ankho vekahi nokutomphola, ngwe ati vala filuu. Ovipuka apopia konyima, vialekesa okuti ankho ukahi nokutehelela nawa etyi vakuavo vapopia. Wakuatesileko Sobe okusoka vali nawa. Wemuavelele onondongwa nokankhenda, mahi ehelitete okumupopila etyi apengesa. (Som. 33:1, 6, 17) Eliuu ankho wesuka vali nokunkhimaneka Siovaa. Ankho kahande okulinkhimaneka nii okunkhimaneka omunthu omukuavo. (Som. 32:21, 22; 37:23, 24) Ku Eliuu, tulilongesilako okuti pena omuvo wokupopia no wokukala tyahiliya. (Tia. 1:19) Tupu tulilongesilako okuti tyina tupakela-mo vakuetu, tuna okusuka vali nokunkhimaneka Siovaa, atuhelinkhimaneka onthue muene.
18 Elaka otyiawa tuapewa na Siovaa. Matulekesa okuti tuapandula otyiawa otyo tyina tulandula onondongwa mbo Mbimbiliya mbupopia konthele yonalupi tuna okupopia, no ñgeni tuna okupopia. Ohamba Salomau wapopia okuti: “Ondaka ipopiwa momuvo waviuka, ikahi ngomapelu oolu pelonga liopalata.” (Omih. 16:31) Omapelu oolu omawa unene tupu alanda onombongo ononyingi. Pahe tyina tutehelela nawa vakuetu, atusoko nawa ku etyi matupopi, onondaka mbetu mambukala ngomapelu oolu. Inkha tulinga ngotyo, tyilinge tupopia unene ine katupopi, onondaka mbetu mambupameka vakuetu. Iya haunene, matuhambukiswa Siovaa. (Omih. 23:15; Efe. 4:29) Okuti pena onkhalelo onkhuavo yokulekesa okuti tuapandula otyiawa otyo tuapewa na Siovaa?
Olumono Lwa Huku
Omutala Womulavi 15/1/2013 pefo 19 § 10
Tualako Okufuena Ku Jeova
10 Tupu, otyiwa okusukalala nolupe luetu. Mahi, katuesukisile okusukalala unene tyina tuhimbika okukulupa. Okukulupa tyilekesa okuti tuekula, nokuna onondunge. Mongeleka, Ombimbiliya yati: “Onohuki onongonga otyaka tyouwa tyina mbukahi mondyila youviuki.” (Omih. 16:31) Ongotyo Jeova etutala, iya nonthwe tuna okulitala ngetyi oe etutala. (Tanga 1 Petulu 3:3, 4.) Okuti onondunge okuovola okuhakulwa ine okutandwa no nondotolo opo tukale vali ovawa? “Okuhambukilwa Jeova” otyo ouwa wotyotyili, utunda mokati, wehetei kokuakulupa ine okekongoko. (Nee. 8:10) Omouye omupe vala matukakala nekongoko ewa, nouwa wotyotyili. (Som. 33:25; Isa. 33:24) Tyina nkhele tuukevela, tulingei ononkhono, nokukala no nondunge, nekolelo, opo tufuene vali ku Jeova. Otyo matyitukuatesako okukala nehambu atuehesukalala unene nekongoko. — 1 Timotiu 4:8.
8-14 YA JANEIRO
OLUMONO LUKAHI MONDAKA YA HUKU | SOMBE 34-35
Tyina Ovipuka Ovivi Vitumbukila Ovanthu Vekahi Nawa
Omutala Womulavi Wounyingi 1/2019 pefo 8 § 2
Huku Ukahi Ñgeni?
Huku apeho ulinga etyi tyaviuka. Tyotyili, “Huku yotyotyili nalumwe malingi etyi tyahaviukile, Wepondolo Aliho nalumwe malingi etyi tyapenga!” (Som. 34:10) Omakoyeso ae aviuka. Omuhoneki wo no Salmo wapopia konthele ya Siovaa okuti: “Ove mohongolela ovanthu vekahi pohi.” (Ovii. 67:4) Mokonda Siovaa utala etyi tyikahi momutima, ngwe katale vala kolupe luomunthu. Apeho wii otyili, malingi omakoyeso ekahi nawa. (1 Sam. 16:7) Tupu, Huku weete ovivi aviho vilinga pano pohi, iya wati, apa katutu, “onondingavivi mavakanyimuako kombanda yohi.” — Omih. 2:22
Omutala Womulavi 4/2017 pefo 10 § 5
Ovipuka Patyi Vihamakalako Vali Tyina Ouhamba wa Huku Wameya?
5 Oityi Jeova malingi? Jeova nkhele ukahi nokuavela onondingavivi omphitilo yokupiluluka. (Isa. 55:7) Namphila ouye uno apa katutu mauhanyuako, mahi Jeova nkhele kenekoyese onondingavivi. Ngotyo, oityi matyimoneka novanthu vaanya okupiluluka, navana vatualako okukuatesako ouye uno alo ononkhumbi ononene mbuhimbika? Jeova walaa okuhanyako ovanthu aveho onondingavivi pano pohi. (Tanga Oviimbo 37:10.) Hono, ovanthu ovanyingi vaholeka ovipuka ovivi valinga iya ovikando ovinyingi kavahitiswa. (Som. 21:7, 9) Mahi Ombimbiliya ituhinangelesa okuti: “Omaiho a Huku atala onondyila mbovanthu, Oe utala onomphai mbavo ambuho. Petupu enthiki ine okahi opo muholame ovanthu valinga ovipuka ovivi.” (Som. 34:21, 22) Tupu, petupu etyi tupondola okuholeka ku Jeova. Huku weete ovipuka aviho onondingavivi mbukahi nokulinga. Konyima yo Armagedom, matukatala pomaumbo onondingavivi, mahi kamatuvevasi-po. Mavakanyimuako pala apeho! — Ovii. 37:10.
Omutala Womulavi 5/2021 pefo 7 §§ 19-20
Wahayeke Natyike Tyikutyike Okulandula Sesusi
19 Okuti hono uhole okumona otyitateka ngotyo? Yoo! Ovanthu ovanyingi hono, kavetavela etyi tulongesa mokonda onthue katulingi onthele youye. Ovanthu ovo vahanda tyina tyiti pokukamanga opo vaholovone ovatumini, ñgeno nonthue tukamanga opo tuholovone ovatumini. Mahi, onthue tutyii okuti, ankho tuholovona omunthu opo etutumine, ngotyo tukahi nokuaanya Outumini ya Siovaa. (1 Sam. 8:4-7) Tupu, ovanthu ovo, vahanda ñgeno tuvekuateseko okutunga onosikola nonosipitali, novipuka ovikuavo vikuatesako ovanthu, iya vetunumanena mokonda onthue katupinayala nokutetulula ovitateka viouye. Mahi tusuka vali nokuivisa onondaka onongwa mba Huku.
20 Oityi tuna okulinga opo tuhayekepo okuumbila Huku? (Tanga Mateusi 7:21-23.) Onthue tuesukisa okutualako okulinga otyilinga Sesusi etutuma. (Mat. 28:19, 20) Katupondola okutalukwa nokutetulula ovitateka viouye uno. Onthue tuhole ovanthu iya tusuka novitateka viavo. Mahi tutyii okuti, onkhalelo ikahi nawa yokukuatesako vakuetu, okuvelongesa konthele Youhamba wa Huku, nokuvekuatesako okukala noupanga na Siovaa.
Olumono Lwa Huku
Omutala Womulavi 4/2017 pefo 29 § 3
Tyina Uliava Tyietela Omunkhima Jeova!
3 Omukuendye umwe utiwa Eliuu ankho ukahi nokutehelela etyi Job novalume ovo vetatu vekahi nokutomphola. Etyi vamana, Eliuu apulu Job konthele ya Jeova okuti: “Inkha etyi wapopia otyili, oityi momuavela; oityi apondola okutambula kuove?” (Som. 35:<u2060>7) Okuti na Eliuu ankho uhanda okupopia okuti ononkhono mbetu mbokuumbila Huku mbutupu esilivilo? Au. Jeova kaviyulile Eliuu, ngetyi alingile ovalume ovakuavo. Ankho Eliuu welikalela. Wapopia okuti Jeova ketukuluminya opo tumufende. Jeova wafuapo. Onthue katupondola okulinga natyike opo akale omuhona ine nepondolo. Tyotyili, kese tyituwa ine ounongo tuna, tuetyiavelwa na Huku iya utala oñgeni tuviundapesa.
15-21 YA JANEIRO
OLUMONO LUKAHI MONDAKA YA HUKU | SOMBE 36-37
Oityi Tuyumbila Onthumbi Mweetyi Huku Ati Meketwavela Omwenyo Wahapu?
Omutala Womulavi 1/10/2015 pefo 13 §§ 1-2
Okuti Tupondola Umwe Okuvasa Huku?
HUKU UKAHI-KO OMUVO UHAPU: Ombimbiliya ilongesa okuti Huku ukahi-ko “tunde komuvo wahapu alo komuvo wahapu.” (Ovii. 90:2) Monondaka ononkhuavo, Huku utupu onthyimbi, tupu kamakala nonthyulilo. Monkhalelo ovanthu vasoka, “omanima ae nawike weevila okuevalula.” — Som. 36:26.
Oñgeni mopolo-ko ouwa: Huku ulaa okuti ove mokakala nomuenyo wapeho, inkha tyotyili umunoñgonoka. (Swau 17:3) Inkha ñgeno Huku kamakala-ko apeho, oñgeni metyivili okufuisapo omulao oo? “Ohamba yomuvo uhapu” vala, upondola okufuisapo omulao ngoo. — 1 Timotiu 1:17.
Omutala Womulavi 5/2020 pefo 22 § 6
Okuti Uhole Okupandula Ovipuka Siovaa Ekuavela?
6 Eheke lina omaande mokonda lili pomphangu ikahi nawa. Inkha ekumbi lifuenaina vali katutu peheke, omaande awatata, pohi pakala tyihena natyike tyina omuenyo. Tupu inkha lihondovoka vala katutu, omaande aeho akala omamanya, pohi apakala tyihena natyike tyina omuenyo. Onthue tuna omaande ekahi nawa mokonda Siovaa wapaka ohi pomphangu yaviuka. Tala etyi omaande eliseta: Ekumbi liveta kombanda yomaande, outokotwe watyo auhimbika okuenda no peulu, aukala omakaka. Kese enima omaande enda no peulu omanyingi vali tyipona omaande omatala aeho o mouye. Omaande oo akala peulu ononthiki ekwii, amomo; etyi onthue tuihana okuti ombila. Konyima aakondoka vali melunga no monondongi. Onkhalelo omaande eliseta-seta ilekesa nawa okuti Siovaa omunongo iya natyike tyimupuiya. — Som. 36:27, 28; Omup. 1:7.
Omutala Womulavi 10/2022 pefo 28 § 16
Tualako Okupameka Ekevelelo Liove
16 Ekevelelo lietu liomuenyo wahapu otyipuka tyimwe otyiwa Huku etuavela. Onthue tuhanda ñgeno otyipuka otyo tyilifuilapo liwa mokonda tuna onthumbi yokuti tyili matyikamoneka umwe. Ekevelelo olio likahi ngo hako, mokonda litukuatesako okukoleleya tyina tuna ovitateka natyina tumoneswa ononkhumbi iya atee umwe tyina ovanthu vahanda okutuipaa. Tupu likahi Ngo kapasete, mokonda liyakulila omalusoke etu atutyivili okulityilika ovipuka viapenga. Ovipuka tukevelela viapopiwa Mombimbiliya vitukuatesako okufuena ku Huku nokunoñgonoka okuti ngwe utuhole unene. Naina tyina tupameka onthumbi yetu movipuka Huku etulaa tupolako ouwa.
Olumono Lwa Huku
Perspicaz Vol. 1 pefo 522
OKUHIPULULA
Ovanthu ankho kohale vanoñgonoka ovipuka mononkhalelo mbelikalaila. Ovipuka vimoneka motyilongo tyavo neevi vimoneka motyilongo otyikwavo, ankho vevinoñgonoka umwe vala mokuhipaulula omu na vakwavo. (2 Sam. 3:17, 19; Som. 37:20) Onongendi, tyina mbutalama motyilongo tyimwe pala okulanda okulia nomaande aa hamwe ovipuka ovikwavo vali, mbupopila vakwavo ovipuka vio-ko vilongo ovikwavo. Motyilongo tyo Palestina, mokonda ankho mutekulwa unene ovinyama tyipona ko Ásia noko África nomo Europa, ankho mukwata onongendi mbovilongo ovinyingi. Otyo ankho ovanthu vakala motyilongo otyo vanoñgonokela liwa ovipuka vipita kovilongo ovikwavo. Ya tupu ankho vanoñgonoka ovipuka vimoneka motyilongo tyavo no movilongo ovikwavo tyina veli ponopalasa mbo momapunda-umbo.
22-28 YA JANEIRO
OLUMONO LUKAHI MONDAKA YA HUKU | SOMBE 38-39
Okuti Ove Uhole Okutala Nawa Ovipuka Huku Atunga?
Omutala Womulavi 8/2021 pefo 9 § 7
Okuti Ukahi Nokukevelela ku Siovaa?
7 Tyina Ombimbiliya ipopia onkhalelo Siovaa atunga ohi, ipopia okuti: “weyeeleka,” eipake “elisesu,” “nemanya liopevindi lielisesu.” (Som. 38:5, 6) Otyo ankho tyesukisa omuvo wokusoka kovipuka matungu. (Ehim. 1:10, 12) Utyivila okusoka kehambu onoandyu mbakalele nalio etyi mbamona ovipuka Siovaa ekahi nokutunga katutu-katutu? Tyotyili mbahambukilwe unene atee umwe ambuhimbika “okuhilivika” Huku. (Som. 38:7) Otyo tyitulongesa-tyi? Tyitulongesa okuti, Siovaa wakala omanima omanyingi nokutunga ohi novipuka vikahimo, mahi etyi evitala apopi okuti “vikahi nawa.” — Ehim. 1:10, 12.
Omutala Womulavi 8/2020 pefo 14 § 2
Etutilo Lilekesa Okuti Huku Una Oluembia, Omunongo, Wapwa-elundo
Tete, Siovaa watunga Omona wae Sesusi. Pahe Sesusi emukuatesako okutunga “ovipuka aviho ovikuavo,” okukutikinyamo onoandyu. (Kolo. 1:16) Omukanda wa Omihe 8:30 upopia okuti Sesusi ankho uhambukilwa okuundapa na Tate yae. Onoandyu, nambo mbahambukilwe unene okutala ovipuka aviho Siovaa, Nomona wae vatunga keulu na pano pohi. Ombimbiliya ipopia okuti ‘mbakuililile nehambu’ etyi eheke liatungwa. Tuna onthumbi yokuti mbatuaileko okuhambukilwa ovipuka ovikuavo Siovaa atunga. Pahe soka oñgeni mbelitehelele etyi Siovaa atunga ovanthu? (Som. 38:7; Omih. 8:31) Ovipuka ovio aviho Siovaa atunga, vilekesa okuti una oluembia, omunongo. — Ovii. 104:24; Loma 1:20.
Omutala Womulavi 3/2023 pefo 17 § 8
Noñgonokela Siovaa Kovipuka Atunga
Siovaa wata-mo mokuyumbwa onthumbi. Siovaa wakwatehileko Sombe ayumbe vali onthumbi mwe. (Som. 32:2; 40:6-8) Metompho Siovaa vali nalio na Sombe, Siovaa wapopile ovipuka ovinyingi atunga, ononthungululu, nomakaka, nomiliakulo. Wapopile-po novinyama, ongombe yohika, nononkhambe. (Som. 38:32-35; 39:9, 19, 20) Ovipuka ovio aviho, viati umwe ovio vilekesa okuti ononkhono mba Huku mbutilisa owoma, ovio tupu vilekesa okuti, una olwembia, omunongo omunene. Siovaa walingile watompholele na Sombe, Sombe pahe atyimupe umwe okumuyumba vali onthumbi. (Som. 42:1-6) Noonthwe ine twovola okunoñgonoka nawa ovipuka Siovaa atunga, matutyimono umwe okuti, wati oe omunongo omunene wehena-le ou aelekwa nae, oe tupu una ononkhono ononene. Ngwe utyivila okumana-ko aviho vitumonesa emone hono, ya mevimane-ko umwe. Otyo tyipameka vali onthumbi yetu mwe.
Olumono Lwa Huku
Perspicaz Vol. 2 pefo 222
Wokupakako ovitumino
Siovaa oe wahinda Ovitumino. Siovaa oe mwene Omuhindi Wovitumino vilulika ouye auho. Oe wapa ovitumino ovipuka atunga (Som. 38:4-38; Ovii. 104:5-19), atee umwe novitumino vieheviovanthu. (Som. 39:1-30) Omunthu nae, mokonda watungwa na Huku, utavela ovitumino Huku apaka kouye, mokonda una onondunge, usoka, upunga ovipuka, utyivila okufenda. Tupu una okutavela ovitumino vilulika onondunge. (Loma 12:1; 1 Kol. 2:14-16) Huku wapa umwe ovitumino no noandyu. — Ovii. 103:20; 2 Pet. 2:4, 11.
Ovitumino vya Siovaa vilulika ouye, katyitavela okuhevitavela. (Sele. 33:20, 21) Ovitumino vya Siovaa vilulika ouye viaviuka vitupu apa viapenga, novanthu vana vokwatanga unene vei ovitumino vya Huku viluka ouye, vetyivila umwe okuvalula nawa tuñgapi ohanyi nono planetas novipuka ovikwavo vili vala meulu omu, viliseta-seta mono minutu. Ovanthu vana vehetavela ovitumino vya Huku vilulika ouye velietela vala. Tyelifwa no otyo, ovitumino vya Huku vipopia omukalelo wovanthu viaviuka, okwehevitavela tyipondola vala okutwetela ovitateka. Namphila tyina tutala ñgaa ovitateka vituka kokwehetavela ovitumino vya Siovaa ngoti kavimoneka liwa, mahi Ombimbiliya yati: “Huku kanyanenwa. Mokonda etyi omunthu akuna tupu otyo makateya.” — Ngal. 6:7; 1 Tim. 5:24.
29 YA JANEIRO ATEE 4 YA FEVEREIRO
OLUMONO LUKAHI MONDAKA YA HUKU | SOMBE 40-42
Etyi Tulilongesila ku Sombe
Omutala Womulavi 1/10/2010 pefo 11-12 §§ 4-6
“Olie Wanoñgonoka Omutima Wa Jeova?”
4 Tyina tusokolola nawa ovilinga via Jeova, tuesukisa okulityilika eyembelo liokukoyesa Huku monkhalelo yokusoka yovanthu. Eyembelo olio, liapopiwa mondaka ya Jeova, ngetyi tyahonekwa mo Oviimbo 50:21 yati: “Ove wasoka okuti mandyikala umwe ngoove.” Otyo tyikahi ngetyi tyapopile omunongo umwe konthele Yombimbiliya omanima 175 konyima, wati: “Ovanthu vena eyembelo liokukoyesa Huku nonkhalelo yavo muene, nokusoka okuti Huku uhongolelwa novitumino vihongolela ovanthu.”
5 Onthue tuesukisa okulunguka opo tuhasoke okuti omalusoke a Jeova ekahi ngomalusoke etu ine omahando etu. Otyo tyakolela mokonda yatyi? Tyina tulilongesa Ovihonekwa, ovipuka vimwe Jeova alinga, vipondola okumoneka ngatyina vihaviukile monkhalelo yetu yokusoka youkuankhali. Ova Isilayeli kohale, vatokelele molusoke luapenga ngoolo, konthele yonkhalelo Jeova ankho evetekula. Tala etyi Jeova evepopila: “Onwe tyotyili mamukapopia okuti: ‘Ondyila ya Jeova kayaviukile.’ Tehelelei mbambavo, tyikumba tyo Isilayeli. Ondyila yange kayaviukile? Hanondyila mbenyi muene mbahaviukile?” — Isek. 18:25.
6 Otyipuka tyimwe matyituvatela okulityilika eliva liokukoyesa Jeova monkhalelo yetu yokusoka, okuimbuka okuti omalusoke etu omasupi unene, iya pamwe aponya unene. Otyo, Job wesukisile okutyinoñgonoka. Mokueenda kuomuvo wononkhumbi mbae, Job wasoyele unene ahimbika okusoka unene konthele yae muene. Wayekelepo okusoka kuetyi tyakolela vali unene. Anthi, Jeova noluembia emukuatesako opo ahandyule omalusoke ae. Jeova wemulingile omapulo alamba po 70 elikalaila, ehetyivili okuekumbulula. Ngotyo, Jeova walekesa nawa okuti enoñgonoko lia Jobe esupi. Jobe etavela nomutima weliola, nokupilulula onkhalelo yae yokusoka. — Tanga Sombe 42:1-6.
Omutala Womulavi 6/2017 pefo 25 § 12
Tualako Okutala Kotyipuka Tyakolela Vali
12 Okuti Job wasokele okuti omokonda yatyi Jeova apopila vala naame konyima yo nonkhumbi ambuho namona? Au, Job kasokele ngotyo. Job wanoñgonokele tupu wapandele onondonga Jeova emuavela. Alo umwe wapopia okuti: “Nayala etyi napopia. Ndyilivela tyokulipaka eheke netwe.” (Som. 42:1-6) Konyima, omukuendye umwe utiwa Eliuu akuatesako Job okupilulula onkhalelo yae yokusoka. (Som. 32:5-10) Konyima Job atehelela nawa elondolo lio luembia, Jeova emuavela tyina emuviyula apilulula onkhalelo yae yokusoka. Jeova amono okuti Job wapilulula onkhalelo yae pahe ayeke ovanthu vanoñgonoke oukuatyili wa Job. — Som. 42:7, 8.
Omutala Womulavi 6/2022 pefo 25 §§ 17-18
“Kevelela ku Siovaa”
17 Sombe o umwe vala povaumbili va Siovaa velikuatehilile etyi ankho vena ovitateka. Momukanda ahonekelele ova Hebeleu, omu apositolu Paulu wapopiamo vamwe iya eveti okuti “ekaka enene lionombangi.” (Hemb. 12:1) Ovanthu ovo aveho vali novitateka ovinyingi, mahi nongotyo vatuaileko okukala ovakuatyili ku Siovaa. (Hemb. 11:36-40) Okuti etyi velikuatehilile, valingile vala ononkhono-mphwila? Namphila momuvo ankho vena omuenyo kavamuene omilao aviho vya Huku vifwisuapo, mahi nongotyo kavayekelepo okukevela ku Siovaa. Iya mokonda ankho vetyii umwe okuti vapandwa na Siovaa, ankho vena onthumbi yokuti mavelimonenako tyina omilao vya Siovaa vilifilapo. (Hemb. 11:4, 5) Etyi valingile tyitupameka iya tyituavela ondundo yokukevelela vala ku Siovaa.
18 Hono onthwe tuvasiwa mouye weyula ovivi. (2 Tim. 3:13) Satanasi etyi tyokulola ovanthu va Huku ketyiyekepo-ale. Namphila matukala novitateka ovinyingi, mahi nongotyo onthwe tuakoya umwe okuundapela Siovaa tyityii okuti “tuna ekevelelo lietu mu Huku womuenyo.” (1 Tim. 4:10) Wahalimbueko okuti etyi Huku ayambele Sombe tyilekesa okuti “Siovaa una oluembia olunene nokankhenda.” (Tia. 5:11) Ngetyi tyalingile Sombe, onthwe tuahanda okukala ovakuatyili ku Siovaa mokonda tutyii okuti “uyamba vana valinga ononkhono mbokumuovola.” — Tanga Ova Hembeleu 11:6.
Olumono Lwa Huku
Perspicaz Vol. 2 pefo 830
OMUKWELE
Sombe wali umulume umwe omuviuki ukakatela vala mu Siovaa, namphila ankho alingwa omukwele. Mahi pena omuvo umwe ahapungile nawa ovipuka alingila-po umwe onkhali, atyisukisa umwe aviyulwe. Eliyuu wapopile etyi tyayemba ku Sombe okuti: “Olie pahe weelekwa na Sombe? Unwa omukwele ngatyina omeva?” (Som. 34:7) Sombe ankho wesuka vala unene nokuliyakulila, ahasoko-ale ko Huku, omu apopila atyikala ngatyina uti ngwe ulinga vali nawa ovipuka tyipona Huku. (Som. 35:2; 36:24) Etyi omapanga etatu a Sombe emulinga omukwele, kasokele okuti ngootyo o Siovaa Huku vekahi nokulinga omukwele. Mokonda yootyo, Sombe wanwine omeva omukwele mokonda wanumanene unene. Etyi pakala Siovaa apopila Sombe okuti omukwele oo ovanthu ovo vekulinga ame veulinga. (Som. 42:7) Otyipuka otyo tyelifwa neetyi Siovaa apopilile omuuli Samuwele etyi ova Isilayeli vaitile ohamba. Siovaa wapopile okuti: “Have-ko vaanya, ame vaanya, kavahande ndyikale ohamba yavo.” (1 Sam. 8:7) Sesusi wapopilile ovalongwa vae okuti: “Ovanthu mavekemumonesa ononkhumbi, aveho mavekemuyala kombanda yenyina liange.” (Mat. 24:9) Tyina omukilisitau anoñgonoka otyipuka otyo, metyivili okukoleleya tyina alingwa omukwele, akala nondyambi ituka kokukoleleya. — Luka 6:22, 23.
5-11 YA FEVEREIRO
OLUMONO LUKAHI MONDAKA YA HUKU | OVIIMBO 1-4
Hula Kouhamba wa Huku
Omutala Womulavi 9/2021 pefo 15 § 8
“Ame Mandyikateketesa Ovilongo Aviho”
8 Oñgeni ovanthu vakala tyina veiva onondaka tuivisa? Ovanthu ovanyingi vaanya etyi tulongesa. (Tanga Oviimbo 2:1-3.) Tupu omalongo ahangayala, aanye una Siovaa akoya Atumine. Kavatale onondaka Mbouhamba ngatyina “onondaka onongwa.” Ovatumini vamwe vailika ovilinga viokuivisa! Namphila ovatumini vamwe vapopia okuti vafenda Huku mahi no ngotyo kavahande okuyeka-po outumini wavo. Ngetyi tyalingile ovatumini vo pomuvo wa Sesusi, novo hono kavetavela Una Siovaa Akoya atumine tupu vamoneswa ononkhumbi ovalanduli vae. — Ovil. 4:25-28.
Omutala Womulavi 4/2016 pefo 29 § 11
Tualako Okuhalingi Onthele Youye Womaliyapauko
11 Omalumono. Inkha omalumono etu tuetala ngatyina akolela vali unene kuonthue, tyipondola okutupuiya unene okuhelipake mopulitika. Konyima yo 1970 ovanyingi Ponombangi mba Jeova ko Malawi vapolelwe ovipuka viavo aviho, mokonda ankho vaanya okulipaka mopulitika. Ovakuatate vamwe avehetavela okuyekapo omuenyo omuwa ankho vena. Omphange umwe utiwa Ruth, wati, “Vamwe tuatuailwe navo koukonde, konyima vetavelele okulipaka mopulitika, avakondoka komaumbo avo, ankho kavetyivilile okukala omapita momphango ankho tuapakwa koukonde.” Mahi ovanthu ovanyingi va Huku kavalingi ngotyo. Vatualako okuhelipake mopulitika, alo umwe tyina vapeseka konombongo mbavo ine omalumono avo. — Hemb. 10:34.
Olumono Lwa Huku
Perspicaz Vol. 1 pefo 425
EYUNGU
Eyungu otyipeta tyotiliku nosevata. Namphila tyina Ombimbiliya ipopia ovipuka ovio, ivipopia vala ngatyina omuhe, mahi mwene ankho otyipuka otyo tyakaka unene kohale tyokutyopa ovikuna. Tyina ovanthu vamateye ankho vatyopa ovikuna opo vapoleko eyungu liatyo liahaliwa. Otyo tyatamo umwe pala okupopia otyipuka tyehesilivila, tyesukisa okupolwa kutyina tyikahi nawa, atyiyokwa.
Tyotete, okutyopa ankho opala okuyapula eyungu konoñgima. Tyina vamatyopo, pahe avayele opo eyungu liende nomphepo. (Tala JOEIRAR.) Otyo tyipopia umwe nawa etyi Huku alinga ayapule vana vokwatyitukilapo otyili, novanthu onondingavivi, no vovilongo ovikwavo kovanthu vae. (Som. 21:18; Ovii. 1:4; 35:5; Isa. 17:13; 29:5; 41:15; Ose. 13:3) Ouhamba wa Huku maukahanyako onondyale mbao, atyikala ngatyina eyungu lityindwapo nomphepo. — Ndan. 2:35.
Eyungu ankho liongiywa aliyokwa opo omphepo iheliete vali nomo noñgima. Tyelifwa no otyo, Swau Mbatisita, waulile ehanyauno lionongeleya mbomatutu, apopi okuti wokutyopa Sesusi Kilisitu, makaongiya otiliku, “mahi olungu eluyumbu motupia tuhevilwa okunyimwa.” — Mat. 3:7-12; Luka 3:17. Tala DEBULHA; PALHA.
12-18 YA FEVEREIRO
OLUMONO LUKAHI MONDAKA YA HUKU | OVIIMBO 5-7
Wahayeke Vakwenyi Vekupundukise
Omutala Womulavi 3/2021 pefo 15 §§ 7-8
Oñgeni Okulilongesa Ombimbiliya Tyitukuatesako Okukoleleya Movitateka?
7 Okuti kumbi waendeluale konyima nepanga liove, ine o umwe mombunga? Inkha ongotyo, mohambukwa unene okulilongesila Kohamba Daviti nomona wae Abisalau. Abisalau waendele konyima tate yae, ahande okukala ohamba pomphangu ya tate yae. — 2 Sam. 15:5-14, 31; 18:6-14.
8 (1) Likuambela. Tyina wehenehimbike okulilongesa ehipululo limwe, likuambela ku Siovaa, omupopila oñgeni ukahi mokonda yokulingwa onya. (Ovii. 6:6-9) Popia umwe etyi tyili mombungo. Ita ku Siovaa ekukuateseko okuvasa onondongwa, mambukukuatesako okukoleleya motyitateka tyove.
Omutala Womulavi 7/2020 pefo 8-9 §§ 3-4
Kala Nonthumbi Yokuti Uli Motyili
3 Ekolelo lietu kalipondola okupamena vala moluembia luli pokati kovanthu va Huku. Omokonda yatyi? Mongeleka, soka ñgeno omukokoli-ndyila ine omukulu wewaneno ulinga onkhali. Ovakuatate vapondola okutulinga otyipuka tyitunumanesa. Vamwe vapondola okutyitukila-po otyili, avahimbika okupopia okuti etyi tulongeswa omatutu. Inkha ovipuka ovio vimoneka-po, oityi molingi? Moyekepo otyili? Etyi tuhanda okupopia otyetyi: Inkha ekolelo liove lipamena muetyi vakuenyi valinga, alihapamena moupa-nga wove na Siovaa, malitendeswa novipuka vihesilivila. Ekolelo liove lielekwa nondyuo. Kupondola okutunga ondyuo yove novipuka vihesilivila. Mongeleka, mokonda ovanthu va Huku velihole, ngamo uliyendeleka vala. Opo ukale nekolelo liapama, wesukisa okulilongesa Ombimbiliya, onoñgonoka nawa etyi ulilongesa. Ove muene wesukisa okusokolola, olipopila okuti: ‘Etyi ndyikahi nokulilongesa mo Mbimbiliya, otyo umwe Siovaa ahanda ndyinoñgonoke.’ — Loma 12:2.
4 Sesusi wapopia okuti vamwe mavetavela umwe otyili “nehambu,” mahi tyina pamamoneka ovitateka, avetyiyekepo. (Tanga Mateusi 13:3-6, 20, 21.) Hamwe ankho kavetyii okuti ovalanduli va Sesusi mavakala novitateka. (Mat. 16:24) Ine hamwe ankho vasoka okuti okukala omulongwa wa Sesusi, tyilekesa okuti Huku memuamena kovitateka aviho, ehena etyi matyimusukalalesa. Mahi tutyii okuti mouye muno, apeho matukala novitateka. Pamwe mapamoneka ovipuka vitusoyesa. — Ovii. 6:6; Omup. 9:11.
Olumono Lwa Huku
Perspicaz Vol. 2 pefo 1004
ELANGALO
Momukanda Ova Loma 3:13, omu apositolu Paulu wapopia onondaka mbuli momukanda Oviimbo 5:9, apopi okuti omangongolivo onondingavivi ayondya ovanthu, “omaendo aikuka”. Ngeetyi ovanthu vaheya eendo pala okuhihilamo omunthu wankhia, nomangongolivo ovanthu onondingavivi apopia vala ovipuka viipaesa ovanthu. — Tala Mat. 15:18-20.
19-25 YA FEVEREIRO
OLUMONO LUKAHI MONDAKA YA HUKU | OVIIMBO 8-10
“Mandyikuhivilika Siovaa”!
Omutala Womulavi 8/2021 pefo 3 § 6
Panda Omphangu Yove Mombunga ya Siovaa
6 Siovaa watunga ohi monkhalelo ikahi nawa pala onthue. Siovaa watetekela okutungila ohi ovanthu, konyima pahe atungu nawa omulume wotete. (Som. 38:4-6; Sele. 10:12) Mokonda Siovaa wesuka nonthue nokuna otyali, wetuavela ovipuka ovinyingi vituhambukiswa. (Ovii. 104:14, 15, 24) Etyi palamba omuvo umwe, Huku atale ovipuka aviho atunga, “amono okuti vikahi nawa.” (Ehim. 1:10, 12, 31) Siovaa tupu walekesa okuti uhole ovanthu etyi evetuma ‘vatumine’ ovipuka aviho atunga. (Ovii. 8:6) Huku ankho uhanda ovanthu vahambukilwe okuyunga ovipuka aviho atunga pala apeho. Okuti ove apeho woovola omuvo wokusoka komulao oo omuwa wa Siovaa?
Omutala Womulavi 5/2020 pefo 23 § 10
Okuti Uhole Okupandula Ovipuka Siovaa Ekuavela?
10 Ovanthu vamwe vetavela okuti eheke novipuka ovikuavo, vieyako vala avike. Pahe onkhalelo imwe yokulekesa okuti tuapandula otyiawa otyo, okuvepopila omokonda yatyi tutavelela okuti o Huku watunga ovipuka aviho. (Ovii. 9:1; 1 Pet. 3:15) Ovanthu vokulongesa ngotyo, vahanda tusoke ngavo. Oñgeni tupondola okuvekuatesako okutavela okuti Tate yetu Siovaa, oe watunga eulu nohi? Tupondola okuvetangela Ombimbiliya, nokuvepopila ovipuka vimwe tukahi nokulilongesa monthele ei. — Ovii. 102:25; Isa. 40:25, 26.
Omutala Womulavi 4/2022 pefo 7 § 13
Okuti Ove ‘Waava Ongeleka Ongwa . . . Mokupopia’?
13 Imba nomutima auho. Tyina tuimba oviimbo vietu Viouhamba, etyi tuhanda vali okuhilivika Siovaa. Omphange umwe utiwa o Sara ulitehelela okuti ketyivili okuimba nawa. Mahi ngwe uhanda okuimba opo ahilivike Siovaa. Mokonda yotyo ulifwikila keumbo ngetyi afwiika ononthele ononkhuavo mbomaliongiyo. Tyina eli meumbo wiimba oviimbo otyo atala oñgeni etyi vipopia tyelikuata nononthele mbeliongiyo. Sara wati: “Otyo tyinkhuatesako okutala etyi otyiimbo tyikahi nokupopia anehesuku nondaka yange yehekahi nawa.”
Olumono Lwa Huku
Perspicaz Vol. 1 pefo 664
OMUNWE WOKENKHANYA
Ombimbiliya ipopia okuti ominwe vya Huku vina ovipuka vialingile ngeetyi okuhoneka komamanya Ovitumino Ekwii Viapelwe Mwisesi (Oku. 31:18; Epal. 9:10), nokulinga omaelema (Oku. 8:18, 19) ya nokutunga ohi ( Ovii. 8:3). Tyina Ombimbiliya ipopia “ominwe” vya Huku pokutunga ohi, ikahi nokupopia Omphepo ya Huku, yapopiwa momukanda Ehimbikilo okuti, ankho yeenda-enda kombanda yomeva. (Ehim. 1:2) Ya Ovihonekwa Viovakilisitau vo Ngeleku, vipopia umwe otyipuka tyimwe tyilekesa umwe nawa omokonda yatyi tupopila ngootyo, omukanda wa Mateusi upopia okuti Sesusi ankho utaata ovilulu mokonda ankho una ‘omphepo ya Huku,’ ya omukanda wa Luka upopia okuti ankho utyivila tupu omokonda ‘yenkhanya lya Huku’. — Mat. 12:28; Luka 11:20.
26 YA FEVEREIRO ATEE 3 YA MARÇO
OLUMONO LUKAHI MONDAKA YA HUKU | OVIIMBO 11-15
Lisokela Mouye Omupe Huku Alaa
Omutala Womulavi 15/5/2006 pefo 18 § 3
Etyi Tyipopia omukanda Oviimbo
11:3 — Opi ovaviuki vapamena mapahanyuka? Opapa ovanthu aveho vomouye vapamena — ovitumino, nomu ovipuka vina okulingilwa, nouviuki. Tyina ovanthu vahalingi ovipuka ovio, opo ovipuka pahe kaviviukwale vali, nouviuki kaukala-po vali. Movipuka ngoovio, “omuviuki” una okuyumba onthumbi mu Siovaa Huku. — Oviimbo 11:4-7.
Omutala Womulavi 4/2016 pefo 11
Okuti Mouye Mupondola Okukala Tyehena Oungangala?
Ombimbiliya yalaa okuti Huku apa katutu makamanako oungangala kombanda yohi aiho. Ouye hono weyula oungangala maukahanyuako na Huku “monthiki yekoyeso no yehanyauno liovanthu onondingavivi.” (2 Pet. 3:5-7) Kamakukakala vali ovanthu onongangala opo vamonese vakuavo ononkhumbi. Oñgeni onthwe tupondola okukala nonthumbi yokuti Huku makaamena ovanthu iya amaneko oungangala?
Ombimbiliya yati: Huku “uyele una uhole oungangala.” (Ovii. 11:5) Omutungi wovipuka aviho uhole ombembwa nouviuki. (Ovii. 33:5; 37:28) Kamayekelela ovanthu valinga oungangala vakaleko apeho.
Omutala Womulavi 8/2017 pefo 6 § 15
Okuti Wafuapo Pala Okukevelela Noumphua-Lundo?
15 Omokonda yatyi David akalele nehando liokukevelela noumphua-lundo? Wetuavela ekumbululo mo salmu etyi elipula ovikando vikuana okuti: “Alo nalupi?” Wapopia okuti: “Ame nayumba onthumbi mohole yove yotyotyili; Omutima wange mauhambukwa novilinga viove vieyovo. Mandyiimbila Jeova iya mamphe ononkhano onongwa.” (Ovii. 13:5, 6) David ankho utyii okuti Jeova umuhole iya apeho omukuatyili kwe. Wasokele komuvo Jeova emukuatesileko kohale iya ankho ukevelela omuvo Jeova matetulula ovitateka viae. David ankho utyii okuti Jeova memuyambe ngetyi ankho akevelela.
Ouhamba wa Huku pefo 236 § 16
Ouhamba Ufuisapo Ehando lia Huku Pano Pohi
16 Epamo. Apa katutu, onondaka mbuhambukiswa mbukahi mu Isaías 11:6-9, mambukafuiswapo umwe nwa-nawa. Ovalume, novakai, novana pano pohi, mavakakala tyapama. Petupu omunthu makalinga onya mukuavo ine otyinyama. Soka komuvo mokatala ohi aiho ngatyina eumbo liove, omu upondola okuyoa momanyana, no momatala, no melunga, nokulonda konomphunda ononene, nokuenda-enda meholi ohakala nowoma wokuti pena etyi matyikuli. Iya tyina kuamanthikovela, kumakala notyiho. Onondaka mba Isekiyele 34:25 mambukafuiswapo, iya alo umwe ovanthu va Huku vapondola ‘okukakala tyapama moluhandya, nokukalala monohika.’
Olumono Lwa Huku
Omutala Womulavi 15/9/2013 pefo 19 § 12
Okuti Wakala Omupe?
12 Tyotyili, tukahi pokati kovanthu vasoka ngetyi Paulu apopile. Vasoka okuti okulandula ovitumino ine onondonga otyo kohale iya nawike una okukuluminya vakuavo okutyilinga. Ovalongesi ovanyingi novohe vayeka ovana valinge atyiho vahanda. Alo umwe valongesa okuti kese munthu una epondolo liokuliholovonena etyi tyaviuka netyi tyapenga. Tupu vetavela okuti tyilityili kutupu onkhalelo yokunoñgonoka etyi tyaviuka netyi tyapenga. Alo umwe vana vetavela okuti kuna Huku kavasoko okuti vesukisa okulinga etyi Huku apopia okuti tyaviuka. (Ovii. 14:1) Otyituwa otyo tyipondola okunyona Ovakristau. Inkha katulunguka, tupondola okuyekapo okulandula onondonga tupewa neongano lia Huku iya alo umwe tupondola okuhimbika okuliyava konthele yovipuka aviho tuhahande. Ine tupondola okuehetavela omalondolo Ombimbiliya tupewa konthele yovitalukiso, nokuundapesa o Internete, nokulongeswa monosikola ononene.