Uhakoyese Vakuenyi Okutalela Kolupe

1. Oityi Isaia aulile konthele ya Jesus, iya omokonda yatyi eulo olio litupameka?

EULO lya Isaia lipopia konthele ya Jesus Kristu, litupameka unene iya lituavela ekevelelo. Isaia wapopile okuti Jesus ankho “kamakakoyesa okutalela ku etyi amona komaiho ine ku etyi eiva.” Tupu ankho “makoyesa omapongo nouviuki.” (Isaías 11:3, 4) Otyo tyitupameka mokonda yatyi? Omokonda tukahi mouye weyula okapungulula, omu ovanthu vakoyesa vakuavo okutalela ku etyi vamona. Onthue tyotyili tuesukisa Omukoyesi wafuapo, Jesus, mokonda nalumwe makoyesa okutalela kolupe!

2. Oityi Jesus etutuma okulinga iya oityi matulilongesa monthele ei?

² Ononthiki ambuho, tuna etyi tusoka konthele vakuetu. Mahi onthue tuelikalela na Jesus, ngotyo onkhalelo tusoka konthele ya vakuetu kayafuilepo mokonda tuvakuankhali. Onthue tuhongiliyua unene netyi tutala. Jesus wati: “Muhakoyesei okutalela kolupe, mahi koyesei nouviuki.” (João 7:24) Ngotyo, Jesus uhanda tukale ngae iya atuhakoyesa vakuetu okutalela kolupe. Monthele ei, matulilongesa ovipuka vitatu vipondola okuhongiliya omalusoke etu: otyivala ine otyilongo omunthu atyitilwa, nomalumono ena iya neti liae. Mu kese nthele, matulilongesa oñgeni tupondola okutavela ku Jesus iya atuhakoyesa vakuetu okutalela kolupe.

UHAKOYESE VAKUENYI OKUTALELA KOTYIVALA INE OTYILONGO

3, 4. (a) Omokonda yatyi Petulu apilululile olusoke ankho ena konthele yova Sindiyu? (Tala olutalatu pefo pahimbikila onthele.) (b) Enoñgonoko patyi epe Jeova alongesile Petulu?

³ Soka oñgeni apostolu Petulu akalele etyi aitwa opo ende meumbo lya Korneliu, ko Sesaleia! (Atos 10:17-29) Tunde pouna, Petulu ankho walongesua okuti ono Sindiyu ankho ovanthu vasila. Mahi apamoneka otyipuka tyimwe tyapilululile olusoke lwae. Mongeleka, Huku wemulekesile emonekelo limwe. (Atos 10:9-16) Memonekelo olio, Petulu wamona otyipuka ankho tyikahi ngotyinyanga tyitundilila keulu iya motyinyanga omo ankho mueyula ovinyama ankho vitalwa okuti viasila. Konyima eivi ondaka yati: “Petulu katuka, ipaa iya oli!” Movikando vitatu, Petulu aanye. Mu kese tyikando, ondaka eiva yati: “Yekapo okuihana ovipuka Huku asukukisa, okuti viasila.” No ngotyo, Petulu kanoñgonokele etyi Huku ankho ahanda okumulongesa. Mahi konyima, ovatumwa-ndaka va Korneliu avehiki. Ospilitu sandu yahongolela Petulu meumbo lya Korneliu iya aende no vatumwa-ndaka.

⁴ Inkha Petulu ‘akoyesile vala ovanthu okutalela kolupe,’ ñgeno nalumwe aile meumbo lya Korneliu. Ova Judeu ankho kavanyingila momaumbo ova Sindiyu. Mahi omokonda yatyi Petulu aila-mo? Namphila ankho atala ova Sindiyu monkhalelo yapenga, mahi emonekelo amuene iya nehongolelo liospilitu sandu, viapilululile olusoke lwae. Konyima yetyi Petulu atehelela Korneliu, apopi okuti: “Ame pahe nanoñgonoka umwe nawa okuti tyili-tyili Huku utupu okapungulula, mahi movilongo aviho utavela kese omunthu una onthilo nae nokulinga etyi tyaviuka.” (Atos 10:34, 35) Olio ankho enoñgonoko epe iya liahambukisilwe unene Petulu. Ovakristau aveho vena okueendela menoñgonoko olio. Ñgeni ngotyo?

5. (a) Oityi Jeova ahanda Ovakristau vanoñgonoke? (b) Namphila tuumbila-le Jeova, olusoke patyi nkhele tupondola okukala nalo?

⁵ Jeova waundapesile Petulu opo akuateseko Ovakristau aveho okunoñgonoka okuti utupu okapungulula. Ku Jeova, otyivala tyetu, notyilongo omu tuatyitilwa, omuhoko ine elaka tupopia, havioko viakolela. Tyakolela kwe, okumufenda nokulinga etyi tyaviuka. (Gálatas 3:26-28; Apocalipse 7:9, 10) Otyo hamwe ove utyi–ale. Mahi inkha wekulila motyilongo ine o mombunga ina okapungulula? Namphila usoka okuti ove utupu okapungulula, mahi pamwe upondola okukala nokapungulula. Petulu wakuatesileko ovanthu okuimbuka okuti Huku utupu okapungulula, mahi no ngotyo nkhele ankho una okapungulula. (Gálatas 2:11-14) Ngotyo, oñgeni tupondola okutavela Jesus iya atuyekepo okukoyesa vakuetu okutalela kotyivala tyavo?

6. (a) Oityi tyipondola okutukuatesako okuyekapo okapungulula? (b) Etyi omukuatate umwe ahoneka, tyilekesa-tyi konthele yae?

⁶ Opo tuimbuke inkha nkhele tuna okapungulula tuna okutala nawa etyi tyikahi momutima wetu. Tuna okueleka ovituwa vietu netyi tulilongesa Mondaka ya Huku. (Salmo 119:105) Tupu, tupondola okuita epanga lietu opo etupopile inkha wamona okuti tuna okapungulula, mokonda onthue pamwe katutyivili okutyiimbuka. (Gálatas 2:11, 14) Pamwe tupondola okutyiliya unene omalusoke oo iya atuhaimbuka okuti tuna okapungulula! Otyo tyamonekele nomukuatate umwe una otyilinga tyakolela meongano. Wahonekele omukanda ankho upopia konthele yovalinepi vamwe ankho veli movilinga viomuvo auho. Omulume watyo ankho o womuhoko ovanthu ankho vatala okuti kausilivila. Omukuatate oo wahonekele ovipuka oviwa konthele yomulume watyo, mahi ayawisako okuti: “Namphila omukuatate o [womuhoko oo], mahi onkhalelo yomuenyo wae ikuatesako ovanthu okunoñgonoka okuti okukala omunthu [womuhoko oo] katyilekesa okuti wasila, utupu omuenyo ukahi nawa, ngetyi ovanthu [vomuhoko oo] vekahi.” Otyo tyitulongesa-tyi? Tyitulongesa okuti katyesukisile ovilinga tuna meongano lya Jeova, tuna okutala nawa omutima wetu iya atutavela ekuateso opo tuimbuke inkha nkhele tuna okapungulula. Oityi vali tupondola okulinga?

7. Oñgeni tupondola okulekesa okuti ‘tuaikula omutima wetu’?

⁷ Inkha “tuikula omutima wetu,” matuyekepo okapungulula iya atukala nohole. (2 Coríntios 6:11-13) Okuti ove ukala vala novanthu votyivala, notyilongo tyove, no vomuhoko wove ine vapopia vala elaka liove? Inkha ongotyo, linga ononkhono mbokukala novanthu ovakuavo. Upondola okuvekonga opo uundape navo movilinga viokuivisa. Ine upondola okuvekonga opo veye okulia meumbo liove. (Atos 16:14, 15) Mokueenda kuomuvo, mokala nohole, oyekepo okapungulula. Pahe matutale onkhalelo onkhuavo pamwe tupondola okukoyesa vakuetu “okutalela kolupe.”

UHAKOYESE VAKUENYI OKUTALELA KOMALUMONO

8. Oityi Levítico 19:15 ipopia konthele yoñgeni omalumono apondola okuhongiliya onkhalelo tutala vakuetu?

⁸ Omalumono vakuetu vena apondola okuhongiliya onkhalelo tuvetala. Levítico 19:15 yati: “Muhalingei okapungulula omuhepi ine okuamena omuhona. Muesukisa okukoyesa omukuatate wenyi nouviuki.” Oñgeni omalumono omunthu ena apondola okuhongiliya onkhalelo tumutala?

9. Oityi Salomau apopile, iya otyo tyitulongesa-tyi?

⁹ Salomau wahonekele okuti: “Omunthu wahepa uyelwe alo umwe namunthele yae, mahi omuhona una omapanga omanyingi.” (Provérbios 14:20) Oityi onondaka ombo mbutulongesa? Inkha katulunguka, tupondola okulinga vala oupanga novakuatate vena omalumono omanyingi, atuyekepo okulinga oupanga na vana vahepa. Omokonda yatyi otyiponga okukoyesa vakuetu okutalela komalumono avo?

10. Tiago walondolele ovakuatate vae konthele yotyitateka patyi?

¹⁰ Inkha tutekula vakuetu okutalela komalumono avo, otyo tyipondola okuhongiliya ovakuatate mewaneno okuliyapauka. Otyo tyamonekele momawaneno amwe potyita tyo tete iya Tiago evelondola konthele yotyo. (Tanga Tiago 2:1-4.) Onthue katupondola okuyeka mewaneno mukale okapungulula. Ngotyo, oñgeni tupondola okulityilika okukoyesa vakuetu okutalela komalumono vena?

11. Okuti opo omunthu akale noupanga wapama na Jeova, tyitei komalumono ena? Hangununa.

¹¹ Tuna okutala ovakuatate vetu ngetyi Jeova evetala. Ku Jeova omalumono omunthu haoko akolela. Oupanga wetu na Jeova kautei komalumono. Namphila Jesus apopia okuti “tyipuiya unene omuhona okunyingila Mouhamba wo keulu,” mahi ankho kekahi nokupopia okuti otyo katyivilwa. (Mateus 19:23) Jesus tupu wati: “Onwe vahepi, muna ehambu, mokonda Ouhamba wa Huku owenyi.” (Lucas 6:20) Mahi otyo katyihangununa okuti ovahepi aveho ankho mavatehelela Jesus iya avapewa ononkhano onongwa. Ovahepi ovanyingi kavalandulile Jesus. Tyotyili, katupondola okukoyesa oupanga vakuetu vena na Jeova okutalela komalumono avo.

12. Oityi Ombimbiliya ipopila vana vamona na vana vahepa?

¹² Pokati kovanthu va Jeova, pena ovakuatate vena omalumono na vana vahepa. Mahi aveho vehole Jeova iya vemuumbila nomutima auho. Ombimbiliya ipopila ovanthu vokuamona opo “vahapake ekevelelo liavo momalumono ahayumbwa onthumbi, mahi vayumbe onthumbi mu Huku.” (Tanga 1 Timóteo 6:17-19.) Ondaka ya Huku tupu ilondola ovaumbili aveho va Jeova, tyilinge vana vamona ine vahepa, okuti okukala nohole no nombongo tyieta ovitateka. (1 Timóteo 6:9, 10) Inkha tutala vakuetu ngetyi Jeova evetala, kamatuvekoyesa okutalela ku etyi vena. Mahi okuti tyaviuka okukoyesa vakuetu okutalela keti liavo?

UHAKOYESE VAKUENYI OKUTALELA KETI LIAVO

13. Oityi Ombimbiliya itulongesa konthele yokukala nonthilo na vana vakulupa?

¹³ Ombimbiliya ipopia okuti tuna okuhumba ovanthu vokuakulupa. Levítico 19:32 yati: “Una okukala nonthilo nonohuki onongonga nokuhumba una wakulupa, nokukala nonthilo na Huku yove.” Tupu Provérbios 16:31 itupopila okuti “onohuki onongonga otyaka tyouwa tyina mbukahi mondyila youviuki.” Iya Paulu wapopilile Timoteo opo ahapopie omapita ovakulu, mahi ankho una okuvetala ngatyina ovo tate yae. (1 Timóteo 5:1, 2) Namphila Timoteo ankho ena otyilinga tyakolela, mahi ankho wesukisa okukala nohole, nonthilo novakulu.

14. Onalupi tuesukisa okuviyula omunthu omukulu ku onthue?

¹⁴ Mahi inkha omukuatate omukulu ulinga onkhali ine uyandyanesa otyipuka tyinumanesa Jeova? Jeova ukoyesa ovanthu valinga onkhali tyawina, alo umwe inkha omukulu ine utalwa okuti ongeleka ongwa. Tala onondonga tuvasa mu Isaías 65:20, mbati: “Ondingavivi maihinganwa, namphila ena omanima otyita.” Onondonga ombo tupu tumbuvasa memonekelo lya Ezequiel. (Ezequiel 9:5-7) Tyakolela vali, okukala nonthilo Nomukulu wo Nonthiki, Jeova. (Daniel 7:9, 10, 13, 14) Onthilo tuna na Jeova maitukuatesako okuviyula omunthu wesukisa ekuateso, tyihatale keti liae.—Gálatas 6:1.

15. Oityi tulilongesila ku Paulu konthele yokukala nonthilo no vakuendye?

¹⁵ Mahi inkha omukuatate omukuendye? Otyo tyilekesa okuti katupondola okukala nonthilo nae? Au. Paulu wapopila Timotiu okuti: “Uhayeke omunthu nawike ekutombe mokonda umukuendye. Mahi kala ongeleka ongwa ko vekolelo, mokupopia, no movituwa, no mohole, no mousukuki.” (1 Timóteo 4:12) Etyi Paulu ahoneka onondaka ombo, Timotiu tyafuile ankho una-le omanima 30 iya ankho una ovilinga ovinyingi viakolela. Otyo tyitulongesa-tyi? Tyitulongesa okuti katupondola okukoyesa ovakuendye okutalela keti liavo. Soka kovipuka aviho Jesus alingile etyi ankho ena vala omanima 33!

16, 17. (a) Oñgeni ovakulu vewaneno vatokola inkha omukuatate umwe wafuapo opo akale omukulu wewaneno ine omukuatesiko wavo? (b) Oñgeni omalusoke etu novituwa vyo motyilongo vipondola okulikalela netyi Ombimbiliya ipopia?

¹⁶ Movilongo vimwe, ovanthu vetupu onthilo novakuendye. Mokonda yotyo, ovakulu vamwe vomawaneno vapondola okulityilika okuveavela ovilinga, ngetyi okukala omukulu wewaneno ine omukuatesiko wavo, namphila pamwe vena ovituwa Ombimbiliya ipopia okuti vena okukala navio opo valinge ovilinga ovio. Ombimbiliya kaipopi omanima omunthu ena okukala nao opo akale omukulu wewaneno ine omukuatesiko wavo. (1 Timóteo 3:1-10, 12, 13; Tito 1:5-9) Inkha omukulu wewaneno uhinda otyitumino konthele yotyo, ngotyo kekahi nokulandula Ondaka ya Huku. Ovakulu vewaneno kavapondola okuyeka ovituwa vyo motyilongo vihongiliye onkhalelo vatala ovakuendye. Mahi vena okuhongolelwa Nondaka ya Huku.—2 Timóteo 3:16, 17.

¹⁷ Inkha ovakulu vewaneno kavalandula Ondaka ya Huku tyina vaholovona ovakuatate opo vakale ovakulu vewaneno ine ovakuatesiko vavo, ngotyo mavelityilika okuavela ovilinga ovio ovakuatate vatokala. Motyilongo tyimwe, omukuatesiko umwe wewaneno ankho ufuisapo nawa ovilinga viae iya ovakulu vewaneno avaimbuka umwe okuti omukuatate oo ankho una ovituwa omukulu wewaneno esukisa okukala navio. Mahi, ovakulu vamwe vewaneno, avapopi okuti mokonda nkhele omona kapondola okukala omukulu wewaneno, iya ahakala umwe. Omukuatate oo kapelwe otyilinga otyo mokonda yonkhalelo ankho vemutala. Onkhalelo oyo yokusoka yakaka unene movilongo ovinyingi. Tyakolela unene okulityilika okuyumba onthumbi momalusoke etu muene ine omo vituwa viotyilongo, mahi atuyumbu onthumbi mo Mbimbiliya. Inkha tulinga ngotyo, matutavela ku Jesus iya atuyekepo okukoyesa vakuetu okutalela kolupe.

KOYESEI NOUVIUKI

18, 19. Oityi matyitukuatesako okutala vakuetu ngetyi Jeova evetala?

¹⁸ Namphila tuvakuankhali, tupondola okulilongesa okuhalingi okapungulula nga Jeova. (Atos 10:34, 35) Ngotyo, apeho tuna okuhinangela etyi Ondaka ya Huku ipopia. Inkha tuendela muetyi tulilongesa, matutavela onondaka mba Jesus mbati: “Muhakoyesei okutalela kolupe.” — João 7:24.

¹⁹ Apa katutu, Ohamba yetu Jesus makakoyesa ovanthu aveho. Jesus makaundapesa ovitumino vya Huku opo akoyese ovanthu, mahi ahatalela kolupe. (Isaías 11:3, 4) Tyotyili, tukahi nokukevelela omuvo oo mauhambukiswa unene!