Oprograma Yotyonge Tyonthiki Ike

Osapi pala otyonge tyonthiki ike, yo 2009, yati: ‘Tualako Okutala Nawa Ovilinga Viokuivisa, . . . opo Uvifuisepo,’ yapolwa mu Colossenses 4:17. Ovakristau aveho vesukisa okutavela elondolo olio nomutima auho. Onthue tuhanda okufuisapo ovilinga vietu nekolelo, ngetyi Jesus alingile. (João 17:​4) Tupu, apostolu Paulu wetuavela ongeleka ongwa konthele oyo. Paulu ankho wahandele okumanuhula ovilinga viae viokuivisa.​—⁠Atos 20:⁠24.

Onthele yomutalelipo womauaneno mailekesa oñgeni ovaivisi vapondola okufinda ovitateka movilinga viavo viokuivisa. Iya elongomona liokuna osapi “Hondyuela Etyi Wakuna” malilekesa oñgeni tupondola okukuatesako vana ‘vahanda omuenyo wahapu.’ (Atos 13:​48) Melongomona liokuna osapi yati “Oñgeni Matulilekesa Okuti Tuvaumbili va Huku” omutumwa woko filiyale mahangununa kese versikulu ya 2 Coríntios 6:​1-10. Kekumbi, oe malingi elongomona lina osapi yati “Lekesa Okuti Upanda Ovilinga Viove Viokuivisa.” Tyotyili, mamupewa ondundo nononthele mbokuati, “Vakuendye Novakulu, Hambukiluei Ovilinga Viokuivisa,” iya “Ovakuendye Novahikuena Vafuisapo Ovilinga Viokuivisa.” Vana vahanda okumbatisalwa motyonge tyonthiki ike ine motyonge tyononthiki onombali, vena okutyipopila liwa omukulu weuaneno ukahi komutue. Onthele imue yakolela movionge vietu aviho, elongeso Liomutala Womulavi. Etelela omukanda wove maulilongeswa mosimano yotyonge tyonthiki ike.

Opo tufuisepo ovilinga vietu, tuesukisa okulinga ononkhono opo tuhayeke ovipuka ovikuavo vitupole omuvo wokulinga ovilinga via Jeova. Ondundo Yovihonekwa matupewa motyonge tyino tyonthiki ike, maitukuatesako okunoñgonoka etyi tuesukisa okulinga opo tutualeko okuendela mondyila yaviuka, nokusoka kuetyi matulingi opo tufuisepo ovilinga vietu viokuivisa.