6 NUENƆ

Baatɛ̄ Lo Dɔ Kpa Kaɛ Leere

Jɔn 10:33-36

TƐƐ̄NYƆƆ: O aa aadee buū ziī dɔ kpa kaɛ sa o kii loo dɔɔ̄na ue a le bu lo kpa aba sɔ̄. Muɛ̄ suā kɔ pya a gaa a gbaɛ̄tɔ̄ muɛ̄ kɛ̄ lo dɔ kpa kaɛ gbaaloo nu o gaa kɔ doo.

KƐ̄ EDOO DOO:

Kɔ ue nyɔɔ pya kpog-bee ue. Sɔ̄ o ebuna ziī dɔ kpa kaɛ sah, kɔ ue nyɔɔ pya kpog-bee ue a baatɛ̄ lo ekobee ue. O dap doo wo tɛ̄maloo esikɛ̄ tɛɛ̄ nyɔɔ lo ue ale tɛ̄maloo bip ebip edoo kɔ pya a gaa gbaɛ̄tɔ̄ a yere nukuādɛɛ̄ loo pya kpog-bee ue a le bu.

Lo o su dɔɔ̄na bee ue baātɛ̄ nu lo dɔ kpa kaɛ kɔ, muɛ̄ kɔ pya a gaa a gbaɛ̄tɔ̄ lege gaa muɛ̄ gbanialoo a le yɛɛ lo dɔ Baibol le kpog-bee nu o gaa kɔ.
Kɔ ue siībah nyɔɔ kpog-bee ue a le bu. Lo o gaa gbī ebuū ziī dɔ kpa kaɛ, baatɛ̄ kɛ̄ ue a le bu lo dɔ kpa kaɛ yere kpotɛ̄ nu o gaa kɔ ue nyɔɔ doo.

Kuma sɔ̄ o gaa kɔ ue nyɔɔ lo dɔ kpa kaɛ, o aa kpaɛ̄ o Baibol. Lo ama edoo kɔ pya a gaa a gbaɛ̄tɔ̄ a dābeeloo kɔ ue o gaa kɔ a kiiloo lo dɔ Baibol.
Kɔ ue nyɔɔ bu ekpurubah. O aa kɔ ue a naa kii loo nu o gaa kɔ ue nyɔɔ. Dɛɛa nyɔɔ nu pya a gaa a gbaɛ̄tɔ̄ suā akiiloo lo ekobee ue, suā pya nu o kɔ lo edoo kɔ ba a dābeeloo leere.