Vwo Imwẹro Taghene Jehova o Vwo Ekwerhọ Kpahuọn

1. Iroro ọgo yẹ idibo i Jehova ezẹko ri fuevwan ọke ahwanren i vwori?

OMA ọ merhenren ọwan omamọ, re rhe taghene Jehova o vwo ekwerhọ kpahen ihworho yi! Baibol na ọ tare: “Oma ọ merhen i Jehova kpahen ihworho yi.” (Ps. 149:4) Ọrẹn, fọkiẹ ẹhẹn ro seriotọre, ihworho ezẹko ne roro, ‘Oma ọ merhen i Jehova kpahen mẹ?’ Idibo i Jehova ezẹko uvuẹn i Baibol na ri fuevwan ga ye, i ji vwo ẹhẹn eveva sẹ Jehova o ghini vwo ekwerhọ kpahen aye.—1 Sam. 1:​6-10; Job 29:​2, 4; Ps. 51:11.

2. Ọrọmo yọ nọ sabu vwo ekwerhọ i Jehova?

² Baibol na o djephia taghene ituakpọ ri vwa gba ina sabu vwo ekwerhọ i Jehova. Izede ọgo? Ene vi vwo esegburhomẹmro kpahen i Jesu Kristi, ji bromarhame. (John 3:16) Uvuẹn izede ọnana, ne dje rẹn awọrọ taghene a ghwẹriẹ nẹ edandan ọwan ne, ji vive re ne ruẹ ọhọre i Jehova. (Acts 2:38; 3:19) Oma ọ merhen i Jehova kpahen ọwan fọkiẹ odjẹ ọnana ra djẹre na sabu vwo obọdẹn onyerẹnkugbe rhẹ ọye. Arha nyamwu ive omẹhakpahontọre ọwan, ne ne vwo ekwerhọ i Jehova ji rhiẹ obọdẹn igbehian yen.—Ps. 25:14.

3. Me ye ne yono kpahen?

³ Me yọ lẹrhẹ ihworho roro ọkezẹko taghene aye e vwo ekwerhọ i Jehova-a? Marhẹ i Jehova o ru dje ekwerhọ ye phia? Marhẹ Olele Kristi ono ru vwo imwẹro rhọ taghene Jehova o vwo ekwerhọ kpahiẹn?

OBORẸ Ọ LẸRHẸ IHWORHO EZẸKO RORO TAGHENE JEHOVA O VWO EKWERHỌ KPAHEN AYE-E

4-5. Orhianẹ e ni oma ọwan sakamu, me yo fori na karorhọ?

⁴ Nẹ ọke ra ha emọvwerhe, buebun ọwan a wọnrọn hasuẹ iroro re ni oma ọwan sakamu. (Ps. 88:15) Omizu ọhworhare owu re se Adrián nọ tare: “Ọke ephian yi mie ni omamẹ sakamu. Mi karorhọ taghene ọke mia ji kamu, mia nẹrhomo taghene ekrun mẹ i ruẹ Paradais, ọrẹn ni mie ni omamẹ taghene mie mwuovwan mi na ruiẹ-ẹ.” Tony rọ ghwanranren uvuẹn ekrun ri vwe rhiẹ Iseri Jehova, nọ tare: “Eri vwiẹre mẹ i vwa ta mẹ taghene aye i vwo ẹguọlọ kpahen mẹ-ẹ. Ọnana nọ lẹrhe mẹ roro taghene mi vwa damoma te-e.”

⁵ Orhianẹ e ni oma ọwan sakamu ọkezẹko, o fori na karorhọ taghene Jehova ọvo yo tiri ọwan kẹrẹ omayen. (John 6:44) O rheri ọwan ghwẹ oborẹ e rhe oma ọwan, o ji rhe oborẹ ọ ha uvuẹn ọmudu ọwan. (1 Sam. 16:7; 2 Chron. 6:30) Omarana, ọrhọ ta taghene a ghanren riẹn, o fori na hẹrosuiẹ.—1 John 3:​19, 20.

6. Marhẹ oma o ruẹ ọnyikọ Paul kpahen edandan ro ru vrẹn ne?

⁶ Bọmọke e ki yono urhomẹmro na, ezẹko ọwan i ru ekwakwa ra lẹrhẹ ọwan vwo ẹhẹn iborhin me te ọke ọnana. (1 Pet. 4:3) Ilele Kristi ra fuevwan ga i Jehova, a ji wọnrọn hasuẹ iroro ọnana. Aruẹ iroro ọnana o ji kpokpuo ẹhẹn? Orhiomaran, vwo imwẹro taghene idibo i Jehova ra fuevwan ga ye, i ji wọnrọn hasuẹ aruẹ iroro ọnana ne. Jerẹ udje, ọnyikọ Paul ọrhọ karorhọ edandan ro ru vrẹn ne, no ni omayen sakamu. (Rom. 7:24) Itiọrurhomẹmro, Paul ọ ghwẹriẹ nẹ edandan yen ji bromarhame ne. Ọrẹn, o ji se omayen “ọnyikọ rọ mai kamu” ọrhẹ ọrọ “karo” usuẹn iruedandan ephian.—1 Cor. 15:9; 1 Tim. 1:15.

7. Me yo fori na karorhọ kpahen edandan re ru vrẹn ne?

⁷ Jehova o veri taghene arha ghwẹriẹ nẹ edandan ọwan, ọnọ harhomu ọwan. (Ps. 86:5) Omarana, ana sabu vwo imwẹro taghene oborẹ i Jehova ọ tare urhomẹmro—nọyẹ ọ ghini harhomu ọwan ne.—Col. 2:13.

8-9. Marhẹ ene ru wọnrọn hasuẹ iroro na taghene oborẹ e ruẹ rẹn i Jehova o bun te-e?

⁸ Ọwan ephian i guọlọ ruẹ ekete omẹgbanhon ọwan o teri uvuẹn ogame i Jehova. Ọrẹn, ezẹko ne roro taghene oborẹ aye e ruẹ, o bun te rẹ aye ine vwo ekwerhọ i Jehova-a. Ọmase owu re se Amanda nọ tare: “Mie roro taghene mi na vi ha owian kpe omamẹ, bọmọke i Jehova ono ki vwo ọdaremẹro kpahen mẹ. Omarana, ni mie ruẹ vrẹn ekete omẹgbanhon mẹ o teri ọgbọ buebun. Mia rha sabu ru oborẹ mi ‘fiẹrorhọ’ na-a, ẹhẹn mẹ no seriotọre, ni mie ji roro taghene oma ọ vwọ merhen i Jehova kpahen mẹ-ẹ.”

⁹ Marhẹ ene ru wọnrọn hasuẹ iroro na taghene a sabu ruẹ oborẹ ọnọ merhẹn i Jehova oma-a? Karorhọ taghene Jehova o roro rẹn ọwan. O vwo fiẹrorhọ taghene ene ru vrẹn ekete omẹgbanhon ọwan o teri-i. Omarana, oma ọ merhiẹn erhe ru ekete omẹgbanhon ọwan o teri. Habaye, roro kpahen idje ihworho uvuẹn i Baibol na, ri fuevwan ga i Jehova. Udje owu yi Paul. O fiomarhọ owian Uvie na vuọnvuọn uvwre ẹgbukpe buebun, nyoma rọ nya iroko buebun ji ha ikoko sansan mwu. Ọrẹn, ọke erhirhiẹ ye o wene, ọ vwọ rhọ sabu wian buẹn te ọke bi-i, ọrana no mevirhọ taghene oma ọ vwọ rhọ merhen Osolobrugwẹ kpahiẹ-ẹn? Ẹjo. O ruẹ ekete omẹgbanhuiẹn o teri, Jehova nọ ji ha ebrurhọ riẹn. (Acts 28:​30, 31) Omaran ọ ji havwọ, orhiẹ ọke ephian ya na sabu ru te oborẹ e ruẹ bi-i. Ọrẹn, oborẹ ọ mai ghanren rẹn i Jehova, yẹ ẹhẹn re ruie. Jene yono kpahen izede ezẹko ri Jehova o ru dje ekwerhọ ye phia rẹn ọwan.

MARHẸ I JEHOVA O RU DJE EKWERHỌ YE PHIA?

10. Marhẹ e ru “rhon” ekwerhọ i Jehova kpahen ọwan? (John 16:27)

¹⁰ Nyoma i Baibol na. Jehova ọ guọlọ izede ro no dje rẹn ihworho yi taghene o vwo ẹguọlọ kpahen aye. Baibol na ọ hunute erhirhiẹ eva ri Jehova ọ ta rẹn i Jesu taghene ọye Ọmọ ro vwo ẹguọlọ kpahen, rọ ji djẹha ne. (Matt. 3:17; 17:5) Wu guọlọre ni Jehova ọ ta wẹn taghene o vwo ekwerhọ kpahuọn? Jehova ọ vwọ tẹmro rẹn ọwan nẹ odjuwu sa-a, ọrẹn nyoma i Baibol na. Erhe se ẹmro i Jesu uvuẹn ọbe i Matthew, Mark, Luke ọrhẹ John, nọ nọ ghwai họhọ taghene Jehova ọ tẹmro rẹn ọwan. (Se John 16:27.) Jesu o dje uruemru Ọsẹ ye phia gbagba. Omarana, ọke i Jesu ọ ta rẹn idibo yi ri vwa gba taghene o vwo ekwerhọ kpahen aye, nọ họhọre taghene ọwan yi Jehova ọ tẹmro erana riẹn.—John 15:​9, 15.

11. Mesoriẹ ebẹnbẹn o vwo mevirhọ taghene Jehova o biomevwan kpahen ọwan? (James 1:12)

¹¹ Nyoma irueruo yi. Jehova o vwo omwemẹ rọ nọ sa ọwan erhumu, nyoma rọ yẹ ọwan ekwakwa ugboma ra guọlọre. Ọkezẹko, Jehova ọnọ sabu kwerhọ ye na rioja ebẹnbẹn, jerẹ oborẹ ọ phia rẹn i Job ro rhiẹ ọvwata. (Job 1:​8-11) Arha ha ebẹnbẹn, o mevirhọ taghene Jehova o biomevwan kpahen ọwa-an. Ukpomaran, ne vwo uphẹn re ne dje oborẹ ẹguọlọ ọrhẹ ẹruẹhaso ọwan kpahen i Jehova ọ gbanhon te. (Se James 1:12.) Ene rhiẹromẹrẹn ẹguọlọ ọrhẹ obẹhatua ye, uvwrọke rọ sa ọwan erhumu vwo edirin.

12. Me ya na sabu yono nẹ udje i Dmitrii?

¹² Roro kpahen udje omizu ọhworhare owu obẹ Asia re se Dmitrii. Iruo yi ọ variẹ obọ, ọrhọ mẹrẹn iruo ọrọrọ uvwre ibiamo buebu-un. Omarana, nọ hẹroso i Jehova, nyoma ro fiomarhọ owian aghwoghwo na. Uvwre ibiamo buebun, ọ mẹrẹn iruo-o. Ọrọ mai biomu, emiamo nọ gbariẹ rhẹ oghwa, ọ vwọ rhọ sabu vẹnrẹn nẹ ekpa-a. No ni omayen taghene ọye rhẹ omamọ esa ọrhẹ ọsẹ-ẹ, no roro sẹ Jehova o ji vwo ekwerhọ kpahiẹn. Owuọwọn owu, ọmọyen ọgbọtọ nọ ya ẹmro ri ha uvuẹn Isaiah 30:15 rhẹ ọbe, rọ tare: “Are ine vwo omẹgbanhon, are i rha fọ ji hẹroso mẹ.” Nọ hariẹ vwe ọsẹ ye ji ta, “Papa, ẹhọn orho seriotọre, karorhọ ekete i Baibol ọnana.” Dmitrii nọ mẹrẹnvwrurhe taghene Jehova ọ ji hẹrote ekruien, nyoma rọ yẹ aye emaren, ewun ọrhẹ ekete aye e rhirhiẹ. Nọ tare, “Oborẹ mi guọlọre yẹ ọrẹ mi na fọ ji hẹroso i Jehova.” Orhianẹ wa dẹrughwaroghwẹ aruẹ obẹnbẹn ọnana, gba hẹroso i Jehova taghene ọnọ hẹroto ji sa erhumu vwo edirin.

13. Ayọmo yi Jehova ọnọ sabu ha dje ekwerhọ ye phia rẹn ọwan, izede ọgo?

¹³ Nyoma imizu ukoko na. Jehova o dje ekwerhọ ye phia rẹn ọwan nyoma imizu ukoko na. Jerẹ udje, ọnọ sabu nyoma aye tẹmro urhebro rẹn ọwan uvuẹn ọke ro serhọ. Omizu ọmase owu obẹ Asia o rhiẹromẹrẹn ọnana uvuẹn ọke obẹnbẹn. Iruo yi ọ variẹ obọ, no ji kpomu emiamo ọgbogbanhon. A ta ọrana obọ, esa ye no ruẹ ọdandan ọghwaghwa ro lele fiẹ ọrẹ e tie nẹ ẹrhẹ ọkpako ukoko. Nọ tare, “Mia sabu vwẹruọ oborẹ ọsoriẹ ekwakwa enana a phia-a. Ni mie roro taghene Jehova o biomevwan kpahen mẹ, mi ji ru emru sọ ne.” Omizu na nọ rẹ i Jehova nọ yẹ ye imwẹro taghene o vwo ekwerhọ kpahiẹn. Marhẹ o rurie lele? Nọ tare, “Ekpako ukoko mẹ, ni ha urhebro mẹ ji lẹrhe mẹ vwo imwẹro taghene Jehova o vwo ẹguọlọ kpahen mẹ.” Ọke oru, nọ rharhumu nekpẹn userhumu mie i Jehova. Nọ tare, “Ẹdẹ owu ọvo na, imizu ukoko mẹ ni ya ileta vwe mẹ. Ọke mie se ẹmro urhebro aye, no mwurun mẹ ẹro taghene Jehova ọ kpahenrhọ ẹrhomo mẹ ne.” Itiọrurhomẹmro, Jehova ọ nyoma ẹmro urhebro awọrọ djephia taghene o vwe ekwerhọ kpahen ọwan.—Ps. 10:17.

14. Izede ọrọrọ ọgo yi Jehova o ru djephia taghene o vwo ekwerhọ kpahen ọwan?

¹⁴ Jehova o ji dje ekwerhọ ye phia nyoma rọ ha imizu ukoko na yẹ ọwan ọghwọghwu ọke ra guọliẹ. Jerẹ udje, uvuẹn ọke Ilele Kristi erukaro na, Jehova ọ nyoma ọnyikọ Paul ya ileta 14 vwe imizu ukoko na. E tiobọnẹ ọghwọghwu izede ẹguọlọ uvuẹn ileta erana. Mesoriẹ ẹhẹn ọfuanfon i Jehova o mwu i Paul ya ẹmro erana? Jehova obọdẹn Ọsẹ, o ji tiobọnẹ ọghwọghwu rẹn emọyen “ro vwo omamerhomẹ kpahen.” (Prov. 3:​11, 12) Omarana, arha ha i Baibol na ghwọghwu ọwan, o mevirhọ taghene Jehova o biomevwan kpahen ọwa-an, ukpomaran, o vwo ẹguọlọ kpahen ọwan. (Heb. 12:6) Ekwakwa erọrọ ego yi djephia taghene Jehova o vwo ekwerhọ kpahen ọwan?

EKA ERỌRỌ RI DJEPHIA TAGHENE JEHOVA O VWO EKWERHỌ KPAHEN ỌWAN

15. Ayọmo yi Jehova o tiobọnẹ ẹhẹn ọfuanfon na riẹn, mesoriẹ ọnana ọnọ yẹ ọwan imwẹro?

¹⁵ Jehova o tiobọnẹ ẹhẹn ọfuanfon rẹn ihworho ro vwo ekwerhọ kpahen. (Matt. 12:18) O fori na nọ oma ọwan, ‘Mie dje iruemru ezẹko usuẹn omamọ ẹhẹn ọfuanfon na phia uvuẹn akpenyerẹn mẹ?’ Wu vwo erhionrin rhọ ne, ghwẹ ọke wu vwe ji rhe i Jehova? Wu rha damoma dje omamọ ẹhẹn ọfuanfon na phia uvuẹn akpenyerẹn ọnọ, ne wu ne vwo imwẹro rhọ taghene Jehova o vwo ekwerhọ kpahuọn!—Se ekpeti “Omamọ Ẹhẹn Ọfuanfon na yẹ . . . ”

16. Ayọmo yi Jehova ọ ha wian owian aghwoghwo na, marhẹ ọnana ọ lẹrhẹ oma ruo? (1 Thessalonians 2:4)

¹⁶ Oma ọ merhen i Jehova ro no tiobọnẹ owian iyẹnrẹn esiri na eghwoghwo rẹn ihworho ro vwo ekwerhọ kpahen. (Se 1 Thessalonians 2:4.) Djokarhọ oborẹ omizu ọmase owu re se Jocelyn, o ru mẹrẹn erere nẹ owian aghwoghwo na. Ẹdẹ owu, ọke i Jocelyn ọ rhọmọ, ẹhẹn yen o seriotọre. Nọ tare, “Ni mie ni omamẹ sakamu. Ọke ọrana mẹmẹ ọkobaro, ẹdẹ ọrana jẹ ẹdẹ aghwoghwo mẹ. Omarana, ni mi nẹrhomo ji riẹ aghwoghwo.” Urhiọke ẹdẹ ọrana, Jocelyn nọ mẹrẹn ọmase owu re se i Mary, ro rhiabọ dede uyono i Baibol. Ibiamo ezẹko a vrẹn, Mary nọ tare taghene ọke ephian yọ nẹrhomo ni Jehova ọ ha userhumu riẹn, uvwrọke ọrana yi Jocelyn ọ ha obọ fomu ighwe yi. Jocelyn nọ tare, “Nọ họhọre taghene Jehova ọ ta mẹ, ‘Mi vwo ekwerhọ kpahuọn.’” Itiọrurhomẹmro, orhiẹ ihworho ephian yi ne rhiabọ dede iyẹnrẹn esiri na-a. Ọrẹn, e rheri taghene oma ọ merhen i Jehova, erhe ruẹ ekete omẹgbanhon ọwan o teri uvuẹn owian aghwoghwo na.

17. Me wu yono nẹ ẹmro i Vicky kpahen izobo otan na? (Psalm 5:12)

¹⁷ Jehova ọ harhomu edandan ihworho ro vwo ekwerhọ kpahen, nyoma izobo otan na. (1 Tim. 2:​5, 6) Ọrẹn, me ye ne ruo orhianẹ e vwo ẹhẹn eveva kpahen ekwerhọ i Jehova, ọrhọ tobọ rhianẹ e vwo esegburhomẹmro kpahen izobo otan na ji bromarhame ne? Karorhọ taghene iroro ọwan ọnọ sabu phiẹ ọwan rhọ, ọrẹn ana sabu hẹroso i Jehova. Ihworho ri vwo esegburhomẹmro kpahen izobo otan na, evwata uvuẹn ukẹruiẹ, ọnọ ji ha ebrurhọ rẹn aye. (Se Psalm 5:12; Rom. 3:26) Eroro kodo kpahen izobo otan na, yọ ha userhumu rẹn ọmase re se Vicky. Ẹdẹ owu, nọ mẹrẹn ọnana vwrurhe ji ta: “O jiri ne ri Jehova o vwo edirin kpahen mẹ. . . . Ọrẹn, nọ họhọre taghene mia ta riẹn: ‘Mie mwuovwan ẹguọlọ ọnana-a. Izobo otan Ọmọ, o te ra na harhomu edandan mẹ-ẹ.’” Ọrẹn, ọke ro roro kpahen izobo otan na, no mwurien ẹro taghene Jehova o vwo ẹguọlọ kpahiẹn. Erhe ji roro kpahen izobo otan na, no no mwu ọwan ẹro taghene Jehova o vwo ẹguọlọ ọrhẹ ekwerhọ kpahen ọwan.

18. Imwẹro ọgo ya na sabu vwo erhe vwo ẹguọlọ kpahen i Jehova?

¹⁸ Ọkezẹko arha tobọ ha irorẹdjẹ enana ephian ruiruo, ẹhẹn ọwan ọnọ ji sabu seriotọre, rọ nọ lẹrhẹ ọwan rhe roro taghene e vwo ekwerhọ i Jehova-a. Ọrana ọrhọ phia, karorhọ taghene Jehova o vwo ekwerhọ kpahen “ihworho ri vwo ẹguọlọ Kpahiẹn.” (Jas. 1:12) Omarana, rhe tiẹkẹrẹ i Jehova ji vwo imwẹro taghene o vwo ekwerhọ kpahuọn. Karorhọ taghene Jehova “o serabọ rẹn ọwan owuowọnwa-an.”—Acts 17:27.