¿Te di senti rä Hesu po rä thuhu rä Zi Dada Jeoba?

1, 2. a) ¿Te bi me̱fi rä Hesu näꞌä rä xui änte de xä tho? b) ¿Te ma gä pädihu̱ ha nunä ntꞌudi di nxadihu̱?

IMÄJINÄ te bi thogi näꞌä rä pa 14 de rä zänä Nisán de rä je̱ya 33. Näꞌä paꞌä mi njuebe, ya mi nxui ꞌne rä Hesu bi uadi bi ja rä Mäkä Ntꞌoxi ko nuꞌu̱ 11 yä apostol. Judas ya xki ma ꞌne rä Hesu mi pädi ge mänꞌitꞌho ma xä traisionä ꞌne nuꞌu̱ yä kontra ma xä juzga, ma xä kondenä, ma xä naꞌmpäbi ꞌne pa ri uadi ma xä tsꞌu̱ti ha nꞌa rä zaa habu̱ ma xä du. Hänge mi uadi näꞌä rä Mäkä Ntꞌoxi, rä Hesu xa bi nupäbi yä mfeni nuꞌu̱ yä apostol. ꞌNepu̱, änte de xä bo̱niꞌu̱ de näꞌä rä nguu habu̱ xki muntsꞌi, bi ja nꞌa rä sadi näꞌä zäi ge nunka bi pumfri nuꞌu̱ yä apostol ꞌne asta mäpaya utkägihu̱ ndunthi. Rä apostol Juan bi yꞌofo näꞌä rä sadiꞌä ꞌne di tinihu̱ ha rä mfistꞌofo Juan, rä capítulo 17.

² Ha nunä ntꞌudi di nxadihu̱, ma gä handihu̱ te dä za gä pädihu̱ de näꞌä rä sadi bi ja rä Hesu. Ma gä pädihu̱ te mi tupäbi rä mu̱i durante näꞌä rä gäxä pa ꞌne durante näꞌä rä tiempo bi mꞌu̱kua ha rä Xiꞌmhai.

«NUGA XTÄ UTIYU̱ NDAꞌÄ RI THUHU»

3. ¿Te bi mää rä Hesu ha näꞌä rä sadi bi ja ꞌne te di signifika nuꞌu̱ yä noya? (Juan 17:​6, 26).

³ Ha nunä sadi bi ja rä Hesu, bi ꞌñembäbi yo mꞌiki rä Zi Dada Jeoba: «Nuga xtä utiyu̱ ndaꞌä ri thuhu» (hñeti Juan 17:​6, 26, TNM). Nuya yä noya hindi signifika ge rä Hesu ja penä bi ꞌñuti nuꞌu̱ yä de̱ni ndaꞌä rä thuhu Äjuä. ¿Por hanja hinä? Ngeꞌä nuꞌu̱ yä de̱ni rä Hesu myä judío ꞌne dende mi bätsi nuꞌu̱ ya mi pädi xä ñho ge Jeoba geꞌä rä thuhu Äjuä. ¿Habu̱ xki bädiꞌu̱? Yä judío ya mi pe̱ꞌtsi nuꞌu̱ yä mfistꞌofo dende Génesis asta Malaquías habu̱ ehe kasi yoto mꞌo yä mꞌiki rä thuhu Jeoba. Nuꞌmu̱, ¿te di signifika nuꞌmu̱ rä Hesu bi ꞌñenä «Nuga xtä utiyu̱ ndaꞌä ri thuhu»? Signifika ge rä Hesu xki matsꞌi nuꞌu̱ yä de̱ni dä konose mänꞌa xä ñho rä Zi Dada Jeoba; xki ꞌñuti tenguꞌä rä mꞌu̱i, te xki me̱fi ꞌne te ma dä me̱fi po yä jäꞌi ꞌne po rä Xiꞌmhai. Ho̱nse̱ rä Hesu bi za bi ꞌñudi xä ñho tenguꞌä rä mꞌu̱i rä Zi Dada Jeoba, ngeꞌä joꞌo mä nꞌa rä jäꞌi näꞌä di konose xä ñho ja nguꞌä.

4, 5. a) ¿Hanja dä za dä te näꞌä di sentihu̱ po rä thuhu nꞌa rä jäꞌi? Hñuxä nꞌa rä kꞌoi. b) ¿Hanja nuꞌu̱ yä apostol rä Hesu mänꞌa bi hyandi ko ndunthi rä muui rä thuhu rä Zi Dada Jeoba?

⁴ Pa gä ntiendehu̱ mänꞌa xä ñho, ma gä huxu̱ nꞌa rä kꞌoi. Imäjinä ge nꞌa de nuꞌu̱ yä anciano de ri mhuntsꞌi rä thuhu David ꞌne di mpe̱fi de gä mediko. Nꞌa rä pa, gä ñheni ꞌne mäntꞌä bi tsꞌixꞌäꞌi ha rä hospital habu̱ di mpe̱fi näꞌä kuꞌä ꞌne näꞌä bi usa gatꞌho näꞌä pädi pa bi ñäni ri te. ¿Te ma gi senti po näꞌä kuꞌä? Zäi ge mäske ya o̱tꞌe ndunthi yä je̱ya de gi konose näꞌä rä kuꞌä, pe nubye̱ mänꞌa gi mädi ꞌne xa gi jamädibi po näꞌä bi me̱fi po geꞌi. Nubye̱ kada gi yꞌo̱de rä thuhu David, hingä ho̱nse̱ ma gi beni ge go geꞌä nꞌa de nuꞌu̱ yä anciano de rä mhuntsꞌi, sino ke nubye̱ ma gi beni ge go geꞌä rä mediko bi ñäni ri te.

⁵ Njabu̱ ꞌnehe bi thogi ko nuꞌu̱ yä apostol rä Hesu. Dende nuꞌmu̱ rä Hesu bi zo̱ho̱ ha rä Xiꞌmhai, nuꞌu̱ mänꞌa bi da ngue̱nda hängu rä muui pe̱ꞌtsi rä thuhu rä Zi Dada Jeoba. ¿Por hanja? Nuꞌmu̱ bi hyandi nuꞌu̱ yä apostol näꞌä mi pe̱fi ꞌne näꞌä mi mää rä Hesu, ꞌne hanja mi uti ꞌne hanja mi trata yä jäꞌi, nuꞌu̱ mänꞌa bi konose xä ñho tenguꞌä rä mꞌu̱i rä Zi Dada Jeoba (Juan 14:9; 17:3).

«NÄꞌÄ RI THUHU GO RI ME̱TI, ꞌNE GÄ RꞌAKÄGI»

6. ¿Te di signifika nuꞌmu̱ rä Hesu bi ꞌñenä ge Jeoba xki umbäbi rä thuhu? (Juan 17:​11, 12).

⁶ Ha näꞌä rä sadi bi ja rä Hesu, bi yꞌapäbi rä Zi Dada Jeoba po nuꞌu̱ yä de̱ni nuꞌmu̱ bi ꞌñembäbi: «Di bänteꞌi gi su po ränge näꞌä ri thuhu go ri me̱ti, ꞌne gä rꞌakägi» (hñeti Juan 17:​11, 12, TNM). ¿Signifika ge rä Zi Dada Jeoba bi umbäbi rä thuhu rä Hesu pa njabu̱ dä tꞌembäbi ꞌnehe Jeoba? Hinä. Hyandi ge nuꞌmu̱ rä Hesu bi xatuäbi rä Zi Dada Jeoba, näꞌä bi ꞌñembäbi: «Näꞌä ri thuhu go ri me̱ti». Hänge rä Hesu himbi hñämbäbi rä thuhu rä Dada. Nuꞌmu̱, ¿te di signifika nuꞌmu̱ rä Hesu bi ꞌñenä ge Jeoba xki umbäbi rä thuhu? Signifika ge rä Zi Dada Jeoba xki me̱hni rä Hesu ngu rä representante pa bi ñä po Geꞌä ꞌne bi me̱fi näꞌä bi mändabi (Juan 5:43; 10:25). ꞌNehe, rä thuhu rä Hesu di signifika «Jeoba geꞌä rä ñänte». Hänge ha rä thuhu rä Hesu di ñꞌoui rä thuhu Jeoba.

7. ¿Por hanja rä Hesu bi za bi ñä po rä Zi Dada Jeoba? Hñuxä nꞌa rä kꞌoi.

⁷ Pa gä ntiendehu̱ mänꞌa xä ñho, ma gä huxu̱ nꞌa rä kꞌoi: nꞌa rä presidente dä za dä me̱hni nꞌa rä jäꞌi ngu rä representante pa dä ñä po geꞌä. Koꞌmu̱ näꞌä rä presidente umbäbi rä tsꞌu̱tꞌhui näꞌä rä representante, dende näꞌä rä oraꞌä gatꞌho näꞌä ma dä mää xa ma dä nja rä tsꞌe̱di ja ngu näꞌä rä tsꞌe̱di pe̱ꞌtsi näꞌä mää rä presidente. Njabu̱ ꞌnehe bi thogi nuꞌmu̱ rä Zi Dada Jeoba bä pe̱hni rä Hesu ngu rä representante ꞌne bi umbäbi rä tsꞌe̱di pa dä ñä po geꞌä (Mat. 21:9; Luc. 13:35).

8. Nuꞌmu̱ rä Hesu tobe hixki ꞌñehe ha rä Xiꞌmhai, ¿por hanja rä Zi Dada Jeoba bi ꞌñenä ge rä thuhu mi «ꞌmu̱i» kongeꞌä? (Éxodo 23:​20, 21).

⁸ Rä Mäkä Tꞌofo mää ge rä Hesu tꞌembäbi «rä Noya». ¿Por hanja? Ngeꞌä ora rä Zi Dada Jeoba xä ne te dä xipäbi yä jäꞌi, nuꞌmu̱ rä Hesu go geꞌä xä hñätsꞌi nuꞌu̱ yä noyaꞌu̱ (Juan 1:​1-3). Rä Hesu zäi ge mi geꞌä näꞌä rä e̱nxe̱ näꞌä bi me̱hni rä Zi Dada Jeoba pa dä su yä israelita nuꞌmu̱ bi ñꞌo ha yä yꞌotꞌä hai. Rä Zi Dada Jeoba bi ꞌñembäbi nuꞌu̱ yä israelita ge mi debe dä yꞌo̱te näꞌä rä e̱nxe̱ꞌä, ꞌne bi ꞌñembäbi: «Ngetꞌho mä thuhu ꞌmu̱i kongeꞌä» (hñeti Éxodo 23:​20, 21).a ¿Por hanja rä Zi Dada Jeoba bi ꞌñenä ge rä thuhu mi «ꞌmu̱i» ko rä Hesu? Ngetꞌho rä Hesu go geꞌä rä representante ꞌne go geꞌä gu̱tꞌi rä ꞌñuu pa di defendebi rä thuhu ꞌne udi ge xä ntꞌaxi gatꞌho näꞌä beni ꞌne pe̱fi rä Zi Dada Jeoba.

«DADA, NSUNDA RI MÄKÄ THUHU»

9. ¿Por hanja di pädihu̱ ge rä Hesu mi handi ko ndunthi rä muui rä thuhu rä Zi Dada Jeoba?

⁹ Ja ngu ya dä handihu̱, dende änte de xä ꞌñehe ha rä Xiꞌmhai, rä Hesu ya mi handi ko ndunthi rä muui rä thuhu rä Zi Dada Jeoba. ꞌNehe, ko gatꞌho näꞌä bi me̱fi ꞌne bi mää rä Hesu nuꞌmu̱ bi mꞌu̱kua ha rä Xiꞌmhai, bi sigi bi ꞌñudi ge xa mi mädi ꞌne mi turämu̱i po rä thuhu rä Dada. Ha nuꞌu̱ yä gäxä pa bi mꞌu̱kua ha rä Xiꞌmhai, bi xatuäbi rä Zi Dada Jeoba ꞌne bi bäntebi: «Dada, nsunda ri mäkä thuhu». Oraꞌä, ha mähetsꞌi bi ntꞌo̱de hanja bi ñä xa ntsꞌe̱di rä Zi Dada Jeoba ꞌne bi ꞌñenä: «Nuga ya xtä nsunda mä thuhu ꞌne ma gä yopä nsunda mänꞌaki» (Juan 12:​28, TNM).

10, 11. a) ¿Te bi me̱fi rä Hesu pa bi ꞌñeꞌtsuäbi rä nsu rä thuhu Jeoba? (Hyandi ꞌnehe rä kꞌoi). b) ¿Por hanja di ja mꞌe̱di drä nsundabi ꞌne drä su̱kuäbi rä thuhu rä Zi Dada Jeoba?

¹⁰ Rä Hesu ꞌnehe bi ꞌñeꞌtsuäbi rä nsu rä thuhu Jeoba nuꞌmu̱ bi ꞌñuti yä jäꞌi tenguꞌä rä mꞌu̱i ꞌne gatꞌho näꞌä xä me̱fi. Rä Hesu mi pädi xä ñho ge mi ja mꞌe̱di dä ꞌme̱tsuäbi ndunthi rä tꞌekꞌei —drä nsundabi— rä thuhu rä Zi Dada Jeoba ꞌne dä fädi ge gatꞌho näꞌä pe̱fi xä ntꞌaxi. ꞌNehe mi pädi ge mi ja mꞌe̱di dä su̱kuäbi rä thuhu rä Dada ꞌne dä fädi ge hingä mäjuäni gatꞌho nuꞌu̱ yä tsꞌo tꞌo̱tꞌe xä mhää de Geꞌä. Hänge nuꞌmu̱ rä Hesu bi ꞌñuti nuꞌu̱ yä de̱ni hanja dä xatuäbi rä Zi Dada Jeoba, bi ꞌñembäbi ge dä yꞌadi ꞌnehe njaua: «Mä Zi Dadaꞌihe gi ꞌmu̱i mähetsꞌi, drä nsunda ri mäkä thuhu» (Mat. 6:9).

¹¹ ¿Por hanja di ja mꞌe̱di drä nsundabi ꞌne drä su̱kuäbi rä thuhu rä Zi Dada Jeoba? Ngeꞌä ha rä jardin de Edén, rä Zithu bi mää ge rä Zi Dada Jeoba xki hyatꞌi Adán ꞌne Eva ꞌne ge hingä mi hombäbi yä ñho (Gén. 3:​1-5). Rä Zithu ꞌnehe bi mää ge hinxä ñho näꞌä rä modo hanja di mända rä Zi Dada Jeoba. Nuya yä nkꞌuamba bi mää rä Zithu, xa bi tsꞌombäbi rä thuhu Jeoba. Mi thogi ndunthi yä je̱ya —ha nuꞌu̱ yä pa Job—, rä Zithu bi mää ge gatꞌho nuꞌu̱ pe̱päbi rä Zi Dada Jeoba, pe̱päbi ho̱nse̱ po nuꞌu̱ yä jäpi häni de Geꞌä. Bi mää ge ninꞌa rä jäꞌi hingä xa mäjuäni di mädi rä Zi Dada Jeoba ꞌne ge mu̱ nuꞌu̱ dä thogi yä xuñha, ma dä zopu̱ ꞌne ya hingä ma dä me̱päbi (Job 1:​9-11; 2:4). Mi ja mꞌe̱di rä tiempo pa dä nheki toꞌo mi mängä mäjuäni: mu̱ rä Zi Dada Jeoba o rä Zithu.

«MA GÄ UNGÄ MÄ TE»

12. ¿Te bi mꞌu̱i dispuesto bi me̱fi rä Hesu po rä thuhu rä Zi Dada Jeoba?

¹² Koꞌmu̱ rä Hesu xa mi mädi rä Dada, näꞌä mi ꞌmu̱i dispuesto dä me̱fi gatꞌho näꞌä mi ja mꞌe̱di pa dä nsundabi ꞌne dä xu̱kuäbi rä thuhu. Hänge rä Hesu bi ꞌñenä: «Ma gä ungä mä te» (Juan 10:​17, 18). Hää, rä Hesu mi ꞌmu̱i dispuesto dä du po rä thuhu rä Zi Dada Jeoba.b Adán ꞌne Eva —nuyu̱ yoho yä jäꞌi myä perfecto— bi rechaza rä Zi Dada Jeoba ꞌne go bi de̱ni rä Zithu. Pe rä Hesu bi mꞌu̱i dispuesto bi zopu̱ mähetsꞌi pa bä ehe ha rä Xiꞌmhai ꞌne bi ꞌñudi hängu di mädi rä Zi Dada Jeoba. Durante nuꞌu̱ yä je̱ya bi mꞌu̱kua ha rä Xiꞌmhai, näꞌä bi me̱fi gatꞌho näꞌä bi mändabi rä Dada (Heb. 4:15; 5:​7-10). Rä Hesu nunka bi ꞌuengi de rä ꞌñuu rä Zi Dada Jeoba mäske xa bi sufri asta xa bi du ha näꞌä rä zaa habu̱ bi tsꞌu̱ti (Heb. 12:2). Njabu̱, rä Hesu bi ꞌñudi hängu rä mhäte pe̱ꞌtsuäbi rä Zi Dada Jeoba ꞌne rä thuhu.

13. ¿Por hanja ho̱nse̱ rä Hesu bi za bi ꞌñudi ge rä Zithu näꞌä nꞌa rä kꞌuamba? (Hyandi ꞌnehe rä kꞌoi).

¹³ Gatꞌho näꞌä bi me̱fi rä Hesu bi ꞌñudi ge rä Zi Dada Jeoba nzäntho xä mängä näꞌä mäjuäni, ꞌne ge rä Zithu go geꞌä rä kꞌuamba (Juan 8:44). Tanto ha mähetsꞌi ngu ha rä Xiꞌmhai, ho̱nse̱ rä Hesu mänꞌa konose xä ñho tenguꞌä rä mꞌu̱i rä Zi Dada Jeoba. Mäske xa bi sufri ndunthi, rä Hesu bi desidi bi defendebi rä thuhu rä Zi Dada Jeoba, ngeꞌä mi pädi xä ñho ge hingä mäjuäni ninꞌa tu̱i de nuꞌu̱ yä nkꞌuamba bi mää rä Zithu. Nuꞌmu̱ ya mi zu̱di ha rä zaa, bi da ngue̱nda ge rä Zi Dada Jeoba xki hñäkuäbi rä mfatsꞌi näꞌä rä oraꞌä. Pe mäske njabu̱, rä Hesu bi mꞌu̱i dispuesto bi du ꞌne himbi fayabi rä Dada (Mat. 27:46).c

«NUGA [ . . . ] YA STÄ HUATÄ RI ꞌME̱FI NUꞌÄ GÄ ꞌME̱PKÄGI GÄ PE̱FI»

14. ¿Te mä njutꞌi bi umbäbi rä Zi Dada Jeoba rä Hesu ngeꞌä xki ñꞌo mänjuäntho ha rä ꞌñuu ꞌne hixki fayabi?

¹⁴ Ha näꞌä rä sadi bi ja rä Hesu näꞌä rä xui änte de xä tho, näꞌä bi ꞌñembäbi rä Zi Dada Jeoba: «Nuga [ . . . ] ya stä huatä ri ꞌme̱fi nuꞌä gä ꞌme̱pkägi gä pe̱fi» (Juan 17:​4, 5). Rä Hesu mi pädi xä ñho ge rä Zi Dada Jeoba ma xä umbäbi nꞌa rä njutꞌi ngeꞌä xki ñꞌo mänjuäntho ha rä ꞌñuu ꞌne hixki fayabi (Juan 17:​4, 5). ¡ꞌNe geꞌä bi thogi! Rä Zi Dada Jeoba bi gu̱tsꞌi rä Hesu de rä du (Hechos 2:​23, 24). ꞌNepu̱ bi umbäbi nꞌa rä däta nsu ha mähetsꞌi (Filipenses 2:​8, 9). Mi thogi ndunthi yä je̱ya, rä Hesu bi mu̱di bi mända ngu nꞌa rä rey ha rä gobiernu Äjuä. ¿Te ma xä logra näꞌä gobiernuꞌä? Nuꞌmu̱ bi mꞌu̱kua ha rä Xiꞌmhai, rä Hesu bi uni rä mpengi nunä ntꞌani nuꞌmu̱ bi ꞌñuti nuꞌu̱ yä de̱ni ge dä yꞌadi njaua ha yä sadi: «Hyopi dä ehe ri Tsꞌu̱tꞌhui. Hyopi dä tꞌo̱tꞌe ri bolunta ngu mähetsꞌi, ꞌnehe ha rä xiꞌmhai» (Mat. 6:​10, TNM).

15. ¿Te mä nꞌa ma dä me̱fi rä Hesu?

¹⁵ Mänꞌitꞌho rä Hesu ma dä ntuhni ko nuꞌu̱ yä nkontra rä Zi Dada Jeoba ꞌne ma dä huati gatꞌho yä tsꞌomꞌu̱i ha rä gerra de Armagedón (Apoc. 16:​14, 16; 19:​11-16). ꞌNepu̱, rä Hesu ma dä gotꞌi rä Zithu po 1.000 yä je̱ya ha nꞌa rä luga habu̱ ya hinte ma dä za dä me̱fi (Apoc. 20:​1-3). Durante nuꞌu̱ 1.000 yä je̱ya, rä Hesu ma dä hä nꞌa rä mꞌu̱i temäꞌentho ꞌne ma dä matsꞌi yä jäꞌi dä mperfecto. Ma dä gu̱tsꞌi nuꞌu̱ xä du ꞌne ma dä hyoki nꞌa rä Paraiso po gatꞌho rä Xiꞌmhai (Apoc. 21:​1-4). Hää, rä Hesu ma dä kumpli näꞌä mi ne rä Zi Dada Jeoba dende ri mu̱di.

16. ¿Te mä mꞌu̱i di to̱ꞌmihu̱ xti uadi nuꞌu̱ 1.000 yä je̱ya?

¹⁶ ¿Te mä mꞌu̱i di to̱ꞌmihu̱ xti uadi nuꞌu̱ 1.000 yä je̱ya? Ya hinte mä tsꞌoki ma dä nja, yä jäꞌi ma dä mperfecto, ma dä me̱ꞌtsi nꞌa rä hogä nzaki, ꞌne ya hingä ma dä ñheni nixi ma dä me̱ꞌtsi yä u̱gi. Koꞌmu̱ ya hinte mä pekado ma dä yꞌo̱tꞌe yä jäꞌi, ya hingä ma dä ja mꞌe̱di dä yꞌadi rä mpumbäte po mädee de rä Hesu. ꞌNehe, pa gä pe̱ꞌtsihu̱ nꞌa rä hogä ntsitsꞌi ko rä Zi Dada Jeoba, ya hingä ma dä ja mꞌe̱di rä mfatsꞌi rä Hesu, nixi rä mfatsꞌi nuꞌu̱ 144.000. ꞌNe näꞌä mä gäxä nkontrahu̱ —näꞌä rä du bi zogägihu̱ Adán— ma dä thäki pa nzäntho. Nuꞌu̱ xä du ma drä ju̱tsꞌi pa dä yopä nte. Gatꞌho yä jäꞌi mä dä mperfecto ꞌne ya hinte mä pekado ma dä me̱ꞌtsi (1 Cor. 15:​25, 26).

17, 18. a) ¿Te ma dä thogi xti uadi nuꞌu̱ 1.000 yä je̱ya? b) ¿Te ma dä me̱fi rä Hesu ko näꞌä rä autorida xä tꞌumbäbi xti uadi nuꞌu̱ 1.000 yä je̱ya? (1 Corintios 15:​24, 28; hyandi ꞌnehe rä kꞌoi).

¹⁷ ¿Te mä nꞌa ma dä thogi xti uadi nuꞌu̱ 1.000 yä je̱ya? ¡Nꞌa rä tꞌo̱tꞌe mänꞌa xa mähotho de gatꞌho! Ya hinte mä duda ma dä nja ge gatꞌho näꞌä pe̱fi rä Zi Dada Jeoba xä ntꞌaxi ꞌne hinte mä injustisia o̱tꞌe. Ha rä jardin de Edén, rä Zithu bi mää ge rä Zi Dada Jeoba xki hyatꞌi Adán ꞌne Eva, ge himi hombäbi yä ñho ꞌne ge himi udi rä mhäte ora mi mända. Pe dende geꞌmu̱, xä mꞌu̱i ndunthi yä jäꞌi nuꞌu̱ xä nsundabi ꞌne xä me̱ꞌtsuäbi rä tꞌekꞌei rä thuhu rä Zi Dada Jeoba, ꞌne kongeꞌä nuꞌu̱ xä ꞌñudi ge hingä mäjuäni näꞌä bi mää rä Zithu. Xti uadi nuꞌu̱ 1.000 yä je̱ya, rä thuhu rä Zi Dada Jeoba ma dä gohi xä ntꞌaxi ꞌne hinte mä duda ma dä nja ge Näꞌä xa di mäkägihu̱ ꞌne nzäntho honi mä ñhohu̱.

¹⁸ ꞌNehe, ya hinte mä duda ma dä nja ge rä Zithu näꞌä nꞌa rä kꞌuamba. Pe xti uadi de dä mända nuꞌu̱ 1.000 yä je̱ya, ¿te ma dä me̱fi rä Hesu ko näꞌä rä autorida xä tꞌumbäbi? ¿Ma dä de̱mbäbi rä mꞌu̱i rä Zithu ꞌne ma dä nju̱tsꞌi kontra rä Zi Dada Jeoba? ¡Hinä! (Hñeti 1 Corintios 15:​24, 28, TNM). Koꞌmu̱ rä Hesu xa di mädi rä Zi Dada Jeoba, hingä ma dä japäbi xä ñhei dä koꞌtsuäbi gatꞌho näꞌä rä tsꞌe̱di ꞌne rä autorida xä tꞌumbäbi.

19. ¿Te di senti rä Hesu po rä thuhu rä Zi Dada Jeoba?

¹⁹ Nubye̱ ya di pädihu̱ por hanja rä Zi Dada Jeoba bi me̱ꞌtsuäbi rä komfiansa rä Hesu nuꞌmu̱ bi umbäbi rä thuhu ꞌne bi me̱hni ngu rä representante. Ja ngu ya dä handihu̱, rä Hesu bi kumpli xä ñho näꞌä rä responsabilida ꞌne himbi fayabi rä Zi Dada Jeoba. Nuꞌmu̱, ¿te di senti rä Hesu po rä thuhu rä Zi Dada Jeoba? Xa di mädi ko ngatꞌho rä mfeni ꞌne rä koraso, hänge bi mꞌu̱i dispuesto bi du pa bi defendebi ꞌne bi xu̱kuäbi rä thuhu. ꞌNehe, po näꞌä rä mhäte di senti po Geꞌä, ma dä koꞌtsuäbi gatꞌho näꞌä rä tsꞌe̱di ꞌne rä autorida xä tꞌumbäbi. Xi nuju̱, ¿hanja dä za gä de̱mbäbihu̱ rä ejemplo rä Hesu? Ma gä ñähu̱ de geꞌä ha näꞌä rä ntꞌudi xä ꞌñepu̱.