¿Te di debe gä sentihu̱ po rä thuhu rä Zi Dada Jeoba?

1, 2. ¿Hanja di pädihu̱ ge rä Hesu xa handi ko ndunthi rä muui rä thuhu rä Zi Dada Jeoba?

JA NGU ya dä pädihu̱ ha näꞌä rä ntꞌudi bi thogi, rä Hesu xa di mädi ko ngatꞌho rä mfeni ꞌne rä koraso rä thuhu rä Zi Dada Jeoba, hänge bi mꞌu̱i dispuesto bi du pa bi defendebi ꞌne bi xu̱kuäbi rä thuhu (Mar. 14:36; Heb. 10:​7-9). ꞌNehe, dä pädihu̱ ge xti uadi nuꞌu̱ 1.000 yä je̱ya de dä mända ngu nꞌa rä rey, rä Hesu ma dä koꞌtsuäbi rä Zi Dada Jeoba gatꞌho näꞌä rä tsꞌe̱di ꞌne rä autorida xä umbäbi. ¿Por hanja? Pa njabu̱ ho̱nse̱ rä Zi Dada Jeoba dä mända mänꞌaki ꞌne dä tꞌeꞌtsuäbi rä nsu pa nzäntho (1 Cor. 15:​26-28). Po gatꞌho näꞌä xä me̱fi ꞌne gatꞌho näꞌä ma dä me̱fi rä Hesu po rä thuhu rä Zi Dada Jeoba, hinte mä duda ja ge näꞌä xa di mädi rä Dada.

² Rä Hesu bä ehe ha rä Xiꞌmhai ngu rä representante rä Zi Dada Jeoba (Juan 5:43; 12:13). Hänge bi matsꞌi nuꞌu̱ yä de̱ni pa bi konose mänꞌa xä ñho rä Dada (Juan 17:​6, 26). Rä Hesu bi mää ge gatꞌho näꞌä mi udi mi ehe de rä Dada ꞌne ge go geꞌä mi umbäbi rä tsꞌe̱di pa mi ja yä milagro (Juan 10:25). Nꞌa rä pa bi xatuäbi rä Zi Dada Jeoba ꞌne bi bäntebi ge dä supäbi nuꞌu̱ yä de̱ni nuꞌmu̱ bi ꞌñembäbi: «Di bänteꞌi gi su po ränge näꞌä ri thuhu go ri me̱ti» (Juan 17:​11, TNM). Ja ngu di handihu̱, rä Hesu xa mi handi ko ndunthi rä muui rä thuhu rä Zi Dada Jeoba, ꞌne xa mi mädi ko ngatꞌho rä mfeni ꞌne rä koraso. Nuꞌmu̱, ¿hanja dä za dä ꞌñenä nꞌa rä jäꞌi ge rä kristianu mu̱ hingi pädi o hingi mämbäbi rä thuhu rä Zi Dada Jeoba?

3. ¿Te ma gä hanthu̱ ha nunä rä ntꞌudi di nxadihu̱?

³ Nuꞌu̱ xa mäjuäni yä kristianu o̱tꞌe ntsꞌe̱di po dä de̱mbäbi rä mꞌu̱i rä Hesu, hänge ꞌnehe handi ko ndunthi rä muui rä thuhu rä Zi Dada Jeoba (1 Ped. 2:21). Ha nunä ntꞌudi di nxadihu̱, ma gä handihu̱ hanja nuꞌu̱ ungä ntꞌo̱de «yä hogä notisia de rä Tsꞌu̱tꞌhui Äjuä» fädi po rä thuhu rä Zi Dada Jeoba (Mat. 24:​14, TNM). ꞌNehe ma gä handihu̱ te debe gä sentihu̱ po rä thuhu rä Zi Dada Jeoba kada nꞌa de gekhu̱.

«NꞌA RÄ HNINI NÄꞌÄ MA DÄ TSꞌOFO PO RÄ THUHUꞌÄ»

4. a) ¿Te bi xipäbi rä Hesu nuꞌu̱ yä de̱ni nuꞌmu̱ ya ma xä mengi pa mähetsꞌi? b) ¿Te ma ntꞌani ma gä thädihu̱?

⁴ Nuꞌmu̱ rä Hesu ya ma xä mengi pa mähetsꞌi, bi ꞌñembäbi nuꞌu̱ yä de̱ni: «Ma gi hñänihu̱ rä mfatsꞌi ꞌne rä tsꞌe̱di ora dä ꞌñeꞌäꞌihu̱ rä mäkä tsꞌe̱di Äjuä, ꞌne nuꞌähu̱ ma gi ntestigohu̱ de geki ha Jerusalén, ha gatꞌho Judea ꞌne ha Samaria, ꞌne asta ha nuꞌu̱ yä luga bi kohi ha yä ñäni rä xiꞌmhai» (Hech. 1:​8, TNM). Hänge nuꞌu̱ yä hogä notisia de rä Tsꞌu̱tꞌhui Äjuä, hingä ho̱nse̱ ma xä tꞌungä ntꞌo̱de ha rä dähni Israel, sino ke ko rä tiempo yä jäꞌi de hängutho yä dähni, ma xä zo̱ho̱ xä bädi ꞌne xä de̱ni rä Hesu (Mat. 28:​19, 20). Pe nuꞌmu̱ rä Hesu bi ꞌñenä «ma gi ntestigohu̱ de geki», ¿signifika ge nuꞌu̱ yä de̱ni ho̱nse̱ ma xä ntestigo de geꞌä o ꞌnehe de rä Zi Dada Jeoba? Ha rä mfistꞌofo Hechos ha rä capítulo 15 ma gä tinihu̱ rä mpengi nunä ntꞌani.

5. ¿Hanja bi ꞌñudi yä apostol ꞌne yä anciano de Jerusalén ge xa mi ja mꞌe̱di dä bädi de rä thuhu rä Zi Dada Jeoba gatꞌho yä jäꞌi? (Hyandi ꞌnehe rä kꞌoi).

⁵ Ha rä je̱ya 49, yä apostol ꞌne yä anciano de Jerusalén bi muntsꞌi pa bi ñä te mi debe dä me̱fi nuꞌu̱ hingä myä judío pa xä za xä nkristianu. Mi uadi näꞌä rä mhuntsꞌi, näꞌä rä ho̱ku rä Hesu mrä thuhu Santiago bi ꞌñenä: «Symeón [fädi ꞌnehe ngu rä apostol Pedro] xä mede gatꞌho näꞌä bi thogi nuꞌmu̱ po rä mu̱di mꞌiki, Äjuä bi mu̱di bi hyandi gatꞌho yä dähni, pa dä gu̱ki de entre geꞌu̱ nꞌa rä hnini näꞌä ma dä tsꞌofo po rä thuhuꞌä». ¿Toꞌo rä thuhuꞌä? Santiago bi beni näꞌä xki yꞌofo rä profeta Amós, ꞌne bi ꞌñenä: «Pa njabu̱ nuꞌu̱ yä jäꞌi kohi de rä hnini, dä yꞌo̱tꞌe ntsꞌe̱di pa dä hyoni rä Zi Dada Jeoba mähye̱gi ko nuꞌu̱ yä jäꞌi de märꞌa yä dähni, ꞌne nuꞌu̱ yä jäꞌiꞌu̱ ma dä tsꞌofo po mä thuhu. Gehnä xä mängä rä Zi Dada Jeoba» (Hech. 15:​14-18, TNM). ¿Te di signifika nuya yä noya «ma dä tsꞌofo po mä thuhu»? Signifika ge nuꞌu̱ ja ma xä nkristianu, ma xä bädi ꞌne ma xä ꞌñuti märꞌa yä jäꞌi de rä thuhu rä Zi Dada Jeoba ꞌne po gatꞌho yä hnini ma xä fädi po rä Thuhuꞌä.

6, 7. a) ¿Te mä raso bi me̱ꞌtsi rä Hesu pa bä ehe ha rä Xiꞌmhai? b) ¿Te mä raso mänꞌa ja ndunthi rä muui?

⁶ Ma gä benihu̱ ge rä thuhu rä Hesu signifika «Jeoba geꞌä rä ñänte». ꞌNe geꞌä bi me̱fi rä Zi Dada Jeoba: bä pe̱hni rä hmäkä Tꞌu̱ ha rä Xiꞌmhai pa dä ñäni gatꞌho yä jäꞌi (Mat. 20:28). Hää, ko näꞌä rä njutꞌi bi uni, nubye̱ gatꞌho nuꞌu̱ dä me̱ꞌtsuäbi rä jamfri rä Zi Dada Jeoba ꞌne rä Hesu, dä za dä hñäni rä mpumbäte de nuꞌu̱ yä pekado ꞌne dä za dä me̱ꞌtsi nꞌa rä te pa nzäntho (Juan 3:16).

⁷ Pe, ¿por hanja mi ja mꞌe̱di dä tꞌuni nꞌa rä njutꞌi po gatꞌho yä jäꞌi? Ja ngu ya dä pädihu̱, Adán ꞌne Eva bi rechaza rä Zi Dada Jeoba, hänge po geꞌä bi du ꞌne bi ꞌme̱di näꞌä rä oportunida de dä me̱ꞌtsi nꞌa rä te pa nzäntho (Gén. 3:​6, 24). Pe rä Hesu hingä ho̱nse̱ bä ehe ha rä Xiꞌmhai pa dä ñäni yä jäꞌi, sino ke bä ehe po mä nꞌa rä tꞌo̱tꞌe näꞌä mänꞌa xa ja ndunthi rä muui. Koꞌmu̱ rä Zithu xki mää yä nkꞌuamba ꞌne xki mänchabi rä thuhu rä Zi Dada Jeoba, hänge mänꞌa xa mi mähyoni dä su̱kuäbi (Gén. 3:​4, 5). Rä Hesu mi pädi ge mu̱ xä xu̱kuäbi rä thuhu rä Zi Dada Jeoba ꞌne xä ꞌñudi ge hingä mäjuäni näꞌä xki mää rä Zithu, geꞌmu̱ ꞌnehe ma xä za xä me̱ꞌtsi nꞌa rä te pa nzäntho yä jäꞌi. Joꞌo mä nꞌa rä jäꞌi ngu rä Hesu näꞌä xä representabi xä ñho rä thuhu rä Zi Dada Jeoba, ngeꞌä näꞌä bi me̱fi gatꞌho näꞌä bi mändabi ꞌne nunka bi fayabi.

8. ¿Te mi debe dä ntiende ꞌne dä asepta nuꞌu̱ ma xä desidi dä de̱ni rä Hesu?

⁸ Gatꞌho nuꞌu̱ ma xä desidi dä de̱ni rä Hesu —tanto yä judío ngu nuꞌu̱ yä jäꞌi de märꞌa yä dähni — mi debe dä ntiende ꞌne dä asepta ge rä Zi Dada Jeoba go geꞌä bä pe̱hni rä Hesu pa dä ñämbäbi yä te yä jäꞌi (Juan 17:3). Ja ngu rä Hesu, gatꞌho nuꞌu̱ yä de̱ni nubye̱ ma xä fädi po rä thuhu rä Zi Dada Jeoba. Nuꞌu̱ ꞌnehe mi debe dä rekonose ge pa dä ñäni yä te, mi debe dä mfaxte pa drä nsundabi ꞌne drä su̱kuäbi rä thuhu rä Zi Dada Jeoba (Hech. 2:​21, 22). Hää, nuꞌu̱ xa mäjuäni yä kristianu mi debe dä bädi tanto de rä Zi Dada Jeoba ngu de rä Hesu. Hänge nuꞌmu̱ rä Hesu bi uadi bi ja näꞌä rä sadi di tinihu̱ ha Juan 17, näꞌä bi ꞌñenä: «Nuga xtä utiyu̱ ndaꞌä ri thuhu ꞌne ma gä sigi gä udi. Pa njabu̱ näꞌä rä mhäte gi pe̱skägi, dä mꞌu̱i kongehyu̱ ꞌne nuga ꞌnehe gä ꞌmu̱i kongehyu̱» (Juan 17:​26, TNM).

«NUꞌÄHU̱, GO MÄ TESTIGOꞌIHU̱»

9. ¿Te debe dä rekonose ꞌne dä me̱fi nuꞌu̱ xa mäjuäni yä kristianu?

⁹ Nuꞌu̱ xa mäjuäni yä kristianu debe dä rekonose ge ho̱nse̱ rä thuhu rä Zi Dada Jeoba xä mäkä nsundatho ꞌne geꞌä mänꞌa rä dängi de gatꞌho nuꞌu̱ yä thuhu ja. Pe̱ꞌtsi te di debe dä ꞌñudi ko näꞌä pe̱fi ge xa ne dä nsundabi ꞌne dä xu̱kuäbi rä thuhu (Mat. 6:​9, 10). Hänge kada nꞌa de gekhu̱ debe gä mfaxtehu̱ pa gä udihu̱ ge hingä mäjuäni nuꞌu̱ yä nkꞌuamba bi mää rä Zithu de rä Zi Dada Jeoba. ¿Te di debe gä pe̱fihu̱? Ma gä handihu̱.

10. ¿Te udi rä mfistꞌofo Isaías ha yä capítulo 42 asta 44 (Isaías 43:9; 44:​7-9; hyandi ꞌnehe rä kꞌoi).

¹⁰ Ha rä mfistꞌofo Isaías ha yä capítulo 42 asta 44, udi te di debe gä pe̱fihu̱ kada nꞌa de gekhu̱ pa gä mfaxtehu̱ drä nsundabi ꞌne drä su̱kuäbi rä thuhu rä Zi Dada Jeoba. Ha nuya yä capítulo, udi hanja rä Zi Dada Jeoba zohni gatꞌho yä jäꞌi, ꞌne apäbi ge dä ꞌñudi ko yä prueba mu̱ nuꞌu̱ yä imagen di xo̱kämbeni ja yä te ꞌne mu̱ go geꞌu̱ xa mäjuäni yä zidada. Jeoba ꞌnehe apäbi dä presenta yä testigo. Pe hinto bi za bi uni yä prueba nixi nꞌa rä testigo (hñeti Isaías 43:9; 44:​7-9).

11. Ja ngu di handihu̱ ha Isaías 43:​10-12, ¿te xipäbi rä Zi Dada Jeoba gatꞌho nuꞌu̱ pe̱päbi?

¹¹ (Hñeti Isaías 43:​10-12). Jeoba embäbi gatꞌho nuꞌu̱ pe̱päbi: «Nuꞌähu̱, go mä testigoꞌihu̱ [ . . . ] ꞌne nuga go geki Äjuä». ꞌNepu̱ o̱ꞌtuäbi nunä rä ntꞌani: «¿Hage ꞌmu̱i mä nꞌa rä Äjuä?» (Is. 44:8). Kada nꞌa de gekhu̱ di pe̱ꞌtsihu̱ näꞌä rä däta nsu de gä ntestigohu̱ ꞌne gä umbäbihu̱ rä mpengi nunä rä ntꞌani. Ko näꞌä di mäñhu̱ ꞌne ko näꞌä di pe̱fihu̱, di udihu̱ ge Jeoba, ho̱nse̱ꞌä rä Zi Dada xa mäjuäni ꞌne ge rä mäkä thuhu geꞌä mänꞌa rä dängi de gatꞌho. ꞌNehe, ko näꞌä rä mꞌu̱i di tsitsꞌihu̱ di udihu̱ ge xa mäjuäni di mädihu̱ rä Zi Dada Jeoba, ꞌne ge xtä desidihu̱ gä yꞌohu̱ mänjuäntho ha rä ꞌñuu —hindi mporta te mä xuñha dä hñuskägihu̱ rä Zithu—. Ora di faxtehu̱ pa gä nsundabihu̱ ꞌne gä xu̱kuäbihu̱ rä thuhu Rä Zi Dada Jeoba.

12. ¿Hanja bi kumpli Isaías 40:​3, 5?

¹² Rä profeta Isaías bi yꞌofo ge ma xä mꞌu̱i toꞌo xä xokuäbi näꞌä «rä ꞌñuu rä Zi Dada Jeoba» (Is. 40:3). ¿Hanja bi kumpli nuya yä noya? Rä Mäkä Tꞌofo udi ge ko näꞌä bi me̱fi Juan Bautista bi xokuäbi rä ꞌñuu rä Hesu pa nuꞌmu̱ xti zo̱ho̱. Pe nunä ꞌñuu bi xoki, go «rä ꞌñuu rä Zi Dada Jeoba» ngeꞌä rä Hesu bä ehe ha rä Xiꞌmhai ngu rä representanteꞌä (Mat. 3:3; Mar. 1:​2-4; Luc. 3:​3-6). Rä profeta Isaías ꞌnehe bi yꞌofo te ma xä thogi nuꞌmu̱ bi ꞌñenä: «Ma dä nheki rä nsunda Jeoba pa gatꞌho dä hyandi» (Is. 40:5). ¿Hanja bi nheki rä nsunda Jeoba? Nuꞌmu̱ rä Hesu bä ehe ha rä Xiꞌmhai bi representabi xä ñho rä thuhu rä Zi Dada Jeoba ngeꞌä bi me̱fi gatꞌho näꞌä bi mändabi. Hää, rä Hesu bi ꞌñudi xä ñho näꞌä rä mꞌu̱i rä Dada, ꞌñenä go mismo rä Zi Dada Jeoba bä ehe ha rä Xiꞌmhai (Juan 12:45).

13. ¿Hanja di de̱mbäbihu̱ rä ejemplo rä Hesu?

¹³ Nuju̱ di de̱mbäbihu̱ rä ejemplo rä Hesu, ora di faxtehu̱ pa dri nsundabi ꞌne dri su̱kuäbi rä thuhu rä Zi Dada Jeoba. Ja ngu rä Hesu, ꞌnehe dyä testigohu̱ rä Jeoba, ngeꞌä di xipäbihu̱ gatꞌho yä jäꞌi ndaꞌä rä thuhu ꞌne gatꞌho nuꞌu̱ yä tꞌo̱tꞌe mähotho xä me̱fi. Hänge pa dä za dä nugägihu̱ xä ñho rä Zi Dada Jeoba ngu yä testigo, xa mähyoni gä pädihu̱ xä ñho gatꞌho näꞌä bi me̱fi rä Hesu pa bi nsundabi ꞌne bi xu̱kuäbi rä thuhu (Hech. 1:8). Joꞌo mä nꞌa rä testigo rä Jeoba ja ngu rä Hesu, hänge xa mähyoni gä o̱thu̱ ntsꞌe̱di po gä de̱mbäbihu̱ rä ejemplo ꞌne gä pe̱fihu̱ näꞌä bi me̱fi (Apoc. 1:5). Pe, ¿te di debe gä sentihu̱ po rä thuhu rä Zi Dada Jeoba kada nꞌa de gekhu̱?

TE DI SENTIHU̱ PO RÄ THUHU RÄ ZI DADA JEOBA

14. Ja ngu udi rä Salmo 105:​3, ¿te di sentihu̱ po rä thuhu rä Zi Dada Jeoba?

¹⁴ Nuju̱ di exä mä nsuhu̱ po rä thuhu rä Zi Dada Jeoba (hñeti Salmo 105:3). Rä Zi Dada Jeoba xa di johya ora o̱de ge di ñꞌetsꞌihu̱ ngeꞌä go geꞌä mä Zi Dadahu̱ (Jer. 9:​23, 24; 1 Cor. 1:31; 2 Cor. 10:17). Hää, pa nuju̱ xi nꞌa rä däta nsu gä mfaxtehu̱ pa gä nsundabihu̱ rä thuhu. Ha mä ꞌme̱fihu̱, ha rä skuela, ko mä besinuhu̱ o habu̱ gatꞌho di yꞌohu̱, nunka di debe gä ntsahu̱ dä fäkägihu̱ ge dyä testigohu̱ rä Jeoba. Rä Zithu dä nehmä dä hyandi ya hingä ñähu̱ de rä thuhu rä Zi Dada Jeoba (Jer. 11:21; Apoc. 12:17). Rä Zithu ꞌne nuꞌu̱ di mfaxhui pa xani yä nkꞌuamba, ne dä hyandi ge yä jäꞌi dä pumfri ndaꞌä rä thuhu rä Zi Dada Jeoba (Jer. 23:​26, 27). Pe koꞌmu̱ nuju̱ xa di mädihu̱ rä thuhu rä Zi Dada Jeoba, hänge hyaxtho di honihu̱ toꞌo gä xipäbihu̱ de Geꞌä ꞌne njabu̱ di nsundabihu̱ rä thuhu (Sal. 5:11; 89:16).

15. ¿Te di signifika gä maꞌtuäbihu̱ rä thuhu rä Zi Dada Jeoba?

¹⁵ Ma gä sigi gä maꞌtuäbihu̱ rä thuhu Jeoba (Joel 2:32; Rom. 10:​13, 14). ¿Te di signifika gä maꞌtuäbihu̱ rä thuhu rä Zi Dada Jeoba? Hingä ho̱nse̱ ma gä pädihu̱ ꞌne gä usabihu̱ rä thuhu, sino ke di signifika gä pädihu̱ tenguꞌä rä mꞌu̱i, gä pe̱ꞌtsuäbihu̱ rä komfiansa, gä apäbihu̱ dä maxkägihu̱ ꞌne dä giagihu̱ (Sal. 20:7; 99:6; 116:4; 145:18). ꞌNehe signifika gä utihu̱ märꞌa yä jäꞌi ndaꞌä rä thuhu rä Zi Dada Jeoba ꞌne tenguꞌä rä mꞌu̱i. ꞌNehe mähyoni gä nupäbihu̱ yä mfeni pa dä arrepenti ꞌne dä zopu̱ nuꞌu̱ yä mꞌu̱i xä ntsꞌo, pa njabu̱ rä Zi Dada Jeoba dä numäñho (Is. 12:4; Hech. 2:​21, 38).

16. ¿Hanja dä za gä udihu̱ ge rä Zithu näꞌä nꞌa rä kꞌuamba?

¹⁶ Di ꞌmu̱ihu̱ dispuesto gä sufrihu̱ po rä thuhu rä Zi Dada Jeoba (Sant. 5:​10, 11). Ora di ze̱tihu̱ yä xuñha ꞌne hindi fayabihu̱ rä Zi Dada Jeoba, di udihu̱ ge rä Zithu näꞌä nꞌa rä kꞌuamba. Mäyaꞌmu̱ —ha näꞌä rä tiempo bi mꞌu̱i rä Job— rä Zithu bi mää nꞌa rä nkꞌuamba kontra gatꞌho nuꞌu̱ pe̱päbi rä Zi Dada Jeoba ꞌne bi ꞌñenä: «Nꞌa rä jäꞌi ma dä mꞌu̱i dispuesto dä uni gatꞌho näꞌä pe̱ꞌtsi kontal dä ñängä rä bida» (Job 2:4). Ko nuya yä noya, rä Zithu bi ne bi mää ge yä jäꞌi ma dä me̱päbi rä Zi Dada Jeoba ho̱nse̱ nuꞌmu̱ ꞌmu̱i xä ñho ꞌne bi mää ge mu̱ dä zo̱päbi yä xuñha, ma dä zopu̱ rä Zi Dada Jeoba ꞌne ya hingä ma dä me̱päbi. Pe Job bi ze̱ti gatꞌho nuꞌu̱ yä xuñha bi thogi ꞌne himbi fayabi rä Zi Dada Jeoba. Njabu̱ bi ꞌñudi ge rä Zithu näꞌä nꞌa rä kꞌuamba. Kada nꞌa de gekhu̱, ꞌnehe di pe̱ꞌtsihu̱ rä däta nsu de gä udihu̱ ge rä Zithu näꞌä rä nꞌa rä kꞌuamba ꞌne ge hindi mporta te mä xuñha o te mä dumu̱i dä ꞌñekägihu̱, nunka ma gä ꞌuegehu̱ de rä Zi Dada Jeoba. ¡Hinte mä duda di pe̱ꞌtsihu̱ ge rä Zi Dada Jeoba ma dä sigi dä sugägihu̱ po ränge näꞌä rä mäkä thuhu di hätsꞌihu̱! (Juan 17:11).

17. Ja ngu di handihu̱ ha 1 Pedro 2:​12, ¿te mä nꞌa dä za gä pe̱fihu̱ pa gä nsundabihu̱ rä thuhu rä Zi Dada Jeoba?

¹⁷ Di udihu̱ rä tꞌekꞌei po rä thuhu rä Zi Dada Jeoba (Prov. 30:9; Jer. 7:​8-11). Koꞌmu̱ nuju̱ di representahu̱ rä Zi Dada Jeoba ꞌne di häꞌtsuäbihu̱ rä thuhu, ko näꞌä rä mꞌu̱i di tsitsꞌihu̱ dä za gä eꞌtsuäbihu̱ rä nsu o dä za gä tsꞌombäbi rä thuhu (hñeti 1 Pedro 2:12). Hänge xa di o̱thu̱ ntsꞌe̱di po gä nsundabihu̱ rä thuhu rä Zi Dada Jeoba ko näꞌä di mäñhu̱ ꞌne ko näꞌä di pe̱fihu̱. Njabu̱ —mäske xtä mꞌu̱ihu̱ ko rä tsꞌoki— dä za gä udihu̱ rä tꞌekꞌei po rä thuhu rä Zi Dada Jeoba ꞌne dä za gä eꞌtsuäbihu̱ rä nsu.

18. ¿Te mä nꞌa di pe̱fihu̱ pa di udihu̱ ge xa di mädihu̱ rä Zi Dada Jeoba ꞌne rä thuhu? (Hyandi ꞌnehe rä nota).

¹⁸ Mänꞌa di tumämu̱ihu̱ te di mbeni yä jäꞌi de rä Zi Dada Jeoba ke näꞌä di mbeni de gekhu̱ (Sal. 138:2). ¿Por hanja? Koꞌmu̱ xa di mädihu̱ rä Zi Dada Jeoba ꞌne rä thuhu, xa di o̱thu̱ ntsꞌe̱di po gä pe̱fihu̱ näꞌä di hoꞌä mäske rꞌabu̱ yä jäꞌi di nkue̱, te xikägihu̱ ꞌne thengägihu̱.a Pe xtä pädihu̱ ge rä Hesu bi mꞌu̱i dispuesto dä nsundabi rä thuhu rä Zi Dada Jeoba, mäske xa bi sufri, bri ꞌme̱tuäbi rä tsa ꞌne asta bi tho ja ngu mi tho nuꞌu̱ yä be, yä ꞌñätsa jäꞌi o yä hyote. Ja ngu di handihu̱ ha Hebreos 12:​2-4, rä Hesu «himbi durämu̱i po näꞌä rä mꞌe̱tsa bi thogi», sino ke mänꞌa bi durämu̱i po dä me̱päbi rä bolunta rä Dada (Mat. 26:39).

19. Xi nuꞌi, ¿te gi senti po rä thuhu rä Zi Dada Jeoba ꞌne por hanja?

¹⁹ Pa gekhu̱ xa nꞌa rä däta nsu dä fäkägihu̱ ngu yä testigo rä Jeoba. Hänge hindi tumämu̱ihu̱ ora yä jäꞌi thengägihu̱, te xikägihu̱ ꞌne di u̱tsagihu̱, sino ke mänꞌa di tumämu̱ihu̱ po gä xu̱kuäbihu̱ rä thuhu rä Zi Dada Jeoba. Nuju̱ xtä desidihu̱ gä sigihu̱ gä nsundabihu̱ rä thuhu, hindi mporta te mä xuñha dä hñuskägihu̱ rä Zithu. ¿Por hanja? Ngeꞌä ja ngu rä Hesu, xa di mädihu̱ ko ngatꞌho mä mfenihu̱ ꞌne mä korasohu̱ rä Zi Dada Jeoba ꞌne rä thuhu.