Atateng, Kasin Tutulongan Yoy Anak Yo ya Onaligwas Parad Bautismo?

1. Antoy labay ya seguroen na saray Kristianon atateng antis ya manpabautismo so anak da?

“PIGAY bulan ko lan ibabagad si Tatay tan Nanay ya labay ko lay manpabautismo, tan lanang da ak ya kakatongtongen nipaakar ed satan. Labay dan naseguro ya natatalosan ko ya seryoson maong so desisyon ko. Nen Disyembre 31, 1934, agawa imay agko nalinglingwanan ed bilay ko.” Ontan so impaneskribe nen Blossom Brandt nen sikatoy nandesisyon ya manpabautismo. Ontan met so labay ya gawaen natan na saray Kristianon atateng pian natulongan day anak dan makapanggawa na dugan desisyon. No ipaleen odino pabayagen ni so pampabautismo, ompan makapuy la ingen so epekto na satan ed espiritualidad na anak da. (Sant. 4:17) Balet importantin seguroen na atateng ya sikatoy akaparaan lan magmaliw ya disipulo nen Kristo antis ya manpabautismo.

2. (a) Anton problema so naiimano na arum ya manangasikaso na sirkito? (b) Antoy aralen tayo ed sayan artikulo?

² Naiimano na arum ya manangasikaso na sirkito ya wala ray kabataan ya mantaon la na ngalngali 20 odino onsulok ni ya binmaleg ed pamilyan Kristiano balet ta agni ra abautismoan. Maslak ed sarayan kabataan et mimiaral tan manpupulong la. Ipapasen da lay sarili ra bilang Tasi nen Jehova. Balet agda ni labay ya idedikay bilay da ed si Jehova tan manpabautismo. Anto kasi rason? Nayarin ibabaga na atateng da ya manpalabas ni ray panaon antis iran manpabautismo. Diad sayan artikulo, pantongtongan tayo so apatiran rason no akin ya manaalangan so arum ya Kristianon atateng ya tulongan so anak dan onaligwas parad bautismo.

KASIN WALA LAD SUSTON EDAD SO ANAK KO?

3. Antoy pampapagaan na atateng nen Blossom?

³ Saray ateng nen Blossom ya abitlad unonan parapo et natural labat ya pampagaan da no kasin wala lad suston edad so anak da pian natalosan toy kaimportantian tan inkaseryoso na pampabautismo. Panon ya naamtaan na atateng no kasin sarag la na anak da ya idedikay bilay to ed si Jehova?

4. Panon ya makatulong ed atateng so ingganggan nen Jesus diad Mateo 28:19, 20 legan dan babangatan so ananak da?

⁴ Basaen so Mateo 28:19, 20. Singa naaralan tayo ed akaunan artikulo, anggapoy ibabaga na Biblia ya espisipikon edad ya nayarin manpabautismo so sakey. Balet maabig no nodnonoten na atateng so labay ya ibaga na pangibangat ed arum pian magmaliw ya disipulo. Base ed konteksto na Mateo 28:19, say sakey a disipulo et samay aaralen tan tatalosan to ray bangat nen Jesus tan determinado ton unoren iratan. Kanian say gagala na amin a Kristianon atateng et ibangat so anak da manlapud inkaugaw pian natulongan dan magmaliw ya bautismadon disipulo nen Kristo. Siempre agnayarin onkualipika ed bautismo so melag nin ugaw. Balet ipapanengneng na Biblia ya anggan saray ugugaw ni et sarag da lan talosan tan pablien iray katuaan ed Biblia.

5, 6. (a) Base ed impaneskribe na Biblia ed si Timoteo, antoy nibaga tayo nipaakar ed impanpabautismo to? (b) Antoy sankaabigan ya paraan pian natulongan na saray makatalos ya ateng so ananak da?

⁵ Si Timoteo et sakey a disipulo ya impapuso to lay katuaan anggan sanen ugaw ni. Imbaga nen apostol Pablo ya naaralan nen Timoteo so katuaan manlapud inkaugaw to. Anggano binmaleg si Timoteo ed pamilyan mandumaan na pananisia, say Judion ina to tan bai to et tinmulong ed sikaton natalosan so Kasulatan, ta kabisado itan na saray Judio. Kanian nagmaliw ya mabiskeg so pananisia to. (2 Tim. 1:5; 3:14, 15) Nen si Timoteo et mantaon la na ngalngali 20 odino onsulok ni, sikatoy sakey lan disipulo nen Kristo ya nayari lan irekomenda parad espisyal iran pribilehyo ed kongregasyon.​—Gawa 16:1-3.

⁶ Siempre, aliwan parepareho so kada ugaw; nandurumay kapeles na itatatken da ed espiritual. Saray arum et matatken lan mannonot, makapanggawa la ray dugan desisyon, tan labay da lay manpabautismo anggano ugaw ni ra. Say arum balet et agni akaparaan ya manpabautismo anggad sano medyo matatken la ra. Kanian saray makatalos ya ateng et agda papasooten so anak dan manpabautismo. Imbes, tutulongan dan ontatken ed espiritual base ed kapeles na iyaaligwas to. Malikeliket iray ateng no ipapapuso na anak da so ibabaga na Proverbio 27:11. (Basaen.) Balet nepeg ya agda lilingwanan a say gagala ra et tulongan so anak dan magmaliw ya disipulo nen Kristo. Legan dan sankanonot itan, tepetan day sarili ra, ‘Kasin magenap lay kakabatan na anak ko pian idedika toy bilay to ed Dios tan manpabautismo?’

KASIN MAGENAP LAY KAKABATAN NA ANAK KO?

7. Kasin kaukolan ya say sakey ya labay to lay manpabautismo et dakdakel lay amta to ed Biblia? Ipaliwawa.

⁷ Lapud saray ateng so manbabangat ed pamilya ra, duga labat ya labay dan nawalaan na malet a pundasyon na kakabatan iray anak da, ta kaukolan itan pian nidedika day bilay da ed si Jehova. Balet agkaukolan ya dakdakel so amta na sakey pian nidedika toy bilay to ed Dios tan manpabautismo. Kayari na bautismo, amin ya disipulo et kaukolan day mantultuloy ya onaligwas ed suston kakabatan. (Basaen so Colosas 1:9, 10.) Kanian panon karakel so nepeg ya naaralan na sakey antis ya nabautismoan?

8, 9. Anto ray naaralan tayod samay agawa nipaakar ed si Pablo tan ed guardia na prisoan?

⁸ Makaaral iray atateng ed eksperiensya na sakey a pamilya nen inmunan siglo. (Gawa 16:25-33) Diad komaduan pambiabiahe nen Pablo bilang misionero nen manga 50 C.E., sikatoy linmad Filipos. Legan ton wadman a kaibay Silas, sikaray inaresto tan impriso lapud palson akusasyon. Kasabi labi, yinmegyeg tan agalaw iray pundasyon na prisoan tan alukasan so amin ya kapot na prisoan. Lapud takot na guardia ompan tinmakas la ray priso, sikatoy manbikkel lawari, balet tinawag nen Pablo. Pankanawnawa iman nen Pablo tan Silas ya pulongan so guardia tan say pamilya to. Antoy ginawa ra nen atalosan da iray katuaan ya naaralan da nipaakar ed si Jesus? Nampabautismo iran tampol. Antoy naaralan tayod sayan agawa?

⁹ Nayarin samay guardia et datin sundalo tan nanretiro la. Anggapoy amta to nipaakar ed Kasulatan. Kanian pian nawalaan na malet a pundasyon na kakabatan ed Kasulatan, kaukolan ton aralen iray manunan katuaan, talosan no anto ray kakaukolanen ed saray magmaliw ya lingkor na Dios, tan nepeg ton unoren iray bangat nen Jesus. Kayari labat na antikey a panaon, saray naaralan ton manunan katuaan tan panamabli tod saratan so amakiwas ed sikaton manpabautismo. Seguradon nantultuloy nin nanaral kayari na bautismo to. Base ed sayan alimbawa, antoy nayarin gawaen yo no imbaga na anak yo ya natatalosan to la iray manunan katuaan ed Biblia, tan say kabaliksan tan kaimportantian na dedikasyon tan bautismo? Sarag yon ibagad sikato ya mitongtong ed saray elder ed kongregasyon no kasin sikatoy kualipikado lan manpabautismo.a Singa saray arum ya bautismado lan Kristiano, itultuloy ton aruman so kakabatan to nipaakar ed gagala nen Jehova legay bilay to, ya anggad andi-anggaan.​—Roma 11:33, 34.

KASIN NIBABANGAT ED ANAK KO SO SANKAABIGAN YA EDUKASYON?

10, 11. (a) Antoy iisipen na arum ya atateng? (b) Antoy nepeg ya manunan nonoten na sakey ya ateng?

¹⁰ Iisipen na arum ya atateng ya maabig no agni manpabautismo so anak da pian mangala ni na atagey ya edukasyon tan nawalaan na marakep ya trabaho. Nayarin maong met so intension da, balet kasin natulongan na satan so anak da pian sikatoy magmaliw ya tuan matalona? Tan say mas importante, kasin ontan so ipapaseseg na Kasulatan? Antoy ipapaseseg na Salita nen Jehova ya gawaen da?​—Basaen so Eclesiastes 12:1.

¹¹ Importantin nonoten tayo ya sayan mundo tan amin ya kabiangan to et kontra ed panlabayan tan kanonotan nen Jehova. (Sant. 4:7, 8; 1 Juan 2:15-17; 5:19) Say maapit ya relasyon ed si Jehova so sankaabigan ya pandepensa na anak sumpad si Satanas, say mundo to, tan say agmakadios ya panagnonot na satan. No say manunan ipapaseseg na ateng ed anak to et say pakawalaan na atagey ya edukasyon odino balibalin trabaho, isipen to laingen ya mas importante iratan nen say relasyon tod si Jehova, balet mapeligro itan. Kasin labay na maaron Kristianon atateng ya impluensyaan na mundo so panmoria na anak da ed no anton talagay makapangiter na tuan liket? Diad tua, magmaliw tayo labat ya tuan maliket tan matalona no iyuna tayod bilay tayo si Jehova.​—Basaen so Salmo 1:2, 3.

PANON TO NO MAKAGAWAY KASALANAN SO ANAK KO?

12. Akin ya labay na arum ya ateng ya ipaleen ni na anak da so pampabautismo?

¹² Imbaga na sakey ya Kristianon ina so rason to no akin ya agto ni papasesegen ya manpabautismo so anak to, a kuan to, “Nababaingan ak ya ibagan say manunan rason et ompan sikatoy nadispelo.” Singa ed satan ya sister, irarason na arum ya ateng ya mas maong no agni manpabautismo so anak da ya anggad sikatoy makalakal la tan nakal to la ray aliwliwan ugali to. (Gen. 8:21; Pro. 22:15) Nayarin iisipen da, ‘No agni abautismoan so anak ko, agnadispelo.’ Akin ya aliwan duga iyan panagrason?​—Sant. 1:22.

13. Kasin anggapoy eebatan na sakey ed si Jehova no agni abautismoan? Ipaliwawa.

¹³ Natural labat ya aglabay na Kristianon atateng ya manpabautismo so anak da no agto ni sarag so mandesisyon ya idedikay bilay to ed si Jehova. Balet lingon isipen ya no agni abautismoan so anak et anggapoy eebatan tod si Jehova. Akin? Aliwan say pampabautismo na sakey so basiyan pian nibagan walay eebatan to ed si Jehova. Imbes, say sakey ya anak et wala lay eebatan tod Dios no amta to lan ibiig no antoy duga tan no antoy aliwa ed pakanengneng nen Jehova. (Basaen so Santiago 4:17.) Kanian imbes ya pigilan na atateng so anak da ya manpabautismo, maabig no panseetan dan ipanengneng so maabig ya alimbawa. Labay dan naaralan na anak da so impapuson panamabli ed atagey iran estandarte nen Jehova ed moral. (Luc. 6:40) Say ontan ya panamabli so sankaabigan ya proteksion na anak yo, ta satan so mamakiwas ed sikaton gawaen so ibabaga nen Jehova ya duga.​—Isa. 35:8.

MAKATULONG SO ARUM

14. Panon ya nasuportaan na saray elder iray atateng ya mansasagpot ya ontulong ed ananak dan onaligwas parad bautismo?

¹⁴ Bilang espiritual ya pastol, sarag na saray elder ed kongregasyon ya suportaan so pansasagpot na atateng no ipaseseg day pakawalaan na saray goal ed espiritual. Nanonotan ni na sakey ya sister, a payunir ed masulok ya 70 taon, so maabig ya epekto ed sikato na impitongtong nen Brother Charles T. Russell nen anemira ni labat so taon to. Imbaga to, “Sikatoy angigana na 15 minuto pian katongtongen ak nipaakar ed saray goal kod espiritual.” On, saray positibon salita tan panamaseseg et talagan agnalingwanan. (Pro. 25:11) Sarag met ya ipila na saray elder iray atateng tan ananak da no wala ray proyekto ed Kingdom Hall, ya ikdan da na kimey iray kabataan base ed edad tan pakasarag da.

15. Panon ya napaseseg na arum ya agagi iray kabataan ed kongregasyon?

¹⁵ Makatulong met iray agagi ed kongregasyon diad pangipatnag da na matukoy ya personal ya interes ed saray kabataan. Kaibad saya so pagmaliw dan alerto ed saray tanda na iyaaligwas dad espiritual. Kasin impapuso tan ninonot a maong iray komento na sakey a kabataan odino ipaparaan ton maong so parte to ed midweek ya aral? Kasin matoor ton nalalampasan iray subok odino aanamoten to ray pankanawnawa ya manpulong diad eskuelaan? Komendaan iran tampol. Agta maabig met ya antis odino kayari na aral et katongtongen moy sakey ya kabataan, ya ipanengneng mon interesado ka ed sikato? Diad onia ran paraan tan arum ni ra, nalikna na saray kabataan ya parte ira na “baleg a kongregasyon.”​—Sal. 35:18.

TULONGAN SO ANAK MON ONALIGWAS PARAD BAUTISMO

16, 17. (a) Panon ya say bautismo et mikonektaan ed bilay na sakey diad arapen? (b) Antoy nayarin panliketan na amin ya Kristianon atateng? (Nengnengen so litratod gapo na artikulo.)

¹⁶ Say pamabaleg na anak diad “disiplina tan panamilin nen Jehova” et sakey ed saray sankaabigan ya pribilehyo na sakey ya Kristianon ateng. (Efe. 6:4; Sal. 127:3) Aliwan singa saray ugugaw ed Israel nensaman, saray anak na Kristianon atateng et agniyanak ya kabiangan na totoon nidedika ed si Jehova. Ontan met, say panangaro ed Dios tan ed katuaan et agnatawir. Manlapud kiyanak na ugaw, nepeg ya say gagala na atateng et tulongan so anak dan magmaliw ya disipulo, ya idedika toy bilay tod si Jehova tan manpabautismo. Wala ta ni mas importante nen say satan? Diad tua, no say sakey et idedika toy bilay tod Dios, manpabautismo, tan matoor ya manlingkor, sikatoy posiblin nakaiba ed saramay namarkaan parad kililiktar diad isabi na baleg a kairapan.​—Mat. 24:13.

¹⁷ Nen imbaga nen Blossom Brandt ya labay to lay manpabautismo, labay ya seguroen na matakot ed Dios ya atateng to ya sikatoy akaparaan lan manggawa ed sayan sankaimportantian a desisyon ed bilay to. Nen aseguro da ya akaparaan la, sinuportaan day desisyon to. Diad samay labi antis na bautismo to, walay balibalin ginawa nen tatay to. Imbaga nen Blossom: “Kinerew ton ontalimukor kamin amin, tan indaulo toy pikakasi. Imbaga tod si Jehova ya sikatoy malikeliket ed desisyon na ugaw nin anak to ya idedika so bilay to ed Sikato.” Kalabas na masulok ya 60 taon, oniay imbaga nen Blossom: “Segurado ya anggan onlabas so dakel a taon, agkon balot nalingwanan iman a labi!” Komon ta nalikna yo iran atateng so liket tan inkapnek no idedika la na ananak yo so bilay da ed si Jehova tan manpabautismo ira.