Bo Ta Corda?

Bo a haña e edicionnan recien di E Toren di Vigilancia di balor práctico pa bo? Anto pakico no test bo memoria cu e siguiente preguntanan:

◻ Ki les nos por siña for dje caida dje amonitanan? (Sofonías 2:9, 10) Jehova no ta considerá e accion di recompensá su bondad cu hostilidad como algu leve, i na su debido tempu, lo e bolbe tuma accion, mescos cu el a haci den pasado. (Compará cu Salmo 2:6-12.)—15/12, página 10.

◻ Den ki manera cristiannan tin pas? Di promé, nan tin “pas cu Dios mediante [nan] Señor Jesucristo.” (Romanonan 5:1) Di dos, nan tin pas entre nan mes dor di cultivá “e sabiduria di ariba,” cu ta “promé cu tur cos decente, anto pacífico.” (Santiago 3:17)—1/1, página 11.

◻ Kico ta algun cos cu cua e Palabra di Dios ta ser compará, i con esaki ta probechoso pa nos? E Palabra di Dios ta ser compará cu lechi nutritivo, cuminda sólido, awa refrescante i purificador, un spiel i un spada skerpi. Comprendiendo loke e términonan aki ta implicá ta yuda un minister usa Bijbel ábilmente.—1/1, página 29.

◻ Kico un educacion seglar balansá mester yuda nos haci? Lesa bon, skirbi cu letra comprendibel, desaroyá mentalmente i moralmente, i adkerí e entrenamentu práctico necesario pa bida diario i sirbishi sagrado eficas.—1/2, página 10.

◻ Ki les balioso relacioná cu educacion nos por siña for di Jesus? Educacion mester ser usá, no pa glorificá nos mes, sino pa trece alabansa n’e Educador di mas grandi, Jehova Dios. (Juan 7:18)—1/2, página 10.

◻ Kico ta e Reino di Dios? E Reino ta un gobiernu celestial cu Dios a instituí i cu ta realisá su boluntad pa eliminá e efectonan di picá i morto i pa restorá condicionnan hustu riba tera. (Daniel 2:44; Revelacion 11:15; 12:10)—1/2, página 16.

◻ Con Bijbel ta percurá e educacion necesario pa trece un fin permanente na violencia? Pa medio di su Palabra, Bijbel, Jehova ta siña hende pa ta stimador di pas i pa ta hustu. (Isaías 48:17, 18) E Palabra di Dios tin e poder pa penetrá i toca curason di un persona, cambiando su manera di pensa i di comportá su mes. (Hebreonan 4:12)—15/2, página 6.

◻ Den ki manera nos por bisa cu e profecia di Isaías capítulo 35 tin tres cumplimentu? E profecia di Isaías tabatin un promé cumplimentu ora e hudiunan a bolbe bek for di cautiverio babilónico na 537 P.E.C. E tin un cumplimentu spiritual continuo awe for dje tempu cu Israel spiritual a ser librá for di cautiverio na Babilonia e Grandi. I lo e tin un di tres cumplimentu en coneccion cu e siguransa bíblico di condicionnan paradísico literal riba tera. (Salmo 37:10, 11; Revelacion 21:4, 5)—15/2, página 17.

◻ Con Dios su interes personal den hende a keda demostrá den e milagernan cu su Yu, Jesus, a efectuá? Siendo cu Jesus “no por haci ni un solo cos di su mes iniciativa, sino solamente loke e mira e Tata haci,” su compasion ta ilustrá Jehova su interes den cada un di su sirbidornan. (Juan 5:19)—1/3, página 5.

◻ Kico e expresion di Jesus “grafnan conmemorativo” na Juan 5:28, 29 ta implicá? E palabra griego mne·mei’on (grafnan conmemorativo) usá aki ta duna e idea cu Jehova ta corda e registro dje persona cu a muri, incluyendo su característicanan heredá i memoria completo. Esaki ta duna prueba firme cu Dios ta interesá den hende riba un base individual!—1/3, página 6.

◻ Ki mensahe spiertador den e profecia di Sofonías ta un yudansa práctico pa nos? Awor no ta tempu pa permití duda saca rais den nos curason i posponé den nos mente e binida dje dia di Jehova. Tambe, nos mester vigilá contra e efectonan debilitador di indiferencia. (Sofonías 1:12, 13; 3:8)—1/3, página 17.

◻ Pakico lealtad na Dios ta presentá un desafio? Pasobra lealtad ta choca cu tendencianan egoista cu nos a heredá for di nos mayornan. (Génesis 8:21; Romanonan 7:19) Mas importante, Satanas i su demoñonan ta determiná pa haci nos desleal na Dios. (Efesionan 6:12; 1 Pedro 5:8)—15/3, página 10.

◻ Den cua cuater áreanan nos mester enfrentá e desafio di lealtad, i kico lo yuda nos haci esei? E cuater áreanan ta lealtad na Jehova, na su organisacion, n’e congregacion i na nos casá. Un yudansa pa enfrentá e desafionan aki ta ora nos ta comprendé cu e desafio di lealtad ta ligá cu e vindicacion di Jehova su soberania.—15/3, página 20.

◻ Ki les nos por siña for di David su experencia ora el a purba trece e arca di pacto pa Jerusalem? (2 Samuel 6:2-7) David a ignorá e instruccionnan cu Jehova a duna relacioná cu cargamentu dje Arca, i esaki a trece calamidad. E les ta cu nos nunca mester culpa Jehova pa problemanan cu ta presentá ora nos ignorá su instruccionnan claro. (Proverbionan 19:3)—1/4, página 28, 29.