Fe i Bo Futuro

“Fe ta e expectativa sigur di cosnan sperá.”—HEBREONAN 11:1.

1. Ki clase di futuro mayoria hende ta deseá?

BO TA interesá den futuro? Mayoria hende ta interesá. Loke nan ta spera ta un futuro di pas, liber di miedu, condicionnan di biba adecuá, trabou productivo i agradabel, bon salú i bida largu. Sin duda tur generacion den historia a deseá e cosnan ei. I awe, den e mundu aki cu tin asina tantu problema, e condicionnan ei ta mas deseabel cu nunca.

2. Con un estadista a expresá un punto di bista tocante futuro?

² Segun cu humanidad ta acercando siglo 21, tin un manera pa determiná con futuro lo ta? Mas cu 200 aña pasá e estadista mericano Patrick Henry a bisa cua ta un manera. E di: “E único manera cu ami sa pa pronosticá futuro ta dor di repasá loke a sosodé den pasado.” Segun e punto di bista aki, nos por sa dje futuro dje famia humano pa un gran parti dor di loke hende a haci den pasado. Hopi hende ta di acuerdo cu e idea ei.

Con e Pasado Tabata?

3. Kico e registro di historia ta indicá pa loke ta e prospectonan pa futuro?

³ Si futuro lo bai ta un refleho di pasado, bo ta haña esei animante? Futuro a bira mihó p’e generacionnan anterior atrabes di siglonan? Bon mirá, no. Apesar dje speransanan cu hende tabatin pa miles di aña i apesar di progreso material den algun lugá, historia tabata yen cu opresion, crímen, violencia, guera i pobresa. E mundu aki a experenciá un calamidad tras di otro, causá principalmente dor di gobiernu humano deficiente. Bijbel ta declará cu exactitud: “Hende a dominá hende pa su perhuicio.”—Eclesiástes 8:9.

4, 5. (a) Pakico hende tabata yen di speransa na cuminsamentu di siglo 20? (b) Kico a sosodé cu nan speransanan pa futuro?

⁴ Echo ta cu e mal pasado di humanidad ta sigui ripití su mes, solamente e calamidadnan ta mas extenso i mas perhudicial. E siglo 20 aki ta prueba di esei. Humanidad a siña for dje erornan di pasado i a evitá nan? Wel, na principio dje siglo aki, hopi hende a pone fe den un mihó futuro pasobra tabatin un periodo relativamente largu di pas i pa motibu di progresonan den industria, ciencia i educacion. Un profesor di universidad a bisa cu hende na principio dje siglo aki a kere cu guera no tabata posibel mas, pasobra “hende tabata muchu civilisá.” Un ex-promé minister británico a bisa relacioná cu e punto di bista cu hende tabatin e tempu ei: “Tur cos lo a bira mas i mas mihó. Esaki tabata e mundu cu ami a nace aden.” Caba el a declará: “Di ripiente, inesperadamente, un mainta na 1914 tur cos a cai den otro.”

⁵ Apesar dje fe den un mihó futuro cu a prevalecé e tempu ei, e siglo nobo apénas a cuminsá cu el a hañ’é den e pió catástrofe cu hende a yega di causa—Guera Mundial I. Como un ehempel di ki clase di guera esei tabata, considerá loke a tuma lugá na 1916 den un bataya ora trupanan británico a atacá e liñanan di bataya aleman banda di Riu Somme na Francia. Den cuestion di ora e britániconan a sufri un pérdida di 20.000 homber i hopi a ser matá n’e banda aleman. Cuater aña di matansa a costa bida di casi dies miyon soldá i hopi civil. E poblacion di Francia a baha pa un tempu debí cu nan a perde asina tantu homber. Economia di hopi pais a cai den otro, hibando na e Gran Depresion di añanan ’30. Nada straño cu algun hende a bisa cu e dia cu Guera Mundial I a cuminsá tabata e dia cu mundu a bira loco!

6. Bida a bira mihó despues di Guera Mundial I?

⁶ Esaki tabata e futuro cu e generacion ei a spera? No, leu di esei. Nan speransa a kibra na filingrana. E guera ei no a hiba na algu mihó tampoco. Solamente 21 aña despues di Guera Mundial I, esta na 1939, hende a causa un catástrofe muchu mas pió—Guera Mundial II. Esei a costa bida di rond di 50 miyon homber, muher i mucha. Bombardeonan masal a garna stadnan. Miéntras cu den Guera Mundial I, algun mil soldá a ser matá den un bataya den cuestion di ora, den Guera Mundial II, solamente dos bom atómico a mata mas cu 100.000 hende den cuestion di seconde. Loke hopi hende ta considerá asta pió tabata e asesinato sistemático di miyones di hende den camponan di concentracion nazi.

7. Kico ta e realidad di henter e siglo aki?

⁷ Vários fuente ta declará cu si nos incluí gueranan entre nacionnan, conflictonan civil i mortonan cu gobiernunan a causa na nan mes ciudadanonan, esnan matá den e siglo aki lo yega rond di 200 miyon hende. Un fuente ta asta bisa cu e cifra ta 360 miyon. Imaginá e horor di tur esei: e dolor, e lágrimanan, e angustia i e bidanan ruiná! Ademas, como promedio, rond di 40.000 hende, principalmente mucha, ta muri tur dia di causanan relacioná cu pobresa. Aborto ta mata tres bes e cantidad ei tur dia. Tambe, rond di mil miyon hende ta muchu pober pa obtené e cuminda necesario pa haci e trabou normal di un dia. Tur e condicionnan aki ta evidencia di loke a ser predicí den profecia di Bijbel cu nos ta biba den “e último dianan” dje mal sistema di cosnan aki.—2 Timoteo 3:1-5, 13; Mateo 24:3-12; Lucas 21:10, 11; Revelacion 6:3-8.

Ningun Solucion Humano

8. Pakico lidernan humano no por resolvé e problemanan di mundu?

⁸ Segun cu e siglo 20 aki ta yega su fin, nos por agregá su experencia na esun di siglonan anterior. I kico e historia ei ta conta nos? E ta conta nos cu lidernan humano nunca a solucioná e problemanan principal di mundu, cu nan no ta solucionando nan awor, i cu nan lo no solucioná nan den futuro. Sin importá ki bon intencion nan por tin, nan simplemente no tin e abilidad pa percurá e clase di futuro cu nos kier. I algun hende den autoridad no tin dje bon intencion ei; nan ta busca posicion i poder pa nan propio finnan egoista i materialista, i no pa e bon di otronan.

9. Pakico tin motibu pa duda cu ciencia tin e solucion pa hende su problemanan?

⁹ Ciencia tin e solucion? No si nos considerá e pasado. Científiconan di gobiernu a gasta enorme cantidad di placa, tempu i esfuerso pa desaroyá armanan kímico, biológico i di otro clase teriblemente destructivo. E nacionnan, incluyendo esnan cu ménos por permití nan mes e luho ei, ta gasta mas cu 700 mil miyon dollar na armamentu tur aña! Tambe, ‘progreso científico’ ta parcialmente responsabel p’e kímiconan cu a contribuí n’e contaminacion di aire, tera, awa i cuminda.

10. Pakico ni educacion no ta garantisá un mihó futuro?

¹⁰ Nos por spera cu institucionnan educacional dje mundu lo yuda construí un mihó futuro dor di siña normanan moral haltu, consideracion pa otro hende i amor pa próhimo? No. En bes di esei, nan ta enfocá riba carera, riba gana placa. Nan ta fomentá un spiritu masha competitivo, no unu di cooperacion; scolnan no ta siña moralidad haltu tampoco. Mas bien, hopi di nan ta dispensá libertad sexual, loke a producí un aumento enorme den embaraso di tiener i malesanan transmití sexualmente.

11. Con e registro di empresanan comercial ta pone duda riba futuro?

¹¹ E empresanan comercial grandi di mundu di ripiente lo ser motivá pa cuida nos planeta bon i mustra amor pa otro hende dor di traha productonan cu lo ta di berdadero beneficio i no djis pa ganashi? Esei no ta probabel. Nan lo stop di producí programanan di television yen di violencia i inmoralidad cu ta contribuí na corumpí mente di hende, specialmente di hóbennan? E pasado recien no ta nada animante pasobra, pa un gran parti, television a bira un beerput di inmoralidad i violencia.

12. Kico ta e condicion humano pa loke ta enfermedad i morto?

¹² Ademas, maske con sincero dokternan por ta, nan no por vence enfermedad i morto. Por ehempel, na fin di Guera Mundial I, nan no por a para e griep spañó of malu di kabouter; mundialmente, el a costa 20 miyon bida. Awe, hopi hende na tur parti ta sufri di malesa di curason, cancer i otro malesanan mortal. E mundu médico no a vence e plaga moderno di AIDS tampoco. Al contrario, un informe di Nacionnan Uní publicá na november 1997 a concluí cu e velocidad cu cua e vírus di AIDS ta plamando ta dòbel e cantidad di cálculonan anterior. Ya caba, miyones di hende a muri di dje. Den un aña recien, un tres miyon hende mas a ser contagiá.

Con Testigonan di Jehova Ta Mira Futuro

13, 14. (a) Con Testigonan di Jehova ta mira futuro? (b) Pakico hende no por trece un mihó futuro?

¹³ Sin embargo, Testigonan di Jehova ta kere cu humanidad tin un futuro briyante, e mihó! Pero nan no ta spera cu esfuersonan humano lo realisá e mihó futuro ei. Mas bien, nan ta acudí n’e Creador, Jehova Dios. E sa con futuro lo ta, i lo e ta un futuro maraviyoso! Tambe e sa cu hende no por trece un futuro asina. Como cu ta Dios a crea nan, e conocé nan limitacionnan muchu mas mihó cu cualkier otro persona. Den su Palabra, e ta bisa nos claramente cu e no a crea hende cu e capacidad pa goberná nan mes cu éxito sin guia divino. E echo cu pa un periodo largu di tempu Dios a permití hende goberná independiente di dje a demostrá e incapacidad ei fuera di tur duda. Un autor a reconocé: “Mente di hende a purba tur posibel combinacion di soberania, i en bano.”

¹⁴ Na Jeremías 10:23, nos ta lesa e palabranan dje profeta inspirá: “Mi sa masha bon, O Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso.” Tambe, Salmo 146:3 ta declará: “No pone bo confiansa den e noblenan, ni den e yu di hende terenal, na ken ningun salbacion ta pertenecé.” De facto, dor cu nos a nace imperfecto, manera Romanonan 5:12 ta mustra, e Palabra di Dios ta spierta nos pa no confia ni den nos mes. Jeremías 17:9 ta bisa: “E curason ta mas traicionero cu cualkier otro cos.” P’esei, Proverbionan 28:26 ta declará: “Esun cu ta confia den su mes curason ta estúpido, pero esun cu ta cana den sabiduria ta esun cu lo scapa.”

15. Unda nos por haña e sabiduria pa guia nos?

¹⁵ Unda nos por haña e sabiduria aki? “E temor di Jehova ta e cuminsamentu di sabiduria, i e conocimentu dje Santísimo ta loke comprendimentu ta.” (Proverbionan 9:10) Solamente Jehova tin e sabiduria cu por guia nos atrabes dje tempu spantoso aki. I el a duna nos acceso na su sabiduria mediante e Scritura Santu, cu el a inspirá pa nos guia.—Proverbionan 2:1-9; 3:1-6; 2 Timoteo 3:16, 17.

Futuro di Gobernacion Humano

16. Ken a determiná futuro?

¹⁶ Kico anto, e Palabra di Dios ta bisa nos tocante futuro? E ta bisa nos cu e futuro siguramente lo no reflehá loke hende a haci den pasado. Pues Patrick Henry su punto di bista tabata robes. E futuro dje tera aki i di hende riba dje ta bai ser dicidí, no dor di hende, sino dor di Jehova Dios. Ta su boluntad lo bai sosodé riba tera, no e boluntad di ningun hende of nacion dje mundu aki. “Hopi ta e plannan den curason di un homber, pero e conseho di Jehova ta loke lo permanecé.”— Proverbionan 19:21.

17, 18. Kico ta e boluntad di Dios pa nos tempu?

¹⁷ Kico ta Dios su boluntad pa nos tempu? E tin e propósito di trece un fin n’e sistema di cosnan violento i inmoral aki. E mal gobernacion di hende cu a dura pa siglonan pronto lo ser reemplasá cu un gobernacion formá dor di Dios. E profecia na Daniel 2:44 ta declará: “Den e dianan dje reynan ei [cu ta existí awe] e Dios di shelu lo establecé un reino [den shelu] cu nunca lo ser reducí na ruina. I e reino mes lo no ser pasá na ningun otro pueblo. Lo e aplastá i pone fin na tur e reinonan aki, i e mes lo permanecé pa tempu indefiní.” Tambe e Reino lo eliminá e influencia malbado di Satanas e Diabel, algu cu hende lo no por haci nunca. Su gobernacion dje mundu lo caba pa semper.—Romanonan 16:20; 2 Corintionan 4:4; 1 Juan 5:19.

¹⁸ Ripará cu e gobiernu celestial lo destruí completamente tur forma di gobernacion humano. Dios lo no laga e gobernacion dje tera aki den man di hende. Den shelu, esnan cu ta forma e Reino di Dios lo controlá tur asuntu di tera pa e bienestar di humanidad. (Revelacion 5:10; 20:4-6) Riba tera, hende fiel lo sigui e instruccionnan dje Reino di Dios. Esaki ta e gobernacion cu Jesus a siña nos pidi p’e den oracion ora el a bisa: “Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:10.

19, 20. (a) Con Bijbel ta describí e areglo di Reino? (b) Kico su gobernacion lo haci pa humanidad?

¹⁹ Testigonan di Jehova ta pone nan fe den e Reino di Dios. E ta e “shelu nobo” cu apostel Pedro a skirbi di dje: “Tin shelu nobo i un tera nobo cu nos ta spera segun su promesa, i den esakinan husticia lo tin cu biba.” (2 Pedro 3:13) E “tera nobo” ta e sociedad humano nobo cu lo ser goberná dor dje shelu nobo, e Reino di Dios. Esaki ta e areglo cu Dios a revelá den un vision na apostel Juan, kende a skirbi: “Mi a mira un shelu nobo i un tera nobo; pasobra e shelu anterior i e tera anterior a pasa bai . . . [I Dios lo] seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.”—Revelacion 21:1, 4.

²⁰ Tuma nota cu e tera nobo lo ta un tera hustu. Tur elemento inhustu lo a ser eliminá mediante un obra di Dios, e bataya di Armagedon. (Revelacion 16:14, 16) E profecia na Proverbionan 2:21, 22 ta bis’é asina aki: “E rectonan ta esnan cu lo biba riba e tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes.” I Salmo 37:9 ta primintí: “Malechornan mes lo ser cortá, pero esnan cu ta spera den Jehova ta esnan cu lo poseé e tera.” Lo bo no kier biba den un mundu nobo asina?

Pone Fe den e Promesanan di Jehova

21. Pakico nos por pone fe den e promesanan di Jehova?

²¹ Nos por pone fe den e promesanan di Jehova? Scucha loke e ta bisa mediante su profeta Isaías: “Corda e promé cosnan di hopi tempu atras, cu ami ta Esun Divino i no tin ningun otro Dios, ni ningun manera ami; Esun cu ta declará desde e principio e final, i for di hopi tempu atras e cosnan cu no a ser hací; Esun bisando: ‘Mi mes conseho lo ser realisá, i tur loke ta mi deleite lo mi haci.’” E último parti di versículo 11 ta bisa: “Mi a asta papi’é; lo mi lagu’é bini tambe. Mi a form’é, lo mi hacié tambe.” (Isaías 46:9-11) Sí, nos por tin fe den Jehova i den su promesanan, mes sigur cu como si fuera e promesanan ei a cumpli caba. Bijbel ta expres’é asina aki: “Fe ta e expectativa sigur di cosnan sperá, e demostracion evidente di realidadnan aunke nan no ta ser contemplá.”—Hebreonan 11:1.

22. Pakico nos por tin confiansa cu Jehova lo cumpli cu su promesanan?

²² Hende humilde ta desplegá tal fe pasobra nan sa cu Dios lo cumpli cu su promesanan. Por ehempel, na Salmo 37:29 nos ta lesa: “E hustunan mes lo poseé e tera, i nan lo biba pa semper riba dje.” Nos por kere esaki? Sí, pasobra Hebreonan 6:18 ta bisa: “Ta imposibel pa Dios gaña.” Dios ta doño dje tera, di manera cu e por dun’é na esnan humilde? Revelacion 4:11 ta declará: “Abo a crea tur cos, i pa causa di bo boluntad nan a existí i a ser creá.” P’esei, Salmo 24:1 ta bisa: “Na Jehova e tera i loke ta yen’é ta pertenecé.” Jehova a crea e tera, e ta su doño i e ta dun’é na esnan cu tin fe den dje. Pa yuda edificá nos confiansa den esaki, e siguiente artículo lo mustra con Jehova a cumpli cu su promesanan na su pueblo den pasado i tambe den nos tempu i pakico nos por tin confiansa absoluto cu lo e haci esei den futuro.

Puntonan di Repaso

◻ Kico a sosodé cu e speransanan di hende atrabes di historia?

◻ Pakico nos no mester acudí na hende pa un mihó futuro?

◻ Kico ta e boluntad di Dios pa loke ta futuro?

◻ Pakico nos tin confiansa cu Dios lo cumpli cu su promesanan?

[Plachi na página 10]

Bijbel ta declará cu exactitud: “No ta pertenecé na hende . . . [pa] dirigí su paso.”—Jeremías 10:23

[Rekonosementu]

Bom: U.S. National Archives photo; muchanan hambrá: WHO/OXFAM; refugiadonan: UN PHOTO 186763/J. Isaac; Mussolini i Hitler: U.S. National Archives photo