Jehova Ta Cumpli cu Su Promesanan na Hende Fiel

“Fiel ta esun cu a primintí.”—HEBREONAN 10:23.

1, 2. Pakico nos por tin pleno confiansa den e promesanan di Jehova?

JEHOVA ta pidi di su sirbidónan pa nan desaroyá i mantené un fe sólido den dje i den su promesanan. Cu un fe asina nos por tin pleno confiansa cu Jehova ta haci loke el a primintí di haci. Su Palabra inspirá ta declará: “Jehova di ehércitonan a hura, bisando: ‘Siguramente net manera mi a calculá, asina mester sosodé; i net manera mi a consehá, esei ta loke lo ser realisá.’”—Isaías 14:24.

² E declaracion, “Jehova di ehércitonan a hura,” ta mustra cu e ta duna su voto solem pa cumpli cu su promesanan. P’e motibu ei su Palabra por bisa: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” (Proverbionan 3:5, 6) Ora nos ta confia den Jehova i ta permití su sabiduria guia nos, nos camindanan sin faya lo hiba na bida eterno, pasobra e sabiduria di Dios ta “un palu di bida pa esnan cu ta gar’é.”—Proverbionan 3:18; Juan 17:3.

Berdadero Fe den Tempu Antiguo

3. Con Noe a mustra fe den Jehova?

³ E registro di Jehova su accionnan pa cu esnan cu tin fe berdadero ta duna testimonio di su confiabilidad. Por ehempel, mas cu 4.400 aña pasá, Dios a bisa Noe cu e mundu di su tempu lo a ser destruí dor di un Diluvio mundial. El a instruí Noe pa construí un inmenso arca pa conserbá bida di hende i di bestia. Kico Noe a haci? Hebreonan 11:7 ta bisa nos: “Pa medio di fe Noe, despues cu el a ser duná spiertamentu divino di cosnan cu no a ser contemplá ainda, a mustra temor piadoso i a construí un arca p’e salbacion di su famia di cas.” Pakico Noe tabatin fe den algu cu no a sosodé nunca promé, algu “cu no a ser contemplá ainda”? Pasobra e tabata sa suficiente di Dios su tratonan anterior cu e famia humano pa comprendé cu kico cu Dios bisa ta ser realisá. P’esei Noe tabatin sigur cu e Diluvio tambe lo a tuma lugá.—Génesis 6:9-22.

4, 5. Pakico Abraham a confia Jehova plenamente?

⁴ Un otro ehempel di berdadero fe ta Abraham. Casi 3.900 aña pasá, Dios a bis’é pa sacrificá Isaac, su único yu cu e tabatin cu su esposa, Sara. (Génesis 22:1-10) Con Abraham a reaccioná? Hebreonan 11:17 ta declará: “Pa medio di fe Abraham, ora el a ser probá, casi a ofrecé Isaac.” Sin embargo, na último momento Jehova su angel a par’é. (Génesis 22:11, 12) Pero, di con Abraham a pensa mes di haci un cos asina? Pasobra, manera Hebreonan 11:19 ta bisa, “el a considerá cu Dios por a lanta [Isaac] asta for di morto.” Pero con Abraham por tabatin fe den un resureccion ora cu e no a mira niun i no tabatin registro di un resureccion promé cu esei?

⁵ Corda cu Sara tabatin 89 aña ora Dios a primintí nan un yu homber. Ya Sara su matris a pasa tempu di haña yu—e tabata morto, na moda di papia. (Génesis 18:9-14) Dios a restorá Sara su matris na bida, i el a haña Isaac. (Génesis 21:1-3) Abraham tabata sa cu una bes Dios a restorá Sara su matris morto na bida, anto e por a restorá Isaac su bida tambe si esei tabata necesario. Romanonan 4:20, 21 ta bisa di Abraham: “Debí n’e promesa di Dios, e no a vacilá den un falta di fe, sino a bira poderoso mediante su fe, dunando gloria na Dios i kedando plenamente convencí cu loke el a primintí e por a haci tambe.”

6. Con Hosué a expresá confiansa den Jehova?

⁶ Mas cu 3.400 aña pasá ora cu Hosué tabatin mas cu shen aña di edad, i despues di a experenciá henter su bida con confiabel Dios ta, el a duna e motibu aki pa su confiansa: “Boso sa bon cu tur boso curason i cu tur boso alma cu ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso. Ni un solo palabra di nan a faya.”—Hosué 23:14.

7, 8. Ki pasonan salbador di bida cristiannan fiel a tuma den e promé siglo, i pakico?

⁷ Rond di 1.900 aña pasá, hopi hende humilde a demostrá di tabatin berdadero fe. For dje cumplimentu di profecia di Bijbel nan a realisá cu Jesus tabata e Mesías i a aceptá su siñansanan. Teniendo e echonan i e Scritura Hebreo como base sólido, nan a pone fe den loke Jesus a siña. P’esei, ora Jesus a bisa cu Dios su huicio tabata biniendo riba Hudea i Jerusalem debí na esakinan su infieldad, nan a ker’é. I ora el a bisa nan ki pasonan nan tabatin cu tuma pa salba nan bida, nan a hacié.

⁸ Jesus a bisa creyentenan cu ora Jerusalem ser rondoná pa ehército, nan mester hui. Ehércitonan romano efectivamente a bin contra Jerusalem den e aña 66 E.C. Pero e ora ei e romanonan a bai pa un of otro motibu inexplicabel. Esei tabata e señal p’e cristiannan bandoná e stad, pasobra Jesus a bisa: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca. E ora ei laga esnan den Hudea cuminsá hui p’e cerunan, i laga esnan cu ta meimei di dje retirá, i laga esnan den cunucu no drent’é.” (Lucas 21:20, 21) Esnan cu tabatin berdadero fe a bandoná Jerusalem i e área alrededor i a hui bai na siguridad.

Consecuencianan di un Falta di Fe

9, 10. (a) Con e lidernan religioso a mustra nan falta di fe den Jesus? (b) Kico tabata e consecuencianan dje falta di fe ei?

⁹ Kico esnan sin berdadero fe a haci? Nan no a hui ora nan a haña e oportunidad. Nan a pensa cu nan lidernan por a salba nan. Pero e lidernan ei i nan siguidónan tambe tabatin e evidencia di cu Jesus tabata e Mesías. Pues pakico nan no a aceptá loke el a bisa? Debí na nan curason malbado. Esaki a sali na cla anteriormente ora nan a mira hopi dje hendenan comun basha bai na Jesus despues cu el a resucitá Lázaro. Juan 11:47, 48 ta relatá: “E sacerdotenan principal i e fariseonan a reuní e Sanedrin [e corte supremo hudiu] huntu i a cuminsá bisa: ‘Kico nos mester haci, pasobra e homber aki [Jesus] ta ehecutá hopi señal? Si nos lagu’e asina aki, nan tur lo pone fe den dje, i e romanonan lo bini i kita tantu nos lugá como nos nacion.’” Versículo 53 ta bisa: “P’esei, for dje dia ei padilanti nan a drenta den conseho pa mat’é.”

¹⁰ Ki un milager maraviyoso Jesus a haci—treciendo Lázaro bek for di morto! Pero e lidernan religioso kier a mata Jesus pa esei. Nan gran malicia a sali mas na cla ora “e sacerdotenan principal a drenta den conseho pa mata Lázaro tambe, pasobra pa causa di dje hopi hudiu tabata bai ei i pone fe den Jesus.” (Juan 12:10, 11) Lázaro a caba di ser lantá for di morto, i e sacerdotenan ei kier a mir’é morto atrobe! Nan no tabata interesá den Dios su boluntad of den e bienestar dje pueblo. Nan tabata hende egoista, interesá den nan posicion i bentaha. “Nan a stima e gloria di hende mas cu asta e gloria di Dios.” (Juan 12:43) Pero nan a paga pa nan falta di fe. Na aña 70 E.C., ehércitonan romano a bini bek i a destruí nan lugá i nan nacion, i tambe hopi di nan.

Demostracion di Fe den Nos Tempu

11. Na cuminsamentu dje siglo aki, con hopi hende a demostrá berdadero fe?

¹¹ Den e siglo aki tambe tabatin hopi homber i muher di berdadero fe. Por ehempel, na cuminsamentu dje siglo aki, por lo general hende tabata anticipá un futuro pacífico i próspero. N’e mésun tempu ei, esnan cu a pone fe den Jehova tabata anunciá cu humanidad tabata cerca di drenta e tempu di mas difícil den su historia. Esei ta loke e Palabra di Dios a pronosticá den Mateo capítulo 24, 2 Timoteo capítulo 3 i den otro textonan. Loke e hendenan di fe ei a bisa en realidad a sosodé, cuminsando na 1914 cu Guera Mundial I. Mundu en berdad a drenta e “último dianan” cu “tempu crítico, duru pa trata cuné,” manera Bijbel a pronosticá. (2 Timoteo 3:1) Con bin sirbidónan di Jehova e tempu ei tabata sa e berdad tocante condicionnan di mundu miéntras cu otro hende no? Pasobra, mescos cu Hosué, nan tabatin fe cu ni un palabra di Jehova lo a faya.

12. Ki promesa di Jehova su sirbidónan ta confia plenamente awe?

¹² Awe, sirbidónan di Jehova cu ta pone nan confiansa den dje, ta casi seis miyon rond mundu. For dje cosnan skirbí den e palabra profético di Dios cu ta cumpliendo nan sa cu pronto lo e pone fin na e sistema di cosnan violento i inmoral aki. Pues nan tin confiansa cu e tempu ta cerca ora nan lo mira e realisacion di 1 Juan 2:17, cu ta bisa: “Mundu ta pasa bai i tambe su deseo, pero esun cu haci e boluntad di Dios ta permanecé pa semper.” Su sirbidónan ta confia plenamente cu Jehova lo cumpli cu e promesa aki.

13. Te con leu bo por confia Jehova?

¹³ Te con leu bo por confia Jehova? Bo por risca bo bida p’e! Asta si bo perde bo bida awor pa motibu cu bo ta sirbié, lo e duná bo bek un bida muchu mas magnífico den e resureccion. Jesus ta sigurá nos: “E ora ta bini den cua tur esnan cu ta den grafnan conmemorativo [esta, den Dios su memoria] lo tende su bos i lo sali.” (Juan 5:28, 29) Bo conocé cualkier dokter, lider político, científico, comerciante, of cualkier otro hende cu por haci esei? Nan registro di pasado ta mustra cu nan no por. Jehova sí por, i lo e hacié!

Un Futuro Maraviyoso pa Hende Fiel

14. Ki futuro maraviyoso e Palabra di Dios ta primintí hende fiel?

¹⁴ Jesus a indicá cu un mundu nobo bou dje Reino celestial di Dios ta algu sigur ora el a bisa: “Felis ta esnan di genio suave, ya cu nan lo heredá e tera.” (Mateo 5:5) Esei a reforsá e promesa di Dios na Salmo 37:29: “E hustunan mes lo poseé e tera, i nan lo biba pa semper riba dje.” I djis promé cu Jesus muri ora un malechor a expresá fe den dje, Jesus a bisa e homber ei: “Lo bo ta cu mi den Paradijs.” (Lucas 23:43) Sí, como Rey dje Reino di Dios, Jesus lo soru pa resucitá e homber aki na bida riba tera cu e oportunidad di biba pa semper den e Paradijs ei. Awe, esnan cu ta pone nan fe den e Reino di Jehova tambe por spera cu anhelo pa biba den Paradijs ora Dios lo “seca tur lágrima di nan wowo, i lo no tin morto mas, ni lo tin lamento ni sclamacion ni dolor mas.”—Revelacion 21:4.

15, 16. Pakico bida lo ta asina pacífico den e mundu nobo?

¹⁵ Laga nos forma un cuadro mental dje mundu nobo ei. Imaginá cu nos ta bibando den dje caba. Mesora nos ta ripará tur caminda hendenan contentu, bibando huntu den pas total. Nan ta disfrutando di condicionnan similar na esnan cu Isaías 14:7 a describí: “Henter e tera a drenta den descanso, a bira liber di disturbio. Hende a bira alegre cu gritunan gososo.” Di con nan ta contentu asina? Wel, pa cuminsá, ripará cu e portanan dje casnan no tin lock. No tin mester di nan, como cu no tin crímen ni violencia. Ta net manera e Palabra di Dios a bisa cu lo ta: “Nan realmente lo sinta, cada un bou di su mata di wijndruif i bou di su palu di figu, i lo no tin ningun hende cu ta haci nan tembla.”—Mikéas 4:4.

¹⁶ No tin guera mas tampoco, pasobra den e mundu nobo aki guera ta contra ley. Tur arma a ser transformá den hermentnan di pas. Den e sentido completo, Isaías 2:4 a ser cumplí: “Nan lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña mas di guera.” Pero, esei ta loke nos a verwagt! Di con? Pasobra hopi habitante dje mundu nobo a siña haci esei miéntras nan tabata sirbi Dios den e mundu bieu.

17. Ki condicionnan di bida lo prevalecé bou dje Reino di Dios?

¹⁷ Algu mas cu bo ta ripará ta cu no tin pobresa. Ningun hende ta biba den krot sushi of ta bisti paña bieu i gastá of ta sin cas. Tur hende tin un cas confortabel i propiedad bon tené cu mata i flornan bunita. (Isaías 35:1, 2; 65:21, 22; Ezekiel 34:27) I no tin hamber pasobra Dios a cumpli cu su promesa di cu lo tin cuminda na abundancia pa tur: “Lo yega di tin abundancia di grano riba tera; riba top dje cerunan lo tin sobreabundancia.” (Salmo 72:16) Sí, bou di guia dje Reino di Dios, un glorioso paradijs ta extendé rond e tera, net manera Dios a proponé aya den Eden.—Génesis 2:8.

18. Den e mundu nobo, ki cosnan lo no menasá hende mas?

¹⁸ Tambe bo ta keda asombrá p’e energia vigoroso cu tur hende tin. Esaki ta pasobra awor nan tin curpa i mente perfecto. No tin enfermedad, dolor ni morto mas. No tin ningun hende den rolstoel of den cama di hospital. Tur esei a disparcé pa semper. (Isaías 33:24; 35:5, 6) Ata, ningun dje bestianan ta un menasa tampoco, pasobra nan a bira mansu mediante e poder di Dios!—Isaías 11:6-8; 65:25; Ezekiel 34:25.

19. Pakico cada dia den e mundu nobo lo ta un dia di “deleite exkisito”?

¹⁹ Ki un civilisacion maraviyoso e habitantenan fiel dje mundu nobo aki ta forma! Nan ta dedicá nan energia i abilidadnan i e rikesa dje tera na actividadnan positivo, no na cosnan perhudicial; na cooperá cu otro hende, no na competí cu nan. I tur hende cu bo topa ta un persona cu bo por confia pasobra, manera Dios a primintí, tur ta “personanan siñá pa Jehova.” (Isaías 54:13) Siendo cu tur hende ta ser guiá dor dje leynan di Dios, e tera ta “yená cu e conocimentu di Jehova mescos cu e awanan ta cubri laman mes.” (Isaías 11:9) Berdaderamente, cada dia den e mundu nobo aki ta manera Salmo 37:11 a bisa cu lo ta, un dia di “deleite exkisito.”

Un Futuro Felis Garantisá

20. Kico nos tin cu haci pa disfrutá di un futuro pacífico?

²⁰ Kico nos mester haci pa ta parti dje futuro felis ei? Isaías 55:6 ta bisa nos: “Boso busca Jehova, miéntras cu e por ser hañá. Yama na dje miéntras cu e ta resultá di ta cerca.” I segun cu nos ta busca, nos actitud mester ta manera ta describí na Salmo 143:10: “Siñá mi haci bo boluntad, pasobra abo ta mi Dios.” Esnan cu ta haci esaki por cana liber di culpa dilanti Jehova atrabes dje último dianan aki i por spera cu anhelo riba un futuro excelente. “Vigilá esun cu ta liber di culpa i mantené esun recto na bista, pasobra e futuro dje homber ei lo ta pacífico. Pero e transgresornan mes siguramente lo ser anikilá huntu; e futuro di malbadonan en berdad lo ser cortá.”—Salmo 37:37, 38.

21, 22. Kico Dios ta formando awe, i con e entrenamentu ta ser lográ?

²¹ Awor aki mes Jehova ta sacando for di tur nacion esnan cu kier haci su boluntad. E ta formando nan den e fundeshi di su sociedad terenal nobo, manera profecia di Bijbel a predicí: “Den e parti final dje dianan [e tempu den cua nos ta biba awor] . . . hopi pueblo siguramente lo bai i bisa: ‘Boso ban, i laga nos subi na e ceru di Jehova [su adoracion berdadero elevá] . . . Lo e instruí nos tocante su camindanan, i nos lo cana den su bereanan.’”—Isaías 2:2, 3.

²² Revelacion 7:9 ta describí esakinan como “un multitud grandi . . . for di tur nacion i tribu i pueblo i lenga.” Versículo 14 ta declará: “Esakinan ta esnan cu ta sali for dje tribulacion grandi.” Nan ta sobrebibí e fin dje sistema actual. E fundeshi aki pa e mundu nobo ta awor casi seis miyon hende, cu hopi hende nobo birando parti di dje tur aña. Tur e fiel sirbidónan aki di Jehova ta ser entrená pa bida den su mundu nobo. Nan ta siñando tantu e abilidadnan spiritual como otro tipo di abilidad necesario pa transformá e tera aki den un paradijs. I nan ta confia plenamente cu Paradijs lo bira un realidad pasobra “fiel ta esun cu a primintí.”—Hebreonan 10:23.

Puntonan di Repaso

◻ Ki consecuencianan un falta di fe tabatin den e promé siglo?

◻ Te con leu sirbidónan di Dios por confi’é?

◻ Ki futuro ta warda hende fiel?

◻ Kico nos tin cu haci pa sigurá un futuro felis pa nos mes den e mundu nobo di Dios?

[Plachi na página 18]

Awor aki mes Jehova ta formando e fundeshi di un sociedad terenal nobo