Traha Pionero—Uso Sabí di Nos Tempu!
1 ‘Mi ta demasiado ocupá caba! Lo ta ègt sabí pa riba dje mi traha pionero tambe?’ Asina un ruman muher a pensa durante un asamblea di circuito segun cu e tabata scucha un anciano pionero presentá un parti titulá “Sigui Padilanti cu e Ministerio di Pionero.” Un ruman homber hóben den e mésun auditorio ei a pensa: ‘Con el a logra traha lugá p’e sirbishi di pionero? Ami no ta un anciano, anto ya caba mi bida ta yen cu actividad!’
2 Segun cu e anciano a sigui considerá e bendicionnan dje trabou di pionero, el a entrevistá vários pionero for dje circuito. Nan a conta dje ahustenan cu nan a haci pa por traha pionero i con Jehova a bendicioná nan esfuersonan ricamente. Unu tabata desabilitá, unu tabatin un casá incrédulo i unu a bandoná un carera mundano pero tog su entrada tabata suficiente pa cubri su necesidadnan básico. Tendiendo con e pioneronan aki tabata logra cu yudansa di Jehova, e ruman homber i e ruman muher den auditorio a cuminsá reexaminá nan propio pensamentu i circunstancia. Nos ta invitá bo pa haci mescos, foral awor cu e rekisito di ora reducí ta na alcanse di hopi mas tantu publicadó dje bon nobo.
3 Nos sa cu Jehova ta e Creador i Soberano Universal i cu nos debe nos bida na dje. (Dan. 4:17; Echo. 17:28) Pa nos ta masha cla cu Jehova ta usando un solo organisacion. Nos tin e privilegio di sirbi lealmente huntu cu e organisacion ei, i apoyá “e esclabo fiel i discreto” den duna testimonio dje Reino promé cu e fin bini. (Mat. 24:45; 25:40; 1 Ped. 2:9) Bibando leu den “e último dianan,” nos ta realisá cu e tempu pa predicá ta cabando. (2 Tim. 3:1) Miéntras tantu, nos tin cu sostené nos famia materialmente. (1 Tim. 5:8) Parce cu hende su entrada no ta yega mas manera ántes. Kisas nos salú no ta manera ántes. I pa ta onesto, nos kier tin un poco tempu i placa pa gasta cu nos mes. (Ecl. 3:12, 13) P’esei, podisé nos ta puntra nos mes si realmente ta sabí pa respondé n’e invitacion pa traha pionero.
4 Ta keda na cada un di nos pa examiná nos propio circunstancia cuidadosamente i dicidí si nos por traha pionero. (Rom. 14:12; Gal. 6:5) Ta un animacion pa ripará e creciente cantidad di rumannan cu a respondé n’e yamada pa traha pionero. Apesar dje preshon i problemanan dje último dianan aki, e raport di sirbishi publicá den e Anuario 1999 ta mustra cu casi 700.000 persona dje pueblo di Jehova ta sigui diligentemente den e ministerio di pionero. E rumannan aki, sea cu nan ta sirbi bou di condicionnan económico difícil, no tin transport, ta sufri di problema cu salú of ta haña nan cu otro prueba of dificultad, tog nan no ta cansa di haci loke ta excelente, i esaki ta digno di encomendacion. (Gal. 6:9) Nan a aceptá Jehova su oferta di pon’é na prueba. (Mal. 3:10) Nan ta sinti cu traha pionero ta un manera masha sabí pa usa nan tempu i recursonan limitá i cu Jehova di berdad a bendicioná nan pasobra nan a haci e ahustenan necesario pa drenta i keda den e trabou di pionero.
5 Pioneronan Ta Ricibí Bendicion: Un ruman muher na Camerun cu tin un yu muher chikitu ta splica: “For di dia cu mi yu muher a nace, el a compañá mi semper den e ministerio. Asta promé cu el a siña cana, mi tabata bai cuné riba mi lomba, bon mará cu un paña. Un mainta den e ministerio, mi a para na un stènd cantu di caminda. Mi yu a cana bai for di mi, hibando huntu cuné vários revista for di mi tas. El a cana tambaleá bai n’e siguiente stènd. Aunke e no por a bisa masha cos, el a atraé e atencion di un señora i a presentá un revista. E señora a keda babucá pa mira un mucha asina chikitu ta participá den e actividad aki. Mesora el a aceptá e revista i tambe un studio di Bijbel!”
6 Respondiendo riba e yamada pa mas pionero auxiliar, un anciano na Zambia, cu a la bes ta cabes di cas cu un trabou seglar full-time, a dicidí di traha pionero auxiliar apesar di su programa yen. E kier a pone un bon ehempel p’e congregacion i pa su famia. Na algun ocasion, e tabata parkeer su auto cantu di caminda, toca e caset di E Secreto pa Felicidad den Famia i invitá hende cu tabata pasa na pia pa bin i scucha loke tabata ser lesá. Den e manera ei, el a logra laga 16 buki Felicidad den Famia i 13 buki Conocimentu, i el a cuminsá dos studio di Bijbel.
7 Den e pais bisiña di Zimbabwe tambe tabatin un excelente spiritu di pionero. Durante april 1998, un congregacion cu 117 publicadó a raportá 70 pionero auxiliar i 9 regular. Un otro congregacion cu 94 publicadó tabatin 58 pionero auxiliar cu a raportá. Un otro mas, cu 126 publicadó, a raportá cu 58 di nan a dicidí di traha pionero auxiliar huntu cu e 4 pioneronan regular. Aña pasá a resultá di ta un aña sobresaliente pa Zimbabwe. Maske e rumannan einan tabata masha ocupá cu asuntunan di famia, actividadnan di congregacion i construccion di sucursal, nan a concentrá riba usa nan tempu na un manera sabí den e ministerio.
8 Pioneronan ta realisá cu pa cuminsá den e trabou di pionero i perseverá den dje no ta dependé di nan propio forsa. Nan ta promé pa admití cu tur loke nan ta logra haci ta debí cu nan ta ‘dependé dje forsa cu Dios ta suministrá.’ (1 Ped. 4:11) Nan fe ta capacitá nan pa sigui efectuá nan ministerio dia tras dia. En bes di busca nan propio cumbinencia i comodidad, pioneronan exitoso ta realisá cu pa sigui padilanti, tal bes ta rekerí “hopi lucha,” pero cu nan ta ricibí hopi bendicion como resultado.—1 Tes. 2:2.
9 E Ehempel di Pablo Ta Digno di Imitacion: Bijbel tin registro di apostel Pablo su logronan den e ministerio i e excelente yudansa cu el a duna asina hopi hende. Sin embargo, si tabatin un hende cu demasiado carga, tabata Pablo. El a wanta persecucion i pruebanan físico pa por predicá e bon nobo i pa fortalecé e congregacionnan. Tambe e mester a soportá un problema serio di salú. (2 Cor. 11:21-29; 12:7-10) E tabata decididu pa usa su tempu na un manera sabí. El a reconocé cu el a haci tur su trabou cu yudansa di Jehova. (Fil. 4:13) Ningun dje hendenan cu Pablo a yuda lo tabatin motibu pa concluí cu Pablo a perde su tempu i esfuerso den e sirbishi di Jehova, of cu lo e por a usa nan mihó den algu otro. Sí, awe ainda nos ta beneficiá dje manera sabí cu Pablo a usa su tempu! Cuantu nos no ta apreciá su conseho inspirá pa yuda nos examiná i scoge nos prioridadnan i pega na e berdad den e tempu difícil aki!
10 Awor mas cu nunca promé, ‘e tempu cu a keda pa predicá e bon nobo ta reducí.’ (1 Cor. 7:29; Mat. 24:14) P’esei, ta na su lugá pa nos puntra nos mes: ‘Si mañan mi bida mester terminá inesperadamente, lo mi por bisa Jehova awe cu mi a usa mi tempu na un manera sabí?’ (Sant. 4:14) Pakico no papia awor cu Jehova den oracion, i sigur’é di bo deseo di usa bo tempu di un manera sabí, como un di su Testigonan? (Sal. 90:12) Pidi Jehova su yudansa den oracion pa bo simplificá bo bida. Maske podisé anteriormente bo a dicidí cu bo no por a traha pionero, por ta cu awor bo ta ripará cu bo por traha lugá p’e sirbishi di pionero den bo bida?
11 Saca Máximo Probecho di Bo Circunstancia: Ta di comprendé cu debí na circunstancia no ta tur ruman cu ta deseá esei por programá 70 ora pa luna pa sirbi como pionero regular. Sin embargo, hopi publicadó ta haci areglo pa dedicá 50 ora pa luna den e ministerio como pionero auxiliar mas tantu biaha posibel of riba un base continuo. Si bo circunstancia ta di tal manera cu actualmente bo no por traha pionero auxiliar ni regular, no desanimá. Sigui pidi den oracion pa bo circunstancia cambia. Miéntras tantu, si no ta posibel pa haci ahustenan, saca consuelo for dje echo cu Jehova ta hopi contentu cu loke sea bo por haci di henter alma den su sirbishi. (Mat. 13:23) E ta ripará cu bo ta para firme na su banda i cu bo ta haci esfuerso diligente pa ta un fiel publicadó cu nunca no ta laga un luna pasa sin haci uso di oportunidadnan pa duna testimonio. Kisas bo por progresá dor di mehorá bo abilidadnan di duna testimonio, trahando pa ta un excelente predicadó i maestro dje bon nobo.—1 Tim. 4:16.
12 Cu Jehova su ‘dia grandi i inspirador di temor’ asina cerca, nos tin cu usa e tempu cu a resta na un manera sabí, si nos kier terminá e trabou cu el a comisioná nos pa haci. (Joël 2:31) Satanas sa cu su tempu ta corticu, i mas cu nunca promé, e ta purba haci tur loke ta den su poder pa complicá nos bida i hacié difícil pa nos concentrá riba e cosnan berdaderamente importante. (Fil. 1:10; Rev. 12:12) Nunca no balotá Dios su interes den bo. Jehova por yuda bo simplificá bo bida i alcansá bo potencial máximo den e ministerio. (Sal. 145:16) Felismente, hopi ruman, despues di reexaminá nan circunstancia, ta ripará cu nan por uni n’e fila di pioneronan auxiliar of regular. Sí, pioneronan ta haña profundo satisfaccion den usa nan tempu na un manera sabí. Abo lo ta un di nan?