Kampaña pa Anunsiá Memorial Ta Kuminsá 17 di Mart
1. Kua kampaña lo kuminsá 17 di mart?
1 Tur aña ora nos tene Memorial, nos ta proklamá e morto di Hesus. (1 Kor. 11:26) Ta p’esei nos ke pa otro hende bin skucha tokante e regalo generoso di e reskate ku Yehova a duna. (Huan 3:16) E aña akí nos kampaña pa invitá hende pa Memorial ta kuminsá djasabra 17 di mart. Bo ta ansioso pa partisipá tur ku tin den dje?
2. Kon nos por ofresé e invitashon?
2 Loke Nos Por Bisa: Ta mihó pa nos tene nos presentashon kòrtiku. Nos por bisa: “Kon ta bai? Nos ke invitá abo i bo famia na un evento anual masha importante ku lo tuma lugá rònt mundu dia 5 di aprel. Lo tin un diskurso basá riba Beibel ku lo splika kiko Hesus a logra ku su morto i kiko e ta hasi aworakí. Entrada lo ta grátis. Riba e invitashon akí bo ta haña adrès di e lugá i ora di e reunion.” Den wikènt, aparte di parti invitashon, nos por ofresé revista tambe, si ta apropiá.
3. Kiko nos por hasi pa invitá mas tantu hende posibel?
3 Invitá Mas Tantu Hende Posibel: Nos meta ta pa invitá mas tantu hende posibel. Pues hasi sigur di invitá tur bo studiantenan di Beibel, tambe bo rebishita-, famia-, kolega- di trabou, kompañero- di skol, bisiñanan i otro hende konosí. Ansianonan lokal lo splika e kongregashon kon lo kubri e teritorio. E kampaña anual akí ta duna bon resultado. Aña pasá, un ùsher a aserká un señora ku a drenta e sala di reunion i a puntr’é si e por a yud’é buska e publikadó ku a invit’é. Sinembargo, e señora a bis’é ku e no konosé niun di e hendenan ku tabatin einan i ku ta e dia ei el a haña e invitashon di un hende ku tabata kana di kas pa kas.
4. Kiko ta duna nos motibu pa partisipá ku zelo den e kampaña?
4 Kisas un hende ku asistí na boso Memorial a bini pasobra ta abo a dun’é un invitashon. Pero sea un persona bini Memorial òf nò, e solo echo ku bo a hasi un gran esfuerso pa invit’é ya ta un testimonio. E invitashonnan ku lo bo parti ta proklamá ku aworakí Hesus ta un Rei poderoso. Ademas, bo partisipashon zeloso ta mustra tur persona ku ta wak bo, esta, esnan den teritorio, otro publikadó, i mas importante ainda, Yehova, ku di kurason bo ta apresiá e regalo di e reskate.—Kol. 3:15.