Imitá e Angelnan Fiel

1-2. (a) Kon diferente nos ta for di e angelnan? (b) Kiko nos tin en komun ku e angelnan?

YEHOVA ta esun ku a hala nos na e bèrdat. Asina ei nos a bira parti di un famia amoroso ku ta adorá Yehova. Anto den e famia ei tin miónes di angel tambe. (Dán. 7:​9, 10) Ora nos kompará nos mes ku angel, hopi biaha nos ta mira kon diferente nos ta for di nan. Por ehèmpel, nan a eksistí hopi tempu promé ku nos a eksistí. (Yòb 38:​4, 7) Ademas, nan ta santu i perfekto den tur sentido, ma nos ta imperfekto.—Luk. 9:26.

² Apesar di tur esei, nos tin hopi kos en komun ku e angelnan. Por ehèmpel, tantu nos komo nan por demostrá Yehova su bunita kualidatnan, tin boluntat liber, tin nos nòmber, nos personalidat i ta hasi diferente tarea pa Yehova. Anto meskos ku nan, nos tambe ta konsiente ku nos mester di guia di nos Kreador.—1 Ped. 1:12.

3. Ki lèsnan balioso nos ta bai siña for di e angelnan?

³ Ya ku nos tin asina tantu kos en komun ku nan, nos por siña diferente lès importante for di nan bon ehèmpel. P’esei, den e artíkulo akí nos ta bai trata kon nos por imitá nan humildat, nan amor pa hende, nan perseveransia i nan esfuerso pa tene e kongregashon limpi.

NAN TA HUMILDE

4. (a) Kon e angelnan ta demostrá humildat? (b) Dikon e angelnan ta humilde? (Salmo 89:7)

⁴ Angelnan fiel ta humilde. Apesar ku nan tin hopi eksperensia, poder i sabiduria, nan ta obedesé e instrukshonnan di Yehova. (Sal. 103:20) Segun ku nan ta kumpli ku nan tareanan, nunka nan no ta broma ni usa nan poder pa hala atenshon. Nan ta kontentu pa hasi Yehova su boluntat asta si hende nunka haña sa nan nòmber.a (Gén. 32:​24, 29; 2 Rei. 19:35) Nan no ke niun onor ku mester bai na Yehova. Dikon nan ta asina humilde? Pasobra nan stima Yehova i tin rèspèt profundo p’e.—Lesa Salmo 89:7.

5. Kon un angel a demostrá humildat ora ku e mester a korigí Apòstel Huan? (Wak e plachi.)

⁵ Ban wak un relato den Beibel ku ta mustra kon humilde e angelnan ta. Na aña 96 D.K. un angel a mustra Apòstel Huan un vishon impreshonante. Beibel no ta menshoná e angel su nòmber. (Rev. 1:1) Kiko Huan a hasi ora el a haña e vishon? Wèl, el a kai na rudia pa adorá e angel. Pero mesora e angel a par’é i bis’é: “No hasi e kos ei! Mi ta un simpel esklabo meskos ku bo i meskos ku bo rumannan . . . Adorá Dios.” (Rev. 19:10) E angel ei a demostrá di ta hopi humilde! E no tabata interesá den gloria ni rekonosementu. P’esei, mesora el a kòrda Huan ku ta Yehova so e mester adorá. Aunke e angel tabatin hopi mas tempu ta sirbi Yehova i hopi mas poder ku Huan, e no a sintié mas kuné. El a bisa Huan ku e ta un simpel esklabo meskos kuné. Aunke e angel mester a korigí e biehitu Huan, e no a skual e ni trat’é malu. Na lugá di esei el a papia trankil kuné. Muy probablemente e angel a komprondé ku Huan tabata djis hopi impreshoná pa e vishon ku el a wak.

6. Kon nos por ta humilde meskos ku e angelnan?

⁶ Kon nos por ta humilde meskos ku e angelnan? Esei ta ora nos ta kumpli ku nos asignashonnan sin kana broma òf buska elogio pa e kosnan ku nos a logra. (1 Kor. 4:7) Tampoko nos no mester sinti nos masha kos debí ku nos tin mas tempu ta sirbi Yehova òf debí ku nos tin sierto privilegio. Bon mirá, mas responsabilidat nos tin, mas humilde nos mester ta. (Luk. 9:48) Meskos ku e angelnan, nos ke sirbi nos rumannan. Nos no ke laga nan sinti ku nos ta mas importante ku nan.

7. Kon nos por ta humilde ora nos tin ku korigí òf konsehá un hende?

⁷ Nos por mustra humildat tambe ora nos tin ku korigí òf konsehá un ruman òf nos yu. Tin biaha nos tin ku duna konseho serio. Pero, kòrda kon e angel a korigí Huan. El a hasi esei na un manera kariñoso. Nos tambe por ta firme sin laga e hende sintié desanimá òf kibrá. Si nos kòrda ku nos ta imperfekto meskos ku tur hende, e manera ku nos ta duna konseho basá riba Beibel lo ta respetuoso i ku kompashon.—Kol. 4:6.

NAN STIMA HENDE

8. (a) Segun Lukas 15:​10, kon e angelnan ta demostrá ku nan stima hende? (b) Kon e angelnan ta yuda nos den e trabou di prediká? (Wak e riba portada.)

⁸ E angelnan ta masha interesá den loke ta pasa ku hende. Nan stima hende. Nan ta keda hopi kontentu ora un pekadó arepentí, esta, ora un karné pèrdí bolbe serka Yehova òf ora un hende hasi kambio den su bida i bin den e bèrdat. (Lesa Lukas 15:10.) E angelnan tambe ta yuda nos ora nos ta prediká. (Rev. 14:6) Aunke nan mes no ta prediká, nan tin e poder pa guia nos na un hende ku ke siña tokante Yehova. Pero no ta angel so Yehova ta usa, e ta usa su spiritu santu tambe pa yuda hende ku ke siña tokante dje òf pa guia nos na un hende asina. P’esei nos no por bisa sigur ku Yehova a usa un angel pa guia nos serka tal-i-tal hende. (Echo. 16:​6, 7) Tòg nos sa ku Yehova ta usa e angelnan hopi. Pues ora nos ta prediká e bon notisia, nos por tin sigur ku nan t’ei kla pa yuda nos.—Wak e kuadro “Nan A Haña Kontesta pa Nan Orashon.”b

9. Kon nos por stima hende meskos ku e angelnan?

⁹ Kon nos por stima hende meskos ku e angelnan? Ora nos tende anunsio ku un hende a ser restorá, nos por alegrá, meskos ku e angelnan. Nos ta yam’é bon biní i lag’é sa ku nos stim’é mashá. (Luk. 15:​4-7; 2 Kor. 2:​6-8) Tambe, meskos ku e angelnan, nos ta hasi tur loke nos por den e trabou di prediká. (Ekl. 11:6) Anto meskos ku nan ta yuda nos ora nos ta prediká e bon notisia, nos tambe por buska maneranan pa yuda nos rumannan den sirbishi. Por ehèmpel, nos por traha afsprak pa traha ku un publikadó nobo. Òf nos por traha den sirbishi ku e rumannan di edat òf esnan ku tin problema ku salú.

10. Kiko nos por siña for di e eksperensia di Sara?

¹⁰ Pero kiko si nos situashon no ta permití nos hasi tur loke nos tin gana di hasi pa Yehova? Nos por haña maneranan nobo pa por traha ku e angelnan den sirbishi. Wak e ehèmpel di Sara,c un ruman na India. E tabata pionero pa 20 aña, pero despues el a bira malu i no por a baha for di kama. El a bira hopi deprimí. Pero danki na e apoyo i amor di e rumannan di su kongregashon i tambe su lesamentu di Beibel tur dia, pokopoko el a haña su goso bèk. Klaru ku e mester a kambia su manera di prediká. Ya ku e no por a lanta sinta pa skirbi karta, e úniko kos ku e por a hasi ta prediká via telefòn. Pues, e tabata yama su rebishitanan i nan tabata dun’é nòmber di otro hende ku kisas kier a studia Beibel. Ku ki resultado? Den un par di luna, Sara tabatin 70 estudio di Beibel! E mes no por a studia ku tur, pues el a pasa algun di nan pa e rumannan di su kongregashon. Hopi di e studiantenan ta bai reunion. E angelnan ta hopi kontentu pa traha huntu ku rumannan, manera Sara, kendenan ta hasi tur loke nan por den e trabou di prediká!

NAN TA PERSEVERÁ

11. Den ki manera e angelnan ta ekselente ehèmpel di perseveransia?

¹¹ E angelnan fiel ta un ekselente ehèmpel di perseveransia. Pa míles di aña nan ta mira inhustisia i maldat. Nan a mira Satanas i hopi otro angel ku un tempu tabata sirbi Yehova huntu ku nan rebeldiá kontra Yehova. (Gén. 3:1; 6:​1, 2; Hudas 6) Beibel ta konta di un angel fiel ku mester a bringa ku un demoño pa hopi dia. (Dán. 10:13) Ademas, for di tempu di Ádam ku Eva, e angelnan a mira solamente un grupo chikitu di hende ta sirbi Yehova. Apesar di tur esei, e angelnan leal ei ta sigui sirbi Yehova ku goso i ánimo. Nan sa ku, na su debido tempu, Yehova ta bai kita tur inhustisia.

12. Kiko lo yuda nos perseverá?

¹² Kon nos por perseverá meskos ku e angelnan? Meskos ku e angelnan, nos tambe ta mira inhustisia. Pero meskos ku nan, nos sa ku, na su debido tempu, Yehova lo kita tur maldat. Pues meskos ku e angelnan fiel, “nos no [ta] stòp di hasi loke ta bon.” (Gal. 6:9) I Yehova ta primintí di yuda nos perseverá. (1 Kor. 10:13) Nos por pidi Yehova pa su spiritu santu, ku lo yuda nos tene pasenshi i keda ku nos goso. (Gal. 5:22; Kol. 1:11) Pero kiko awor si bo haña bo ku oposishon? Konfia kompletamente den Yehova i no tene miedu. Yehova semper lo yuda bo i fortalesé bo.—Heb. 13:6.

NAN TA YUDA TENE E KONGREGASHON LIMPI

13. Ki asignashon spesial e angelnan tin durante e último dianan? (Mateo 13:​47-49)

¹³ Durante e último dianan, Yehova a duna e angelnan un asignashon spesial. (Lesa Mateo 13:​47-49.) E trabou di prediká ta atraé miónes di hende na e bèrdat. Tin algun di nan ku ta dal pasonan pa bira berdadero kristian, pero tin otro sí nò. E angelnan tin e trabou di “separá e malbadonan for di e hustunan.” Esei ke men ku nan tin e asignashon pa yuda tene e kongregashon limpi. Ma esei no ke men ku esnan ku a stòp di bai reunion nunka mas no por bolbe ni ku lo no tin problema den e kongregashon. Algu ku nos por ta sigur di dje ta ku e angelnan ta traha duru pa yuda tene e kongregashonnan limpi.

14-15. Kon nos por demostrá ku nos tambe ta deseá pa yuda tene e kongregashon limpi? (Wak e plachinan.)

¹⁴ Kon nos por demostrá interes den tene e kongregashon limpi meskos ku e angelnan? Esei ta di hasi tur nos esfuerso pa protehá nos amistat ku Yehova. Nos por hasi esei dor di skohe amigunan ku ta stim’é i dor di keda leu for di kualke kos ku ta daña nos amistat ku Yehova. (Sal. 101:3) Ademas, nos por yuda nos rumannan keda fiel na Yehova. Por ehèmpel, ban bisa ku nos a haña sa ku un ruman a kometé un piká serio. Komo ku nos stim’é, nos lo anim’é pa e bai papia ku e ansianonan. Si e no hasié, e ora ei nos mes lo bisa e ansianonan loke nos sa. Nos ke pa kualke ruman ku mester di yudansa spiritual haña esei mas lihé posibel.—Sant. 5:​14, 15.

¹⁵ Lamentablemente, algun ku ta kometé pikánan serio ta ser saká for di e kongregashon. Den kaso asina, nos ta “stòp di anda” ku nan.d (1 Kor. 5:​9-13) E areglo akí ta yuda tene e kongregashon limpi. Es mas, ora nos no anda ku esnan ku a ser saká for di e kongregashon, nos ta mustrando nan ku nos stima nan. Ademas, ora nos no anda ku nan i obedesé Yehova, esei por yuda nan realisá ku nan tin ku bolbe serka Yehova. I si nan hasi esei, nos ta alegrá huntu ku Yehova i su angelnan.—Luk. 15:7.

16. Den ki maneranan abo lo ke hasi esfuerso pa hasi meskos ku e angelnan?

¹⁶ Ta un bunita privilegio ku Yehova ta permití nos siña di e angelnan i traha huntu ku nan. P’esei laga nos demostrá nan bunita kualidatnan: humildat, amor pa hende, perseveransia i interes den tene e kongregashon limpi. Si nos hasi meskos ku e angelnan fiel, nos tambe lo por forma parti di Yehova su famia di adoradónan pa tur eternidat.