Konmemorá e Reskate ku Gratitut
1 Rònt mundu, kristiannan ta bai obedesé Hesukristu su mandamentu pa konmemorá su morto riba djasabra 22 di mart 2008, despues ku solo baha. (Luk. 22:19; 1 Kor. 11:23-26) Nos ta konmemor’é pa motibu ku nos ta sinti un gratitut profundo pa tur loke a ser lográ riba e fecha ei 1.975 aña pasá. Loke Hesus a logra dor di mantené su integridat den un forma perfekto ora el a ser torturá i matá na un staka di tormento ta lo siguiente: Santifiká e nòmber di su Tata i duna e mihó kontesta posibel na e mofanan di Satanas.—Jòb 1:11; Pro. 27:11.
2 Dor di Hesus su sanger dramá, e aliansa nobo a drenta na vigor; i a bira posibel pa hende imperfekto ser adoptá komo yunan di Dios ku e perspektiva di goberná ku Kristu den su Reino selestial. (Jer. 31:31-34; Mar. 14:24) Ademas manera Hesus mes a splika Nikodemo, nos por mira Dios su amor profundo pa humanidat bon kla ora el a duna su Yu stimá komo sakrifisio.—Juan 3:16.
3 Invitá Otro Hende: E edishon di Nos Ministerio di Reino di yanüari a sugerí pa traha un lista di konosínan i pa invitá nan personalmente. Bo a kuminsá invitá esnan ku ta riba bo lista? Bo ta preparando pa partisipá plenamente den e kampaña, ku lo kuminsá 1 di mart, pa invitá hende pa Memorial? Esnan ku asistí lo tende informashon bíbliko ku por edifiká nan fe den e reskate, lokual na su turno lo hiba na bida eterno.—Rom. 10:17.
4 Ta bon pa nos plania pa yega trempan pa ekstendé un kaluroso bonbiní na tur esnan ku aseptá e invitashon spesial. Ya ku hopi hende lo asistí na Memorial, ta masha importante pa nos mustra atenshon spesial tantu na hende ku bin pa promé biaha komo na esnan ku sa asistí na reunion de bes en kuando.
5 Prepará Bo Kurashon: Eksaminando e Skritura Diariamente—2008 i e Kalènder 2008 tin un programa di lesamentu di Beibel spesial pa e temporada di Memorial, ku ta kuminsá dia 17 di mart. Dor di konsiderá e susesonan importante ku a tuma lugá durante e último dianan di Hesus su bida riba tera, lo bo por prepará bo kurason pa e selebrashon di Memorial. (Esd. 7:10) Ora bo meditá ku orashon riba e relatonan bíbliko aki, bo gratitut pa e amor ku Yehova i su Yu a demostrá mediante e reskate lo bira mas profundo.—Sal. 143:5.
6 Segun ku Memorial ta aserká, laga nos prepará nos mes bon, i yuda otro hende prepará pa e okashon importante aki. Ora nos konmemorá e reskate ku gratitut, nos relashon ku Yehova i su Yu lo bira mas fuerte. (2 Kor. 5:14, 15) Tambe, nos lo sinti nos konmoví pa imitá nan den mustra amor di sakrifisio propio na otro hende.—1 Juan 4:11.
[Study Questions]
1, 2. Ki motibunan nos tin pa konmemorá e reskate ku gratitut?
3. Kon esnan ku asistí na Memorial lo benefisiá?
4. Dikon ta bon pa nos yega trempan na Memorial?
5. Kon bo por prepará bo kurason pa e okashon aki?
6. Kon nos lo benefisiá si nos hasi esfuerso pa oumentá nos gratitut pa e reskate?