Oktooba

Es die daut eenjemol schwoa to jehorchen? Fa dän Kjennich David wia daut, un doawäajen bäd hee: “Jeff mie eenen Jeist, dee die jehorchen well” (Psa. 51:14). David leewd Jehowa. Oba am wia daut doawäajen eenjemol schwoa to jehorchen, un veleicht jeit ons daut uk soo. Wuarom es daut soo? Na, wie haben ieeschtens aula soone Natua, waut jeweenlich jäajenaun es. Un tweedens prooft de Fient ons dän Tiet äwa bat doa to brinjen, daut wie ons jäajen Jehowa stalen, soo aus hee selfst deed (2. Kor. 11:3). Un dreddens läw wie en eene Welt, wua de mieeschte sikj jeweenlich jäajenaun stalen, wiels dee haben “dän Jeist, waut nu en de ojjehuarsome Menschen wirkjt” (Efs. 2:2). Wie motten ons sea aunstrenjen un jäajen onse Onvolkomenheit schaufen un dän Druck von dän Fient un von dise Welt wadastonen, om Jehowa to jehorchen un uk dee, waut hee äwa ons aunjestalt haft. w23.10 6 V. 1

Waut kjenn wie von Jesus sien Wunda lieren, daut hee Wota to Wien muak? Wie lieren, daut hee deemootich wia. Jesus pucht nich met siene Wunda, un hee pucht uk kjeenmol met irjentwaut, waut hee deed. Hee jeef emma sienen Voda aule Iea (Joh. 5:19, 30; 8:28). Wan wie Jesus nodoonen, dan woa wie nich too väl von ons selfst hoolen un wie woaren uk nich met daut puchen, waut wie aules jedonen kjrieen. Wie wellen ons leewa brow doonen, daut wie Gott deenen kjennen (Jer. 9:22-23). Well wie dän de Iea jäwen, dän de Iea traft, wiels waut wudd wie onen siene Help volbrinjen kjennen? (1. Kor. 1:26-31). Wan wie waut fa aundre doonen un nich Iea velangen, dan wies wie, daut wie deemootich sent. Wie weeten, daut Jehowa daut väl räakjent, wan wie waut fa aundre doonen, un daut moakt ons sea tofräd (see uk Matäus 6:2-4; Heb. 13:16). Jehowa freit sikj sea äwa ons, wan wie Jesus siene Deemoot nodoonen (1. Pet. 5:6). w23.04 4 V. 9; 5 V. 11-12

De Apostel Paulus rod de Christen enne Schreft too, no daut to kjikjen, waut de aundre intressieet. Woo kjenn wie disen Rot enne Vesaumlunk nokomen? Wan wie doaraun denkjen, daut de aundre uk wellen metmoaken. Denkj mol äwa dit no: Wan du met diene Frind vetalst, wurscht dan bloos du dän Tiet äwa räden un dee nich eemol waut sajen loten? Secha nich! Du west je die met dee unjahoolen. Krakjt soo es daut uk bie de Toopkomes. Wie wellen, daut soo väl aus mäajlich de Jeläajenheit kjrieen, eene Auntwuat to jäwen. Daut es mau rajcht eent von de baste Wajch, onse Breeda un Sestren Moot to moaken, wan wie dee loten äwa äaren Gloowen räden (1. Kor. 10:24). Doo korte Auntwuaten jäwen. Soo woaren uk noch aundre kjennen auntwuaten. Uk wan du eene korte Auntwuat jefst, proow nich, äwa too väl Sachen to räden. Wan du aules von eenen Varsch sajchst, dan blift doa nuscht mea fa aundre to sajen. w23.04 22-23 V. 11-13

Wie motten em Denkj hoolen, woo wichtich daut es, daut wie wieda aundre uthalpen, besonda derch dän Prädichtdeenst. Wie motten ons aunpaussen kjennen, wan wie prädjen gonen. Wie bejäajnen soo väl veschiedne Menschen, waut gaunz aundasch sent un aundasch oppjetrocken sent aus wie. Wie kjennen väl von dän Apostel Paulus lieren, waut sikj sea goot aunpaussen kunn. Jesus stald am aus “een Apostel … fa de aundre Sorten Menschen” aun (Reem. 11:13). Bie dise Oppgow prädijd Paulus to Juden, Griechen, huach Utjelieede, deemootje Foarma, Rejierungsmenschen un Kjennichs. Daut hee aul dise veschiedne Menschen kunn to Hoaten räden, wort Paulus “to aules … fa aule Sorten Menschen” (1. Kor. 9:19-22). Paulus docht sea doaräwa no, von wua de Menschen staumden, waut dee jelieet hauden un aun waut dee jleewden. Doaderch kunn hee sikj em Prädichtdeenst aunpaussen. Wie kjennen uk bätre Liera woaren, wan wie ons aunpaussen un proowen, eenen jiedrem soo goot aus mäajlich to halpen. w23.07 23 V. 11-12

Leeftolich sennen es nich eene Schwakheit, oba eene stoakje Sied. Daut brukt Krauft, ruich to bliewen, wan wie en eene schwoare Loag sent. Leeftolich sennen es Poat von “dän Jeist siene Frucht” (Gal. 5:22-23). Daut griechische Wuat fa “leeftolich sennen” wort eenjemol uk jebrukt fa een willet Pieet, waut mak jemoakt wort. Denkj mol aun een willet Pieet, waut mak jeworden es: Daut es mak, oba doawäajen noch stoakj. Woo kjenn wie aus Menschen noch leeftolja woaren un doabie oba stoakj sennen? Daut kjenn wie nich ut ons selfst. Wie motten Jehowa om sienen Jeist bäden un am no Help froagen. Väle haben daut aul jelieet, leeftolich to sennen. Een deel Breeda haben äare Jäajna kunt leeftolich auntwuaten un daut wia een goodet Zeichnis fa aul dee, waut tookjikjten (2. Tim. 2:24-25). w23.09 14 V. 3

En eene besondre Vision sach de Apostel Johanes 24 Eltestasch em Himmel, waut Jehowa aunbäden deeden. Dee lowden Gott un säden, daut bloos am aule “Harlichkjeit un Iea un Krauft” troff (Opb. 4:10-11). Mau rajcht de true Enjel haben sea väl Uasoak, Jehowa to lowen un to preisen. Wäajen dee met am toop em Himmel sent, haben dee am goot kjanen jelieet. Dee seenen aul daut, waut Jehowa deit, un lieren emma mea doaräwa, woo Jehowa es. Wäajen see beoobachten kjennen, woo goot hee aules deit, wellen see am preisen (Hiob 38:4-7). Wie kjennen Jehowa en onse Jebäda uk lowen un am sajen, waut wie von am jleichen un schazen. Wan du de Bibel läsen un studieren deist, dan proow, soone Ieejenschoften von Jehowa to finjen, waut die sea to Hoaten gonen (Hiob 37:23; Reem. 11:33). Un dan saj Jehowa daut, woo du äwa dise Ieejenschoften denkjst. Wie kjennen Jehowa uk doafäa lowen, daut hee sikj soo sea om de jeistelje Famielje oppe gaunze Welt kjemmat (1. Sam. 2:1-2). w23.05 3-4 V. 6-7

Aune 1919 muaken Gott siene Deena sikj von daut Groote Babel loos. En daut Joa wort “de trua un väabedochta Sklow” aunjestalt, un soo kunnen opprechtje Menschen aunfangen, opp dän “heiljen Wajch” to gonen (Mat. 24:45-47; Jes. 35:8). Wäajen de heilja Wajch aul Joaren ea soo fein wia reedjemoakt worden, wia dee daut dan väl leichta, mea äwa Jehowa un sien Väanämen to lieren (Spr. 4:18). Dee kunnen dan uk aunfangen, soon Läwen to fieren, waut Jehowa gootheet. Oba Jehowa velangd von siene Deena nich, daut dee aules opp eemol sullen endren. Enne Städ daut holp hee äant, daut eent nom aundren to doonen. Woo scheen woat daut nich sennen, wan wie ieescht bloos noch soont doonen woaren, waut Gott jefelt! Aun jieda Wajch mott pinkjlich jeschauft woaren. Un krakjt soo wort uk vonne 1919 aun emma wada aun “dän heiljen Wajch” jeschauft, soo daut mea Menschen von daut Groote Babel veloten kunnen. w23.05 17 V. 15; 19 V. 16

De Väastaunt haft selfst Breeda utjelieet, waut aul en veschiedne Kommitees vom Väastaunt deenen, daut dee äant halpen kjennen. Dise Helpa haben nu aul väl Veauntwuatungen en de Organisazion. Dee sent fein utjelieet toom sikj wieda om Gott siene Deena kjemren, wan de Jesaulwde ieescht nom Himmel jenomen sent. Wan de latste von de Jesaulwde nom Himmel jenomen woaren, aum Enj von de groote Liedenstiet, woat Jesus Christus Gott siene Deena oppe Ieed wieda halpen, daut see Jehowa tru deenen kjennen. Wie weeten, daut de Velkja, waut sikj toopstonen woaren, en dise Tiet Gott siene Deena aunjriepen woaren. Dise Velkja nant de Bibel Gog von Magog (Hes. 38:18-20). Oba dee woaren Gott siene Deena doa nich von aufhoolen kjennen, Jehowa wieda to deenen. Hee woat äant secha raden! De Apostel Johanes sach en eene Wision “eene Häad, dee kjeena talen kunn”. Dit sent Jesus siene aundre Schop, “dee ut de groote Vefoljunk jekomen sent” (Opb. 7:9, 14). Doawäajen weet wie daut neiw, daut Gott siene Deena raden woat! w24.02 5-6 V. 13-14

Woo kjenn wie dän heiljen Jeist kjrieen? Wan wie doarom bäden, Gott sien Wuat studieren un am met sien Volkj toop deenen, waut hee derch sienen Jeist aunleiden deit. Wan wie daut doonen, dan woa wie “dän Jeist siene Frucht” emma bäta wiesen kjennen (Gal. 5:22-23). Gott jeft bloos dee sienen Jeist, waut reine Jedanken fieren un daut Rajchte doonen. Soone, waut orreine Jedanken haben un uk doano haundlen, woat hee sienen Jeist nich jäwen (1. Tes. 4:7-8). Daut wie wieda Gott sienen Jeist haben kjennen, mott wie uk opp “de Profezeiungen” achten (1. Tes. 5:20). “Profezeiungen” meent hia soont, waut von Gott sienen Jeist kjemt, soo aus wan daut von Jehowa sienen Dach rät ooda doavon, en waut vonne Tiet wie läwen. Wan wie aun Harmagedon denkjen, dan well wie nich jleewen, daut wie daut aulmols nich beläwen woaren. Wie wellen daut kloa haben, daut daut boolt komen woat, un ons drock hoolen met Goodet doonen (2. Pet. 3:11-12). w23.06 12 V. 13-14

Waut kjenn wie doonen, wan doa met eenst wua schwiensche Bilda oppkomen? Dan mott wie fuaz wajchkjikjen. Waut kaun ons doabie halpen? Wie motten doaraun denkjen, daut Frind sennen met Jehowa daut gaunz Wieetvolste es. Oba daut jeft uk Bilda, waut se em Auljemeenen nich fa schwiensch talen, von dee wie oba veleicht orreine Jedanken kjrieen. Dan mott wie von soont uk wajchbliewen, wiels wie ons nich mol en onse Jedanken met Orreinet aufjäwen wellen (Mat. 5:28-29). Een Eltesta en Tailaunt, waut David heet, sajcht: “Ekj denkj emma äwa dit no: ‘Wudd Jehowa sikj freien, wan ekj mie soont emma wada besee, wan daut uk nich schwiensche Bilda sent?’ Un daut halpt mie dan, goode Entscheidungen to moaken.” Wan wie ons ferchten, Jehowa truarich to moaken, dan woa wie ons kluak oppstalen. Gottesforcht es de Gruntloag fa Weisheit. w23.06 23 V. 12-13

Met de “Bennastowen” kjennen onse Vesaumlungen jemeent sennen. En de groote Liedenstiet woat Jehowa ons beschitzen, wan wie ons wieda enj met onse Breeda toophoolen. Doawäajen es daut needich, daut wie nu sea doaraun schaufen, onse Breeda un Sestren to leewen un nich dee bloos uttohoolen. Daut kaun mau rajcht doamet to doonen haben, aus wie äwaläwen! “De groota Dach fa däm HARN” woat eene schwoare Tiet sennen fa de Menschen (Zef. 1:14-15). Jehowa siene Deena woaren doa uk unja lieden motten. Oba wan wie ons nu aul reedmoaken, dan woa wie kjennen ruich bliewen un aundre halpen. Wie woaren bie aul onse Trubbels staunthauft bliewen kjennen. Un wan onse Breeda woaren lieden motten, woa wie ons Bastet doonen, om dee bietostonen, doaderch daut wie dee Metjefeel wiesen un uthalpen. Wie woaren met onse Breeda un Sestren toophoolen, wiels wie daut nu aul jelieet haben, dee to leewen. Jehowa woat ons met daut eewje Läwen en de niee Welt beloonen, wua kjeena mea woat aun een Owwada ooda aun Lieden denkjen (Jes. 65:17). w23.07 7 V. 16-17

En Gott sien Wuat läs wie foaken von true Mana, waut väl Krauft hauden. Oba mau rajcht de Stoakjste mank dee feelden sikj lang nich emma stoakj. De Kjennich David feeld sikj biejlikj en Stekjen “soo stoakj aus een Boajch”, oba dan wia am bieaun uk wada angst (Psa. 30:7). Derch Gott sienen heiljen Jeist wia Simson butajeweenlich stoakj. Oba Simson wist, daut hee onen de Krauft, waut von Gott kjeem, “nuscht stoakja [wia] aus aule aundre Menschen” (Rech. 14:5-6; 16:17). Dise true Mana wieren stoakj, wäajens Jehowa äant Krauft jeef. De Apostel Paulus stunt daut uk too, daut am daut aun Jehowa siene Krauft fäld (2. Kor. 12:9-10). Hee haud Trubbels met de Jesuntheit (Gal. 4:13-14). Bieaun wia am daut schwoa, daut Rajchte to doonen (Reem. 7:18-19). Un eenjemol haud hee Sorjen un Angst, waut met am woaren wudd (2. Kor. 1:8-9). Oba aus Paulus schwak wia, wort hee stoakj. Woo schauft daut? Daut wia Jehowa, waut am dee Krauft jeef, waut am fäld. Soo, Jehowa muak Paulus stoakj. w23.10 12 V. 1-2

Wan wie ons eenjemol mootloos feelen, dan kjenn wie doaraun denkjen, daut Jehowa selfst ons no sikj jetrocken haft (Joh. 6:44). Hee sitt daut Goode en ons, waut wie selfst veleicht nich seenen, un hee kjant ons Hoat (1. Sam. 16:7; 2. Chr. 6:30). Doawäajen kjenn wie ons gaunz opp am veloten, wan hee sajcht, daut wie bie am väl wieet sent (1. Joh. 3:19-20). Eenje haben veleicht waut jedonen, ea dee de Woarheit kjanen lieeden, wua see sikj noch emma äwa schuldich feelen (1. Pet. 4:3). Mau rajcht eenje, waut Jehowa aul lang tru deenen, haben noch emma jäajen schlajchte Wenschen to kjamfen. Feelst du die eenjemol soo, daut Jehowa die nich vejäwen woat? Wan jo, dan kaun die daut treesten, daut Jehowa siene true Deena sikj ieeschtemma krakjt soo feelden. Biejlikj de Apostel Paulus feeld sikj sea schlajcht, wan hee äwa siene Onvolkomenheit nodocht (Reem. 7:24). Paulus haud een Leetsennen äwa siene Sinden un leet sikj deepen. Oba hee säd von sikj selfst: “Ekj sie de Läachsta von de Apostel” un “de oajchsta” Sinda (1. Kor. 15:9; 1. Tim. 1:15). w24.03 27 V. 5-6

Von dän Kjennich Joasch siene schlajchte Entscheidunk lia wie, daut wie ons motten goode Frind sieekjen, waut ons halpen, daut Rajchte to doonen, soone, waut Jehowa leewen un am schaftich moaken wellen. Wie kjennen Frind haben, waut ella ooda jinja sent aus wie. Denkj doaraun, daut Joasch väl jinja wia aus sien Frint Jojada. Wan du die Frind wälst, dan denkj mol äwa dit no: “Halpen dee mie, eenen stoakjren Gloowen to kjrieen? Halpen dee mie, no Gott siene Jebooten to läwen? Räden dee äwa Jehowa un äwa de Woarheit? Wiesen dee, daut dee Gott siene Jebooten achten? Sajen dee mie bloos daut, waut ekj hieren well, ooda sajen dee mie uk, wan ekj waut orrajcht doo?” (Spr. 27:5-6, 17). Wan du Frind hast, waut Jehowa nich leewen, dan brukst du dee rajcht jesajcht nich. Oba wan du Frind hast, waut Jehowa leewen, dan hool die faust aun dee, wiels dee woaren die toom Gooden sennen (Spr. 13:20). w23.09 9 V. 6-7

Daut griechische Aubeetsee fangt met de Lata Alfa aun un hieet met Omega opp. Aus Jehowa daut säd, daut hee daut Alfa un daut Omega wia, wees hee doamet, daut hee eene Sach foadich moakt, wan hee dee aunfangt. Jehowa säd to Adam un Eva: “Mucht jie Kjinja haben un junt äwa de gaunze Ieed vemieren, un äwa de Ieed rejieren” (1. Mo. 1:28). Aus Jehowa daut ieeschte Mol säd, waut hee sikj väajenomen haud, säd hee soo to sajen “Alfa”. Wan de Ieed ieescht woat veendat woaren to een Paradies un Adam un Eva äare volkomne Nokomen doabowen läwen woaren, woat sikj sien Väanämen erfelt haben. Dan woat Jehowa soo to sajen “Omega” sajen kjennen. Jehowa jeef eene Garantie, aus hee dän “Himmel un de Ieed, un aul daut Läwen waut em Himmel un oppe Ieed es” jemoakt haud. Hee jeef ons de Garantie, daut sien Väanämen sikj aum Enj von dän säwenden Dach woat gaunz erfelt haben (1. Mo. 2:1-3). w23.11 5 V. 13-14

De schwoare Reis von Babel trigj no Israel kunn rom vea Moonat dieren. Oba Jehowa vespruak, daut doa nuscht sennen wudd, waut äant stieren wudd. De true Juden dochten mea aun de Säajnungen, waut see wudden en Israel kjrieen, aus aun daut, waut see veleicht wudden trigjloten. De jratsta Säajen haud met äare Aunbädunk to doonen. En Babel jeef daut nich eenen eensjen Tempel fa Jehowa. Daut jeef doa uk nich eenen Aultoa, wua de Israeliten kunnen soone Opfa moaken, aus Moses sien Jesaz daut velangd. Un doa wieren uk nich Priestasch aunjestalt fa soone Opfa. Buta daut jeef daut doa väl mea Menschen, waut faulsche Jetta deenden un nuscht om Jehowa siene Jesazen romjeewen, aus soone, waut Jehowa deenden. Doawäajen freiden sikj dusende Juden, waut Jehowa leewden, daut see kunnen trigj no äa Launt reisen un doa Jehowa wada soo aunbäden, aus hee daut velangd. w23.05 14-15 V. 3-4

Wie brucken de Help von Gott sienen heiljen Jeist, daut wie wieda soo läwen kjennen “aus Kjinja von daut Licht”. Wuarom? Wiels daut es nich leicht, rein to bliewen en eene Welt, waut voll Huararie es (1. Tes. 4:3-5, 7-8). De heilja Jeist kaun ons uk halpen, nich soo to denkjen aus de Menschen enne Welt, waut de Sachen nich soo seenen, aus Jehowa deit. De heilja Jeist kaun ons uk halpen, “en aule Stekjen leeftolich … [un] jerajcht to sennen” (Efs. 5:9). Om Gott sienen heiljen Jeist to kjrieen, mott wie doarom bäden. Jesus säd, Jehowa woat “dee dän heiljen Jeist jäwen, dee am doano froagen” (Luk. 11:13). Wan wie aus Christen Jehowa en de Toopkomes lowen, kjrie wie uk dän heiljen Jeist (Efs. 5:19-20). Gott sien heilja Jeist woat ons halpen, soon Läwen to fieren, waut am jefelt. w24.03 23-24 V. 13-15

Fält die daut aun Jedult? Dan bäd om mea Jedult. De Jedult jehieet to dän heiljen Jeist siene Frucht (Gal. 5:22-23). Wie kjennen Jehowa no heiljen Jeist froagen un uk no Help, daut wie kjennen dise Ieejenschoften verendach brinjen. Wan onse Jedult oppe Proow jestalt woat, mott wie fa wieda no heiljen Jeist froagen, daut wie kjennen jeduldich bliewen (Luk. 11:13). Wie kjennen Jehowa uk doano froagen, aus hee ons well halpen, aun de Sachen soo nauntokjikjen, aus hee deit. Un wan wie ieescht jebät haben, mott wie ons uk aunstrenjen, jieda Dach jeduldich to sennen. Je mea wie om Jedult bäden un ons aunstrenjen, je ea woa wie opp iernst jeduldje Menschen woaren. Denkj uk äwa Biespels ut de Schreft no. Enne Schreft finj wie een deel Jeschichten von Menschen, waut jeduldich wieren. Wan wie doaräwa nodenkjen, kjenn wie lieren, woo wie kjennen jeduldich sennen. w23.08 22 V. 10-11

Jesus vesechad dän Apostel Petrus, daut Jehowa am aules jäwen wudd, waut am fäld. Nodäm Jesus vom Doot oppjestonen wia, holp hee Petrus un de aundre Apostel wada derch een Wunda, een deel Fesch to kjrieen (Joh. 21:4-6). Derch dit Wunda woat Petrus daut secha sennen dietlich jeworden, daut daut fa Jehowa kjeene groote Sach wia, am emma daut Needje to jäwen. Veleicht haft de Apostel doaraun jedocht, waut Jesus mol säd, daut Jehowa deejanje emma daut Needje jäwen wudd, waut “daut Ieeschte no Gott sien Kjennichrikj” sochten (Mat. 6:33). Doawäajen stald Petrus dän Prädichtdeenst aun de ieeschte Städ en sien Läwen un nich daut Feschen. Aum Pinjsten 33 n. Chr. deed Petrus sea äwanäment prädjen un holp Dusende, de goode Norecht auntonämen (Apj. 2:14, 37-41). Lota lieed hee de Samarita un de Nichjuden äwa Jesus un holp äant, am notofoljen (Apj. 8:14-17; 10:44-48). Daut es kloa, daut Jehowa Petrus opp eene besondre Wajch brukt, om veschiedne Sorten Menschen to halpen, en de Christenvesaumlunk nenntokomen. w23.09 20 V. 1; 23 V. 11

Rom twee Joa nodäm aus de Babelonia Jerusalem venicht hauden, haud de Kjennich Nebukadnezar eenen Droom von een grootet Stauntbilt. Dis Droom gruld am sea. Hee wull aule weise Mana dootmoaken, wua uk Daniel met en wia, wan dee am nich wudden kjennen sajen, waut am jedreemt haud un waut dee bedied (Dan. 2:3-5). Daniel must sea bosich waut doonen, wiels wan nich, wudden väle stoawen motten. Dan “jinkj Daniel direkjt nom Kjennich nenn, un kunn am beräden, daut hee wudd Tiet jäwen, soo daut Daniel am dän Droom utlajen kunn” (Dan. 2:16). Daut bewees, daut Daniel äwanäment wia un Gloowen haud. Doa es noanich jeschräwen, daut Daniel aul ea mol Dreem utjelajcht haud. Hee fruach siene Poatna, aus dee kunnen to “däm Gott em Himmel bäden fa Jnod, daut hee daut Jeheemnis, woont de Kjennich wull opjedakjt haben, am wudd wiesen kjennen” (Dan. 2:18). Jehowa beauntwuad dee äare Jebäda, un met siene Help kunn Daniel Nebukadnezar sienen Droom utlajen. Doaderch worden Daniel un uk de aundre äare Läwes veschoont. w23.08 2 V. 4

Denkj doaräwa no, woo die daut kaun togood komen, wan du jeduldich best. Wan wie jeduldich sent, dan sent wie schaftja un uk ruja. Un daut halpt uk, daut wie jesunda sent un ons uk bäta feelen. Wan wie met aundre jeduldich sent, woa wie uk bäta met dee foadich woaren. En onse Vesaumlunk woaren sikj uk aule dolla veeent feelen. Un wan ons wäa prooft doll to moaken, kjenn wie daut väabieejen, daut daut nich schlemma woat, wan wie jeduldich bliewen (Psa. 37:8; Spr. 14:29). Oba daut Wichtichste es, daut wie soo onsen himlischen Voda nodoonen un am noch noda komen. Jedult es werkjlich eene scheene Ieejenschoft, waut ons aula togood kjemt! Veleicht es daut nich emma leicht, jeduldich to sennen, oba met Jehowa siene Help woa wie doa wieda kjennen aun schaufen. Un wäarent wie jeduldich no de niee Welt luaren, kjenn wie ons gaunz secha sennen, daut Jehowa “dee em Uag [helt], dee am ferchten, dee met siene truhoatje Leew räakjnen” (Psa. 33:18). Well wie ons aula faust väanämen, wieda doaraun to schaufen, jeduldich to sennen. w23.08 21 V. 7; 25 V. 16-17

Jakobus räd von eenen Maun, waut veleicht väajeef, daut dee Gloowen haud, oba dee daut nich met siene Woakjen bewees (Jak. 2:1-5, 9). Jakobus räd uk von wäm, waut sach, daut eenen “Brooda ooda eene Sesta nich auntotrakjen un to äten” haud, oba dee nich holp. Wan deejanja uk väajeef, daut hee Gloowen haud, wia daut oba aun siene Woakjen to seenen, daut et nich soo wia (Jak. 2:14-16). Jakobus räd von Rahab, waut een goodet Biespel doafäa wia, daut see Gloowen wees derch äare Woakjen (Jak. 2:25-26). See haud von Jehowa jehieet un see wist uk, daut Jehowa de Israeliten biestunt (Jos. 2:9-11). See wees äaren Gloowen derch Woakjen, aus see twee israelitische Spionen beschitzen deed, aus dee äa Läwen en Jefoa wia. Doawäajen wort dise Fru, waut nich volkomen wia un uk nich eene von de Israeliten wia, aus jerajcht jetalt, krakjt soo aus Abraham. Wie lieren von Rahab, daut et needich es, daut wie derch onse Woakjen Gloowen wiesen. w23.12 5 V. 12-13

Aus Christen sent wie nich tofräd doamet, bloos de eefache Lieren ut de Bibel to vestonen. Met de Help von Gott sienen heiljen Jeist well wie “mau rajcht Gott siene deepe Sachen” lieren (1. Kor. 2:9-10). Wuarom fang wie nich mol aun, fa ons perseenlich een Teema deep to studieren, waut ons Jehowa noda brinjen kaun? Du wurscht biejlikj waut doaräwa nosieekjen kjennen, woo Jehowa siene Deena ieeschtemma Leew wees un woo daut wiest, daut hee uk die leeft. Du wurscht uk kjennen waut doaräwa studieren, waut Jehowa von de Israeliten velangd, woo dee am deenen sullen, un woo sikj daut met vondoag dän Dach likjent. Ooda du wurscht kjennen Eenselheiten doaräwa studieren, woo sikj de Profezeiungen äwa Jesus erfelden, aus hee en sienen Deenst oppe Ieed wia. Du kaust soone Teemasch studieren met de Help von dän Index der Wachtturm-Publikationen ooda de Help toom nosieekjen fa Jehova siene Zeijen un daut woat die scheen gonen. Doaderch woat dien Gloowen stoakja woaren, un daut woat die halpen, de “Gotteserkjantnis [to] finjen” (Spr. 2:4-5). w23.10 18-19 V. 3-5

Dän Apostel Petrus sien Wuat fa “groote” meent werkjlich “utjerakjt”. Wie kjennen ons daut mol een bät soo aus dit väastalen: Wie nämen dise Leew en beid Henj, soo aus wan wie wudden een Biet Zeich haben, waut rakjt. Wie rakjen de Leew emma wieda ut, soo daut wie nich mau bloos een poa, oba “een deel Sinden” doamet toodakjen kjennen. Daut tweede Poat von dän Varsch beschrift een bät, waut dise Leew deit. Dee dakjt onse Breeda äare Sinden too. Toodakjen meent vejäwen. Krakjt soo aus eena irjenteene Plak met een Biet Zeich toodakjt, krakjt soo dakj wie de Schwakheiten un Onvolkomenheiten von aundre met Leew too. Onse Leew saul soo stoakj sennen, daut wie onse Breeda un Sestren äare Onvolkomenheiten vejäwen kjennen; mau rajcht, wan daut eenjemol uk sea schwoa es (Kol. 3:13). Oba wan wie aundre vejäwen, dan wies wie, daut onse Leew stoakj es un daut wie Jehowa jefaulen wellen. w23.11 11-12 V. 13-15

Aus Kjennich Josia ieescht een bät ella wia, funk hee aun, dän Tempel opptofiksen. Aus dee dise Oabeit deeden, fungen dee “daut Buak met däm HARN sien Jesaz, waut de HAR derch Moses jejäft haud.” Un aus hee hieed, waut daut doabennen säd, endad hee fuaz waut, om daut notokomen (2. Chr. 34:14, 19-21). Wurscht du jleichen, pinkjlich de Bibel to läsen? Un wan du daut aul deist, woo jeit die daut dan? Schrifst du die dee Varzhen opp, waut die kunnen halpen? Aus Josia rom 39 Joa wia, muak hee eenen Fäla, waut mau rajcht sien Läwen kost. Enne Städ daut hee Jehowa no Rot fruach, vetrud hee opp sikj selfst (2. Chr. 35:20-25). Waut kjenn wie doarut lieren? Krakjt endoont woo oolt wie sent ooda woo lang wie aul de Bibel studieet haben, wie motten Jehowa emma noda komen. Doa es met en, daut wie am pinkjlich no Rot froagen, sien Wuat studieren un uk no Rot horchen von erfoarne Christen. Wan wie daut doonen, dan woa wie nich soo leicht groote Fäla moaken un wie woaren schaftja sennen (Jak. 1:25). w23.09 12 V. 15-16

De Schreft rät von een deel feine Frues, waut Jehowa leewden un am deenden. Dee kunnen “sikj beharschen” un wieren “en aules tru” (1. Tim. 3:11). Enne Vesaumlungen kjennen de Sestren oba uk goode Biespels finjen von riepe, christelje Frues, waut see nodoonen kjennen. Junge Sesta, kjanst du soone Sestren, waut een feinet Biespel sent fa die? Kjikj no dee äare goode Ieejenschoften un dan denkj doaräwa no, woo du dee kaust nodoonen. Biejlikj deemootich sennen es sea wichtich fa riepe Christen. Wan eene Fru deemootich es, woat see een goodet Veheltnis haben met Jehowa un uk met aundre. Eene Fru, waut Jehowa leeft, nemt daut biejlikj deemootich aun, daut doa een Haupt äwa ar es, soo aus Jehowa daut enjerecht haft (1. Kor. 11:3). Un dit es besonda en de Vesaumlunk un enne Famielje soo. w23.12 18-19 V. 3-5

Jehowa well, daut een Ehemaun siene Fru leeft un fa ar em tieteljen un em jeisteljen sorcht un een gooda Frint es fa ar. Derchjedocht sennen, Frues respakjten un opp to veloten sennen woat die halpen, een gooda Ehemaun to sennen. Wan du die ieescht befriet hast, woascht du veleicht Kjinja haben. Jehowa es een sea gooda Voda un von am kjenn wie een deel lieren (Efs. 6:4). Jehowa säd gaunz op to sienen Sän Jesus, daut hee am sea leewd un tofräd wia met am (Mat. 3:17). Wan du Kjinja hast, dan saj dee foaken, daut du äant leefst. Low dee uk fa daut Goode, waut dee doonen. Soone Vodasch, waut sikj Jehowa aus Biespel nämen, halpen äare Kjinja, riepe Christen to woaren. Du kaust die nu aul fa dise Veauntwuatunk reedmoaken, wan du die leeftolich om diene Famielje, de Vesaumlunk un aundre kjemmascht. Lot dee daut weeten, daut du äant leefst un schazt (Joh. 15:9). w23.12 29 V. 17-18

Wan wie uk Jehowa siene true Deena sent, hab wie doawäajen Schwierichkjeiten un woaren uk krank, krakjt soo aus aule aundre Menschen. Wie haben veleicht uk Jäajenstaunt ooda Vefoljunk von soone, waut Gott siene Deena nich lieden kjennen. Wan Jehowa ons uk nich fa soone Schwierichkjeiten beschizt, vesprakjt hee ons oba to halpen (Jes. 41:10). Met siene Help kjenn wie onse Freid hoolen un goode Entscheidungen moaken un am uk tru bliewen, mau rajcht en de schwanste Loagen. Jehowa vesprakjt, daut hee ons woat “Gott sien Fräd” jäwen, wua de Bibel von rät (Filip. 4:6-7). Dis Fräd es de Ru, waut wie ennalich feelen, un dän hab wie bloos, wiels wie goode Frind met Jehowa sent. De Fräd, “waut wieda jeit, aus waut Menschen vestonen kjennen”, es väl scheena, aus waut wie ons väastalen kjennen. Hast du biejlikj mol von gaunzen Hoaten to Jehowa jebät un jewundat, woo ruich du die dan feelsd? Dit Jefeel es “Gott sien Fräd”. w24.01 20 V. 2; 21 V. 4

Dee, waut Gott leewen, lowen sienen Nomen von Hoaten. De Kjennich David kunn vestonen, daut wan wie Jehowa sienen Nomen lowen, dan low wie am selfst. Wan wie Jehowa sienen Nomen hieren, dan denkj wie aun siene goode Ieejenschoften un aun aul daut Goode, waut hee deit, un woo hee es. David wull sienen himlischen Voda sienen Nomen heilich hoolen un lowen. Hee wull daut met sien gaunzet Hoat doonen. Krakjt soo wia daut uk met de Leviten, waut een Väabilt doarenn wieren, Jehowa to lowen. Dee stunden deemootich too, daut see Jehowa sienen Nomen nich kunnen dee Iea jäwen, waut dän traft (Neh. 9:5). Jehowa muak daut secha froo, daut dee soo deemootich wieren un sienen Nomen von Hoaten lowden. w24.02 9 V. 6

Jehowa woat nich denkjen, daut du to nuscht to brucken best, wan du nich waut volbrinjen kaust, waut aulmols too väl fa die es (2. Kor. 8:12). Lia doavon, wan doa waut mankkjemt. Un denkj doaraun, waut du aul volbrocht hast. De Bibel sajcht: “Gott es nich ojjerajcht, daut hee june Woakjen … vejäten deit” (Heb. 6:10). Un du saust daut uk nich vejäten. Denkj doaräwa no, waut du aul aules volbrocht hast. Veleicht best du aul Jehowa sien Frint ooda du rätst aul to aundre von am ooda du hast die aul deepen loten. Krakjt soo aus du ea aul veraunjekomen best un daut volbrocht hast, waut du die em Jeisteljen väajenomen hautst, woascht du daut uk nu doonen kjennen. Met Jehowa siene Help kaust du daut volbrinjen, waut du die väajenomen hast. Proow aulsoo to seenen, woo Jehowa die halpen deit. Vejät uk nich, daut hee die emma halpen woat, Freid to haben, bat du daut volbrinjen kaust, waut du die väajenomen hast (2. Kor. 4:7). Wan du nich oppjäwen deist, woascht du lota noch väl mea Säajnungen haben (Gal. 6:9). w23.05 31 V. 16-18

Jehowa sieekjt no Mäajlichkjeiten, om siene Deena to wiesen, daut hee äant leeft un tofräd es met äant. En de Schreft säd Jehowa twee Mol to Jesus, daut hee sien leewa Sän wia un daut hee met am tofräd wia (Mat. 3:17; 17:5). Wurscht du daut jleichen, wan Jehowa mol to die säd, daut hee met die tofräd es? Jehowa woat ons daut nu nich von utem Himmel sajen, oba hee rät derch de Bibel to ons. Wan wie daut läsen, waut Jesus en de vea Evangelien säd, dan kjenn wie Jehowa siene Stemm hieren. Jesus deed sienen Voda krakjt no. Soo, wan wie daut läsen, daut Jesus to siene true Nofolja säd, daut hee met äant tofräd wia, wan dee uk onvolkomen wieren, kjenn wie ons daut väastalen, daut Jehowa dautselwje to ons sajcht (Joh. 15:9, 15). Wan wie Schwoaret beläwen, dan sell wie nich denkjen, daut Jehowa ontofräd met ons es. Enne Städ daut hab wie de Jeläajenheit to bewiesen, woo sea wie Gott leewen un woo sea wie opp am vetruen (Jak. 1:12). w24.03 28 V. 10-11